MUKANDA WA KUMUDILU WA PETELO

 

JS Robertson

 

Table des matières :

1        Mukanda wa kumudilu — Meyi a Kumpala

2        Mukanda wa kumudilu — Nshapita 1

3        Mukanda wa kumudilu — Nshapita 2

4        Mukanda wa kumudilu — Nshapita  3

5        Mukanda wa kumudilu — Nshapita 4

6        Mukanda wa kumudilu — Nshapita 5

MUKANDA MUIBIDI WA PETELO

7        Mukanda Muibidi — Meyi a kumpala

8        Mukanda Muibidi — Nshapita 1

9        Mukanda Muibidi — Nshapita 2

10     Mukanda Muibidi — Nshapita 3

 

 

1        Mukanda wa kumudilu — Meyi a Kumpala

     Petelo wakadi mupostolo, nangananga kudi Bena Yuda, Paulo wakadi mupostolo kudi bisamba bia bende (Galatia 2:7,8). Diambedi Petelo kayi muanji kupidia Mukelenge Yesu misangu isatu, Mukelenge wakamuambila ne, “Simona, Simona, mona, Satana wakalomba mua kunuangata bualu bua kunusengeye bu ntete; kadi nakukulombela wewe Nzambi bua ditabuja diebe kadipangi; wewe, pawakudimuka, ukoleshe mitshima ya bana benu” (Luka 22:31,32).

    Kunyima kua lufu ne dibika dia Mukelenge, Yeye wakamueneka kudi Petelo ne kudi bayidi bakuabo ku dishiba dia Tibelia. Butuku bukuabo, Petelo ne balunda bende bakaya kukuata minyinyi ya mu mayi. Butuku abu kabakuata tshintu. Pakafikabo ku mpata, bakamona makala a kapia akenka ne munyinyi wa mu mayi muteka pa kapia ne mutanda wa bidia. Mukelenge wakababikila, waka- bambila ne, “Luayi nudie”, wakabapesha mutanda wa bidia ne munyinyi. Pakashikijabo kudia, Yesu wakakonka Simona Petelo misangu isatu bualu bua dinanga diende bua bualu buende. “Mutshima wa Petelo wakanyingalala bua yeye wakamukonka tshiakasatu ne, Udi munsue, anyi? Wakamuambila ne, Mukelenge, wewe udi mumanye malu onso; wewe udi mumanye ne, Ndi mukusue. Yesu wakamuambila ne, Udishe mikoko yanyi”  (Yone 21:17). Mukelenge wakamana kumuambila ne, “Udishe bana banyi ba mikoko”.

 Petelo wakafundila bena Kilisto, bakadi Bena Yuda, bakadi batangalaka mu maloba a bungi. Bakuabo bakadi bakengeshibue bikole be bua ditabuja diabo, bakuabo bakadi bantu batekete mu ditabuja. Petelo, bu mulami muimpe wa mikoko, wakajinga bua kukolesha mitshima yabo bualu bua bupianyi buabo mu Kilisto, bua kubajadika mu ditabuja diabo ne bua kubalombola mu malu a Nzambi.

Petelo biende wakashala mulamate too ne ku lufu luende, muena mudimu wa kueyemena mene mene.

 

2        Mukanda wa kumudilu — Nshapita 1

Petelo, mupostolo wa Yesu Kilisto, kudi bantu basungudibue kudi Nzambi, badi benyi bena tshimuangi, ba mu Ponto, Gala-tia, Kapadokia, Asia ne mu Bitunia, badi basungudibue bu mudi budianjidi kumanya bua Nzambi Tatu mu kujidibua kua Nyuma Muimpe, bua kuikalabo ne ditumikila ne kumiamina kua mashi a Yesu Kilisto; ngasa kunudi ne ditalala bivulangane. 1,2

 Bapostolo bonso bakadi babikidibua kudi Mukelenge Yesu nkayende. Muaku “mupostolo” udi wamba bua “muntu mu-tumibua”. Buonso buabo bakatangila Mukelenge, Paulo kabidi! (Pakadi bakuabo belangana mpata bualu bua bupostolo bua Paulo yeye wakabambila ne, “Tshiena mupostolo, anyi? Tshiakutangila Yesu, Mukelenge wetu, anyi?” (1 Kolinto 9:1).

 Petelo udi umona bena kuitabuja bu benyi ne bena luendu pa buloba ebu, nzubu wabo udi mu Diulu. Bu Abalahama wa kale, badi batekemena “musoko udi ne bishimikidi, mulongolodi wawu ne muibaki wawu nNzambi” (Ebelu 11:10).

 Muena kuitabuja udi mua kuamba ne, Nzambi Tatu udi unsungula. Nyuma Muimpe udi wenza mudimu munda mua  mutshima wanyi, ndi mbikila Yesu Kilisto ne, “Mukelenge”,  ne mashi ende adi andengesha ku malu mabi anyi onso (Efeso 1:3,4. Lomo 10:9. 1 Yone 1:9).

 

Batumbishe Nzambi udi kabidi Tatu wa Mukelenge wetu Yesu Kilisto, nyeye wakatulela tshiakabidi bu mudi luse luende lunene, bua kutupeye ditekemena didi ne muoyo bua dibika dia Yesu Kilisto dia ku bafue; bua tuikale ne bupianyi budi kabuyi bubola, budi kabuyi bunyanguka, budi kabuyi bufubidila, buakutekibua mu diulu bua bualu buenu, nuenu mbadi bala- mibua ku bukole bua Nzambi bua ditabuja too ne ku lupandu lulongolola luabuluibua mu tshikondo tshia kunshikidilu. 1:3-5

 Mukelenge wakapa bonso bakamuitabuja bukole bua kuluabo bana ba Nzambi, bobo mene badi bitabuja dina diende; bakadi kabayi baledibue kudi  mashi,  anyi  kudi  disua  dia  mubidi, anyi kudi disungula dia muntu, kadi bakaledibua kudi Nzambi (Yone 1:12,13).

     Abalahama wakamanya Nzambi bu Nzambi wa Bukole Buonso. Bena Isalele bakamanya Nzambi bu Yehowa kadi bena Kilisto badi bamanye Nzambi bu Tatu (Genese 17:1. Dutelonome 18:13. Galatia 4:6). Kunyima kua dibika dia Mukelenge, Yeye wakambila Malia wa Magadala ne, “Ya kudi bana betu, ubambile ne, Ndi nya kulu kudi Tatu wanyi ne Tatu wenu, kudi Nzambi wanyi ne Nzambi wenu” (Yone 20:17).

    Tudi ne ditekemena didi ne muoyo bualu bua dibika dia Mukelenge Yesu munkatshi mua bafue. “Ditekemena ditudi nadi bu luongo lua muoyo wetu, didi dikuata bikole, didi dishindama” (Ebelu 6:19). Ditekemena dia bena kuitabuja kadiena bu di-tekemena dia ba pa buloba!

 Bantu ba Nzambi badi balamibua ku bukole bua Nzambi too ne badi babikidibue kua Mukelenge. Nyuma Muimpe wa Nzambi nkayende udi tshieya tshia bupianyi buabo (Efeso 1:13,14).

 

Bua muanda ewu nudi nutamba kusanka, nansha bikalaku bualu bua nuenu kunyingalajibua tshitupa tshipi mu mateta a mishindu ya bungi; bualu bua kuteta kua ditabuja dienu, nansha ditetshibua ne kapia, didi ditamba ngolo udi ujimina mushinga mukole, nekusanganyibue ne butumbi ne dineme-kibua ne buneme palua dibuluibua dia Yesu Kilisto. 1:6,7

    Nzambi udi uteta ditabuja dietu, udi musue bantu bende bashibue munda muende ne bajadikibua mu ditabuja diabo. Bidi nunku nebikale “bidikiji ba badi bapiana milayi bua ditabuja ne lutulu” (Ebelu 6:12).

    Diteta dia ditabuja didi dia mushinga mukole ku mesu kua Nzambi. “Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye nenuenzele njila wa kupandukila, bua nuenu numanye mua kutantamana mu diteta. Nunku, kanuyimashi dikima dienu, didi dinupingijila difutu dinene” (1 Kolinto 10:13. Ebelu 10:35).

 

Yeye,  unuakadi  kanuyi  batangile  ku  mesu,  nyeye  unudi nu-nanga; kadi nudi numuitabuja, kanuyi numutangila katataka, ne nudi nusanka bikole ne disanka didi kadiyi mua kuambibua ne didi diule tente ne butumbi; nudi nuangata nshikidilu wa ditabuja dienu, ndupandu lua mioyo yenu. 1:8,9

 Katuena banji kutangila Mukelenge Yesu, bu Petelo, kadi “Tudi bamanye ne, Biamueneshibueye, netuikale bafuanangane nende; bualu bua netumumone bu mudiye” (1 Yone 3:2). Bantu bende “nebamone mpala wende” (Buak. 22:4) ne ku makasa ende, bamutumbisha, bamba bu Paulo ne, “Muana wa Nzambi, waka- nnanga, wakadifila bua bualu buanyi” (Galatia 2:20).

 

Bua lupandu elu baprofete bakakeba ne bakalukesha bikole, bamba bua ngasa wakadi pa kulua kunudi; bakebakeba tshikondo kayi ne mushindu kayi wa tshikondo tshiakabaleja Nyuma wa Kilisto wakadi munda muabo, pakadianjileye kubambila bua makenga a Kilisto ne bua butumbi buakadi pa kualonda. 1:10,11

 Baprofete ba kale, pakafundabo bualu bua Mukelenge Yesu, bakadi balombodibua kudi Nyuma Muimpe. Bakafunda bualu bua makenga a Kilisto ne bua butumbi buakadi pa kulonda, bu mu Musambu nshapita 22 ne Yeshaya nshapita 53.

 Dituku dikuabo, pakadi bayidi babidi mu njila wa ku Emau, Mukelenge wakasemena nabo pabuipi, wakenda nabo, Mukelenge “wakabangila ku Mose ne ku baprofete bonso, wakabajinguluila malu akafundabo mu Mukanda wa Nzambi wonso bualu buende” (Luka 24:27).

 

Buakabuluibua kudibo, ne kabakadikuatshila, bobo bine, malu aa mudimu, kadi bakanukuatshilawu nuenu mudimu, malu mene akanumanyishabo katataka kudi bantu bakanuambila lumu luimpe mu Nyuma Muimpe wakanutuminabo mufume mu diulu; malu adi banjelo basue kutangilatangila. 1:12

Banjelo badi batangilatangila njila ya Nzambi mu luse ne mu ngasa  biakalejeye  kudi  bantu  ne mushindu wa lupandu luende lunene. Badi batangila bunene bua dinanga diende mu ditumibue dia Muana wende munanga bua kutuala tshilumbu tshietu ne bua kukenga ne kufua mu muaba wetu.

Banjelo badi batangila malu manene bualu bua Ekeleziya ne bu mudiye wa mushinga mukole kudi Yeye wakadifila bua bualu buende. Badi batumbisha Nzambi kadi katuena tubala ne badi bamanye mua kuimba “musambu mupia-mupia”, udi musambu wa bupikudi! (Buakabuluibua 5:9,10).

  Ku kuledibua kua Mukelenge mu Beteleheme tshisumbu tshia banjelo bakatumbisha Nzambi (Luka 2:13,14). Mu tshipela Satana wakateya Mukelenge bikole, Mukelenge wakamuipata ne meyi makese ku Mukanda wa Nzambi ne, “Bakafunda ne …”. Pashishe banjelo bakalua, bakadi bamukuatshisha ne biakadiye nabi bualu (Matayo 4:11). Pakadi Mukelenge unyingalala bikole be mu Getesemene, muanjelo wa mu diulu wakamueneka kudiye, wakamukolesha (Luka 22:43). Muanjelo wa Mukelenge waku-musha dibue dinene diakadi ku lukita luende, wakashikamapu (Matayo 28:2). Pakadiye mubandishibua mu diulu banjelo babidi bakambila bayidi bende ne, “Yesu ewu wakadi nenu … nealue kabidi bu munuakumumona ubanda mu diulu” (Bienzedi 1:10,11).

 

Nunku nuele bimono bia meji enu mikaya, nuikale talala, nujadike ditekemena dienu tshishiki mu ngasa udibo balua nende kunudi ku dibuluibua dia Yesu Kilisto. 1:13

 Paulo wakafundila Bena Filipoi bualu bua ditalala dia Nzambi, didi ditamba dijingulula dionso dia bantu, didi mua kulama mitshima ne meji etu mu Kilisto Yesu (Filipoi 4:6,7).

 Satana udi ufofomija meji a bantu bajimine (2 Kolinto 4:4). Muena Kilisto udi ne bua kuikala mudimuke kabidi. Bantu badi ne bilulu biabo biela mikaya badi bu bena luendu badi basue kuenda bimpe kayi ne mapumbisha mu njila (Ekesode 12:11).

 

Nuikale bana batumikidi, kanudifuanyikiji bu munuakadi mu nkuka yenu ya diambedi, mu bupote buenu; bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a muoyo wenu; bualu bua diyi didi difundibua ne, Nuenu nenuikale ba tshijila, bualu bua meme ndi wa tshijila. 1:14-16

      Bana ba Nzambi badi ne bua kuenda mu njila muimpe. Paulo wakafundila Bena Kolinto ne, “Kanuena bena mioyo yenu. Bualu bua nuakasumbibua ku mushinga mukole; nunku nutumbishe Nzambi mu mubidi wenu” (1 Kolinto 6:19,20). “Nunku, bu munudi bantu basungula kudi Nzambi, ba tshijila ne bananga, luatayi mutshima wa luse, ne wa dikuatshisha, ne wa kudipuekesha, ne wa kalolo, ne wa lutulu” (Kolosai 3:12). Tudi basue kusankisha Yeye wakadianjila kutunanga ne udi utubikila ne, Bana banyi bananga.

 

Binuamubikila bu Tatu udi ulumbuluisha muntu yonso bu mudi bienzedi biende kayi ne kansungunsungu, nupitshishe tshikondo tshia buenyi buenu mu ditshina. 1:17

  Muena kuitabuja yonso udi mumanye mua kubikila Nzambi ne, Tatu. “Tangilayi mushindu  wa  dinanga  diakutupa Tatu bua tuetu tubikidibue ne, Bana ba Nzambi; ne tudi nunku” (1 Yone 3:1). Kadi Diyi diende didi diamba kabidi ne, “Kanudidingi; Nzambi kena usekibua, bualu bua tshintu tshionso tshidi muntu ukuna, ntshiotshio tshiapuoleye. Katupangi mu kuenza kua malu mimpe; bualu bua palua tshikondo tshia kuapuola netuapuole bituikala katuyi tupanga” (Galatia 6:7,9).

  Bu benyi ne bena luendu pa buloba ebu, tudi ne bua kuenda kumpala kua Nzambi Tatu wetu ne kunemekela ne ditshina (Ebelu 11:13. 12:28,29). “Ditshina dia Yehowa ntshibangidilu tshia lunge- nyi. Kutshina Yehowa nkuikala ne malu mabi lukuna. Ditshina dia Yehowa didi dilombola muntu ku muoyo; udi nadi neashi- kame talalaa, dikenga kadiena dimukuata” (Nsum. 1:7. 8:13. 19:23).

 

Bualu bua nudi bamanye ne, Tuakapikudibua, kenku bintu bidi bijimina, ku argent anyi ku ngolo, mu malu a patupu a muoyo wenu akanushilabo kudi batatu benu; kadi nuakapikudibua  ku  mashi a mushinga mukole, bu a muana wa mukoko kayi ne tshilema ne kayi ne ditoba, ku mashi a Kilisto mene; waka- dianjila kumanyibua bulelela kumpala kua tshibangidilu tshia buloba, kadi wakamueneshibua kunshikidilu kua bikondo bua bualu buenu.  1:18-20

      Mushinga wa bupikudi buetu wakadi munene be. Tudi ne tshifuanyikiji tshimpe tshia bualu ebu mu lusumuinu lua dibue dia mushinga mukole. “Bukelenge bua mu diulu kabidi budi bu muntu udi biende muendi wa mushinga, udi ukeba mabue mimpe a mushinga mukole; pakasanganeye dibue dia mushinga mutambe bukole, wakaya, wakapana bintu biende bionso, wakadisumba” (Matayo 13:45). Mukelenge Yesu wakasua Ekeleziya, “Waka-difila bua bualu buende” (Efeso 5:25).

  Pakatua disalayi difuma mu lubadi lua Mukelenge yeye kakamanya ne, Mashi ne mayi biakapatuka ku lubadi luende biakadi bua dilengeja dietu. “Bikalaku kakuyi kumatshisha kua mashi panshi, kakuena kubuikidila kua mibi nansha” (Ebelu 9:22). Mashi adi atuambila bualu bua muoyo “bualu bua mashi adi bu muoyo wa tshintu” (Lewitiki 17:11).

 

Bua bualu buende nudi bena kuitabuja ba Nzambi, Nzambi wakamubisha ku bafue, wakamupa butumbi; bua ditabuja dienu ne ditekemena dienu bikale mu Nzambi. 1:21

 Ditekemena dia bena Kilisto kadiena mu malu mimpe abo, kadi mu Nzambi “wakabisha Yesu Mukelenge wetu ku bafue, wakafidibua ku lufu bua malu mabi etu, wakabishibua bua dibingishibua dietu” (Lomo 4:24).

 

Bualu bua nuenu nuakulengeja mitshima yenu mu kutumikila kuenu kua malu a bushuwa bua kuikala ne dinanga dia bana benu ba mu Kilisto didi kadiyi ne lubombo, nunku nu-nangangane mu mitshima yenu bikole. 1:22

  Mufundi wa Musambu 119 wakakonka ne, “Nsongalume nealengeje bienzedi biende munyi? Adimuke biende bu mudi diyi diebe diamba” (Musambu 119:9). Mukelenge Yesu wakambila bayidi bende ne, “Katataka nudi balengejibue bualu bua diyi dinakunuambila” (Yone 15:3). Kilisto wakadifila bualu bua Ekeleziya, “bua yeye amujidile, mumane kumulengeja ne kuvua kua mayi ne diyi diende” (Efeso 5:26).

  Petelo udi usengelela bena Kilisto bua kunangangana. “Mu muanda  ewu  mudi  dinanga,  kembua  tuetu  tuakunanga Nzambi, kadi bua yeye wakatunanga, wakatuma Muana wende bu mulambu  wa kubuikila nawu mibi yetu. Bananga, bikala Nzambi mutunange nunku, tuetu kabidi, butudi nabu mbua kunanga- ngana” (1 Yone 4:10,11).

 

Bualu bua nuakaledibua tshiakabidi, kenku bintu bidi bi-jimina, kadi ku bintu bidi kabiyi bijimina, ku diyi dia Nzambi didi ne muoyo ne didiku tshiendelele. 1:23

  Mukelenge Yesu wakambila Nikodemo, muyishi munene wa Isalele, ne “Bulelela, bulelela, ndi nkuambila ne, Bikala muntu kayi muledibue kudi mayi ne kudi Nyuma, yeye kena mumanye mua kubuela mu bukelenge bua Nzambi. Wakaledibua kudi mubidi udi mubidi; wakaledibua kudi Nyuma udi nyuma” (Yone 3:5,6). Mayi mu mvese ewu adi amba bualu bua Diyi dia Nzambi, kaena amba bua dibatiza bu mudi bakuabo bayisha (1 Kolinto 4:15. Yakobo 1:18. Efeso 5:26).

 

Bualu bua bakafunda ne, Ba pa buloba bonso badi bu bisosa, ne butumbi buabo buonso budi bu tshilongo tshia bisosa. Bisosa bidi bifubidila, ne tshilongo tshidi tshimata panshi; kadi diyi dia Mukelenge didiku tshiendelele. Edi ndiyi dia lumu luimpe diakanuambilabo.  1:24,25

  Malu onso, bualu bua ba pa buloba ne butumbi buabi, adi ashala anu tshitupa tshipi. “Buloba budi bujimina ne lukuka luabu kabidi; kadi yeye udi wenza mudi disua dia Nzambi udi ushalaku tshiendelele” (1 Yone 2:17). “Difutu dia bubi ndufu, kadi dipa dia luse dia Nzambi mmuoyo wa tshiendelele mu Kilisto Yesu Mukelenge wetu” (Lomo 6:23). Mukelenge Yesu wakatuangatshila “dipikula dia tshiendelele” ne tudi ne mulayi wende wa “bupianyi bua tshiendelele” (Ebelu 9:12,15). “Bupianyi budi kabuyi bubola, budi kabuyi bunyanguka, budi kabuyi bufubidila, buakutekibua mu diulu bua bualu buenu” (1 Petelo 1:4).

 

3        Mukanda wa kumudilu — Nshapita 2

Nunku panumusha malu mabi onso, ne kudinga kuonso, ne lubombo, ne mukawu, ne njianu yonso; bu bana balela kata-taka, nujinge mabele a meji adi kayi ne kudinga, bua nuenu nudiundeku too ne ku lupandu; binuikala balabule ne Mukelenge udi muimpe.  2:1-3

     Mukelenge “wakapa bonso bakamuitabuja bukole bua kuluabo bana ba Nzambi, bobo meme badi bitabuja dina diende” (Yone 1:12).

     Muana wa mu maboko budiye nabu mbua kuikala ne mabele bua kudiunda. Mabele a meji adi kayi ne kudinga, adi atuambila bualu bua Diyi dia Nzambi !  Bikala Diyi dia Nzambi bia kudia bietu bia buatshia-buatshia, netudiunde bu bena Kilisto.

     Malu a mubidi adi mua kupumbisha muena kuitabuja bua kudiunda mu malu a Nzambi. Paulo wakafundila Bena Kolinto ne, “Meme, bana betu, tshiakamanya mua kuakula nenu bu mundi ngakula kudi bantu badi balonda Nyuma, kadi anu bu kudi bantu badi balonda malu a mubidi, bu kudi bana batekete ba mu Kilisto. Nakanupa mabele a kunua, tshiakanupa bia kudia bikole; bua kanuakamanya mua kubidia, ne katataka mene kanuena mua kubidia; bualu bua nutshidi nulonda malu a mubidi” (1 Kolinto 3:1-3).

     Petelo udi musue bantu ba Nzambi bua kudiunda “too ne ku lupandu”, bua kuikale bantu bakole mu ditabuja. Mukanda wa Nzambi udi utuambila bualu bua lupandu mu mishindu mishi-langane:

 

Muena kuitabuja wakamana kupeta lupandu  - bupikudi

     Dituku dikuabo Mukelenge Yesu wakambila mukaji mubi, wakadi uleja kukudimuna kua mutshima kua bushuwa ku bienzedi biende, ne, “Mibi yebe yakujimijibua … ditabuja diebe diakuku-sungila, ya biebe talala” (Luka 7:48-50). Mukelenge wakamba ne, “Bulelela, bulelela, ndi nuambila ne, Umvua diyi dianyi, witabuja wakuntuma, udi ne muoyo wa tshiendelele, kena ulua ku tshi- lumbu, wakumuka mu lufu, wakubuela mu muoyo” (Yone 5:24).

 

Muena kuitabuja udi upeta lupandu katataka - ngasa

 Muena kuitabuja udi mua kuikala musungidibue ku dituku ku dituku ku tshilele ne bukokeshi bia malu mabi. Paulo wakafundila bena kuitabuja ba mu Lomo ne, “Bubi kabuena bunukokesha; bua kanuena muinshi mua mikenji, nudi muinshi mua ngasa” (Lomo 6:14). Pakadi Petelo mutetibue ne pepi ne kupanga, Mukelenge Yesu wakamuambila ne, “Nakukulombela wewe Nzambi bua ditabuja diebe kadipangi” (Luka 22:32). “Nunku yeye udi ne bukole bua kusungila ne lupandu lujima badi basemena pa buipi ne Nzambi bua bualu buende, yeye muikale ne muoyo tshiendelele bualu bua kubakuila” (Ebelu 7:25).

 

Muena kuitabuja neasungidibue butumbi

 Muena kuitabuja neikale musungidibue padiye ne mubidi wende mupia-mupia, mufuanangane ne Mukelenge wende. “Ba- nanga, katataka tudi bana ba Nzambi; kadi kabuena buanze kumanyibua mutuikala. Tudi bamanye ne, Biamueneshibueye, netuikale bafuanangane nende; bualu bua netumumone bu mu- diye” (1 Yone 3:2. Efeso 1:13,14. Ebelu 10:36).

 

Nulue kudiye ndibue didi ne muoyo, diakapidiabo kudi bantu, kadi didi disungula kudi Nzambi, ndia mushinga mukole; nunku nuenu kabidi, bu mabue adi ne muoyo, nuakashibua nzubu wa Nyuma, bua kuikala bakuidi ba tshijila; bua nuenu kufila milambu idi ya nyuma mitabujibue kudi Nzambi bualu bua Yesu Kilisto.  2:4,5

  Kale Nzambi wakadi ne nzubu wakadi mubakibue ku bianza bia bantu mu Yelushalema. Nzambi wakamba ne, “Nentabale mesu anyi, nenteleje matshu anyi ku kulomba kudibo balomba mu nzubu ewu. Bualu bua nakusungula, nakujidila nzubu ewu, bua dina dianyi dikalemu tshiendelele” (2 Kulondolola 7:15,16). Bena Yuda bakaunyangisha. Pakadi Mukelenge Yesu mu Yelushalema, “wakabuela mu ntempelo wa Nzambi, wakipata bonso bakadi bapana bintu ne bakadi basumba bintu mu ntempelo … waka- bambila ne, Bakafunda mu Mukanda wa Nzambi ne, Nebabikile nzubu wanyi ne, Nzubu wa kutendelelamu Nzambi, kadi nuenu

nuakumuvuija bu muaba wa banyengi” (Matayo 21:12,13). Yeye wakambila bafundi ba mikenji ne bafalese ne, “Nzubu wenu udi mushale patupu” (Matayo 23:38). Pashishe Mukelenge Yesu wakambila bayidi bende bualu bua ntempelo ne, “Nudi nutangila bintu ebi bionso, anyi? Bulelela, ndi nuambila ne, kabena bashiya dibue dimue pa mutu pa dikuabo, nebasasule buonso buawu” (Matayo 24:2).

  Nzambi udi ne nzubu wa Nyuma katataka, kayi muasa ne bianza. Bena kuitabuja, bu mabue adi ne muoyo, badi bashibua nzubu wa Nyuma. Mukelenge nkayende udi “Dibue didi ne muoyo”. Badi ne muoyo mupia-mupia munda muende.

 

Muena Kilisto yonso udi  muakuidi

  Bu muakuidi wa tshijila, muena kuitabuja udi mumanye mua kusemena pabuipi ne Nzambi. “Nzambi wakatusungila, wakatu- bikila ne dibikila dia tshijila” (2 Timote 1:9). Udi ne dikima dia ku- buela kumpala kua Nzambi bua mashi a Yesu. Mukanda wa Nzambi udi wamba ne, “Bualu bua tudi ne muakuidi mutambe (Mukelenge Yesu) ku mutu kua nzubu wa Nzambi; tusemene bietu pa buipi nende ne mutshima mulelela mu dimanya dijalame dia ditabuja” (Ebelu 10:21,22).

  Bena Kilisto badi bafila milambu. “Nunku bua bualu buende (bualu bua Yesu), tufilafile kudi Nzambi mulambu wa kumu- tumbisha nawu, udi biawu mamuma a mishiku idi ijikula ditabuja dia dina diende. Kadi kanupu muoyo bua kuenzelangana bimpe ne bua kukuatshishangana; bua Nzambi udi usanka ne milambu ya nunku” (Ebelu 13:15,16).

 

Bualu bua diyi didi mu Mukanda wa Nzambi ne, Tangilayi, ndi nteka mu Siona dibue dinene dia mu ditumba dia nzubu, disungula ne dia mushinga mukole; weyemena kudidi kena ufuishibua bundu? Nunku mushinga mukole wadi udi kunudi badi bamuitabuja; kadi kudi badi kabayi bamuitabuja, udi dibue  diakapidiabo  kudi  bibaki ba nzubu, diodio diakavuiji bua mutu wa ditumba; ne dibue dia kukumabo dikasa, ne mutunda wa dibue wa kubalenduisha: bobo badi balenduka ku diyi dia Nzambi bualu bua bupidia buabo; bakatekibua ku bualu ebu kabidi.  2:6-8

 Kudi Bena Isalele Mukelenge Yesu Kilisto wakadi dibue “bua kuasapu bishimikidi bia nzubu” kadi bakamupidia. (Yeshaya 28:16). Bualu bua dipidia diabo Yeye wakalua “Dibue dia kukumaku dikasa, ne mutunda wa dibue wa kubaluenduisha” (Yeshaya 8:14). Bidi nunku too ne lelu bualu bua bena bupidia. Kadi kudi bobo badi bitabuja Mukelenge Yesu, bualu bukuabo! Udi wa mushinga mukole.

     Dituku dikuabo Mukelenge Yesu wakakonka bayidi bende ne, “Nuenu nudi nungamba ne, Meme ndi nganyi? Simona Petelo wakandamuna ne, Wewe udi Kilisto, Muana wa Nzambi udi ne muoyo. Yesu wakamuandamuna ne, Simona Ba-yona, wewe udi ne disanka; bantu kabakukubuluila bualu ebu, anu Tatu wanyi wa mu diulu. Ndi nkuambila kabidi ne, Wewe udi Petelo, pa dibue edi nengibake ekeleziya wanyi” (Matayo 16:15-18). Ekeleziya udi mubakibua pamutu pa Kilisto, Muana wa Nzambi udi ne muoyo. Petelo udi ujadika patoke too ne, Mukelenge Yesu udi Dibue edi, kayi yeye to, bu bakuabo bamba. Paulo wakajadika bualu ebu kabidi. “Kakuena muntu udi mua kujadika bishimikidi bikuabo, anu biobio biakamana kujadikibua, bidi Yesu Kilisto mene” (1 Kolinto 3:11).

 

Kadi nuenu nudi tshisamba tshisungudibua, ne bakuidi ba bu-kelenge, ne tshisamba tshia tshijila, bantu badi bikale ba Nzambi muine, bua nuenu nuambe bua buimpe bua Nzambi wakanubikila bua kunupatula mu midima bua kunubueja mu munya wende wa dikema. Mu tshikondo tshia diambedi ka- nuakadi bantu, kadi katataka nudi bantu ba Nzambi; kanua- kafuidibua luse, kadi katataka nuakufuidibua luse. 2:9,10

     Bu bakuidi ba tshijila tudi tusemena pepi ne Nzambi bua ku- mutumbisha kadi bu bakuidi ba bukelenge tudi tuambila bantu bualu bua buimpe bua Nzambi, bua Lumu Luimpe ne bu muaka-tufuileye luse. Diambedi tuakadi bajimine bualu bua malu mabi etu kadi mpindiewu, bualu bua ditabuja, tudi bana bende. Paulo wakafundila Bena Efeso kabidi ne, “Diambedi nuakadi midima, kadi katataka nudi munya mu Mukelenge; endayi bienu bu bana ba munya. Tabala, wewe udi mulale tulu, bika ku lufu, ne Kilisto neakutemene. Nunku nudimuke bienu bu munudi nuenda; kanuendi bu badi kabayi ne meji, kadi nuende bu bena meji; nudisumbile tshikondo patshiditshiku tshia kuenzamu malu mimpe, bualu bua matuku adi mabi” (Efeso 5:8,14-16).

 

Bananga, ndi nutendekena bu benyi ne bena luendu ba pa buloba ne, Nuepuke ku nkuka ya mibidi idi iluangana ne mioyo yenu; nuikale ne bienzedi bienu bimpe munkatshi mua bisamba bia bende, bualu bua, mu mianda idibo banusonguela nuenu bu benji ba malu mabi, bobo batumbishe Nzambi mu dituku dialueye, bua midimu yenu mimpe idibo bamona. 2:11,12

 Mu matuku a Petelo bena Kilisto bakadi bakengeshibua kudi Bena Yuda ne kudi bantu ba bisamba bikuabo kabidi. Bantu bakuabo bakababanda ne, “Nudi benji ba malu mabi”. Malu aa akadi mudimu wa Satana. Mu dilongesha dia Mukelenge Yesu pa mukuna Yeye wakambila bumvui bende ne, “Panupendabo ne panukengeshabo ne panushiminyinabo mashimi onso, bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene … nunku munya wenu uteme ku mesu kua bantu, bamone midimu yenu mimpe, batumbishe kabidi Tatu wenu udi mu diulu (Matayo 5:11,12,16).

     Pakadi Mukelenge Yesu pa buloba yeye biende wakadi mukengeshibue bikole be. Yeye wakambila bayidi bende ne, “Nuvuluke diyi dinakunuambila ne, Mupika kena mutambe mfumu wende. Biankengeshabo, nebanukengeshe kabidi” (Yone 15:20). Nunku Petelo udi musue kukolesha mitshima ya bena kuitabuja bua kunanukila mu kuenza kua malu mimpe.

 

Nudikokeshe ku bukokeshi buonso bua bantu bualu bua Mukelenge; nansha kudi mfumu munene udi ku mutu; nansha kudi bangovena bu batumibua kudiye bua kudisombuela kudi benji ba malu mabi, ne bua kutumbisha benji ba malu mimpe. Bualu bua disua dia Nzambi didi nunku, bua nuenu nupuishe bupote bua bantu batshimbakane ku kuenza kuenu kua malu mimpe; bu badishikamine, kadi kembu badi bangata budishi kaminyi buabo bu tshibuikilu tshia malu mabi; kadi nuikale bu bapika ba Nzambi. Nunemeke bantu bonso. Nunange bana benu ba mu Kilisto. Nutshine Nzambi. Nunemeke mfumu munene. 2:13-17

 Mukanda wa Nzambi udi wamba ne, “Muntu yonso aditeke ku nyima kua bakokeshi badi ku mutu kuende. Bua kakuena bukokeshi budi kabuyi bulua kudi Nzambi; ne makokeshi adiku akajadikibua kudi Nzambi. Nualukishile bantu bonso mabanza abo: mulambu kudi muena mulambu, mpunga kudi unudi mua kupunga, buowa kudi unudi mua kutekela buowa, buneme kudi unudi mua kunemeka” (Lomo 13:1,7).

     “Kilisto wakatupikula bua tuetu tuikale ne budishikaminyi” (Galatia 5:1). Tudi badishikaminyi bulelela, kadi, bu bapika ba Nzambi, tudi basue kusankisha Yeye wakatupatula mu midima bua kutubueja mu munya wende wa dikema. Bituatshina Nzambi, netunemeke mfumu munene kabidi, diyisha edi didi diyisha dia mu Mukanda wa Nzambi.

  Petelo udi wamba bua kunangangane misangu ya bungi! “Mu dinanga dia bana benu ba mu Kilisto nunangangane, muntu ne muntu; mu buneme muntu ne muntu ateke mukuabo kumpala” (Lomo 12:10).

 

Bena mudimu, nudikokeshe kudi bakelenge benu ne ditshina dionso; kenganu kudi badi bimpe ne badi ne bupole, kadi kudi badi ne tshinyangu kabidi. Bua muanda ewu udi wa kusakidila, bikala muntu udikankamika mu kanyinganyinga bualu bua muoyo-mukese wende kudi Nzambi pakengeye kayi ne bualu. Butumbi budi panyi binuadikankamika panuenza bualu bubi ne badi banukuma? Kadi binuadikankamika panuenza bualu buimpe ne nudi nukenga, bualu ebu budi bua kusakidila ku mesu kua Nzambi. 2:18-20

  Kembualu butekete bua kudikokesha kudi bamfumu badi ne tshinyangu, kadi bualu ebu budi busankisha Nzambi. Bikala bumanyishi bua muena kuitabuja bimpe, bakuabo badi mua kubaseka ne mishiku kadi munda mua mitshima yabo badi bamune

mekela bua kueyemenyibua kuende. Nzambi udi mutumbishibue kabidi. Nzambi udi utangilatangila bienzedi bia bantu bende. Aba-lahama wakadi mua kuamba bualu bua “Yehowa undi ngendakana kumpala kuende” (Gen. 24:40). Wakadi mumanyibua bu “Mulunda wa Nzambi”. Panoka kabidi “wakadi ne bualu buende buambibua ne, Yeye wakasankisha Nzambi” (Ebelu 11:5). Nzambi udi wamba ne, “Badi bantumbisha nembatumbishe” (1 Sam. 2:30).

 

Bua nuakabikidibua bua muanda ewu, bualu bua Kilisto waka-kenga bua bualu buenu, wakanushila tshilejilu bua nuenu numulonde mu makasa ende. Yeye kakenza bualu bubi, kaba-kamusangana ne didinga mukana muende; pakamupendabo, yeye kakabapenda kabidi; pakakengeye, yeye kakabakanyina, kadi wakadifila mu bianza bia udi ulumbulula  biakane. Yeye muine wakatutuadila malu mabi etu mu mubidi wende ku mutshi mutshiamakane, bua tuetu, bamane kufua ku malu mabi, tuikale ne muoyo wa ku buakane; kunuakuondapibua ku mibundabunda yende. 2:21-24

 Tshilele tshia bantu babi tshidi bua kupingaja bubi ku bubi kadi Mukanda wa Nzambi udi wamba ne, “Kualukishidi muntu bubi ku bubi buende. Nudianjile kuela meji bua kuikala ne malu mimpe ku mesu kua bantu bonso” (Lomo 12:17). Katupeshi bena lukunu ba Lumu Luimpe kaba ka kupendabo bena ekeleziya.

  Bena Kilisto badi ne muoyo, ne muoyo muvule, bua bualu buende. Yeye wakakenga bikole be bua bualu buabo. Mukelenge Yesu wakamba ne, “Biansua muntu, nenze diyi dianyi” (Yone 14:23). Tudi mua kuamba ne, Tudi tumunanga bualu bua yeye wakadianjila kutunanga (1 Yone 4:19).

 

Bualu bua nuakadi nupambuka bu mikoko, kadi katataka nuakupingana kudi Mulami ne Mutangidi wa mioyo yenu. 2:25

 Mukelenge Yesu, bu Mulami Muimpe wa mikoko, udi mumanye mua kupingaja mikoko yende kudiye papambukayi. Bikala mikoko yende ishala pepi nende udi uyivuijila muaba wa kusomba talalaa, kayiyi ne ditshina. Udi uyilombola mu njila ya buakane bualu bua dina diende (Musambu 4:8. 23:2).

 

4        Mukanda wa kumudilu — Nshapita  3

Muomumue, nuenu bakaji, nukokele babayenu; nunku bikala bakuabo kabayi bitabuja diyi dia Nzambi, nebapetebue mu  bualu bua Nzambi kabayi ne diyi dia Nzambi, ku bienzedi bia bakaji babo: patangilabo bienzedi bienu bilengele bidi ne di-tshina. 3:1,2

 Bikala bakaji bakuabo ne balume badi kabayi bena kuitabuja mvese ewu udi mua kubasamba. Pamona babayabo nsombelu wabo bimpe bakuabo nebitabuje Mukelenge. Mukanda wa Nzambi udi wamba ne, “Udi mua kupeta mukaji wa tshikadilu tshimpe nganyi? Bulengele buende budi butamba mabue a bi- lenga mushinga mukole. Mutshima wa bayende udi umueye- mena” (Nsumuinu 31:10,11).

 

Didilengeja diabo kadikadi dia pambidi dia kuluka kua nsuki, anyi dia kuela kua bilenge bia ngolo, anyi dia kuluata kua bivualu; kadi dikale dia muntu musokoma wa mu mutshima, mu bivualu bidi kabiyi binyanguka bia mutshima wa kalolo ne ditalala, bidi bia mushinga mukole ku mesu kua Nzambi. 3:3,4

  Bakaji badi basue kusankisha Nzambi kabena balonda tshimuenekelu tshia malu a ba pa buloba, netshijimine. Bu-lengele buabo budi nangananga bulengele bua mu mitshima yabo. Badi badilengeja ne bienzedi bimpe, bu mudi buakane bua bakaji badi bamba ne, “Tudi tutshina Nzambi” (1 Timote 2:9).

 

Muomumue kabidi, bakaji ba tshijila ba kale bakadi ba-tekemena Nzambi, bakadi badilengeja, bakadi bakokela ba- bayabo; bu  muakatumikila  Sala  Abalabama, mumubikile Mukelenge; unuakulua bana bende katataka, binuenza bimpe, ne binuikala kanuyi nutshinyishibua ku buowa buonso. 3:5,6

  Sala, mukaji wa tshijila, wakakokela Abalahama. Bilonde-shile pa tshilele tshia bantu mu matuku abo, yeye wakabikila bayende ne, Mukelenge. Bakaji badi bitabuja Nzambi ne bakokela bayende babo badi bana ba Sala. Ditekemena diabo didi mu Nzambi ne mu Diyi diende.

  Bikala ba pa buloba kabena bitabuja diyisha dia Nzambi bualu

bua dibaka, kembualu bua dikema bikala meku a bungi kaena ajalame nansha. Bua malu aa bana ba bungi badiunda mu meku adi matapuluke, anyi mu meku ne anu muledi umue. Bana bakuabo kabena bamanye batatu babo. Bualu bua mukaji muena kuitabuja udi ukokela bayende wende kembualu bua mulume udi umupita mu lungenyi anyi mu malu a Nzambi, misangu ya bungi bakaji badi bapita balume babo mu malu aa ne mu ditabuja, kadi badi bitabuja dilongolola dia Nzambi. Bua bualu ebu meku abo adi miaba ya ditalala ne dia disanka.

 

Nuenu balume muomumue, nuikale ne bakaji benu bu mudi lungenyi luimpe, bu mudibo banutambe mubidi butekete, bu mudibo bapianyi nenu ba ngasa wa muoyo; bua kutendelela kuenu kakupumbishibu. 3:7

  Bikala bakaji badi ne bua kukokela balume babo, balume badi ne bua kukokela Kilisto ne Diyi dia Nzambi. Bakaji babo kabena bapika babo anyi bena mudimu babo. Mu diku dia bena Kilisto bajalame, mulume ne mukaji badi banangangana ne badi bakua- tshishangana bu bapianyi muomumue ba “ngasa wa muoyo”. Nzambi utangila kutendelela kua mulume ne mukaji wende popamue bu bualu bua mushinga mukole kudiye. Bikala “dise-ngelela dia muntu muakane didi ne bukole bua bungi mu kuenza kuadi” (Yakobo 5:16), kutendelela ne milombu bia diku dia bena Kilisto nebikale ne bukole bua bungi be mu kuenza kuabi !

 

Diyi dia kundekelu ne, Nuikale buonso buenu ne mutshima umue,  nusambangane,  nunangangane  bu  bana  babo ba mu Kilisto, nuikale ne mitshima ya luse ne mitshima mipuekela. 3:8

  Paulo wakatangila bena ekeleziya ba ku Filipoi bu disanka diende ne tshifulu tshiende tshia butumbi, kena utela bualu bubi mu mukanda wende kudibo anu bualu bumue; bidi bimueneka ne, bakaji babidi bakadi batandangana. Paulo wakabasengelela bua kuikalabo ne meji amue mu Mukelenge (Filipoi 4:1-3).

 Mukelenge Yesu wakambila bayidi bende, pakadiye pepi ne kuteka muoyo wende panshi bua bualu buabo ne bua bualu buetu, ne,  “Ndi  nuelela  mukenji mupia-mupia ne, Nusuangane; nusua-

ngane bu munakunusua. Bua bualu ebu bantu bonso nebamanye ne, Nudi bayidi banyi, binuasuangana nunku. Ewu udi mukenji wanyi ne, Nusuangane bu munakunusua” (Yone 13:34. 15:12).

 

Kanushintakaji bubi ku bubi anyi tshipendu ku tshipendu; kadi nushintakajangane nabo disanka; bua nuakabikidibua bua muanda ewu, bua nuenu kupiana disanka. 3:9

 Tulonde mu makasa a Mfumu wetu “kabakamusangana ne didinga mukana muende; pakamupendabo, yeye kakabapenda kabidi; pakakengeye, yeye kakabakanyina, kadi wakadifila mu bianza bia udi ulumbulula biakane” (1 Petelo 2:22,23). Dibikidibua dia Nzambi didi dibikidibua dia disanka. “Nzambi wakanubikila bua kunupatula mu midima bua kunubueja mu munya wende wa dikema” (2:9).

 

Bualu bua, wasua kunanga muoyo ne kumona matuku mimpe, akande ludimi luende ku bubi ne mishiku yende bua kayidingi. Adimuke biende ku malu mabi, enze malu mimpe; akebe biende ditalala, adilonde. Bualu bua mesu a Mukelenge adi kudi bakane, ne matshu ende adi buashi ku milombu yabo; kadi mpala wa Mukelenge udi mutangisha kudi benji ba malu mabi. 3:10–12

  Nzambi udi utangilatangila bienzedi bia bantu. “Kakuena tshintu tshifukibua tshidi katshiyi tshimueneshibua ku mesu kuende, kadi bintu bionso bidi butaka ne bibuluka ku mesu kua utudi nende ne bualu” (Ebelu 4:13). Kadi mesu ende adi kudi bantu bende, kudi bobo badi benda mu njila yende bua kumusankisha. Nzambi udi uteleja milombu yabo.

 

Ne nganyi wanuenzela bibi, binualua bena lukunukunu ba malu mimpe? Kadi binuakenga bualu bua buakane, nudi ne disanka; kanutshinyi kutshinyisha kuabo, kanulubakashibu mitshima yenu; kadi nujidile Kilisto mu mitshima yenu bu Mukelenge. Nuikale badilongolola misangu yonso, bua kukudimuna diyi kudi muntu yonso udi unukonka bua muanda wa ditekemena didi munda muenu; kadi nuenze nunku ne kalolo ne ditshina. 3:13-15

  Mu kuamba kua Mukelenge ku mukuna, yeye wakambila bantu ne, “Bakakengeshibua bua buakane buabo badi ne disanka, bua bukelenge bua mu diulu budi buabo. Panupendabo ne panu- kengeshabo ne panushiminyinabo mashimi onso, bua bualu buanyi, nenuikale ne disanka. Nusanke, nuikale ne disanka dingi, bualu bua difutu dienu didi mu diulu ndinene” (Matayo 5:10-12).

  Mukelenge wetu wakakenga bualu bua buakane bikole be. Bakadi nende lukuna tshianana (Musambu 69:4. Yone 15:25). Bikala Mukelenge Yesu mujidibue mu mitshima yetu bu Mukelenge, Yeye neatupeshe ngasa bua kumulonda bu bana bende bananga ne bua kuandamuna ku makonka a bantu bualu bua ditekemena didi munda muetu ne kalolo.

 

Nuikale ne muoyo-mukese muimpe, bua, mu bualu budibo banusonguela, bobo badi bapenda bienzedi bienu bimpe binudi nabi mu Kilisto bafuishibue bundu. Bua budi butambe buimpe, bikaladi disua dia Nzambi, bua nuenu nukenge bu benji ba malu mimpe, ne kanukengi bu benji ba malu mabi.  3:16,17

  Petelo udi upingana ku bualu bua bena Kilisto bakadi bakenga bua ditabuja diabo. Bualu ebu budi bujitu pambidi pende. Yeye biende wakamanya makenga ku bianza bia bantu babi, yeye biende wakadi mu nzubu wa lukanu bualu bua dina dia Kilisto. Udi musue kukolesha mitshima ya bakengi kadi muomumue kena musue bena Kilisto bua kukenga bua kuenza kua malu mabi.

   Misangu ya bungi makenga adi akuata bantu ba Nzambi, kembualu bua badi benji ba malu mabi. Kadi Mukelenge utshidi wambila bantu bende, bu mu matuku a kale ne, “Kutshinyi, bualu bua nakukupikula, nakukubikila ku dina diebe, wewe nguanyi. Pawapitshila mu mayi, nengikale nebe; pawapitshila mu misulu, kayena ipasalala pa mutu pebe” (Yeshaya 43:1,2).

 

Bualu bua Kilisto wakafua musangu umue bua malu mabi, muntu muakane wakafuila bantu babi, bua kulua netu kudi Nzambi; wakashipibua mubidi wende, kadi wakavuijibua muoyo mu nyuma wende; muakayeye mu nyuma wende kabidi, ne wakambila nyuma ya ba mu nzubu wa lukanu wa lufu bualu

bua Nzambi. 3:18,19

  Bidi bimueneka ku diyila dia Mukanda wa Nzambi ne, Kilisto wakayisha bantu ba kale bualu bua Nzambi mukana mua Noa kudi Nyumu wende. Bobo bakapidia Nzambi badi mu nzubu wa lukanu wa lufu mpindiewu. Nebamueneke kumpala kua tshi- lumbuluidi tshia bafue tshitedibua mu Buakabuluibua 20:11-15.

 

Bantu aba bakadi ne bupidia diambedi, pakadi lutulu lua Nzambi luindila mu mataku a Noa, pakadi buatu bunene bu-longolodibua, muakasungidibua bantu banya-banya, bantu muanda mukulu mene, mu mayi. 3:20

  Nzambi wakindila bidimu bia bungi mu luse diambedi yeye kayi muanze kulumbulula ba pa buloba mu matuku a Noa. “Bua ditabuja, Noa, pakadiye mudimujibue bua malu akadi kaayi manze kumuenebua, muenzejibue ku ditshina dia Nzambi, wakalongolola buatu bua kusungila nabu ba mu nzubu muende; bua bualu ebu wakapisha ba pa buloba, wakalua mupianyi wa buakane budi bua ku ditabuja” (Ebelu 11:7).

 

Mayi aa kabidi adi tshifuanyikishi tshia adi atusungila kata-taka, nkubatiza mene, kembua diuvua dia manyanu a mubidi, kadi bua dikeba dia muoyo-mukese muimpe kudi Nzambi, bua dibika dia Yesu Kilisto ku lufu.  3:21

  Mayi a dibatiza adi amba bua lufu. Noa wakadi mu-sungidibue bualu bua wakadi mu buatu pakalua mayi ma-nene.  Muena kuitabuja udi musungidibue bualu bua Nzambi udi umumona mu Kilisto. Mayi aa adi “tshifuanyikiji tshia dikeba dia muoyo-mukese muimpe kudi Nzambi”. Dibatiza nkayadi kadiena dimanya mua kusungila muntu. Mukanda wa Nzambi udi wamba ne, “Nudi basungidibua ku ngasa bua ditabuja; ne diodi kadiena difuma kunudi, ndipa dia Nzambi; kadiena difuma ku midimu, bua muntu kaditumbishi (Efeso 2:8,9).

  Mutangadiki Filipo wakambila muena Atiopa “lumu luimpe lua Yesu”, wakaluitabuja, wakamba ne, Apu, ka mayi aa tshidi tshimpumbisha bua kubatijibua ntshinyi? Filipo wakamubatiza. Muena Atiopa wakaya biende mu njila usanka (Bienzedi 8:36-39). Tudi ne tshifuanyikiji tshikuabo tshia dibatiza mu Mukanda wa

Bienzedi, “Bena Kolinto ba bungi, pakumvuabo (Lumu Luimpe), bakitabuja, bakabatidijibua” (Bienzedi 18:8).

 

Kubatijibua kuetu kudi bumanyishi kudi bantu ne:

1) Tuakitabuja Mukelenge Yesu bu Musungidi ne

 Mukelenge.

2) Tudi bantu bende.

3) Tuakafua ne Kilisto ne tuakalekela malu a muoyo wetu

 wa kale.

4) Tuakajikibua nende mu lufu, tuakabishibua ne Kilisto

  mu muoyo mupia-mupia ne tudi basue kuendamu.

Mu tshikoso, dibatiza dia bena Kilisto didi bumanyishi kudi bantu bua: Ditabuja dia muntu mu Yesu Kilisto bu Mukelenge, kulamata kudi Mukelenge Yesu ne kutumikila ku Diyi diende. Dibatiza kadiena dimanya mua kusungila muntu, anu ditabuja. Pakadi Paulo ne Sila mu Filipoi. Mulami wa nzubu wa lukanu wakabambila ne, “Bakelenge, bundi nabu mbua kuenza tshinyi bua kusungidibua? Bakamba ne, Itabuja Mukelenge Yesu, neu-sungidibue”  (Bienzedi 16:30,31).

 

Udi ku tshianza tshia bukole tshia Nzambi, mumane kubuela mu diulu; banjelo ne makokeshi ne makole biakavuijibua kunyima kuende. 3:22

 Katataka Mukelenge Yesu udi ku tshianza tshia bukole tshia Nzambi. Ba pa buloba bakapidia Mukelenge Yesu, Pilato wakasua kumulekela, kadi bantu bakela mbila ne, “Umushipe ku mutshi mutshiamakane, umushipe ku mutshiamakane” (Luka 23:21). Mukelenge wakadi mulenguludibue kudi bantu kadi Nzambi wakamubandisha kulu kule, wakamupa dina didi pamutu pa dina dionso; ne bua mu dina dia Yesu binu bionso bitue panshi. Palueye bua kukokesha Yeye nealue  bu MFUMU WA BAMFUMU, NE MUKELENGE WA BAKELENGE (Buakabuluibua 19:16). Nzambi wakela mukenji ne, Mukelenge Yesu budiye nabu mbua kuikala kumpala mu malu onso (Kolosai 1:18).

 

5        Mukanda wa kumudilu — Nshapita 4

Nunku, bualu bua Kilisto wakakenga mu mubidi, nuenu nudi- luatshishe ne meji muomumue; bua wakakenga mu mubidi wakumana kulekela malu mabi, bua nuenu kanuikadi ne muoyo kabidi mu nkuka ya bantu matuku enu atshidi mashale mu mubidi, kadi nuikale ne muoyo bu mudi disua dia Nzambi.  4:1,2

 Muena Kilisto udi mubikidibua bua kuenza malu makane ne malu mimpe, bu muakenza Mukelenge Yesu pakendeye munkatshi mua bantu. Mukelenge wakambila bayidi bende ne, “Bikala ba pa buloba nenu lukuna, nudi bamanye ne, Bakadi nanyi lukuna diambedi. Bu nuenu bikale ba pa buloba, ba pa buloba bakadi kusua bantu babo; kadi bualu bua nuenu kanuena ba pa buloba, nakunusungulula mu ba pa buloba, nunku ba pa buloba badi nenu lukuna. Nuvuluke diyi dinakunuambila ne, Mupika kena mutambe mfumu wende. Biankengeshabo, nebanu- kengeshe kabidi. Pa buloba nudi ne dikenga; kadi nukoleshe mitshima yenu; nakupita ba pa buloba bukole” (Yone 15:18-20.16:33).

 

Bualu bua matuku mapite akakumbana bua nuenu nulonde disua dia bisamba bia bende, ne bua nuenu nuende mu tshienzenza tshia masandi, mu nkuka, mu kukuatshika kua maluvu, mu manaya a bundu, mu tshingu tshia banu ba maluvu, ne mu kutendelela kua mpingu mibi. Mu malu aa badi bakema bualu bua nuenu kanuena nuenda nabo too ne ku dipitshibua diodiumue dia malu manyanguka, badi banupenda; bobo nebababadile malu abo kudiye udi udilongolola bua kulumbuluisha badi ne muoyo ne badi bafue. 4:3-5

 Petelo udi utela bienzedi bia bantu ba bende. Mukanda wende wakadi mufunda kudi “bantu basungudibue kudi Nzambi, badi benyi bena tshimuangi” (1:1), buena kuamba ne, Kudi Bena Yuda bakadi bashikama mu maloba a bantu ba bende. Ba bungi mu- nkatshi muabo bakalonda bienzedi bia bantu aba, bakadi bena mpingu diambedi kabayi banze kulua bena Kilisto.

     Kembualu bua kukema bikala ba pa buloba bapenda muntu bualu

bua muoyo wende muakane nansha. “Bua buakane budi ne bulunda kayi ne bualu bubi; anyi munya udi ne buobumue kayi ne midima?” (2 Kolinto 6:14). “Muntu kena mumanye mua kukua- tshila bamfumu babidi mudimu diakamue” (Matayo 6:24). Njila ibidi idiku. Njila umue udi njila wa muoyo, njila mukuabo udi njila wa kabutu (Matayo 7:13,14). “Yehowa udi mumanye njila wa bantu bakane, kadi njila wa bantu babi neajimine” (Musambu 1:6).

 

Bua muanda ewu kabidi bakambila bafue mene lumu luimpe, bua bobo balumbuluishibue bu mudibo balumbuluisha bantu badi ne mibidi, kadi bua kuikalabo ne muoyo mu nyuma bu mudi Nzambi musue. 4:6

 Mvese ewu udi musuika ne mvese inayi ne itanu. Bikala bena Kilisto kabena balonda masanka a ba pa buloba nebapendibue kudibo. Badi babalumbuluisha bu mudi lungenyi luabo. Mu dituku didi dilualua, ba pa buloba “nebababadile malu abo kudiye udi udilongolola bua kulumbuluisha badi ne muoyo ne badi bafue” (Mvese 5). Mu dituku adi nebajingulule ne, Bena kuitabuja bakasungula njila wa lungenyi, njila wa muoyo ne wa disanka dilelela.

  Bantu bafue ba kale ba mu matuku a Noa bakumvua lumu luimpe bualu bua mushindu wa kupanduka kulumbulula kuakane kua Nzambi mu buatu bunene. (Tangila 2 Petelo 2:5). Muprofete Yeshaya wakadi muambi wa Lumu Luimpe mu matuku a Dipungila Dikulukulu. Yeye wakamba ne, “Muntu mubi alekele kuenda mu njila wende mubi, udi kayi muakane alekele meji ende mabi; apingane biende kudi Yehowa, yeye neamufuile luse; ne kudi Nzambi wetu, bualu bua yeye neatambe kumubuikidila mibi yende”  (Yeshaya 55:7). Bikala bantu bumvua Lumu Luimpe ne balupidia kabena ne tshia kudibingisha natshi.

 

Kadi kunshikidilu kua malu onso kudi pa buipi; nunku nuikale ne meji majalama, ne nuikale bapole mu mitendelelu; ku mutu kua malu onso nuikalangane ne dinanga dikole munkatshi muenu, bualu bua dinanga didi dibuikila malu mabi a bungi. 4:7,8

 Paulo wakafundila Bena Tesalonike ne,Kadi nuenu bana betu, kanuena mu midima bua dituku adi dinukuate bu muibi … nunku katuladi tulu bu mudi bakuabo benza; kadi tutabale, tuikale ne meji mapole” (1 Tesalonike 5:4-6).

 Mbualu butekete bua kuikala kubunga tulu! Mu Getesemane Mukelenge Yesu wakalomba Petelo ne bayidi babidi bakuabo, ne, “Nuikale nanyi tshitabala” kadi yeye wakabasangana balale tulu. Wakabambila ne, “Nudimuke; nutendelele Nzambi; nunku kanu-ponyi mu mateyi; mutshima udi musue nunku, kadi mubidi udi mutekete” (Matayo 26:41).

  Petelo udi upingana ku bualu bua dinanga. Musangu mu-kuabo Petelo wakavuluka dituku dikuabo pakadi bayidi batanda-ngana pakadibo ne Mukelenge Yesu mu njila (Mako 9:33). Yeye biende wakamanya dinanga dia Mukelenge diakabuikidila ma- panga ende onso. Nunku udi usengelela bantu ba Nzambi bua kunangangane.

 

Nusankidilangane ne benyi kanuyi ne kutontolola; bu muaka- ngata muntu ne muntu tshipedi, nukuatshishangane natshi munkatshi muenu, bu balami bimpe ba ngasa muvulangane wa Nzambi. 4:9,10

  Mufundi wa Mukanda wakatuminabo Bena Ebelu wakafunda ne, “Dinangangana dia bana babo ba mu Kilisto dikaleku. Kanupu muoyo bua kuleja benyi luse, bua bualu ebu bakuabo baka- sankidila banjelo, kabayi babamanye” (Ebelu 13:1,2). Malu aa adi tshimanyinu tshia ditabuja dilelela.

  Muena kuitabuja yonso udi ne tshipedi tshiende. Nyuma Muimpe “udi utapuluila muntu ne muntu tshipedi tshiende bu mudiye musue” (1 Kolinto 12:11). Bipedi bidi bishilangane, ne bidi bia bungi. Bipedi bidi bua tshinyi? Bua kukuatshishangana ne bua kudiundishangana mu malu a Nzambi. Bipedi bikuabo bidi bimonebua, bipedi bikuabo bidi kabiyi bimonebua, bu milombu ya mukaji wa mufuila, kayi ne bukole bua mubidi bua bungi, kadi udi unanukila mu kulomba, mu disengelela, ne mu mitendelelu mu nzubu wende bua bantu ba Nzambi ne bantu bakuabo kabidi.

 

Biakula muntu, akule meyi bu mudiwu mamba kudi Nzambi; biakuata muntu mudima, enze bu mudi bukole buakamupa Nzambi; enze biende bua Nzambi atumbishibue mu malu onso bua Yesu Kilisto; kudiye kuikale butumbi ne bukokeshi too ne ku bikondo bia bikondo. Amen. 4:11

  Mbimpe bua muambi wa Diyi dia Nzambi bua kuakula meyi udiye wangata kudi Nzambi. Bu nunku yeye neikale muambi muimpe wa ngasa muvulangane wa Nzambi.  Patuela meji wa mudimu tudi tuela meji bualu bua mudimu wa mishindu ya bungi. Foibe, wakadi mukaji wakenza mudimu ne bukole buakapete- bueye kudi Nzambi. Paulo wakafunda bua bualu buende ne, “Yeye wakumana kulua mukuatshishi wa ba bungi, ne wa meme muine” (Lomo 16:1-2).

  Tuenze bietu malu etu onso bua butumbi bua Nzambi. Disanka kayi bua kumvua meyi a Mukelenge wetu ne, “Bimpe, muana wanyi muimpe ne muntumikidi … buela mu disanka dia mukelenge webe” (Matayo 25:23).

 

Bananga, kanukemi bua dikenga didi bu kapia munkatshi muenu diakaluila kunudi bu diteta, bu bualu bupia-bupia buakanukuata; kadi bualu bua nudi babanyanganyi ba makenga a Kilisto, nusanke; bua nuenu nusanke kabidi ne disanka dinene ku dibuluibua dia butumbi buende. 4:12,13

   Bena Kilisto ba mu tshikondo tshia bapostolo bakakenga bikole be, ba bungi too ne ku lufu, bu muakenza Petelo ne Paulo ne bapostolo bakuabo. Bobo bakalonda mu makasa a Mfumu wabo, bakadi ba kueyemenyibua too ne ku lufu. Bakatangila kumpala too ne ku disanka dia dibuluibua dia butumbi bua Mukelenge. Mukelenge Yesu wakebeja bayidi bende babidi mu njila wa ku Emau ne, “Kabiakadi bimpe bia Kilisto kukengeye mu malu aa (makenga a mutshi mutshiamakane) ne bua kubueleye mu butumbi buende, anyi? (Luka 24:26).

  Yakobo wakafunda ne, “Muntu udi utantamana mu mateyi udi ne disanka; bualu bua pakamanabo kumujadika, neangate tshifulu tshia butumbi tshia muoyo tshiakalaya Mukelenge badi bamunanga”

(Yakobo 1:12). Dikenga didi disuikibua ne butumbi ne disanka mu Mukanda wa Nzambi.

  Paulo wakakenga bikole be (2 Kolinto 11:23-33), kadi yeye wakafunda ne, “Kakuena diteta diakunukuata didi kadiyi dikuata muntu yonso; kadi Nzambi udi mua kueyemenyibua, ngudi kayi witabuja bua nuenu nutetshibue ne diteta didi dinupita bukole; kadi palua diteta, yeye neanuenzele njila wa kupandukila, bua nuenu numanye mua kutantamana mu diteta” (1 Kolinto 10:13).

 Mukunjiji wa biamu udi ukunjija tshiamu tshia or anyi tshia argent mu kapia bua kubilengeja, bua kuumusha bintu bia tshianana, bu mudiye ulengeja tshiamu mushinga watshi udi ubandabanda ku mesu kuende. Mukelenge udi ushikama bu Mukunjiji wa biamu kabidi (bu mu Malaki 3:1-4), misangu mikuabo udi witabuja malu makole bua kutukuata bua di-tekemena dietu nedikale munda muende.

 

Bianupendabo bua dina dia Kilisto, nudi ne disanka; bualu bua Nyuma wa butumbi ne Nyuma wa Nzambi udi unuikila pa- mbidi penu. Kadi umue wenu kakengeshibu bu mushipia-nganyi, anyi bu muibi, anyi bu muenji wa malu mabi, anyi bu mudibueji wa mu malu a bantu bakuabo; kadi biakenga muntu bu muena Kilisto, kikadi biende ne bundu, kadi atumbishe biende Nzambi bua dina edi.  4:14-16

  Bipendu bia bantu badi bapenda Kilisto nebipone pambidi bantu bende kabidi. Bikala bualu budi nunku, Nyuma wa butumbi ne Nyuma wa Nzambi udi unuikila pambidi pabo. Dina dia Kilisto didi dinene be, ba pa buloba kabena bajingulula ne, “Mu dina dia Yesu binu bionso nebitue panshi, ne bia bintu bia mu diulu ne bintu bia pa buloba ne bintu bia muinshi mua buloba, ne bua ndimi yonso yambe patoke ne Yesu Kilisto udi Mukelenge, too ne ku butumbi bua Nzambi Tatu” (Filipoi 2:10,11).

  Bena Kilisto badi ne bua kudilama ku njila ya bantu babi. Mu Musambu chapitre 1 tudi tubala ne, “Disanka kudi muntu udi kayi ulonda lungenyi lua bantu babi, anyi udi kayi wimana mu njila diatshimue ne  benji  ba malu mabi, udi kayi mushikame mu tshi-

sombelu tshia babuidi, kadi disanka diende didi mu mikenji ya Yehowa, ne mu mikenji yende mudiye welangana meji munya ne butuku. Yeye udi bu mutshi wakukunabo kukala kua misulu ya mayi, udi ukuama  mamuma awu mu tshidimu tshiawu; dibeji diawu kadiena difubidila. Malu onso adiye wenza adi atuta diakalengele” (Musambu 1:1-3).

 

Bualu bua tshikondo tshia dilumbuluisha kubangadi ku ba mu nzubu wa Nzambi tshiakulua, ne biadianjiladi kubanga kutudi, kunshikidilu kua badi kabayi batumikila lumu luimpe lua Nzambi nekuikale tshinyi? Ne biasungidibua muntu muakane anu ne bualu bukole, muntu udi kayi wa Nzambi ne udi mubi neamueneke kudi kunyi? 4:17,18

  Ekeleziya wa Nzambi udi bu nzubu. Patuela meji bualu bua nzubu tudi tuela meji bua muaba wa kushikamamu, bu muaba wa kudilongolola ne wa discipline. Bidi nunku patuela meji bua Nzubu wa Nzambi  (1 Petelo 2:5). Nzambi udi wa tshijila. Malu a tshijila adi akanangana ne Nzubu wa Nzambi. Paulo wakafundila Timote ne, “Ndi nkufundila mukanda ewu bua wewe umanye bu mudibo ne bua kuenza mu nzubu wa Nzambi, udi muaba wa tshijila wa ekeleziya wa Nzambi udi ne muoyo, udi bu dikunji ne tshishindamenu bia malu malelela” (1 Timote 3:15).

 Tuakamona mu 1 Petelo 1:5 ne, Bantu ba Nzambi “badi bala- mibua ku bukole bua Nzambi bua ditabuja” kadi tudi ne bua kuenda kumpala kuende ne kunemekela ne ditshina; “bualu bua Nzambi wetu udi kapia kadi kashidisha” (Ebelu 12:29).

 

Nunku bantu badi bakenga bu mu disua dia Nzambi bafile muoyo yabo mu kuenza kua malu mimpe kudi Mufuki udi wa kueyemenyibua. 4:19

 Bena kuitabuja ba kale bakamanya Nzambi bu “Nzambi muakane ne Musungidi” (Yeshaya 45:21). Ne tuetu kabidi. Kadi bena Kilisto badi bamumanya bu “Tatu” (Galatia 4:6).  Nansha bena Kilisto bakenga bu mudi disua dia Nzambi badi mua kudifila mu bianza biende bu Mufuki udi wa kueyemenyibua. “Nuteke ntatu yenu yonso kudiye, bualu bua yeye udi unulubulula” (1 Petelo 5:7).

 

6        Mukanda wa kumudilu — Nshapita 5

Nunku ndi nsengelela bakulu badi munkatshi muenu, ndi bianyi mukulu nabo ne mumanyi wa makenga a Kilisto, ne muangatshi wa butumbi budi buamba kubuluibua, ne, Nulame tshisumbu tshia mikoko ya Nzambi tshidi munkatshi muenu, nubalame, kanuyi benzejibue ku bukole, kadi ne mitshima ya disanka bu mu disua dia Nzambi; kembualu bua kukeba biuma, kadi nuikale ne mutshima mulongolola bimpe. 5:1,2

     Tudi tubala mu Bienzedi 20:17 ne, Pakadi Paulo mu Mileto, wakatuma diyi ku Efeso, wakabikila bakulu ba ekeleziya. Paka- luabo kudiye wakabambila ne “Tshiakatshina bua kunuambila malu onso adi Nzambi musue. Nuditangile bienu bimpe, ne tshisumbu tshionso tshiakanutekelabo batangidi kudi Nyuma Muimpe, nudishe ekeleziya wa Mukelenge wakasumbeye ku mashi ende (Bienzedi 20:17,27,28).

     Mvese eyi idi ituyisha malu a bungi bualu bua bakulu ba mu Ekeleziya mu matuku a bapostolo. Bakulu bakadi babikidibue kudi Nyuma Muimpe. (Katuena tubala bua bukokeshi bua anu mukulu umue mu ekeleziya wa kaba kamue). Bakadi batangidi, bakadi balami ba mikoko ya Mukelenge ne bujitu pambidi pabo bua kudisha mikoko yende.

     Petelo, wakabasengelela ne, “Nulame tshisumbu tshia mikoko ya Nzambi tshidi munkatshi muenu”. Mu Bienzedi nshapita 20:30,31 Paulo wakabela bakulu ba ku Efeso ne, “Bantu nebabike munkatshi muenu mene, bambila bantu malu adi kayi malelela bua kukokabo bayidi kunyima kuabo. Nunku dimukayi”. Bidi nunku lelu ! Petelo udi udimuje bakulu bualu bua malu adi mua kupumbisha mudimu wabo bua butumbi bua Nzambi ne bualu bua mateya a Satana.

     Nzambi udi musue kutangila kudipuekesha mu bena mudimu bende. Tudi tubala mu mvese 5 ne, “Nzambi udi upidia badi badisue, kadi udi upa badi badipuekesha ngasa” (1 Petelo 5:5). Kembualu bua kukeba biuma:  “Lukuka lua biuma ludi muji wa malu mabi a mishindu yonso; bidi bantu bakuabo badikebela ne ba-

kasesuishibua mu njila wa ditabuja, bakadisunsula mubidi wonso ne tunyinganyinga tua bungi” (1 Timote 6:10).

 

Kanuikadi bu bakokeshi ba badi kunyima kuenu, kadi nudivuije bifuanyikiji bimpe kudi mikoko. Ne pamueneshibua Mulami Munene, nenuangate tshifulu tshia butumbi tshidi katshiyi tshifubidila. 5:3,4

     Mudimu wa bakulu kembualu butekete nansha kadi Mu- kelenge Yesu, bu Mulami Munene wa mikoko (Ebelu 13:20), udi utangilatangila mudimu wa balami badi muinshi mua bukokeshi buende. Yeye neabafute bilondeshile pa mudimu wabo, bua kulama kuabo ne bua kudisha kuabo bia bobo badi ba mushinga mukole ku mesu kuende, basumbibue ku mashi ende ne bana-ngibue kudiye.

 

Muomumue, nuenu bansongalume, nukokele bakulumpe. E, buonso buenu nudiluatshishe ne bupuekele, bua kukuatshisha-ngana; bualu bua Nzambi udi upidia badi badisue, kadi udi upa badi badipuekesha ngasa. Nunku nudipuekeshe kuinshi kua tshianza tshikole tshia Nzambi, bua yeye anubandishe mu tshikondo tshiasunguleye; nuteke ntatu yenu yonso kudiye, bualu bua yeye udi unulubulula. 5:5-7

     Mbidi bimpe bua bansongalume kunemeka bakulumpe, baku- lumpe bakadi mu njila wa ditabuja bidimu bia bungi, badi bamanye mateyi adi mu njila. Kadi mbualu bimpe kabidi bikala bakulumpe bakolesha mitshima ya bansongalume mu mudimu wa Nzambi. Paulo wakangata Timote, nsongalume wakadi ne lumu luimpe lumanyibua kudi bena Kilisto, bua kumukuatshisha mu mudimu wa Nzambi. Paulo wakamuangata pakatshidiye nsonga- lume bua kuya nende mu ngendu yende ne Lumu Luimpe. Timote wakalonda mu makasa a Paulo bu muena mudimu wa Mukelenge wa kueyemenyibua.

     Lelu, malu a bungi adiku bualu bua bantu ba Nzambi kabena balonda disengelela dia Petelo ne, Nudiluatshishe ne bupuekele, bua kukuatshishangana. “Kudisua kudi kupatula anu matandu, kadi badi bitabuja meyi a lungenyi badi ne meji” (Nsumuinu 13:10). “Kudipuekesha kuinshi kua tshianza tshia Nzambi kudi

kuleja ditabuja dilelela. Tudi tuenda bua ditabuja, kembua bintu bidi bimueneka ku mesu” (2 Kolinto 5:7).

 

Nuikale bapole, nutabale; muena lukuna wenu, diabolo mene, udi wendakana bu nyama wa ntambue udi ukungula, ukeba bantu ba kudieye; numutantamene bajalame mu ditabuja dienu; bualu bua nudi bamanye makenga momumue adi makumba- jibue mu bana benu ba mu Kilisto badi pa buloba ebu. 5:8,9

     Muena lukuna udi Satana, (muaku, “diabolo”, udi wamba bua mupumbishi), misangu mikuabo udi wendakana bu nyama wa ntambue udi ukungula, misangu mikuabo bu muanjelo wa munya (2 Kolinto 11:14). Dituku dikuabo nakadi mu mpata muakadi nyama ya ntambue. Balume bonso bakadi benda mu njila bakadi ne mafuma abo anyi bintu bikuabo bua kudilama. Bakadi badimuke! Satana udi wenzeja bu muanjelo wa munya kabidi. Bidi nunku udi udinga bantu badi kabayi badimuke.

     Balombodi bakuabo badi badingi. Badi babikila malu mabi ne, Malu mimpe. Badi babueja lulengu lua nyoka mu diyisha diabo. Mu Mukanda wa Buakabuluibua 20:2  Satana udi mubikidibue ne, “Dragon, nyoka awu wa kale”.

 

Ne Nzambi wa ngasa yonso, wakanubikila mu butumbi buende bua tshiendelele bua mu Kilisto, panuamana kukenga musangu muipi, yeye muine neanuakaje tshishiki, neanujadike, neanu- koleshe. Bukokeshi buikale kudiye too ne ku bikondo bia bikondo. Amen. 5:10,11

     Petelo udi upingana ku muanda wa makenga. Petelo waka- manya makenga mu mudimu wa Lumu Luimpe kadi yeye kabidi wakamanya ngasa wa Nzambi. Dituku dikuabo yeye mene waka- pua kuikala mudimuke muoyo. Mukelenge Yesu wakamuambila ne, “Simona, Simona, mona, Satana wakalomba mua kunuangata bualu bua kunusengeye bu ntete; kadi nakukulombela wewe Nzambi bua ditabuja diebe kadipangi; wewe, pawakudimuka, ukoleshe mitshima ya bana benu. Petelo wakamuambila ne,  Mukelenge, ndi ne dikima dia mua kuya nebe ne mu nzubu wa lukanu ne ku lufu.  Yeye wakamba ne,  Petelo,  ndi nkuambila ne,

Tshitala katshiyi tshianze kusama lelu wewe neuvile misangu isatu ne, Tshiena mumumanya” (Luka 22:31-34).

     Satana wakapanga mene mene. Pakadi Mukelenge mu bianza bia bena lukuna bende, Petelo wakamuvila misangu isatu, kadi pakumvueye tshitala tshisama, bu Mukelenge wakamuambila, wakalupuka biende, wakadila bikole. Kunyima kua kubika kua Mukelenge yeye wakamueneka kudi Petelo, wakakankamija mutshima wende. Pakalua dituku dia Pentekoste, Petelo waka- mbila bantu Lumu Luimpe mu bukole bua Nyuma Muimpe. Bantu bu binunu bisatu bakadikungija ne bena Kilisto dituku adi (Bienzedi 2:41). Mu mikanda yende Petelo udi mumanye mua kusamba bantu ba Mukelenge Yesu mu makenga abo ne busambi buakadiye musambibua kudi Mukelenge ne bua kubasengelela bua kuikala badimuke.

 

Nakunufundila meyi makese mu bianza bia Siluano, undi mbala bu muanetu wa mu Kilisto udi mua kueyemenyibua, bua kunusengelela ne bua kunumanyisha ne, Ewu udi ngasa mulelela wa Nzambi; nujalamemu bikole. 5:12

  Siluano (anyi Sila) wakamanya makenga bua dina dia Kilisto pakadiye ne Paulo mu nzubu wa lukanu mu Filipoi. Petelo wakabala Siluano bu muanetu wa lulamatu. Bakakoleshangana mu mudimu wa Lumu Luimpe. “Bantu babidi badi bapita umue, bua bobo badi bapeta difutu dimpe ku mudimu wabo. Bualu bua biadishindabo, umue neabishe mukuende” (Muambi 4:9,10).

  Malu a mu mukanda ewu wa kumpala akadi mafunda bua kumanyisha bantu ba Nzambi ne, Ewu udi ngasa mulelela wa Nzambi; nujalamemu bikole. Malu aa adi akolesha mitshima yetu kabidi ne adi atusamba mu bikondo bia makenga.

 

Wa mu Babulona, musungula nenu, udi unuela muoyo, ne muananyi Mako udi unuela muoyo kabidi. 5:13

  Babulona wakadi musoko munene wa Bena Chaldea mu buloba bubikidibua lelu ne, Irak, kadi kale ne, Mesopotamia. Mu matuku a bapostolo ba Mukelenge, pakalua dituku dia Pentekoste, mu Yelushalema muakadi bantu bakuabo bafume ku Mesopotamia.

Bakumvua Lumu Luimpe mukana mua Petelo. Dituku adi bantu bu binunu bisatu bakitabuja Mukelenge. Tshiena ne mpata ne munkatshi mua bena kuitabuja bakadi Bena Babulona kabidi (Bienzedi 2:9,41).

 

Nuelangane muoyo ne kutuangana kua mishiku kua dinanga. Ditalala dikale kudi buonso buenu badi mu Kilisto. 5:14

 Kutuangana kua mishiku kua tshijila ne kua dinanga kuakadi tshilele tshia bena Kilisto ba kale, ne tshia bantu bakuabo mu maloba makuabo lelu  (2 Kolinto 13:12. 1 Tesalonike 5:26).

 Petelo udi ujikija mukanda wende ne “ditalala”. Petelo, mu diela dia muoyo kudi Bena Kilisto mu nshapita 1, wakafunda ne, “Ngasa ikale kunudi ne ditalala divulangana” (1 Petelo 1:2).

 Pashishe meyi ende a kunshikidilu mu mukanda wende adi ne, “Ditalala dikale kudi buonso buenu badi mu Kilisto”.

 

1)   Ditalala ne Nzambi didi dilonda dibingishibua dia ku ditabuja. Yesu, Mukelenge wetu, “wakafidibua ku lufu bua malu mabi etu, wakabishibua bua dibingishibua dietu. Nunku bualu bua tuakabingishibua ku ditabuja, tuikale ne ditalala ne Nzambi bua Mukelenge wetu Yesu Kilisto” (Lomo 4:25. 5:1).

2)  Ditalala dia Nzambi didi dilonda kudifila kuetu kua malu etu a ku dituku ku dituku mu bianza bia Nzambi ku ditendelela ne ku disengelela  (Filipoi 4:6,7).

3)  Nzambi wa Ditalala. Nzambi wetu udi Nzambi wa ditalala bualu bua Mukelenge Yesu Kilisto wakafuta dibanza dia muntu yonso udi umuitabuja. “Nzambi wa ditalala waka- bisha mulami munene wa mikoko munkatshi mua bafue kabidi ku mashi a dipungila dia tshiendelele, Mukelenge wetu Yesu mene, anuvuije bakane tshishiki mu bualu buimpe buonso bua kuenza bu mu disua diende, wenza munda muetu bualu budi buimpe ku mesu kuende bua Yesu Kilisto” (Ebelu 13:20). Nzambi wetu udi Nzambi wa ditalala bualu bua Mukelenge Yesu wakavuija ditalala ku mashi a ku mutshi wende mutshiamakane (Kolosai 1:20).

 

MUKANDA MUIBIDI WA PETELO

 

7        Mukanda Muibidi — Meyi a kumpala

 Mukanda wa Petelo wa kumpala wakadi mufundibue kudi Bena Yuda bakakadi bashikama mu maloba a bantu ba bende. Bakadi Bena Kilisto. Petelo udi ubabikila ne, “Bantu basungu- dibue kudi Nzambi, badi benyi bena tshimuangi”. Mu Mukanda wende Muibidi yeye kena ufundila bantu ba mu ekeleziya wa kaba kamue anyi bena kuitabuja ku luseke kampanda kadi udi ufunda kudi :

1)   Bantu bakuangata ditabuja dia mushinga mukole muomumue

      ne ditudi nadi (1:1).

2)   Badi “bana betu”, dibikidibua ne disungudibua (1:10).

3)   Bakadi bakengeshibua kudi bayishi ba mashimi  (2:1).

4)   Bakadi banangibue  (3:1,8,14,17).

 

Petelo wakadi mumonyi wa butumbi bua Mukelenge

 Petelo wakadi mumonyi wa bukole bua Mukelenge Yesu pamutu pa lufu ne masama onso. Wakadi mumonyi wa butumbi buende pa mukuna wa kukudimuka (Matayo 17:1-8). Wakadi nende pakadiye wendakana “mu bimenga bionso ne mu misoko mikese uyisha bantu mu nsunagoga yabo, ubambila bualu bua lumu luimpe lua bukelenge bua mu diulu, ukolesha bantu bakadi ne mabedi ne matekete onso” (Matayo 9:35). Petelo wakadi mumonyi wa makenga a Mukelenge wetu, wa lufu luende, wa dibika diende ne wa dibandishibua dia Mukelenge mu Diulu.

 Petelo biende wakakenga mu mudimu wa Lumu Luimpe bu muena mudimu wa kueyemenyibua. Wakadi wa kueyemenyibua too ne ku dituku diakadiye mushipibue kudi bantu babi.

 

Mukanda muibidi wa Petelo udi ufuanangane ne Mukanda wa Yuda

  Bu Petelo, Yuda wakafundila bena kuitabuja bua kukolesha mitshima yabo mu bualu bua Nzambi ne bua kubadimuja bualu bua malu adi alualua mu tshikondo tshia kunshikidilu. Mukanda Muibidi wa Tesalonike ne Mukanda Muibidi wa Timote bidi bia mushindu ewu.

 

8        Mukanda Muibidi — Nshapita 1

Simona Petelo, mupika ne mupostolo wa Yesu Kilisto kudi bantu  bakuangata ditabuja dia mushinga mukole muomumue ne ditudi nadi mu buakane bua Nzambi wetu ne bua Musungidi Yesu Kilisto. Ngasa ikale kunudi ne ditalala divulangana mu dimanya dijalama dia Nzambi ne dia Yesu, Mukelenge wetu. 1:1,2

       Simona Ba-yona, (Simona muana wa Yona) diakadi dina dia Petelo dia mu nzubu ne munkatshi mua balunda bende bakuabo bakadi Bena Yuda. Mukelenge Yesu wakamupesha dina dipia-dipia ne, “Petelo”, buena kuamba ne, “Dibue dikese”, Mukelenge Yesu nkayende udi Dibue Dinene (Matayo 16:18).

     Bu mupostolo wa Mukelenge, Petelo wakadi ne bukokeshi bua bungi, kadi udi usanka bua kubikidibua ne, Mupika wa Yesu Kilisto.

 

Mbu mudi bukole bua bunzambi buende, buakatupa bintu bionso bidi bua muoyo ne bua buimpe bua Nzambi, bualu bua kumanya kuetu kua yeye wakatubikila bua butumbi buende buine ne bua buimpe buende. 1:3

 Mbu mudi bukole buende, Nzambi wakatupa bintu bionso bitudi tukengela bua tuetu tuikale munemu bua butumbi buende ne bua kumanya kuetu kua yeye wakatupatula mu midima bua kutubueja mu munya wende wa dikema. “Tudi bamanye ne, Muana wa Nzambi wakumana kulua wakutupa meji bua tuetu tumumanye yeye udi wa bushuwa; ne tuetu tudi munda mua udi wa bushuwa, munda mua Muana wende Yesu Kilisto mene. Ewu udi Nzambi wa bushuwa, ne udi muoyo wa tshiendelele” (1 Yone 5:20).

 

Mu malu aa yeye wakutupa milayi yende ya mushinga mukole ne mitambe bunene; bua ku milayi eyi nuenu nulue baba-nyanganyi nende ba muoyo wa bunzambi, bamane kupanduka ku malu mabole adi mu buloba bualu bua nkuka mibi. 1:4

 Milayi ya Nzambi idi itusamba mu matuku a dikengela dietu. Idi ikolesha mitshima yetu palua malu makole. Kale Solomo wakadi

mua kuamba ne, “Nansha diyi dimue dia milayi yende mimpe yonso yakalayeye muntu wende Mose kadiakapona panshi pa-tupu” (1 Bakelenge 8:56). Bidi nunku too ne lelu.

     Petelo udi musue miaku “mushinga mukole”. Mukelenge Yesu wakadi wa mushinga mukole kudiye. Udi wamba bualu bua: “Ditabuja dia mushinga mukole” (1 Petelo 1:7. 2 Petelo 1:1).Tua- kapikudibua ku mashi a mushinga mukole” (1 Petelo 1:19). Mukelenge udi dibue didi ne muoyo, ndia mushinga mukole. “Nunku mushinga mukole wadi udi kunudi badi bamuitabuja” (1 Petelo 2:4,6,7). Muntu musokoma wa mu mutshima, mutshima wa kalolo ne ditalala, udi wa mushinga mukole ku mesu kua Nzambi  (1 Petelo 3:4). Milayi yende kabidi idi ya mushinga mukole ne mitambe bunene  (2 Petelo 1:4).

 

Ne bua bualu ebu, nuenu mene, panuavudija disuminyina dionso, ku ditabuja dienu nutentekaje buimpe; ne ku buimpe buenu nutentekaje lungenyi; ne ku lungenyi luenu nutentekaje didikanda; ne ku didikanda dienu nutentekaje didikankamika; ne ku didikankamika dienu nutentekaje buimpe bua Nzambi; ne ku buimpe bua Nzambi buenu nutentekaje dinangangana dia bana benu; ne ku dinangangana dienu dia bana benu, nu- tentekaje luse. 1:5-7

     Mukelenge, bu mudi bukole bua bunzambi buende, udi utupa bintu bionso bidi bua muoyo ne bua buimpe bua Nzambi. Muena kuitabuja udi muledibua tshiakabidi, udi ne muoyo mupia-mupia mpindiewu, udi mubanyanganyi nende wa muoyo wa bunzambi, kadi udi ne bua kudiunda mu muoyo ewu (Yone 1:12,13.  2 Kolinto 5:17. Galatia 4:6).

 

Malu adi mua kutukuatshisha bua kudiunda ne kukola mu muoyo wetu wa nyuma ne bua kukuama mamuma a Nyuma Muimpe.

 

Bua kudiunda

Mamuma a Nyuma

disuminyina dionso

dinanga

ditabuja

disanka

buimpe

ditalala

lungenyi

lutulu

didikanda

luse

didikankamika

buimpe

buimpe bua Nzambi

bunanukidi bua lulamatu

dinangangana dia bana benu

kudipuekesha

luse

kudikanda

2 Petelo1:5-7

Galatia  5:22,23

 

Bikala malu aa ngenu ne biavulanganawu, adi anuvuija kanuyi batuke ne kanuyi nupanga mamuma too ne ku dinanga dijalama dia Mukelenge wetu Yesu Kilisto. Kadi muntu udi kayi ne malu aa udi mufofo, utangila anu bidi pa buipi, muikale ne tshipua muoyo bua dilengesha dia ku malu mabi ende a diambedi. 1:8,9

  Mbualu butekete bua kupua muoyo ne, Tuakadi bafue mu malu mabi etu, katuyi ne Kilisto, katuyi ne ditekemena, katuyi ne Nzambi mu buloba ebu. Tuikale bu bena Kilisto ba kumpala, “Bobo bakananukila kuikala mu dilongesha dia bapostolo ne mu buobumue, ne mu kutshibula kua bidia ne mu kutendelela kua Nzambi. Bakadi batumbisha Nzambi, bakadi ne diakalengele kudi bantu bonso. Ku dituku ku dituku Mukelenge wakadi usangisha kudibo bakuabo bakadi basungidibua” (Bienzedi 2:42,47). Tudi ne dilongesha dia bapostolo mu Dipungila Dipia-dipia mu mikanda mifunda kudi ekeleziya ne kudi bantu bu Timote ne Tito.

  Mukelenge Yesu wakamba ne, “Meme ndi muonshi munene, nuenu nudi matamba; wikala munda muanyi, meme muikale munda muende, yeye neakuame mamuma a bungi; binuikala kanuyi nanyi, kanuena bamanye mua kuenza bualu”  (Yone 15:5).

 

Nunku, bana betu, nutambe kunanukila bua kujadika dibi- kidibua dienu ne disungula dienu; bua binuenza malu aa, kanuena nulenduka tshiendelele; bua nunku nebatambe kunu- kumbajila pa kubuelela mu bukelenge bua tshiendelele bua Mukelenge wetu, udi kabidi Musungidi Yesu Kilisto. 1:10,11

   Nzambi Tatu, mu ngasa, “wakatupandisha ku bukokeshi bua midima, wakatubueja mu bukelenge bua Muana wa dinanga diende” (Kolosai 1:13). Kadi Mukelenge neafute bantu bende bu mudi

mudimu wabo. Mu nsumuinu wa ntalanta tudi tubala ne, “Bukelenge bua mu diulu budi bu muntu wakamba kuya ku luseke lukuabo, wakabikila bantu bende, wakafila bintu biende mu bianza biabo … muntu bu mu lungenyi luende muntu bu mu lungenyi luende”. Pakapinganeye, wakabafuta bua kueyemenyi- bua kuabo, ke bualu bua lupetu lua mudimu wabo, ne meyi aa ne, “Bimpe, muana wanyi muimpe ne muntumikidi, wewe wakadi untumikila pawakadi pamutu pa bintu bikese, nenkuteke pamutu pa bintu bia bungi, buela mu disanka dia mukelenge webe” (Matayo 25:14-30). Mukelenge Yesu wakamba ne, “Tangila, ndi ndua lubilu; ne difutu dianyi didi nanyi, dia kupingishila kudi muntu ne muntu, bu mudi mudimu wende” (Buakabuluibua 22:12).

 

Nunku nengikale mudilongolole misangu yonso bua kunu-vuluija malu aa, nansha nuenu baamanye, ne nansha nuenu bajalame mu malu malelela anudi nawu. Ne ndi ngela meji ne, Bidi bimpe, pantshidi mu nzubu ewu wa mubidi bua meme kutabuluija mitshima yenu ku dinuvuluija dianyi; mumanye bianyi ne diumusha dia nzubu wanyi ewu wa mubidi dilualua lubilu bu muakandeja Mukelenge wetu Yesu Kilisto. 1:12-14

 Katataka Petelo udi mukulumpe, udi uvuluka meyi a Mukelenge kudiye ne, “Bulelela, bulelela, ndi nkuambila ne, Pawakadi nsongalume, wakadi udisuika mukaba, wakadi wenda-kana kuonso kuwakasua; kadi pawakulumpa, wewe newolole bianza biebe, mukuabo neakusuike mukaba, neakutuale kudi kuyi musue. Yesu wakamba diyi edi bua kumumanyisha lufu luatumbisheye nalu Nzambi. Pakambeye nunku, wakamuambila ne, Undonde” (Yone 21:18,19).

 Petelo udi mumanye ne, Dituku dia lufu luanyi didi pabuipi. Diambedi yeye kayi muanze kubikidibua kua Mukelenge udi musue  kutabuluija  mitshima  ya  bena Kilisto bualu bua malu a Nzambi bu muena mudimu wa kueyemenyibua. Yeye biende wakalonda Mfumu wende too ne ku lufu.

 

E, nenanukile bua nuenu numanye mua kuvuluka malu aa misangu yonso pangikala mumane kufua. Bualu bua tuetu katua-

kalonda nsumuinu yakambabo ku budimu bua bantu patuakanumanyisha bua bukole ne bua dilua bia Mukelenge wetu Yesu Kilisto, kadi tuetu tuakadi bamonyi ba butumbi buende ku mesu etu. 1:15,16

     Petelo wakadi mumonyi wa makenga a Kilisto ne wa butumbi buende kabidi. Yeye wakadi ne Mukelenge mu ngendu yende ne Lumu Luimpe.  Wakadi mumonyi wa bukole bua Mukelenge bua kuondapa bantu. Dituku dikuabo Mukelenge Yesu wakakolesha muku wende mukaji mu nzubu wende. Munganga munanga, Luka, udi utuambila ne, Mukaji wakadi ne mubidi wende mukuatshike kapia ka bungi. Mukelenge wakakandika disama dia kapia; diakamulekela; yeye wakabika lukasa, wakabalongoluela bia kudia”  (Luka  4:38,39).

     Petelo wakatangila butumbi bua Mukelenge pakadiye nende pa mukuna wa kukudimuka kuende (Matayo 17:1-8). Bumonyi buende ne bumonyi bua bayidi bakuabo bidi bijadika ne, Malu onso adi mafunda mu Mukanda wa Nzambi, bualu bua Mukelenge wetu Yesu Kilisto, adi malelela. Bualu ebu budi bua mushinga mukole kutudi mu dituku dia bupidia bua bantu bua kuitabuja Diyi dia Nzambi.

 

Bualu bua yeye wakangata buneme ne butumbi kudi Nzambi Tatu pakalua diyi dia nunku kudiye munkatshi mua Butumbi bua Buneme ne, Ewu udi Muana wanyi munanga, disanka dianyi dionso didi kudiye; ne tuetu tuakunvua diyi edi difuma mu diulu patuakadi nende ku mukuna awu wa tshijila. 1:17,18

     Petelo udi wamba bualu bua kukudimuka kua Mukelenge pa mukuna mule. “Yeye wakakudimuka ku mesu kuabo; mpala wende wakaditemena bu diba, bilulu biende biakatoka bu munya”. Mose ne Eliya bakamueneka kudibo, bakayikila ne Mukelenge.  Petelo,  Yakoba  ne  Yone bakumvua diyi diakalu-puka mu ditutu ne, “Ewu udi Muana wanyi munanga, yeye udi unsankisha bimpe, mumvuilayi” (Matayo 17:1-8).

     Bamonyi bakadi basatu, kadi Mose ne Eliya bakadiku kabidi.  Mose udi uleja bantu ba Nzambi bakafua mu ditabuja kale. Eliya,wangatshibua mu diulu ne muoyo, udi uleja bena kuitabuja batshidi ne muoyo palua Mukelenge bua kuangata bantu bende (1 Tesalonike 4:13-18).

  Mu mikanda yende ibidi Petelo udi utuambila bualu bua dilua dia Mukelenge mu butumbi buende bua kukokesha, Paulo udi utuambila bualu bua dilua dia Mukelenge bua kuangata Ekeleziya wende diambedi dituku adi kadiyi dianze kulua (1 Tesalonike nshapita 4 ne Buakabuluibua nshapita 19).

 

Ne tudi ne diyi diakamba baprofete ditamba kujadikibua; nunku nudi nuenza bimpe binuadimuka bienu, bu mudibu kudi muinda udi utema mu muaba wa midima, too ne patshia butuku ne pabanda mutoto wa nkesha mu mitshima yenu; numanye bualu ebu diambedi ne, Kakuena diyisha dia baprofete dia mu Mukanda wa Nzambi didi difuma ku dijingulula dia muntu. Bualu bua kakuena diyisha dia baprofete diakanza kulua ku disua dia muntu; kadi bantu bakamba diyi dia kudi Nzambi benzeja kudi Nyuma Muimpe. 1:19-21

 Patudi ne Mukanda wa Nzambi mu bianza bietu lelu tudi mua kuamba ne; Tudi ne Diyi dia Nzambi udi ne muoyo mu bianza bietu. Diyi dia Nzambi didi ne muoyo ne bukole (Ebelu 4:12).

     Paulo wakafundila Timote ne, “Ku buana buebe wewe wakamanya Mukanda wa Nzambi, udi mumanye mua kukuvuija muena meji too ne ku lupandu luakulua bua ditabuja dia mu Kilisto Yesu. Diyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe bua kuyisha bantu, ne wa kubabela, ne wa kubadimuja, ne wa kubalongesha mu buakane bua Nzambi; bua muntu wa Nzambi ikale mukumbajibue, mulongolola tshishiki bua midimu yonso mimpe” (2 Timote 3:15-17).

     Diyi diakamba baprofete didi bu muinda udi utema mu muaba wa midima. Butuku budi buamba bua matuku etu, Mukelenge Yesu kenaku, kadi patshia butuku, Mukelenge nealue bu mutoto wa nkesha. “Tudi bamanye ne, Biamueneshibueye, netuikale bafuanangane nende; bualu bua netumumone bu mudiye” (1 Yone 3:2).

 

9        Mukanda Muibidi — Nshapita 2

Kadi baprofete ba mashimi bakabika munkatshi mua bantu kabidi, bu mudi bayishi ba mashimi balua kubika munkatshi muenu, nebalue mu musokoko ne malu manutapulule ku dibutuka, bavila Mukelenge wakabapikula, badivuijila dibu-tuka dia lukasa. Bantu ba bungi nebalonde bienzenza biabo bia masandi; bua bualu buabo njila wa bushuwa neapendibue. Bualu bua lukuka lua biuma bobo nebendulule nenu mushinga ne meyi a mashimi; dipila diabo diakabapishabo nadi kale kadiena dishanguluka, ne dibutuka diabo kadiena dilala tulu. 2:1-3

   Tudi tumona mu nshapita 2 ne bayishi ba mashimi bakabuela too ne munkatshi mua bantu ba Nzambi. Badi babikila malu mabi malu mimpe. Kabena bitabuja bukokeshi bua Mukanda wa Nzambi. Badi ne “tshimuenekelu tshia buimpe bua Nzambi, kadi bamane kudiula bukole buabu; umuke biebe kudi bantu aba kabidi” (2 Timote 3:5). Kabena bitabuja ne “Diyi dionso dia mu Mukanda wa Nzambi didi difuma munda mua Nzambi bu mupuya wende”. Bayishi aba badi badileja bu bena meji. Bantu ba bungi bitabuja meyi abo a mashimi, badi babalonda mu njila wabo wa kabutu.

 

Bualu bua bikala Nzambi kayi muengeleke banjelo pakenzabo bibi, kadi yeye wakabela mu Ngena ne wakabafila mu nyongola ya midima, bua balamibuemu too ne ku dibalumbuishibua diabo; ne bikalaye kayi muengeleke ba pa buloba ba kale, kadi wakalama Noa, muambi wa malu mimpe ne bantu bakuabo muanda mutekete pakatumeye mayi manene pa buloba bua bantu babi; ne pakandamusheye misoko ya Sodoma ne Amola butue bua kapia, wakayipisha ne dibutuka, wakayivuija bu tshifuanyikiji kudi bantu balualua kupidia Nzambi.  2:4-6

     Kale kale kulumbulula kuakapona pamutu pa banjelo bakato- mbokela Nzambi. Badi balamibua mu nyongola ya midima bindile diambuluisha diabo. (Banjelo bakuabo bakatombokela Nzambi ba- diku, badi bena mudimu ba Satana kadi Nzambi neabalumbuluishe

palua tshikondo tshiende).

     Mu matuku a Noa, “Yehowa wakamona ne, Mibi ya bantu idi idiundadiunda munkatshi mua ba pa buloba ne meji adibo bela mu mitshima yabo adi mabi matuku onso” (Genese 6:5). Bakadi  bumushibua pa buloba bua kuindila tshilumbuluidi tshia kunshikidilu (Buakabuluibua 20:11-15).

  Nzambi wakavuija misoko ya Sodoma ne Amola bu tshifuanyikiji tshia tshiji tshiende kudi bantu balualua kupidia Nzambi. Mu matuku etu ku luseke lua ku Wesete, balombodi bakuabo ba mbulamatadi ne balombodi bakuabo ne bukokeshi bua bungi mu buena Kilisto badi bitabuja bilele bia Sodoma. Badi bamba ne malu adi mafunda bualu bua Sodoma ne bua Noa adi afuma ku nsumuinu ya kale. Bualu bua tshilejilu tshiabo bakuabo badi babalonda mu njila yabo mibi. Mukanda wa Nzambi udi wamba ne malu aa nealue mu matuku a kunshikidilu a tshikondo etshi.

 

Nzambi wakapandisha Lota, muntu muakane, pakadiye mu-tatshishibue ku bienzedi bia bundu bia bashipi ba mikenji; (bualu bua muntu ewu muakane mushikame munkatshi muabo, mu dimona diende ne mu diumvua diende wakadi unyingalaja mutshima wende muakane ku dituku ku dituku ne bienzedi bia bantombueshi). 2:7,8

     Petelo udi utuambila ne, Lota wakadi muntu muakane. Diambedi yeye kayi muanze kushikama mu Sodoma wakenda ne Abalahama.  Kadi Lota wakalekela Abalahama mu buloba bua Kanana. “Lota wakashikama mu misoko ya mu mpata; waka-shikamika ntenta yende too ne ku Sodoma. Bantu ba Sodoma bakadi babi, bakatamba  kupidia  Yehowa”  (Genese 13:12,13). Pa- shishe yeye wakadi ushikama ku tshibi tshia ku Sodoma, bu muntu wa bukokeshi mu musoko. Diambedi Nzambi kayi muanze kulumbuluisha Sodoma banjelo babidi bakalua ku musoko bua kumupandisha. Lota wakajanguluka, banjelo bakamukuata ku tshianza tshiende, ne tshianza tshia mukaji wende, ne bianza bia bana bende bakaji babidi. Pakayabo nabo pa bule, umue wabo wakamba ne, “Nyema lubilu, bua kupandisha muoyo webe; kutangidi kunyima kuebe, kushadi pa mpata, nyema ku mikuna, kufu biebe” (Genese 19:17).

  Lota wakajimija bintu bionso bikadiye nabi mu Sodoma. Mukaji wende wakafua bualu bua bupidia buende, bana ba bakaji bende bakadi bankambua bua Bena Moaba ne Bena Amola, bena lukuna ba bantu ba Nzambi. Udi tshifuanyikiji tshia muena kuitabuja udi ulekela njila ya Nzambi bua kuenda mu njila ya bantu babi. Nzambi wakapandisha muoyo wende kadi yeye biende wakakenga bikole bualu bua bienzedi biende.

  Mukanda wa Nzambi udi wamba ne, “Kakuena dipila mpindiewu kudi badi mu Kilisto Yesu” (Lomo 8:1). Kadi udi wamba kabidi ne, “Bituikala badijingulule munda muetu, ka- bakadi ne bualu bua kutulumbuluisha. Kadi patulumbuluishabo, tudi tukengeshibua kudi Mukelenge bu bana bende, bua tuetu katupishibu popamue ne ba pa buloba” (1 Kolinto 11:31,32).

 

Mukelenge udi mumanye mua kupandisha bantu bende bimpe mu mateyi abo, ne mua kulama bantu babi mu dikenga too ne palua dituku dia kulumbulula. 2:9

 Muana mukese wa bakaji wakidikija tshifuanyikiji tshiende pa dibeji, wakafunda muinshi mua tshifuanyikiji tshiende ne, “Ndi wa mushinga mukole ku mesu kua Nzambi”. Muena kuitabuja yonso udi wa mushinga mukole kudi Nzambi !

 Bena kuitabuja badi balamibua ku bukole bua Nzambi. Badi ne bupianyi budi kabuyi bubola, budi kabuyi bunyanguka, budi kabuyi bufubidila, buakatekibua mu Diulu bua bualu buabo (Petelo 1:4,5).

“Mukelenge Yesu wakamba ne, “Mikoko yanyi idi yumvua diyi dianyi, ndi muyimanye, idi indonda; ndi nyipa muoyo wa tshiendelele; kayena ifua tshiendelele, kakuena mukuabo udi winyenga mu tshianza tshianyi. Tatu wakuyimpa udi mutambe bonso bukole, kakuena wayinyenga mu tshianza tshia Tatu” (Yone 10 27-29).

    “Mesu a Yehowa adi kudi bakane, ne matshu ende adi buashi ku

kudila kuabo … Yehowa udi pa buipi ne bantu badi ne mitshima idi itamba kunyingalala, udi usungila badi ne mitshima ya majia. Makenga a muntu muakane adi a bungi; kadi Yehowa udi umusungila ku buonso buawu” (Musambu 34:15,18,19).

  Nzambi udi Nzambi wa luse ne Nzambi wa busambi buonso, kadi Yeye kabidi udi Nzambi wa tshijila. Budiye nabu mbua kulumbuluisha bantu bua bupidia buabo. Nzambi kena ulumbuluisha bantu ku lukasa, udi ubabikila mu luse bua ku- kudimuna mitshima yabo. Kadi mukenji wa Lumu Luimpe ludi ne, “Lelu binumvua diyi diende, kanukoleshi mitshima yenu. Monayi, katataka ntshikondo tshimpe, monayi, katataka ndituku dia lupandu” (Ebelu 4:7.  2 Kolinto 6:2).

 

Mukelenge udi utamba kukengesha bantu badi balonda malu a mubidi mu lukuka ludi lubabipisha, ne badi bapetula bukokeshi. Badi bena dikamakama ne badisu, kabena bazakala pakapendabo badi ne butumbi; kadi banjelo, badi babapita bunene ne bukole, kabena balua ne dipisha didi dibapenda ku mpala kua Mukelenge. Kadi bayishi aba, bu badi kabayi ne meji, baledibua bu nyama mene, bua kuyikuatabo ne bua kuyishipabo, badi bapendi mu malu adibo kabayi bamanye, mu dijimija diabo nebajimijibue bulelela.  2:10-12

  Lelu bantu bakuabo kabena banemeka badi ne bukokeshi ne badi ne butumbi, badi baditumbisha mu kushipa kuabo kua mikenji ya mbulamatadi. Mukanda wa Nzambi udi wamba ne, “Muntu yonso aditeke kunyima kua bakokeshi badi ku mutu kuende. Bua kakuena bukokeshi budi kabuyi bulua kudi Nzambi; ne makokeshi adiku akajadikibua kudi Nzambi. Nunku muntu udi upidia kudikokela kudi bukokeshi udi upidia meyi majadikibue kudi Nzambi. Badi bapidia nunku nebadiangatshile dilumbu- luisha. Bualu bua bakokeshi kabena bavuija buowa kudi benji ba malu mimpe, kadi anu kudi benji ba malu mabi” (Lomo 13:1-3).

  Bikala bantu bapidia mikenji ya mbulamatadi, Malu makole adi alonda butomboka buabo, malu mabuelakane, buivi ne kushipangana. Makenga, kanyinganyinga ne dibunguma bidi bilonda lubila mu makasa abo.

 

Badi bakengeshibua bu difutu dia kuenza kua malu mabi abo; bantu badi babala kutamba kudia kuabo ne kunua kuabo kua mu munya bu disanka; badi matobe ne bilema, batamba kudia ne kunua ku bidia bia dinanga padiabo nenu; badi ne mesu mule tente ne masandi, ne adi kayi mamanye mua kulekela malu mabi; badi balobesha badi ne mitshima mitekete; badi ne mitshima yabo mibidila mu lukuka; badi bana badi ne mulawu. 2:13,14

 Yuda udi wamba bualu bua bantu ba mushindu awu ne, “Aba mbobo badi mabue masokome mu masanka a bidia bia dinanga padiabo nenu; badi balami ba mikoko badi badidisha kabayi ne ditshina; badi matutu adi kayi ne mvula matuala kumpala kudi tshipepele; badi mitshi ya mu mushipu idi kayi ne mamuma, mifue misangu ibidi mijudibue ne miji; badi mavuala makole a mu mayi manene adi enza ntutu ya malu abo mine a bundu; badi mitoto idi yendakana mulu, yakatekelabo bufike bua midima tshiendelele” (Yuda 12,13).

Pakalekelabo njila mululame, bakapambuka, bamane kulonda njila wa Belama, muana wa Beo, wakasua difutu dia bienzedi bibi; kadi yeye wakadi mubedibue bua malu mabi ende; mpundu wakadi kamama wakakula mukana bu muntu, wakakanda bupote bua muprofete. 2:15,16

  Mvese eyi ibidi ituleja malu anayi bualu bua bayishi ba mashimi. 1) Balekelabo njila mulalame. 2) Bakapambuka. 3) Badi balonda mu njila wa Belama. 4) Badi basua difutu dia bienzedi bibi. Belama wakadileja bu muambi wa Nzambi kadi tshiji tshiakakuata Nzambi pakayeye bua kuelela bantu ba Nzambi mulawu. Muanjelo wa Yehowa wakaditeka mu njila bu mupumbishi wende. Nyama wa mpunda wende wakatangila muanjelo wa Yehowa, wakalala panshi muinshi mua Belama; tshiji tshiakuata Belama, wakakuma mpunda ne mulangala wende. Yehowa wakabulula mukana mua mpunda, nyama wa mpunda wakakandika bupote bua muprofete ewu mubi (Nomba nshapita 22).

     Pakadi mupostolo Yone mukulumpe, yeye wakafunda bualu bua ekeleziya wa ku Pegamo ne, “Udi ne bakuabo apa badi balamata diyisha dia Belama wakayisha Balaka bua kutekeye tshilenduishi kumpala kua Bena Isalele, bua kudiabo bintu bishipela mpingu ne bua kuendabo masandi” (Buakabuluibua 2:14).

  Kunshikidilu kua Belama kuakadi kukole, yeye wakadi mushipibua pakadiye ne bena lukuna ba bantu ba Nzambi. “Bena Isalele bakamushipa ne muele wa mvita munkatshi mua bantu bakuabo bakashipabo”  (Yoshua 13: 22).

 

Aba badi mishimi kayi ne mayi; badi bu dibungi dipata kudi tshipepele tshikole; kudibo babatekela bufike bua midima. Bualu bua padibo bakula meyi manene a diambu, ku bienzedi biabo bia masandi, badi balobesha bakuabo mu nkuka ya mubidi, mbobo badi bamba kupanduka kudi badi balonda dipambuka; badi babalaya budishikaminyi, padi bobo bine bapika ba malu mabole; bualu bua muntu udi mubueja mu bupika kudi tshidiye mutambibue bukole. 2:17-19

  Badingi ba bungi badi ne ludimi lupepele. Badi bamanye mua kuangata bantu bua kuitaba diyisha dibi. Bakuabo, bu Belama, badi bayisha bakuabo bua kuteka bilenduishi kumpala kua bantu ba Nzambi. Badi bitabuja masandi ne malu mabi makuabo bu bubi bua Sodoma. Mukanda wa Nzambi udi wamba ne, “Bu muakapidiabo kuikala ne Nzambi mu meji abo, nunku Nzambi wakabafila ku meji a patupu akapidieye, bua kuenzabo malu adi kayi makanangane ne lungenyi” (Lomo 1:28).

 

Bualu bua, pakamanabo kupanduka mu malu a pa buloba, kumanya kuabo kua Mukelenge ne Musungidi, Yesu Kilisto, biakuatshibuabo mu malu aa kabidi ne biatambibuabo bukole, tshikadilu tshiabo tshia kunshikidilu tshidi tshitamba tshia kumudilu bubi. Biakadi bitamba buimpe bua bobo kabayi banze kumanya njila wa buakane, ne pakamumanyabo, bua bobo kuela nyima ku mukenji wa tshijila wakabelelabo. Bualu buakulua kudibo bu mudi lusumuinu lulelela luamba ne, Mbua mupingane ku bilushi biende kabidi, ne ngulube mumane kuowa wakapingana kudibonda mu bitapikidi. 2:20-22

 Paulo wakafunda ne, “Bantu babi ne badingi ba bakuabo nebadiundadiunde mu malu mabi abo matuku onso, badinga-ngana, badingibua” (2 Timote 3:13).

 Satana udi mukokeshi wa buloba ebu. Udi “mukelenge wa bukokeshi bua mu lupepele … nyuma udi wenzeja katataka munkatshi mua bana ba bupidia” (Efeso 2:2).

 Mupostolo Paulo udi utupesha mayisha mimpe adi mua kulama mitshima yetu mu dituku dibi: “Kadi wewe, muntu wa Nzambi, nyema malu aa; londa malu makane ne a buimpe bua Nzambi ne ditabuja ne dinanga ne ditantamana ne kalolo. Uluangane mvita mimpe ya ditabuja, ulamate ku muoyo wa tshiendelele, kuwakabikidibua ne kuwakitabujila Yesu ne dijukula dimpe ku mesu kua bamanyi ba bungi. Wewe Timote, ulame tshiakakupebua; epuka ku biakulakula bia patupu ne ku mpata ya bantu badi ne lungenyi ludibo batupakana ne, Ndulelela; bakuabo pakitabujabo lungenyi elu, bakapambuka bualu bua ditabuja. Ngasa ikale nenu” (1 Timote 6:11,12,20,21).

 

10  Mukanda Muibidi — Nshapita 3

Bananga, ewu mukanda muibidi katataka undi nufundila; mu bubidi buayi ndi ntabuluija mitshima yenu miakane bua kunuvuluija bua nuenu kuvuluka meyi akambibua diambedi kudi baprofete ba tshijila, ne mukenji wa Mukelenge ne Mu-sungidi wakanuambileye kudi bapostolo benu. 3:1,2

   Petelo udi ne bujitu pambidi pende. Mu nshapita 2 wakamba bualu bua bayishi ba mashimi, udi musue kutabuluija mitshima ya bantu ba Nzambi bua buonso buabo bikalabo badimuke, bua kutangila ku Diyi dia Nzambi diambibua mukana mua baprofete ba tshijila ne bapostolo, bu mudi mukenji wa Mukelenge, bua kubalombola mu malu onso a muoyo wabo.

 Mayisha mabi adi adiundadiunda, butudi nabu mbua kuikala badimuke.  Tuikale  bu  Bena  Beloya, “bakitabuja  diyi  ne  mitshima

mimane kulongolola; bakadi badikebela mu Mukanda wa Nzambi ku dituku ku dituku ne, Malu aa adi malelela, anyi? (Bienzedi 17:11). Katuena ne bukokeshi bukuabo budi pamutu pa Diyi dia Nzambi! Kadiena dishintulula. “Mashinde adi afubidila, tshi-longo tshidi tshitutuka; kadi diyi dia Nzambi wetu nedijalame tshiendelele” (Yeshaya 40:8).

 

Numanye bienu bualu ebu kumpala ne, Palua kunshikidilu kua matuku, baseki nebalue ne tuseku tuabo, benda bu mudi nkuka yabo mene, bamba kabidi ne, Mulayi wa dilua diende udi panyi? Bualu bua katshiya batatu balala tulu, malu onso adi ashala momumue bu muakadiwu ku tshibangidilu tshia bufuki. 3:3,4

 Meji a baseki ba lelu adi muomumue ne meji a bantu babi ba kale, bakambila Nzambi ne, “Umuka kutudi; bakakonka ne, Wa Bukole Buonso udi mua kutuenzela tshinyi?” (Yobo 22:17). Badi basue kuikala ne budishikaminyi bua kuenda bu mudi nkuka yabo. Badi batela dina dia Nzambi tshitelatela. Bana babo kabidi badi batela dina dia Nzambi tshitelatela bu baledi babo, kabena bajingulula meyi adibo bamba. Baseki kabena bajingulula ne badi bapika ba Satana, nzambi wa tshikondo etshi, udi ufofomija mesu a meji a badi kabayi bitabuja, “bua dinkenka dia lumu luimpe lua butumbi bua Kilisto, udi tshifuanyikiji tshia Nzambi, kaditema kudibo” (2 Kolinto 4:4).

 

Bua bobo badi basue kupua muoyo bua bualu ebu ne, Diulu diakadiku kale, ne buloba buakakuatakashibua bua mu mayi bufume mu mayi bua diyi dia Nzambi; bualu bua mayi aa, buloba abu buakadiku mu tshikondo atshi buakabuikidibua ne mayi,  buakajimina.  Kadi  bua  diyi  diodiumue  diulu didiku katataka ne buloba kabidi biakabutshidibua bua kupia ne kapia bilamibue too ne ku dituku dia dilumbulula ne dia dibutuka dia bantu badi babenga Nzambi. 3:5-7

 Bantu ba bungi badi basue kupua muoyo bua malu aa. Diyi dia Nzambi didi dilelela bualu bua Noa ne mayi manene nunku bena bupidia ba luse lua Nzambi ne lupandu luende lunene nebalue

muinshi mua tshiji ne kulumbulula bia Nzambi. Muomumue kabena

bitabuja ne, Nzambi wakabutula Sodoma, musoko wa bantu bakatamba kupidia Nzambi. Badi bamba ne malu aa adi nsumuinu ya bantu ba kale. Bantu aba, “Pakadiambabo ne, Tudi bena lu- ngenyi, bakalua bapote” (Lomo 1:22). Mukelenge Yesu waka- mbila bayidi bende ne, “Mu matuku a Lota; bakadi badia, bakadi banua, bakadi basumba, bakadi bapana, bakadi bakuna, bakadi bibaka; kadi dituku diakapatuka Lota mu Sodoma, kapia ne soufre biakafuma mulu, biakabashipa bonso; bualu nebuikale nunku palua dituku dimueneka Muana wa muntu” (Luka 17:28-30).

 

Kadi bananga, kanupu muoyo bua bualu ebu bumue ne, Dituku dimue kudi Mukelenge didi bu bidimu tshinunu, ne bidimu tshinunu bidi bu dituku dimue. Mukelenge kena ushanguluka bua kushikijeye milayi yende, bu mudi bakuabo babala dishanguluka; kadi udi nenu lutulu, kena musue umue wenu ajimine, kadi udi musue bonso balue kukudimuna mitshima yabo. 3:8,9

 Nzambi udi mubanji mu luse. Yeye wakindila matuku a bungi mu matuku a Noa diambedi yeye kayi muanze kulumbuluisha ba pa buloba ba tshikondo atshi. Bakuabo badi bela meji ne mvese wa mu Genese 6:3 udi wamba bua matuku aa. “Yehowa wakamba ne, Nyuma wanyi kena utendekena bantu tshiendelele, bualu bua badi anu ba pa buloba, ne matuku abo neikale bidimu lukama ne makumi abidi”. Bidi bimueneka ne mu bidimu ebu Noa waka- manyisha bantu bualu bua njila wa kupanduka tshiji tshia Nzambi tshiakadi tshilualua. Nzambi utshidi windila. “Nzambi Musungidi wetu … udi musue bantu bonso basungidibue, bafike ku dimanya dia malu malelela” (1 Timote 2:3,4).

 

Kadi dituku dia Mukelenge dilualua bu mudi muibi; mu dituku adi diulu nedijimine ne diyoyo dinene, ne bintu bia mu diulu nebifingutuke ne kapia kakole, ne buloba ne bintu bidimu nebipie. Bualu bua bintu ebi bionso bidi bijimina nunku, bunudi nabu mbua kuikala bantu ba mushindu kayi mu bienzedi bia tshijila ne bia Nzambi.  3:10,11

     Musangu mukuabo Petelo wakavuluka meyi a Mukelenge kudi bayidi bayende, ne, “Diulu ne buloba nebijimine, kadi meyi anyi kaena ajimina. Kadi bua dituku adi ne pa diba adi kakuena muntu udi mumanye, banjelo mene mene ba mu diulu kabena bamanye, Muana kena mumanye, anu Tatu udi mumanye. Kulua kua Muana wa muntu nekuikale bu muakadi pa matuku a Noa. Pa matuku awu, mvula ya bungi kayi mianze kulua, bantu bakadi badia, bakadi banua, bakadi babaka, bakadi babakibua too ne pakalua dituku diakabuela Noa mu buatu bunene, kabakamanya bualu too ne pakalua mvula ya bungi kubabutula; kulua kua Muana wa muntu nekuikale nunku … Dimukayi, bualu bua kanuena bamanye dituku dialua Mukelenge wenu” (Matayo 24:36-42).

 

Panudi nutekemena ne panudi nuendesha lukasa dilua dia dituku dia Nzambi? Bua bualu buadi diulu diakukuata kapia nedijimine ne bintu bidimu nebienguluke ne kapia kakole. Kadi bu mudi mulayi wende tudi tutekemena diulu dipia-dipia ne buloba bupia-bupia mudi buakane buikalemu. 3:12,13

 Mu Mukanda wa Nzambi, “Dituku dia Mukelenge” (3:10) didi dituku dikole be. Didi dituku dia kulumbulula ne tshiji tshikole bualu bua bubi. “Bualu bua Yehowa wa misumba udi ne dituku didiye ulumbuluisha bifukibua bionso bidi biditumbisha ne bidi bidisue, ne tshifukibua tshionso tshidi tshidibandisha; nebipue-keshibue” (Yeshaya 2:12. 34:8). “Dituku dia Kilisto” didi bualu bukuabo (Filipoi 1:6,10. 2:16. 1 Kolinto 1:8).

 Yeshaya wakafunda bualu bua diulu dipia-dipia ne buloba bupia-bupia. Mukelenge Yehowa udi wamba ne, “Bua monayi, ndi nfuka diulu dipia-dipia ne buloba bupia-bupia; malu a dia-mbedi kaena avulukibua, ne malu aa kaena abuela mu mitshima kabidi” (Yeshaya 65:17).

 Tudi tubala bualu bua diulu dipia-dipia ne buloba bupia-bupia ne, “Tangilayi, nzubu wa tshilulu tshia Nzambi udi munkatshi mua bantu, ne yeye neikale nabo, ne bobo nebikale bantu bende; ne Nzambi muine neikale nabo, neikale Nzambi wabo, Yeye neakupule tshinsonshi tshionso ku mesu kuabo;  ne lufu kaluena

luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka. Yeye udi ushikama pa nkuasa wa butumbi, wakamba ne, Mona, ndi nvuija bintu bionso bipia-bipia. Yeye wakuamba ne, Funda; bualu bua meyi aa adi meyi a kueyemena ne malelela” (Buak. 21:3-5).

 

Tshikondo  tshia bukokeshi bua Mukelenge pamutu pa buloba

  Diambedi dibutuka dia buloba buetu ku kapia kadiyi dianze kulua Mukelenge Yesu neakokeshe pamutu pa buloba bua bidimu tshinunu. Satana neikale musuikibua bua bidimu ebi “bua yeye kadingi bisamba bia bantu kabidi; too ne ku pashika bidimu tshinunu; kunyima kua bualu ebu budiye nabu mbua kusuludibua tshitupa tshipi” (Buakabuluibua 20:2-3).

  Ku tshikondo tshia bukokeshi bua Mukelenge yeye neako-keshe bisamba bionso ne dikombo dia tshiamu. Tudi tubala ne, ”Monayi, mukelenge neakokeshe mu buakane, ne bakokeshi nebakokeshe mu kulumbulula kuakane” (Yeshaya 32:1)

  Kunshikidilu kua tshikondo atshi, Satana nealekedibue mu nzubu wende wa lukanu, yeye neadinge bantu kabidi, bakuabo nebatombokele Nzambi, kadi kapia nekapueke kafuma mu diulu, nekabashidishe (Buakabuluibua 20:9). Kunyima kua malu aa, mu tshiakadilu tshia tshiendelele, mu diulu dipia-dipia ne buloba bupia-bupia, buakane nebuikalemu. Bintu bionso nebikale bipia-bipia.

 

Nunku, bananga, bualu bua nudi nutekemena malu aa, na- nukilayi bua banusangane mu ditalala kanuyi ne katobe, kanuyi ne kadiwu kudiye. 3:14

 Dimanya dia malu aa nedikoleshe mitshima yetu bua kuikala munda mutoke ne katuyi ne kalema ku mesu kua Mukelenge.

 Mukelenge Yesu wakatushila tshilejilu bua tuetu tumulonde mu makasa ende.Nulengeshibue tshishiki, nusambibue, nuikale ne meji amue, nuikalangane talala; ne Nzambi wa dinanga ne ditalala neikale nenu” (2 Kolinto 13:11).

 

Numanye ne, Lutulu lua Mukelenge wetu ndupandu; bu mudi muanetu munanga Paulo kabidi, bua lungenyi luakamupabo, wakanufundila; bu mudiye wenza kabidi mu mikanda yende yonso wambamu bua malu aa, munda muayi mudi manga malu adi makole pa kuajingulula, adi bantu badi kabayi bayishibue ne ba mitshima mitekete bakonyangaja meyi, bu mudibo benzela meyi makuabo mu Mukanda wa Nzambi, bua dibutuka diabo. 3:15,16

 Mukelenge wetu utshidi windila mu lutulu. Udi musue bantu bonso balue ku dimanya dia bualu bua bushuwa. Kena usanka bua lufu lua muntu mubi, kadi Mukelenge budiye nabu mbua kulumbuluija bena bupidia. “Nzambi wakatamba kusua ba pa buloba, yeye wakabapa, Muanende umuepele mulela bua muntu yonso wamuitabuja kafu biende, kadi ikale ne muoyo wa tshiendelele. Udi witabuja Muana udi ne muoyo wa tshiendelele; kadi udi upidia Muana kena umona muoyo, tshiji tshia Nzambi tshidi tshishala nende” (Yone 3:16,36).

 Paulo wakambila Tito ne, “Bena bupidia ba bungi ne bena biakulakula, ne bena mashimi badiku … budibo nabu mbua ku- buikidishibua mishiku yabo; bobo badi bona ditabuja dia bena nzubu mijima, bayisha bantu malu adibo kabayi ne bualu bua kubayisha, bua kupetabo biuma bibipe” (Tito 1:10,11).

  Mbidi bualu bukole bua kukonyangaja meyi adi mu Mukanda wa Nzambi. Paulo wakasengelela Timote bua kuambila bantu bikole ku mesu kua Nzambi “bua bobo kabatandanganyi bualu bua meyi adi kaayi ne mudimu ne adi apambuisha bantu badi baumvua … epuka ku biakulakula bia patupu; bualu bua benabi nebatambe kudiunda mu malu adi kayi anemekela Nzambi; ne meyi abo neavulangane bu mputu wa lubangu; Humenayo ne Fileto badi munkatshi muabo; bobo bakamana kupambuka mu njila wa meyi malelela, bamba ne, Kubika kua bantu ku lufu kuakumana kulua, ne badi banyanga ditabuja dia bakuabo” (2 Timote 2:14-18).

 

Nunku, nuenu bananga, bualu bua nudi nudianjila kumanya malu aa, dimukayi bua, panuapambuishibua ku mashimi a bantu babi, kanulamuki ku dijadikibua dienu dine.  3:17

 Meyi a kunshikidilu a Petelo adi meyi a dinanga. Misangu inayi tudi ne muaku “bananga” mu nshapita ewu wa kunshi-kidilu. Kadi udi musue kudimuja bantu ba Nzambi kabidi bualu bua mayisha a bayishi bakadi badingi. Petelo wakamanya njila yabo bimpe. Yeye wakamana kufunda ne, “bantu ba bungi nebalonde bienzenza biabo bia masandi; bua bualu buabo njila wa bushuwa neapendibue” (2 Petelo 2:2). Nuimane bajalame mu Mukelenge, bananga banyi”  (Filipoi 4:1).

Kadi nudiunde mu ngasa ne mu dimanya bia Mukelenge wetu ne Musungidi Yesu Kilisto. Butumbi buikale kudiye katataka too ne ku dituku dia tshiendelele. Amen. 3:18

 Ngasa udi muaku wa mushinga mukole. Udi wamba bua malu a bungi: bua buimpe bua Nzambi, bua dinanga diende, ne bua luse luende ne bua malu makuabo pamutu !

 

“Mose wakatupa mikenji, kadi ngasa ne bulelela biakafuma kudi Yesu Kilisto” (Yone 1:17 ).

 “Nudi bamanye ngasa wa Mukelenge wetu Yesu Kilisto ne, Yeye wakadi mubanji, kadi wakalua mupele bua bualu buenu, bua nuenu nulue babanji ku bupele buende” (2 Kolinto 8:9).

 Tudiunde mu ngasa ne mu dimanya dia Yeye udi utunanga ne wakadifila bua bualu buetu.

Butumbi buikale kudiye katataka too ne   ku dituku dia tshiendelele. Amen.