Malu adi mafunda mu Mukanda wa Nzambi bualu bua Yoshua adi atukuatshisha bua kujingulula malu a bupianyi buetu bua mu diulu ne bualu bua njila ya Nzambi ne bantu bende. Adi atuleja bu mudi Satana uteta bua kupumbisha bantu ba Nzambi bua bobo kababuedi mu bupianyi buabo.

Bena Isalele bakaluangana mvita ya bungi ne bena lukuna babo, kadi bakadi bapitshi muinshi mua bulombodi bua Yoshua.

Nzambi wakasua kusankisha bantu bende ba kale ne kulua nabo mu buloba buimpe (Dutelonome 8:7-10). Muomumue lelu Nzambi kena musue bantu bende basombe mu malu a ba pa buloba kadi bua kujingulula muaba wabo badi nawu mu diulu katataka, bu muakafunda Paulo mu mukanda wende kudi Bena Efeso. Mu mukanda ewu, bena kuitabuja, nansha batshidi pa buloba, badi bamonebua bashikame mu miaba ya mu diulu mu Kilisto. Paulo wakafunda ne, "Nzambi… wakatuvuija ne muoyo pamue ne Kilisto (nuakusungidibua ku ngasa), wakatubisha nende pamue, wakatushikika nende pamue mu miaba ya mu diulu mu Kilisto Yesu" (Efeso 2:4-6).

1.2 Yoshua, tshifuanyikiji tshia Kilisto

Yoshua udi tshifuanyikiji tshia Kilisto udi ulombola bantu bende kudi Nyuma Muimpe bua kubuela mu bupianyi buabo bua nyuma. Dina, "Yoshua", didi diamba ne,"Yehowa udi Musungidi". Yeye udi tshifuanyikiji tshia Mukelenge wetu Yesu Kilisto. Nzambi udi musue bana bende bapikudibua babuele mu bupianyi buabo budibo nabu bu bana ba Nzambi katataka. Satana udi musue kubapumbisha, mvita idiku, kadi mu malu aa badi bamanye mua kutamba kupita bualu bua bukole bua Yesu udi ubananga (Lomo 8:37).

1.3 Yoshua udi musungidibue ku lufu

Yoshua wakadi mupika, muana wa mupika mu Ejipitu. Tshiena ne mpata ne yeye wakumvua bualu bua dimueneka dia Muanjelo wa Yehowa kudi Mose ne mukenji wa Mukelenge ne, "Yehowa wakamba ne, Nakutangila dikenga dia bantu banyi badi mu Ejipitu bulelela, nakumvua muadi wabo … nakulua panshi bua kubasungila mu bianza bia Bena Ejipitu, ne bua kubalupula mu buloba abu, ne bua kulua nabo mu buloba buimpe ne bunene, mu buloba budi ne mabele ne buitshi bia bungi" (Ekesode 3:7,8). Yoshua wakumvua Diyi dia Nzambi kudi Bena Isalele ne, "Meme nempite buloba bua Ejipitu butuku abu, nenshipe banabute bonso ba mu buloba bua Ejipitu ne ba bantu ne ba nyama; nedumbuluishe nzambi yonso ya Ejipitu; Meme ndi Yehowa. Mashi neikale bu tshimanyinu tshia mu nzubu munudi; ne panamona mashi, nempite pamutu penu, ne mulawu kawena unukuata panashipa bantu ba mu buloba bua Ejipitu" (Ekesode 12:12,13). Yoshua, muanabute wa mu diku diende, wakadi mulamibue ku lufu ku mashi a muana wa mukoko mamiamine ku mutshi wa pa mutu pa mushiku wa mbelu ne ku biluwa bibidi bia mushiku wa mbelu wa nzubu.

Petelo wakafundila bena Kilisto ne, "Tuakapikudibua, kenku bintu bijimina, ku argent anyi ku ngolo … kadi nuakapikudibua ku mashi a mushinga mukole bu a muana wa mukoko kayi ne tshilema ne kayi ne ditoba, ku mashi a Kilisto mene" (1 Petelo 1:19).

1.4 Amaleka udi uluangana ne Bena Isalele mu Lefidima

Pakalupuka Bena Isalele mu Ejipitu, Bena Amaleka bakashipa bantu bakashala kunyima bakadi batekete. Bena Amaleka bakadi bantu ne bukole bua bungi ne bena lukuna ba bantu ba Nzambi matuku abo onso, kabakatshina Nzambi. Bakadi ba mu tshilongo tshia Esau, wakapana bintu bia buanabute ku katupa ka bia kudia (Dutelonome 25:17-19. Genese 36:12. Ebelu 12:16,17).

Bena Amaleka badi tshifuanyikiji tshia bukole bua Satana ne tshia bena lukuna lua Lumu Luimpe badi benzejibua kudi Satana bua kupumbisha dibuela dia bantu ba Nzambi mu bupianyi buabo. Satana udi utatshisha bantu ba Nzambi pikalabo batekete, anyi papangabo mu njila. Yeye kena ne luse kadi Nzambi udi mua kumuambila ne, Neumanye mua kufika aku, kadi kupitshi nansha (Yobo 1:12). Katuena bamanye mua kupita muena lukuna wetu bukole mu bukole buetu, tudi ne dikuatshisha dia Mukelenge bualu.

Amaleka udi tshifuanyikiji tshia malu a mubidi adi aluangana ne malu a Nyuma. "Dijinga dia malu a mubidi didi difuilangana ne dijinga dia malu a Nyuma, ne dijinga dia malu a Nyuma didi difuilangana ne dijinga dia malu a mubidi" (Galatia 5:16,17).

"Amaleka wakalua, wakaluangana ne Bena Isalele mu Lefidima. Mose wakambila Yoshua ne, Utusunguile bantu baye kuluangana ne Bena Amaleka. Makelela nengimane pamutu pa mukuna ne mulangala wa Nzambi mu tshianza tshianyi. Yoshua wakenza bu muakamuambila Mose, wakaluangana ne Bena Amaleka. Mose ne Alona ne Hu bakaya pamutu pa mukuna. Pakabandisha Mose tshianza tshiende, Bena Isalele bakatamba bukole, ne pakapuekesheye tshianza tshiende, Bena Amaleka bakatamba. Kadi bianza bia Mose biakanema bujitu; bakangata dibue, bakaditeka kunyima ne yeye wakashikama pamutu padi; ne Alona ne Hu bakabandisha bianza biende, umue ku luseke lukuabo, umue ku luseke lukuabo; ne bianza biende biakakoleshibua too ne pakabuela diba. Yoshua wakapita Amaleka ne bantu bende bukole ne muele wa mvita" (Ekesode 17:8-13).

1.5 Mukelenge Yesu udi wakuila bantu bende

Mose, pa mukuna, udi tshifuanyikiji tshia Mukelenge Yesu udi wakuila bantu bende mu Diulu. "NKilisto Yesu mene wakafua, E, bulelela, wakabishibua ku lufu, udi ku tshianza tshikole tshia Nzambi, udi utuakuila kabidi. Udi mua kutupandulula ku dinanga dia Kilisto nganyi? Ntatu idi mua kuenza nunku, anyi kanyinganyinga, anyi tshinyangu, anyi tshiole, anyi butaka, anyi njiwu, anyi muele wa mvita? " (Lomo 8:34,35). Musangu mukuabo tudi mua kuamba ne, "Anyi, Amaleka? Anyi, Satana? "

Alona udi uleja bukuidi. Mukelenge Yesu udi Muakuidi wetu Munene udi mumanye mua kutukuatshisha mu tshikondo tshia dikengela dietu (Ebelu 4:14-16. 7:25).

Dina dia Hu didi diamba ne, "Butoke". Dina diende didi diamba bualu bua butoke bua mutshima, bua buakane. Malu aa adi atuambila bualu bua Mukelenge wetu Yesu kabidi. Petelo wakafunda ne, "Bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a muoyo wenu; bualu bua diyi didi difundibua ne, Nuenu nenuikale ba tshijila, bualu bua meme ndi wa tshijila" (1 Petelo 1:15,16).

Yoshua wakapita Amaleka bukole ne muele wa mvita. Paulo wakakolesha mitshima ya bena Efeso ne, "Ku ndekelu, nudikoleshe mu Mukelenge ne mu bukole buende bunene… pamutu pa bintu bionso nuambule ngabu wa ditabuja, unudi mua kuepela nende miketa yonso ya Satana idi ne kapia kasuikaku. Nuangate tshifulu tshia lupandu, ne muele wa Nyuma udi diyi dia Nzambi… nuikale batabale" (Efeso 6:10-18).

1.6 Mose udi ushila tshioshelu

"Yehowa wakambila Mose ne, Ufunde bualu ebu mu mukanda bu tshivulukidi; ububadile mu matshu a Yoshua ne, Meme nenjimije tshivulukidi tshia Amaleka muinshi mua diulu. Mose wakashila tshioshelu, wakidika dina diatshi ne, Yehowa-nisi, wakamba ne, Yehowa wakaditshipa; Yehowa nealuangane ne Bena Amaleka mvita ku tshikondo ku tshikondo" (Ekesode 17:14-16).

Pakashila Mose tshioshelu, biakadi bu yeye wakamba ne, Mvita ewu kanwetu, nwa Nzambi. "Yehowa-nisi'', kuandamuna kua muaku kudi ne, "Yehowa udi dibendela dia bantu bende". Kale, pakaya bantu ba bisamba bikuabo bua kuluangana ne bena lukuna babo, bakaya ne mabendela abo. Biakadi dimue dijimine anyi dikuatshibue kudi bena lukuna babo, bualu buakadi butamba bikole ku mesu abo. Kadi bikala Yehowa dibendela dia bantu bende badi mua kuamba ne, "Bikala Nzambi netu, nganyi udi mumanye mua kutupumbisha ? " (Lomo 8:31).

2 Yoshua: Mukuatshishi wa Mose

2.1 Nzambi udi uteta Bena Isalele ne mikenji

Nzambi wakalombola Bena Isalele ku Ejipitu too ne ku Sinai mu ngasa ne mu luse. Ku Sinai Nzambi wakabikila Mose kudiye, wakamuambila ne, "Neumanyishe Bena Isalele ne, Yehowa udi wamba ne, Nuenu nuakutangila malu anakenzela Bena Ejipitu, ne bu munakanutuala pa mapuapua a nyunyu wa mukanku, bu munakalua nenu kundi meme. Binuatumikila diyi dianyi, ne binuanemeka tshipungidi tshianyi, nuenu nenuikale bantu banyi ba munkatshi mua bantu bonso; bualu bua buloba buonso mbuanyi. Nuenu nenuikale kundi bu bukelenge bua bakuidi, bu tshisamba tshia tshijila. Aa meyi awudi mua kuambila Bena Isalele". Mose wakalua, wakabikila bakulu ba bantu, wakabamanyisha meyi onso akamuambila Yehowa. Bantu bonso bakamba popamue ne, "Netuenze meyi onso akutuambila Yehowa" (Ekesode 19:3-8). Nzambi wakamanya ne, Bena Isalele nebapingane mu mitshima yabo kudi nzambi ya mu Ejipitu, nebankome nyima, nebajiane muena mudimu wanyi Mose. Nzambi wakabapesha Mikenji bua kuteta mitshima yabo. Diyi dia Nzambi didi diamba ne, "Ku mikenji kudi kufuma dijingulula dia bubi" (Lomo 3:20). Mikenji yakabuelamu bua kuleja ne, Bubi budi bualu butambe bukole ku mesu kua Nzambi. Idi ileja muntu ne udi ne Musungidi bualu.

Yehowa wakambila Mose ne, "Ulue biebe kundi pa mukuna, wikaleku, nenkupe mabue adi ne mikenji inakufunda, bua wewe kuyiyisha bantu. Mose wakabika ne Yoshua mukuatshishi wende; Mose wakabanda mu mukuna wa Nzambi". Mose wakashala mu mukuna munya ne butuku mafuku makumi anayi. "Pakajikija Yehowa kusomba ne Mose pa mukuna wa Sinai, yeye wakamupa mabue abidi akadi ne mikenji mifundapu ne munu wa Nzambi" (Ekesode 24:12,13. 31:18).

2.2 Bena Isalele badi bakoma Yehowa nyima lukasa

Pakamanya bantu ne, Mose wakashala ku mukuna musangu mule, bakadisangisha kudi Alona, bakamuambila ne, "Bika biebe, utuenzele nzambi idi mua kuya kumpala kuetu: bua muntu awu Mose, wakalua netu mu Ejipitu, katuena bamanye bualu buakumukuata" (Ekesode 32:1).

Diambedi Bena Isalele kabayi banji kusabuka Dishiba Dikunze bakajiana Mose, bakamuambila ne, "Bualu bua kakuakadi nkita mu Ejipitu, wewe wakulua netu bua tuetu kufuila mu tshipela, anyi?" Bakajiana Mose mu tshipela tshia Sinai, bakatandangana nende mu Lefidima, ne katataka badi bapetula muntu ewu wa Nzambi mu mitshima yabo mibi (Ekesode 14:11. 16:2. 17:2). Mutshima wa muntu mbualu bukole. Mukelenge Yesu wakamba ne, "Meji mabi ne kushipa kua bantu ne masandi ne tshiendenda ne buibi ne mashimi ne kupenda Nzambi bidi bilupuka mu mutshima" (Matayo 15:19).

2.3 Yoshua udi umvua diyoyo dia bantu

"Mose wakapueka mu tshibanda ne mabue abidi akadi ne mikenji mifundapu mu bianza biende… mabue awu akadi mena kudi Nzambi, ne meyi akadi mafunda kudi Nzambi, mafunda pa mabue awu. Pakumvua Yoshua diyoyo dia bantu pakadibo bela mbila, yeye wakambila Mose ne, Awu mmutoyi wa bantu badi baluangana mvita mu tshitudilu. Mose wakamba ne, Adi kaena diyi dia bantu badi bapita bakuabo bukole, ne kadiena diyi dia bantu bakutambibua bukole; ndi mumvue mutoyi wa bantu badi bimba misambu" (Ekesode 32:15-18).

Pakalueye pepi ne tshitudilu, wakatangila kana ka ngombe ne bantu baja maja. Bualu buakadi bukole be, Bena Isalele "bakutula kana ka ngombe, bakukatendelela, bakukashipela milambu, bakuamba ne, Bena Isalele, nzambi wenu nyewu wakanulupula mu buloba bua Ejipitu" (Ekesode 32:8). Mose wakadi ne tshiji tshikole, wakela mabue panshi akadi mu bianza biende, wakaatshibula kuinshi kua mukuna.

Tudi tujingulula ne, Tshiji tshia Mose tshiakadi tshiji tshiakane. Mose, ku tshienzedi tshiende, wakasungila Bena Isalele bonso ku lufu, anyi? Mikenji ya kumpala mifunda kudi munu wa Nzambi pa mabue akadi ne, "Kuikadi ne nzambi mikuabo ne meme popamue. Kudisongedi lupingu anyi tshifuanyikiji tshia tshintu tshia mu diulu anyi tshia tshintu tshia panshi pa buloba… kubinaminyi, kubitendeledi" (Ekesode 20:3-5). Nzambi wakamana kuambila Mose ne, "Nakutangila bantu aba, mona, badi ne bupidia bukole; nunku kumpumbishi nansha, tshiji tshianyi tshikale tshikole kudibo, mbashipe" (Ekesode 32:9). Nzambi wakadi ne tshiji tshikole bua kushipa Alona, muanabo ne Mose kabidi, kadi Mose wakamulombela bu muakalombeleye Bena Isalele (Dutelonome 9:20). Yehowa wakumvua milombu ya muena mudimu wende wa kueyemena.

2.4 Nzambi udi upatuka munkatshi mua Bena Isalele

Nzambi wakambila Mose ne, "Tshiena nya munkatshi muenu bualu bua nudi bantu ba bupidia bukole: bua tshinushipi mu njila" (Ekesode 33:2,3). Pakumvua Bena Isalele malu aa, bakanyingalala bikole, bakamanya ne, Tuakuenza bubi. Bakatshina bikole kabidi bualu bua bantu bu binunu bisatu bakamana kufua pakafika Mose ku mbelu kua tshitudilu ne Mikenji mu bianza biende (Ekesode 32:28). Mona bu mudi Mikenji bualu bukole. Kadi pakalua dituku dia Pentekoste, pakalua Nyuma Muimpe mu ngasa ne mu luse, banni bu binunu bisatu bakitabuja Lumu Luimpe. Dituku adi diakadi dituku dia disanka (Bienzedi 2:42,46,47).

Mose wakumusha Ntenta wa kusambakena mu tshitudilu bua kuuteka ku butshika buatu. Ditutu (diakaleja Bena Isalele ne, Yehowa udiku) diakapueka, diakimana kumbelu kua Ntenta. Bena Isalele bonso bakajingulula bimpe ne, Nzambi kena munkatshi muetu nansha. Pakumvua bantu lumu alu lubi, bakadila; nansha muntu umue wakaluata bintu bia kudilengeja nabi. Yehowa wakambila Mose ne, "Wambile Bena Isalele ne, Nudi bantu ba bupidia bukole; binaya bianyi munkatshi muenu anu tshitupa tshikese, nennushipe; nunku nuvule bintu bia kudilengeja nabi, bua meme mmanye tshindi mua kunuenzela" (Ekesode 33:5).

2.5 Mose udi upatuka mu tshitudilu

Mose wakashimika Ntenta ku butshika bua tshitudilu, (ke Nzubu wa Tshitendelelu wakasa Mose kunyima kua malu aa). Muntu yonso wakasua kukeba Yehowa wakalupuka mu tshitudilu bua kuya ku ntenta wa kusambakena. "Pakabuela Mose mu tshitendelelu, ditutu diakapueka, diakimana ku mbelu kua Ntenta, ne Yehowa wakayikila ne Mose … mpala pa mpala bu mudi muntu uyikila ne mulunda wende. Mose wakapingana ku tshitudilu kabidi, kadi mukuatshishi wende Yoshua, nsongalume, muana wa balume wa Nuna, kakalupuka mu Ntenta" (Ekesode 33:9-11).

Mose wakadi muntu wa Nzambi wa bushuwa, Nzambi wakamuambila ne, "Wewe wakasangana luse ku mesu kuanyi, meme ndi mumanye dina diebe" (Ekesode 33:17).

Yoshua wakashala mu Ntenta wa kusambakena mutapuluke ku malu mabi akadi mu tshitudilu. Yoshua wakashala kumpala kua Yehowa mu Ntenta. Muntu yonso wakasua kukeba Yehowa wakalupuka mu tshitudilu bu muakenza Yoshua. Diyi dia Nzambi didi diamba ne, "Udi mushikame mu tshisokomenu tshia Nzambi Mutambe Bunene wa mulu neikale mu mundidimbi wa Nzambi wa Bukole Buonso. Bulelela, bantu bakane nebasakidile dina diebe; badi ne mitshima miakane nebashikame kumpala kuebe" (Musambu 91:1. 140:13). Nzambi kena mumanye mua kuikala ne buobumue ne bubi kadi udi munkatshi mua bantu bende badi batapuluke ku malu mabi.

2.6 Nzambi udi mumanye mitshima ya bantu

Yone wakafunda bualu bua ekeleziya wa ku Laodikiya, udi tshifuanyikiji tshia buena Kilisto mu matuku etu, ne, "Ndi mumanye midimu yebe, ne kuena nansha ku mashika nansha ku kapia. Nakadi kusua ne wikale nansha ku mashika anyi ku kapia. Nunku, bualu bua udi tshiuyuya, kuyi nansha ku mashika nansha ku kapia, nenkutuile mukana muanyi… Tangila, ndi mudimanyike ku tshibi, ndi nkokelaku. Biumvua muntu diyi dianyi, ne udi ungunzuluila tshibi, nembuele kudiye, nendie nende bidia, ne yeye neadie nanyi" (Buakabuluibua 3:1422). "Nunku Yesu kabidi, bua kujidileye bantu ne mashi ende, wakakenga pa bule pa tshibi tshia musoko. Nunku, tuye bietu kudiye kukala kua tshitudilu, batuala bipendu bia bualu buende" (Ebelu 13:12,13).

3 Yoshua udi ne mukawu ku bualu bua Mose

3.1 Bena Isalele badi baya kumpala mu luendu

Bena Isalele bakabika ku mukuna wa Yehowa (Sinai), bakaya mu luendu matuku asatu, ne mushete wa tshipungidi tshia meyi a Yehowa wakaya kumpala kuabo matuku asatu bualu bua kubakebela muaba wa kuikisha. Ditutu dia Yehowa diakadi kumutu kuabo mu munya, pakumukabo ku tshitudilu tshiabo. Pakaya mushete kumpala, Mose wakamba ne, "Yehowa, bika biebe, bantu badi nebe lukuna batangadishibue, bantu badi nebe tshiji banyeme ku mesu kuebe kudi binunu bia binunu bia Bena Isalele. Pakikisha mushete, yeye wakamba ne, Yehowa, upingane biebe kudi binunu bia binunu bia Bena Isalele" (Nomba 10:33-36).

"Ditutu diakabuikila nzubu (wa tshitendelelu) matuku onso, diakakenka bu kapia butuku. Pakumuka ditutu kumutu kua Ntenta, pashishe Bena Isalele bakaya ku luendu; mu muaba wakimana ditutu, Bena Isalele bakalongolola tshitudilu" (Nomba 9:16,17).

Ditutu diakaleja Bena Isalele ne, Yehowa udi netu, Yeye udi Mulombodi wetu. Mukelenge Yesu udi ulombola bantu bende kudi Nyuma Muimpe. "Bonso badi balombodibua kudi Nyuma wa Nzambi, bobo badi bana ba Nzambi" (Lomo 8:14).

3.2 Bena luendu badi batontolodi

Pakapita tshitupa tshipi, bantu bakapanga kabidi. Bakadi batontolodi, bualu ebu buakadi bubi ku matshu a Yehowa. Mose wakumvua muadi wa bantu ku meku ne ku meku, muntu ne muntu ku mbelu kua ntenta wende. Bantu bakuabo ba munkatshi muabo bakadi ne lukuka be: Bena Isalele bakadila kabidi, bakamba ne, "Nganyi neatupe munyinyi wa tuetu kudia? " (Nomba 11:4). Bakapua makenga abo mu Ejipitu muoyo, bakadi bela meji anu bua bia kudia bia mu buloba bua bupika buabo, ne bua minyinyi ya mu mayi. Bualu butamba bubi: bakajiana mana, "bidia bia mu diulu" (Yone 6:31. Musambu 78:23-25). Tshilema tshiabo tshinene tshiakadi bupidia. Mose wakanyingalala bikole be. Tshiji tshiakakuata Yehowa, tshiji tshiakakuata Mose kabidi. Bualu buakadi bukole ku mesu kua Nzambi.

3.3 Bena Isalele badi bapangisha mutshima wa Mose

Mose wambila Yehowa ne, "Wewe wakuenzela muntu webe bibi nunku bualu kayi? Munyi tshiakusangana luse ku mesu kuebe bua wewe wakateka bujitu bua bantu aba bonso pambidi panyi? Meme nakimitshisha baledi ba bantu aba mafu, anyi? nakabalela, anyi?… Meme ndi mua kudisha bantu aba bonso munyinyi kudi kunyi?… Meme nkayanyi tshiena mua kutuala bantu aba bonso, bualu ebu budi buntambe bunene. Biwasua kutuenzela nunku, ndi nkusengelela ne, Unshipe ku tshianza tshiebe, binasangana luse ku mesu kuebe; bua tshitangidi dikenga dianyi nunku" (Nomba 11:11-14). Ku tshikondo atshi ditabuja dia Mose diakadi ditekete.

3.4 Yehowa udi uleja Mose luse

Yehowa wakambila Mose ne, "Unsangishile balume makumi muanda mutekete ba bakulu ba mu Isalele, baudi mumanye ne mbakulu ba bantu, ne bakelenge badi kumutu kuabo; ulue nabo kumpala kua ntenta wa kusambakena, bobo bimaneku nebe. Meme nempueke, nensombe nebe; nengangate Nyuma udi kuudi, nembapeye, nenukuatshishangane bua kutuala bujitu bua bantu aba, wewe kuena ubutuala nkayebe" (Nomba 11:16,17).

Mose wakamana kupanga mu muanda wa Hobaba, Muena Midiyana, tatuende-muenu. Mose wakasengelela Hobaba bua kushala ne Bena Isalele, wakamuambila ne, "Tuetu netuikale mu tshipela, wewe newikale bu mesu etu" (Nomba 10:31). Kadi Yehowa wakadi Mulombodi wa bantu bende. Yeye wakamba ne "Nenkuyishe lungenyi, nenkuleje njila uudi ne bua kuendela, nenkupe meji patshidi disu dianyi kuudi" (Musambu 32:8).

Pashishe, pakalua Nyuma kudi bakulu, bakamba diyi dia Nzambi. Kadi balume babidi bakashala mu tshitudilu, Nyuma wakashala kudibo; bakadi ne mena abo mafunda, kadi kabakaya ku Ntenta ne bakulu bakuabo. Nsongalume wakadiku, wakaya lubilu, wakamanyisha Mose ne, "Eladada ne Medada badi bamba diyi dia Nzambi mu tshitudilu". Yoshua, wakamba ne, "Mukelenge wanyi, Mose, ubakande". Mose wakamuambila ne, "Wewe udi ne mukawu ku bualu buanyi, anyi? Nakadi kusua bua bantu ba Yehowa bonso bikale baprofete, ne Yehowa ateke Nyuma wende kudibo" (Nomba 11:26-29).

Mose wakenda mu njila wa ditabuja matuku a bungi, wakadi ne meji mu malu a Nzambi bualu bua yeye wakenda ne Nzambi. Nsongalume Yoshua wakatshidi ne malesona makuabo bua kuyila bualu bua njila ya Nzambi. Pakalomba Yoshua Mose ne, "Ukande Eladada ne Medada", bualu bua kabakadi nabo kumpala kua ntenta wa tshitendelelu, Mose wakamukuatshisha bua kujingulula bualu bimpe: Bantu aba babidi bakadi balombodibua kudi Nyuma Muimpe.

Dituku dikuabo Yone, muyidi wa Mukelenge Yesu, wakalua kudiye, wakamuambila ne, "Mukelenge, tuakutangila muntu umusha bademon munda mua bantu mu dina diebe; tuakumukanda bualu bua yeye kena ukulonda netu". Kadi Yesu wakamuambila ne, "Kanumukandi, bualu bua udi kayi unupidia udi nenu" (Luka 9:49). Mukelenge wakamuambila ne, "Kanumukandi", Mukelenge Yesu kakamuambila ne, "Nuye nende".

3.5 Bualu bua Nyuma Muimpe

Mu matuku a Dipungila Dikulukulu Nyuma Muimpe wakatulukila bantu bualu bua mudimu kampanda, bu Mose ne bakulu makumi muanda mutekete. Besalele wakadi ne dijingulula ne meji mu kuenza kua midimu yonso ya bianza bualu bua nzubu wa tshitendelelu (Nomba 11:16,17. Ekesode 31:1-3). Katataka, mu tshikondo tshietu, Nyuma Muimpe udi munda mua muena kuitabuja yonso wa bushuwa (Efeso 1:13,14. Galatia 3:2). Bukole bua mu malu a Nzambi butshidi bufuma ku dienzeja dia Nyuma Muimpe munda mua muena kuitabuja. Diambedi muena Kilisto kayi muanze kuikala tshitekelu tshikumbana bua kuenzela Nzambi mudimu mu bukole bua Nyuma Muimpe:

· Budiye nabu mbua kuikala tshitekelu tshia munda mutupu (2 Timote 2:20-22).

· Budiye nabu mbua kuikala bu tshitekelu tshitoke Diyi dia Nzambi didi dilengesha mutshima wa muntu (Yone 15:3. Efeso 5:26. Musambu 119:9-11).

· Budiye nabu mbua kuikala ne nzala ne nyota ya buakane (Matayo 5:6).

4 Batentekedi badi baya bua kutentekela Buloba bua Kanana

4.1 Badi batuma batentekedi dikumi ne babidi

"Yehowa wakambila Mose ne, Utume bantu, bua bobo batentekele buloba bua Kanana, bundi mpa Bena Isalele; usungule muntu ku tshisamba ku tshisamba, muntu yonso udi bu mukelenge munkatshi muabo. Mose wakabatuma ku Ka-nana bumuke ku tshipela tshia Palana, muakamba Yehowa: buonso buabo bakadi balume ba ku mutu kua Bena Isalele" (Nomba 13:1-3). Munkatshi muabo muakadi Yoshua. Buonso buabo bakadi balume ba ku mutu kua Bena Isalele.

Mose wakabambila ne, "Yilayi ku njila wa luseke lua sude, yayi bienu mu buloba bua mikuna : nutangile buloba ne budi munyi; bantu badimu badi bakole anyi badi batekete, badi banya-banya anyi badi ba bungi: buloba budi munyi budibo bashikama, budi buimpe anyi budi bubi; misoko idibo bashikamamu idi ya patupu anyi idi ya mpangu ya mabue; nutangile buloba ne budi ne bufunfule anyi budi busenguluke, nutangile ne mudi metu, anyi kaenamu. Nukoleshe mitshima yenu, nulue ne mamuma a mu buloba abu. Pakayabo nunku, mamuma a mvinyo akabanga kupia. Bakalua mu tshibanda tshia Eshekola, bakakosamu ditamba diakadi ne tshisumbu tshia mamuma a mvinyo, bakadituala ku mutshi babidi; bakalua ne mamuma makuabo a grenade ne a nfigi. Muaba awu wakidikibua ne, Tshibanda tshia Eshekola, bualu bua tshisumbu tshia mamuma tshiakakosamu Bena Isalele (Nomba 13:1720,23,24).

4.2 Yoshua ne Kaleba badi basengelela bantu

Batentekedi bonso, pakapinganabo, bakajadika ne, "Bulelela, buloba abu budi buule tente ne mabele ne buitshi, aa mmamuma a buloba" (Nomba 13:27). Mamuma a buloba akajadika bumanyishi bua batentekedi kudi Bena Isalele ne, "Buloba budi buimpe". Kadi batentekedi dikumi bakatekesha mitshima ya bantu, bakabambila ne, "Kadi bantu badi mu buloba abu badi bakole, misoko yabo idi ne mpangu ya mabue, ne idi minene be; ne bualu bukuabo, tuakamonamu bana ba Anaka. Bena Amaleka badi ku luseke lua ku Sude, Bena Hiti ne Bena Yebuse ne Bena Amole badi ku luseke lua ku mikuna; Bena Kanana badi pepi ne mayi manene ne kukala kua musulu wa Yadene" (Nomba 13:28,29).

Batentekedi dikumi bakatekesha mitshima ya Bena Isalele, bantu bakatontolola mu ntenta yabo. Kaleba wakabapolesha ku mesu kua Mose ne, "Tuyayi katataka, tunyenge buloba abu, tudi bamanye mua kupita bena buloba abu bukole". Kadi batentekedi dikumi bakamba ne, "Buloba abu butuakutentekela butu buadia bantu badi bikalamu; bantu bonso batuakamonamu badi bantu ba mibidi minene. Tuakamona bantu ba nfiondo, bana balume ba Anaka, bakalelabo kudi Nefilima: patuakaditangila, tuakadi bu mpasu, tuakadi nunku ku mesu kuabo kabidi" (Nomba 13:30-33).

4.3 Bantu badi batombokela Yehowa

Bena Isalele bonso bakatontolola Mose ne Alona, bakabambila ne, "Biakadi bimpe, tuafuila mu Ejipitu, anyi tuafuila mu tshipela etshi. Bualu kayi Yehowa udi ulua netu ku buloba ebu bua kutushipesha ku miele ya mvita? Bakaji betu ne bana betu bakese nebashipibue; bualu budi butamba buimpe bua tuetu tupingane mu Ejipitu nansha?" Bakambilangana ne, "Tusungulayi bietu kapitene, netupingane mu Ejipitu". Pashishe Mose ne Alona bakadikuma panshi kumpala kua tshisumbu tshionso tshia Bena Isalele. Yoshua ne Kaleba bakadipanda bilulu biabo, bakambila tshisumbu tshionso tshia Bena Isalele ne, "Buloba butuakapita bua kutentekela budi butambe buimpe. Bikala Yehowa ne disanka bualu buetu, yeye nealue netu mu buloba ebu, neatupebu; buloba budi buule tente ne mabele ne buitshi. Kanuanji kutombokela Yehowa nansha" (Nomba 14:1-9).

Bantu bonso bakamba ne, "Tubakume ne mabue". Bua malu aa, Nzambi wakakengesha Bena Isalele, wakamba ne, "Bulelela, bobo kabena batangila buloba bunakalaya batatuabo". Batentekedi, bakalua ne lumu lubi lua buloba, bakafua ne disama dikole kumpala kua Yehowa (Nomba 14:37). Bua malu aa Bena Isalele ba bungi kabakadi mua kubuela mu buloba bua mulayi, too ne bena bupidia bonso bakafua mu tshipela. Ku tshikondo atshi bakadi pepi ne buloba bua Kanana mene mene, katataka badibo nabo mbua kuendakana mu tshipela bidimu bia bungi. Yehowa wakabambila ne, "Bana benu nebikale bu bena tshiendenda mu tshipela etshi too bidimu makumi anayi, bobo nebatuale bujitu bua masandi enu, too ne pajimina mibidi yenu mifue mu tshipela etshi" (Nomba 14:33). Nunku Bena Isalele bakafua mu tshipela anu bana babo, ne Kaleba, bakapiana buloba buimpe muinshi mua bulombodi bua Yoshua.

Mukanda mufunda kudi Bena Ebelu udi utukuatshisha bua kujingulula malesona a nyuma bualu bua batentekedi. Bualu bua bupidia bua Bena Isalele Nzambi wakamba ne, "Kabena babuela mu dikisha dianyi…bana betu, nudimuke bua bumue kakulu kuikala umue wenu udi ne mutshima mubi wa bupidia munda muende, mu dilekela diende dia Nzambi wa muoyo; kadi nukoleshangane mitshima yenu ku dituku ku dituku patshidibi bikidibua ne, Lelu, bua mukuabo wenu kakoleshibu ku kudinga kua bubi" (Ebelu 3:7-13. 4:1-12).

4.4 Ditabuja dia bushuwa didi disankisha Nzambi

Ditabuja dilelela didi diamba ne, "Tudi bamanye mua kupita bena buloba abu bukole". Ditabuja edi didi ditabuja dia Paulo, wakamba ne, "Ndi mumanye mua kuenza malu onso mu Mukelenge udi unkolesha" (Filipoi 4:13). Didi diodiumue ne ditabuja dia nsongalume Davidi, wakapita Goleyata bukole ne dibue dikese, wakamuambila ne, "Wewe udi ulua kundi ne muele wa mvita ne difuma ne difuma dia kabenda, kadi meme ndi ndualua kuudi mu dina dia Yehowa" (1 Samuele 17:45). Lelu, bena Kilisto badi ne Nyuma Muimpe wa Nzambi ne Diyi diende bua kujadikabo mu njila wa buakane, mu njila udi usankisha Mukelenge.

5 Yoshua: Mulombodi

5.1 Yoshua udi musungudibue bua kulombola Bena Isalele

Mose wakambila Bena Isalele ne, "Lelu nakupita bidimu lukama ne makumi abidi … ne Yehowa wakamana kungambila ne, Wewe kuena usabuka Yadene ewu …Yoshua neasabuke kumpala kuenu bu muakamba Yehowa" (Dutelonome 31:1-3).

Mose kakadi mua kubuela mu buloba bua mulayi bualu bua dipanga diende mu bualu bua kututa kua dibue ku Kadesha, pakatandangana Bena Isalele nende bualu bua mayi a kunua (Nomba 20:1-13). Yehowa wakambila Mose ne, "Wewe wambile dibue didi ku mesu kuabo, dipatule mayi", kadi Mose, bualu bua bantu bakanyingalaja mutshima wende, wakamba biende meyi akadi kayi ne meji, wakabambila ne, "Umvuayi, bena kutomboka; netunupatuile mayi ku dibue edi, anyi? Mose wakabandisha tshianza tshiende, wakakuma dibue ne mulangala wende misangu ibidi kadi Yehowa kakamuambila bua kututa dibue. Yehowa wakambila Mose ne Alona ne, "Bualu bua nuenu kanuakungitabuja bua kunjidila ku mesu kua Bena Isalele, nunku kanuena nulua ne bantu aba mu buloba bunakubapa". Mose wakakuma dibue, ke anu musangu umue kadi misangu ibidi, bualu buakadi bukole ku mesu kua Nzambi. Dibue diakamba bualu bua Kilisto (1 Kolinto 10:4). Yeshaya, mulombodibua kudi Nyuma Muimpe, wakafunda bualu bua Mukelenge Yesu Kilisto, "mukumibue, mututshibue kudi Nzambi, ne mukengeshibue. Kadi bakamutapa mputa bua mibi yetu, bakamukuma bua malu mabi etu" (Yeshaya 53:4,5). Nzambi kakadi mua kukuma Mukelenge Yesu misangu ibidi bua malu mabi etu !

5.2 Mose udi ukolesha mutshima wa Yoshua

Nansha Mose wakapanga mu bualu bua mayi yeye wakadi muntu wa Nzambi wa bushuwa, wakadi ne kalolo be (Nomba 12:3). Pakamuambila Nzambi ne, "Wewe kuena usabuka Yadene", Mose kakaleja muji wa bululu mu mutshima wende anyi mukawu bualu bua Yoshua, kadi wakamuambila ku mesu kua Bena Isalele bonso ne, "Wikale ne bukole ne mutshima wa dikima, bualu bua wewe uyaya ne bantu aba mu buloba buakalaya Yehowa batatu babo bua kubapabu; ne wewe neubapianyishe buloba abu. Yehowa mene uyaya kumpala kuebe, yeye neikale nebe, kena ukupanga, kena ukulekela: kutshinyi, kuzakadi" (Dutelonome 31:7,8). Nunku Mose wakakolesha mutshima wa Yoshua, mukuatshishi wende.

Pakafua Mose, Yehowa wakambila Yoshua ne, "Mose, muntu wanyi, udi mufue; nunku bika biebe, usabuke musulu ewu wa Yadene, wewe ne bantu aba bonso, uye mu buloba bundi mpa Bena Isalele. Nakanupa miaba yonso inuadiata muinshi mua makasa enu bu munakambila Mose" (Yoshua 1:13). Mona bu mudi Yehowa utela lufu lua Mose, "muntu wanyi", kudi Yoshua. "Lufu lua bansanto bende ludi lua mushinga mukole ku mesu kua Yehowa" (Musambu 116:15).

Bena Isalele buakadibo nabu mbua kusabuka musulu wa Yadene ne kubuela mu buloba bua Kanana bua kupiana bupianyi buabo. Buakadibo nabu mbua kudiata buloba muinshi mua makasa abo. Buloba buakadi dipa dia Nzambi kudibo, kadi bakadibo nabu mbua kuya kumpala mu ditabuja. Bena lukuna bakadiku, kadi mulayi wa Yehowa kudi Yoshua wakadi ne, "Kakuena muntu udi mua kuimana kumpala kuebe too matuku onso awutshidi ne muoyo; nengikale nebe bu munakadi ne Mose; tshiena nkulekela, tshiena nkushiya nkayebe. Ikala ne bukole ne mutshima wa dikima" (Yoshua 1:5,6).

5.3 Tuye kumpala mu njila wa ditabuja

Bua kubuela mu bupianyi buabo, Bena Kilisto, bu Bena Isalele ba kale, budibo nabu mbua kuya kumpala mu njila wa ditabuja, "batangila kudi Yesu", Mulombodi wabo ne Kapitene ka lupandu luabo. Bu Bena Isalele, budibo nabu mbua "kudiata buloba muinshi mua makasa abo". Kabena bamanye mua kusomba tshianana kabayi benza tshintu ne kubuela mu masanka a bupianyi buabo. Mapumbisha adiku, bena lukuna badiku ne mateyi adiku kadi Kapitene kabo kadi nabo (Yoshua 23:13. 1 Timote 3:7, 6:9).

Yehowa wambila Yoshua ne, "Mukanda ewu wa mikenji yanyi kaumuki mukana muebe; kadi welangane meji a mukanda ewu munya ne butuku, udimuke mua kuenza malu onso adi mafundamu; pashishe neutute dikasa dimpe, newikale ne diakalengele" (Yoshua 1:8). Dimanya dia Mukanda wa Nzambi didi ditulama ku mateyi a bungi. Mufundi wa kale wakamba ne, "Nakulama diyi diebe mu mutshima wanyi, bua meme tshikuenzedi bibi". Ne kabidi ne, "Diyi diebe didi muinda ku makasa anyi ne munya muteme mu njila wanyi" (Musambu 119:11,105). Mu diluangana dietu ne bukokeshi bua midima butudi nabu mbua kuikala ne "muele wa Nyuma udi diyi dia Nzambi" (Efeso 6:17).

5.4 Bantu bakuabo kabena basue kusabuka Yadene

Pakatshidi Mose ne muoyo, Bena Lubena ne Bena Gada, pakatangilabo ne buloba bua Yaze ne buloba bua Gilada buakadi muaba muimpe wa bimuna, bakamulomba ne, "Kanuyi netu dishiya dia Yadene". Mose kakadi ne disanka to. Wakabambila ne, "Nudi basue bana benu baye ku mvita, ne nuenu nushikame kunoko, anyi? Nudi basue kupangisha mitshima ya Bena Isalele bua kuya mu buloba buakabapabo kudi Yehowa munyi?" (Yoshua 1:12-17. Nomba chap. 32).

Bena Lubena ne Bena Gada ne tshitupa tshia tshisamba tshia Bena Manashe bakasua bupianyi buabo "dishiya dia munemu", ku esete kua musulu Yadene, bakadi belangana meji bua malu a buloba, ke malu mabi a ba pa buloba nansha, kadi bu muakadibo ne bimuna bia bungi, bakela meji bua bualu buabi. Badi bu bena kuitabuja badi kabayi bajingulula bimpe ne, Bupianyi buetu budi mu Kilisto, budi mu malu a mu diulu. Bakapua muoyo ne, "Tudi benyi ne bena luendu pa buloba ebu" (Ebelu 11:13). Pakalua bena lukuna bua kuluangana ne Bena Isalele mu tshikondo tshia butekete, bonso bakasomba "dishiya dia munemu", bakadi bantu ba kumpala bua kupona mu bianza bia bena lukuna ba Nzambi.

Kale, diambedi Bena Isalele kabayi banji kupatuka mu Ejipitu, Lota, muntu wa mu famille wa Abalahama, wakamona mpata ne bibanda bia musulu wa Yadene biakadi bimpe be, yeye kabidi wakadi ne bimuna bia bungi, kadi kunyima kua tshikondo, wakashimika ntenta yende too ne ku Sodoma, musoko mubi mutambe. (Abalahama wakashala mu buloba bua Kanana. Genese chap. 13). Kunyima kua tshikondo tudi tusangana Lota, "wakadi ushikama ku tshibi tshia ku Sodoma", bu muena musoko (Genese 19:1). Nzambi wakabutula bantu bonso bakadimu bua malu mabi abo, anu Lota ne bana bende ba bakaji babidi bakapanduka. Bintu bionso bia Lota biakadi bijimijibua, mukaji wende, bimuna biende, ne buneme buende kabidi.

6 Lahaba ne Batentekedi

6.1 Lahaba udi usokoka batentekedi babidi mu nzubu wende

"Yoshua, muana wa Nuna, wakatuma batentekedi babidi ku Shitima mu musokoko, wakabambila ne, Yayi, nutangile buloba, ne Yeleko. Bobo bakaya, bakabuela mu nzubu wa mukaji muena tshiendenda dina diende Lahaba, bakalalamu. Bakambila mukelenge wa Yeleko ne, Mona, balume ba Bena Isalele bakafika munemu butuku bua kutentekela buloba. Mukelenge wa Yeleko wakatumina Lahaba diyi ne, Patula balume bakulua kuudi, bakubuela mu nzubu muebe; bualu bua bobo bakulua bua kutentekela buloba buonso. Mukaji ewu wakangata bantu aba babidi, wakabasokoka; yeye wakamba ne, Bulelela, bantu aba bakulua kundi kadi tshiakamanya kuakafumabo; ne pakulua diba didibo binshila bibi bia musoko, pakuila butuku, bantu aba bakulupuka; kadi meme tshiena mumanye kuakuyabo; nubalonde lubilu, nenubapete. Kadi yeye wakamana kuya nabo ku musaka wa nzubu wende, wakabasokoka muinshi mua mitshi ya lin yakadiye mulonge pa musaka. Balume bakabalonda mu njila too ne ku malobo a Yadene; pakalupuka bantu, bakaya bua kubakeba, bakinshila tshibi" (Yoshua 2:1-7).

6.2 Lahaba, mukaji wa bantu ba bende

Yeleko wakadi musoko muimpe, wakadi mubikidibua ne, Musoko wa mabue a ngashi (2 Kulondolola 28:15). Kadi mu matuku a Yoshua Yeleko wakadi musoko wa bena lukuna lua bantu ba Nzambi. Munda mua musoko ewu mubi wakadi mukaji umue, Lahaba, ne dimanya dia Yehowa bu "Nzambi wa mu diulu ne pa buloba kabidi". Lahaba wakambila batentekedi ne, "Ndi mumanye ne, Yehowa wakanupa buloba, ne buowa buakatukuata" (Yoshua 2:9,11). Lahaba wakamanya ne, Ndi ne Musungidi bualu, wakamanya ne, Tshilumbululu tshiakane tshia Nzambi netshikuate buonso buetu bualu bua malu mabi etu. Nzambi, udi mumanye mitshima ya bantu, wakalombola makasa a batumibue babidi bende ku nzubu wende. Pakabuejeye batentekedi mu nzubu, yeye wakenza bualu mu ditshina dia Nzambi. "Bua ditabuja Lahaba, mukaji wa masandi, kakashipibua ne bakadi ne bupidia, bualu bua wakabueja batentekedi mu nzubu ne ditalala" (Ebelu 11:31).

6.3 Lahaba udi musue tshieya tshilelela

Lahaba wakambila batentekedi ne, "Ndi nnusengelela ne, Nuditshipe kudi Yehowa bua bualu buanyi bu munakunuenzela bimpe, nuenu kabidi nungenzele meme ne nzubu wa tatu wanyi bimpe, numpe bianyi tshieya tshilelela" (Yoshua 2:12). Batentekedi bakamuambila ne, "Mona, patuabuela mu buloba, wewe neusuike nshinga ewu mukunze ku dididishi dia nzubu kuwakutuluila: udisangishe mu nzubu webe ne tatu webe ne mamu webe ne bana benu ne bonso ba mu nzubu wa tatu webe. Kadi muntu yonso udi ulupuka ku bibi bia nzubu webe, uyaya mu misesu, mashi ende neikale pamutu pende, ne tuetu netubinge" (Yoshua 2:18,19).

Nshinga mukunze udi utuvuluija bualu bua diyi dia Yehowa kudi Mose bualu bua Bena Isalele mu Ejipitu ne, "Bobo nebangate mashi (a muana wa mukoko), nebaamiamine ku mutshi wa pamutu pa mushiku wa mbelu ne ku biluwa bibidi bia mushiku wa mbelu wa nzubu mudibo bamudila. Mashi neikale bu tshimanyinu tshia mu nzubu munudi; ne panamona mashi, nempite pamutu penu, ne mulawu kawena unukuata panashipa bantu ba mu buloba bua Ejipitu" (Ekesode 12:7,13). Muana wa mukoko udi utuambila bualu bua Muana wa Nzambi ne mushinga wa bupikudi bua bena kuitabuja. "Nuakapikudibua ku mashi a mushinga mukole, bu a muana wa mukoko kayi ne tshilema ne kayi ne ditoba, ku mashi a Kilisto meme" (Yone 1:29,36. 1 Petelo 1:19).

Lahaba wakatulula batentekedi babidi ne muonshi pa dididishi dia nzubu, bualu bua nzubu wende wakadi mutuangane ne lumbu lua musoko, yeye wakashikama pamutu pa lumbu. Pakayabo, yeye wakasuika nshinga mukunze ku dididishi (Yoshua 2:15,21).

Mukenji wa Lumu Luimpe udi mukole, kupidia Lumu Luimpe ndufu, kuitabuja Lumu Luimpe mmuoyo wa tshiendelele. Mukanda wa Nzambi udi wamba ne, "Lelu ewu, binumvua diyi diende, kanukoleshi mitshima yenu… Monayi, katataka ntshikondo tshimpe, monayi, katataka ndituku dia lupandu" (Ebelu 3:7,8. 2 Kolinto 6:2).

7 Bena Isalele badi basabuka Musulu wa Yadene

7.1 Yoshua, tshifuanyikiji tshia Mukelenge Yesu Kilisto

Diba diakafika mu disua dia Nzambi bua Bena Isalele kusabuka musulu wa Yadene ne kubuela mu Kanana. Mose, bu muleji wa Mikenji, kakamanya mua kulombola bantu ba Nzambi mu buloba bua mulayi. Mikenji yakabateka muinshi mua mulawu bua bubi buabo (Galatia 3:10,11). Yoshua udi muntu wa mushindu mukuabo, udi muleji wa ngasa wa Nzambi. Udi tshifuanyikiji tshia Mukelenge wetu udi ulombola bantu bende, mu njila wa ditabuja, kudi Nyuma Muimpe, bua kubapianyisha masanka a buloba butamba buimpe.

"Yoshua wakabika ne dinda dionso; bakumuka ku Shitima, bakalua ku Yadene, yeye ne Bena Isalele bonso; bakalalaku diambedi kabayi banze kusabuka. Pakapita matuku asatu, milopo yakendakana munkatshi mua tshitudilu; yakambila bantu ne, Panuatangila mushete wa tshipungidi tshia meyi a Yehowa, Nzambi wenu, ne bakuidi Bena Lewi bautuala, nenumuke ku muaba unudi, nenuulonde. Kadi nushiye muaba pankatshi penu ne mushete bule bua coudées binunu bibidi; kanusemenyi pabuipi nawu, nunku nenumanye njila unudi mua kuya; bualu bua kanuakaya mu njila ewu diambedi" (Yoshua 3:1-4).

Mushete wa tshipungidi tshia meyi udi wamba bua Mukelenge wetu Yesu Kilisto. Musulu wa Yadene udi utuambila bualu bua lufu ne dibika dia ku lufu bia Mukelenge wetu kabidi. Pakasabuka Bena Isalele Yadene, bakuidi bakambula mushete wa tshipungidi tshia meyi, bakaya kumpala kua bantu. Mukenji wa Yehowa wakadi ne, "Kanusemenyi pabuipi nawu, nunku nenumanye njila unudi mua kuya; bualu bua kanuakaya mu njila ewu diambedi". Muaba munkatshi mua mushete ne bantu wakadi mule, bu 900 mètres. Mukelenge Yesu, pakatufuileye, wakadi nkayende, nansha muntu umue wakadi mua kuya nende. Mukelenge Yesu wakambila bayidi ne, "Kanuena bamanye mua kulua kunaya," Petelo wakamukonka ne, "Neuye kudi kunyi"? Yesu wakamukudimuna ne, "Katataka kuena mumanye mua kundonda kunaya, kadi pashishe neundonde". Petelo wakamukonka ne, "Mukelenge, munyi mudi tshiyi mumanye mua kukulonda katataka? Nenkufuile" (Yone 13:33-37). Nganyi wakadi mumanye mua kuimana ne Mukelenge wetu pakakengeye bua malu mabi etu muinshi mua kulumbulula kukole kua Nzambi? Nansha umue.

7.2 Bantu bonso badi basabuka Yadene pa lusenga lume

"Pakumuka bantu mu ntenta yabo bua kusabuka Yadene, bakuidi bakadi batuala mushete wa tshipungidi tshia meyi bakadi kumpala kua bantu; pakalua bantu bakadi batuala mushete mu Yadene, ne pakatua bakuidi bakadi batuala mushete makasa abo ku muelelu wa mayi (bualu bua mayi a Yadene atu apita pamutu pa bibungubungu mu ngondo yonso ya kupuola), pashishe mayi akadi apueka kumutu akimana … ne mayi a kamanda akadi apueka ku dishiba dia Alaba, ku Dishiba dia Luepu, akapanduluka; ne bantu bakasabuka buludiludi ne Yeleko. Bakuidi bakadi batuala mushete wa tshipungidi tshia meyi a Yehowa bakimana balulame mu lusenga lume munkatshi mua Yadene; ne Bena Isalele bonso bakasabuka mu lusenga lume too ne pakasabuka bantu bonso Yadene" (Yoshua 3:14-17). Nansha muntu umue wakashala.

7.3 Yadene, musulu wa lufu ne dibika dia ku lufu

Muinshi mua tshianza tshikole tshia Yehowa, kusabuka kua musulu wa lufu kuakalua njila wa ku muoyo ne wa dibuela dia Bena Isalele mu bupianyi buabo. Malu aa adi tshimanyinu tshia bualu buetu lelu. Nzambi udi utangila bantu bende bu "bafue ne Kilisto", ne "babishibue popamue ne Kilisto ku lufu" (Kolosai 2:20. 3:1). Paulo wakamba ne, "Nakashipibua ku mutshi mutshiamakane ne Kilisto; nunku kememe kabidi udi ne muoyo, kadi Kilisto ngudi muoyo munda muanyi; ne muoyo undi nawu mu mubidi katataka ndi nawu mu ditabuja dia Muana wa Nzambi, wakannanga, wakadifila bua bualu buanyi" (Galatia 2:20).

Mukenji munene wa Lumu Luimpe udi ne, Muena kuitabuja "kena ulua ku tshilumbu, wakumuka mu lufu, wakubuela mu muoyo" (Yone 5:24). Meyi aa adi malelela bualu bua muena kuitabuja yonso. Kadi budibo nabu mbua kuya kumpala mu ditabuja bua kumanya bubanji ne masanka bia bupianyi buabo. "Nunku binuikala babishibue popamue ne Kilisto ku lufu, nukebe malu a mu diulu, mudi Kilisto, mushikame ku tshianza tshikole tshia Nzambi" (Kolosai 3:1). Tuvuluke mulayi wa Nzambi kudi bantu bende ba kale ne, "Miaba yonso inudi nudiata munda mua makasa enu neyikale yenu" (Dutelonome 11:24).

7.4 Bifuanyikiji bisatu bia lufu lua Kilisto

7.4.1 Muana wa mukoko wa Kupita kua Yehowa

Pakamiamina Bena Isalele mashi a muana wa mukoko ku mutshi wa pa mutu pa mushiku wa mbelu ne ku biluwa bibidi bia mushiku wa mbelu wa nzubu yabo, bakasungidibua ku kulumbulula kua Nzambi. Yehowa wakambila Bena Isalele ne, "Mashi neikale bu tshimanyinu tshia mu nzubu munudi; ne panamona mashi, nempite pa mutu penu, ne mulawu kawena unukuata panashipa bantu ba mu buloba bua Ejipitu" (Ekesode 12:13). Petelo wakafunda ne, "Bualu bua nudi bamanye ne, Tuakupikudibua, kenku bintu bidi bijimina, ku argent anyi ku ngolo… kadi nuakapikudibua ku mashi a mushinga mukole, bu a muana wa mukoko kayi ne tshilema ne kayi ne ditoba, ku mashi a Kilisto mene" (1 Petelo 1:19).

7.4.2 Dishiba Dikunze

Ku Dishiba Dikunze Nzambi wakasungila bantu bende ku bianza bia Palo ne basalayi bende ku bukole buende bunene. Palo wakamba ne, "Tuakenza tshinyi patuakalekela Bena Isalele ku mudimu wetu? " (Ekesode 14:5). Kadi Yehowa wakapita Bena Ejipitu bukole mu bunene bua mayi. Ku lufu luende Mukelenge Yesu wakamuvuija tshianana "udi ne bukole bua lufu, ndiabolo mene; ne bua yeye apikule bonso aba bakadi bakuatshibue mu bupika matuku onso a muoyo wabo bua ditshina diabo dia lufu. Tuasakidila kudi Nzambi, udi utupa kutamba kua lufu bualu bua Mukelenge wetu Yesu Kilisto" (Ebelu 2:15. 1 Kolinto 5:57).

7.4.3 Musulu wa Yadene

Musulu wa Yadene udi utuambila bualu bua lufu luetu ne Kilisto ne dibishibua dietu nende; bualu bua muaba wetu mu Kilisto katataka. "Nzambi udi mubanji mu luse, bualu bua dinanga diende dinene diakatunanganeye nadi, patuakadi bafue bualu bua kushipa kuetu kua mikenji, wakatuvuija ne muoyo pamue ne Kilisto (nakusungidibua ku ngasa), wakatubisha nende pamue, wakatushikika nende pamue mu miaba ya mu diulu mu Kilisto Yesu" (Efeso 2:4-6). Paulo wakafundila Bena Kolosai ne, "Nuakafua, ne muoyo wenu udi musokoka ne Kilisto mu Nzambi" (Kolosai 3:3).

8 Mabue a Tshivulukidi

8.1 Bena Isalele badi basa tshitudilu tshiabo mu Gilegala

Pakasabuka bantu bonso Yadene, Yehowa wakambila Yoshua ne, "Usungule bantu dikumi ne babidi munkatshi mua bantu, muntu umue wa mu tshisamba ne tshisamba, ubambile ne, Nuangate mabue dikumi ne abidi munkatshi mua Yadene mu muaba wakadiata makasa a bakuidi, nuatuale, nuaele panshi mu muaba unudi nulala butuku ebu" (Yoshua 4:1-3).

Bantu bakasa tshitudilu tshiabo tshia kumpala mu buloba bua Kanana mu Gilegala, wakadi luendu lua bu kilomètre 12 ku musulu wa Yadene ne ku esete kua Yeleko. Dituku adi Yoshua wakajadika mabue dikumi ne abidi, akadi atuadibue kudi bantu dikumi ne babidi, muntu umue wa mu tshisamba ne tshisamba tshia Bena Isalele, bu muakamuambila Yehowa. Yeye wakajadika mabue dikumi ne abidi makuabo mu Yadene, mu muaba wakadiata makasa a bakuidi bakatuala mushete wa tshipungidi tshia meyi. Yoshua wakambila Bena Isalele ne, "Biakonka bana benu batatu babo mu matuku atshidi kumpala ne, Mabue aa ntshinyi? nenumanyishe bana benu ne, Bena Isalele bakasabuka Yadene ewu pa lusenga lume. Bualu bua Yehowa, Nzambi wenu, wakumisha mayi a Yadene kumpala kuenu, too ne panuakasabuka bonso… bua bantu bonso ba pa buloba bamanye ne, Tshianza tshia Yehowa tshidi tshikole; ne bua nuenu nutshine Yehowa, Nzambi wenu, tshiendelele" (Yoshua 4:21-24).

8.2 Mabue dikumi ne abidi adi tshivulukidi

Mabue dikumi ne abidi akajadikibua mu Gilegala akadi tshivulukidi tshia malu manene akenzela Yehowa bantu bende. Bakamana kutangila tshianza tshikole tshia Yehowa pakabalomboleye mu buloba bume munkatshi mua mayi a Dishiba Dikunze. Ku tshikondo atshi Yehowa wakasungila Bena Isalele mu bianza bia Palo, muena lukuna wabo. Katataka badi basabuka musulu wa Yadene, muaba wa lufu, "pa lusenga lume", bua kubuela mu bupianyi buabo. Ku Dishiba Dikunze

Bena Isalele bakashiya bena lukuna babo kunyima, katataka bena lukuna babo badi kumpala kuabo kadi mabue dikumi ne abidi akadi bumanyishi kudibo ne, Yehowa udi netu.

Malesona a nyuma, bua malu aa, adi bua bualu buetu lelu. Muoyo utudi nawu mpindiewu, bu bena kuitabuja, udi muoyo mupia-mupia mu Kilisto. "Bikala muntu mu Kilisto, yeye udi mufukibue mupia-mupia; malu makulukulu akaya, monayi, akalua mapia-mapia" (2 Kolinto 5:17).

Mabue akajadikibua mu Gilegala adi atuvuluija ne, "Bituikala bamane kufua ne Kilisto, tudi tuitabuja ne, Netuikale nende ne muoyo kabidi. Tudi bamanye ne, Kilisto wakabishibua ku lufu kena ufua kabidi; lufu kaluena mua kumukokesha kabidi. Bualu bua pakafueye, yeye wakafua ku bubi musangu umue tshiendelele; kadi muoyo udiye nawu, udi nawu kudi Nzambi. Muomumue nuenu kabidi, nudibale ne, Tudi bafue ku bubi, kadi tudi ne muoyo kudi Nzambi mu Kilisto Yesu" (Lomo 6:8-11).

8.3 Mabue ajadikibua kudi Yoshua mu musulu wa Yadene

Pakumuka bakuidi mu musulu, pashishe mayi akapingana mu muaba wawu, akabuikila mabue ajadikibua kudi Yoshua munkatshi mua Yadene. Mabue aa adi atuambila bualu bua lufu lukole lua Mukelenge wetu. Tudi tuvuluka meyi adi mafunda bua bualu buende ne, "Ndondo wa mayi udi ubikila ndondo mukuabo pumvueye tshiona tshia bibila biebe. Mavuala ebe ne mambuanka ebe onso akupita pamutu panyi" (Musambu 42:7). "Yeye wakumushibua mu buloba bua badi ne muoyo, ne bua matomboka a bantu banyi wakashipibua" (Yeshaya 53:8). Mabue adi atuvuluija ne, Kilisto wakatufuila. Ku mesu kua Nzambi, bena kuitabuja bakafua nende.

8.4 Tshivulukidi tshia Bidia bia Mukelenge

Bu mabue dikumi ne abidi akavuluija Bena Isalele bua malu manene akabenzela Yehowa, Bidia bia Mukelenge bidi bituvuluija bua malu manene akatuenzela Musungidi wetu. Paulo wakadi wela meji bua malu aa pakambeye ne, "Mukelenge wetu Yesu Kilisto, wakadifila bua malu mabi etu bua yeye atusungile munkatshi mua tshikondo etshi tshibi bu mudi disua dia Nzambi Tatu wetu. Muoyo undi nawu mu mubidi katataka ndi nawu mu ditabuja dia mu Muana wa Nzambi, wakannanga, wakadifila bua bualu buanyi" (Galatia 1:4. 2:20).

Mutanda wa bidia, mutshibuke, udi utuvuluija bualu bua mubidi wa Mukelenge utupebua, udi utuvuluija bua malu onso akamuenzela bantu babi, pakakengeye pa mutshi mutshiamakane. Bualu bua lupanza, Mukelenge Yesu wakamba ne, "Lupanza elu ludi dipungila dipia-dipia dia mu mashi anyi akunumatshishilabo panshi" (Luka 22:20). Malu manene bualu bua dipungila dipia-dipia adi ne, "Nenteke mikenji yanyi mu meji abo, nenyifunde kabidi pa mitshima yabo; nengikale Nzambi wabo, ne bobo nebikale bantu banyi… bualu bua nengikale nabo luse mu malu mabi abo, tshiena nvuluka mibi yabo kabidi" (Ebelu 8:10-12).

Lupanza ludi lupanza lua disanka bua bualu buetu (1 Kolinto 10:16), kadi luakadi lupanza lua dikenga ne lua kanyinyanyinga kakole bua Mukelenge wetu.

8.5 "Enzayi nunku bua kunvuluka"

Pasangisha bantu ba Mukelenge bua kumuvuluka mu kutshibula kua bidia, badi benza nunku bua kuandamuna ku dilomba diende ne, "Enzayi nunku bua kunvuluka" (Luka 22:19). Badi bavuluka makenga ende ne kanyinganyinga kende, badi bavuluka kabidi butumbi buende ku "tshianza tshikole tshia Mutambe Bunene wa mulu" (Ebelu 1:3). Badi bavuluka mulayi wende ne, "Ndi bianyi munkatshi mua bantu babidi anyi basatu badi badisangisha mu dina dianyi" (Matayo 18:20). Badi bavuluka mulayi wa Mukelenge ne, "Nempingane kabidi, nenuangate kundi meme muine, bua kundi ngikala, nuenu nenuikaleku kabidi" (Yone 14:3). Paulo wakafundila Bena Kolinto ne, "Misangu yonso inuadia bidia ebi ne inuanua lupanzu elu, nudi nuambila bantu bua lufu lua Mukelenge too ne palueye" (1 Kolinto 11:26). Mulayi wa kunshikidilu wa Mukelenge Yesu udi ne, "E, ndi ndua lubilu. Amen; lua, Mukelenge Yesu" (Buakabuluibua 22:20).

9 Gilegala: Muaba wa kudilumbuluisha

9.1 Gilegala: muaba munene mu histoire wa Bena Isalele

Tuakamana kumona ne, Bena Isalele, pakasabukabo musulu wa Yadene, bakasa tshitudilu tshiabo mu Gilegala ku esete wa Yeleko bua musangu wa kumpala mu buloba bua mulayi. Bakajadika mabue dikumi ne abidi mu Gilegala bua kuvuluija bantu mu matuku akatshidi kumpala ne, Bena Isalele bonso bakasabuka Yadene pa lusenga lume ku bukole bua tshianza tshia Nzambi bua buonso buabo bamutshine tshiendelele (Yoshua 4:19-24). Ku Gilegala Yehowa wakumusha "bundu bua Ejipitu" kudibo pakatengudibuabo. Ku Gilegala bakadia bidia bia disanka dia Kupita kua Yehowa, ne ku Gilegala mana (mampa a mu diulu) akajika pakabangabo kudia bintu biakasanganabo mu Kanana.

9.2 Mitshima ya Bena Kanana idi ipandika

"Pakumvua bakelenge bonso ba Bena Amole bakadi dishiya dia Yadene dia ku wesete, ne bakelenge bonso ba Bena Kanana bakadi bashikama kukala kua mayi manene, lumu ne, Yehowa wakuumisha mayi a Yadene kumpala kua Bena Isalele too ne pakasabukabo bonso, pashishe mitshima yabo yakapandika, kabakadi ne dikima kabidi bualu bua Bena Isalele" (Yoshua 5:1,2).

Bidimu bia bungi biakamana kupita, musangu mukuabo bu nkama itanu, katshia Nzambi wakambila Abalahama bualu bua bubi bua Bena Amole ne, "Bubi bua Bena Amole kabuena buanji kukumbana" (Genese 15:16). Nzambi udi mubanji mu luse, udi upesha bantu tshikondo tshia kukudimuna mitshima yabo. Bikalabo kabayi batonda mibi yabo Yeye neabalumbuluishe. Mu mukanda wa Yoshua tudi tubala bu muakalumbuluisha Nzambi Bena Amole ne Bena Kanana bonso ku bianza bia Yoshua. Mu mikanda idi ilonda mukanda wa Yoshua tudi tubala bu muakalumbuluisha Nzambi Bena Isalele nkayabo, pakamukomabo nyima, ku bianza bia bantu ba bende. "Nzambi kena usekibua" (Galatia 6:7).

9.3 Gilegala, muaba wa kudilumbuluisha ne wa bukole

"Mu matuku awu Yehowa wakambila Yoshua ne, Enza tuele tua mabue, utengule Bena Isalele tshiakabidi. Yoshua wakenza tuele atu, wakatengula Bena Isalele ku muaba udibo babikila ne, Mukuna wa tshitenguidi. Ebu mbualu buakabatenguila Yoshua … bantu bonso bakalupuka mu Ejipitu bakadi batengula, kadi bantu bonso bakalelabo mu njila mu tshipela pakalupukabo mu Ejipitu kabakadi batengula. Bualu bua Bena Isalele bakendakana mu tshipela bidimu makumi anayi too ne pakajimijibua bena mvita bonso bakalupuka mu Ejipitu, bualu bua bobo kabakumvua diyi dia Yehowa … pakajikijabo kutengula bantu bonso, bobo bakashala mu miabo yabo mu tshitudilu too ne pakondapibuabo. Yehowa wakambila Yoshua ne, Lelu nakumusha bundu bua Ejipitu kunudi. Nunku badi babikila muaba awu ne, Gilegala too ne lelu" (Yoshua 5:2-9).

9.4 Bualu bua ditengula

Tudi tubala bualu bua ditengula bua musangu wa kumpala mu mukanda wa Genese. "Pakadi Abalahama ne bidimu makumi tshitema ne tshitema, Yehowa wakamueneka kudi Abalahama, wakamuambila ne, Ndi Nzambi wa Bukole Buonso; wenda kumpala kuanyi, wikale muakane … nenjadike tshipungidi tshianyi pankatshi petu nebe, ne tunkanunuina tuebe too ne bikondo biatu bionso bu tshipungidi tshia tshiendelele, bua meme kuikala Nzambi webe ne wa tunkanunuina tuebe. Nenkupe wewe ne tunkanunuina tuebe buloba buonso bua Kanana buudi wendakanamu, bu bupianyi buenu bua tshiendelele; nengikale Nzambi wabo … etshi ntshipungidi tshidi pankatshi petu nebe ne tunkanunuina tuebe tshinudi natshi bua kutumikila ne, Muana mulume yonso wa munkatshi muenu atengudibue" (Genese 17:1-11).

Mu matuku a bapostolo Bena Yuda bakuabo bakadi bayisha ne, Bikala bana betu ba mu Kilisto, bantu ba bende, bakakudimuna mitshima yabo kudi Nzambi, kabayi batengula "bu mu tshilele tshia Mose, kabena bamanye mua kusungidibua". Kadi bapostolo ne bakulu, bakadisangisha bua kulondabo bualu ebu, bakapidia diyisha edi (Bienzedi nshapita 15). Dilesona dia ditengula bua bena Kilisto didi mu Kolosai 2:11. 3:5,6. Didi diamba dia kutapulula kuabo ku malu a ba pa buloba ne malu a mubidi. "Tuetu tudi batengula (buena kuamba ne, Batengula balelela) badi batendelela ku Nyuma wa Nzambi ne badi batumbila mu Kilisto Yesu, ne badi kabayi ne dieyemena dia malu a mubidi" (Filipoi 3:3).

9.5 Badi badia bintu bia Kupita kua Yehowa

Bena Isalele bakadia bintu bia Kupita kua Yehowa bua musangu wa kumpala mu Ejipitu, diambedi kabayi banji kuumuka mu buloba bua bupika buabo. Ku tshikondo atshi Mose wakabambila ne, "Panuafika mu buloba bulualua Yehowa kunupa, bu muakalayeye, nuenze tshilele etshi" (Ekesode 12:25). Katataka, badi badilongolola bua Disanka dia Kupita kua Yehowa bu muakambilabo Mose. Pakabakonka bana babo bakaledibua mu tshipela ne, "Nudi nuenzele tshilele etshi tshinyi? " Bakabandamuna ne, "Tshidi tshintu tshishipa tshia kupita kua Yehowa, yeye wakapita pamutu pa nzubu ya Bena Isalele mu Ejipitu, pakashipeye Bena Ejipitu, ne wakasungila nzubu yetu" (Ekesode 12:26,27). Malu aa adi bindidimbi bia malu matamba bunene adi asanganyibua mu Dipungila Dipia-dipia bualu bua Kilisto ne Ekeleziya wende.

9.6 Bena Isalele badi mu muaba mupia-mupia

Bena Isalele bakamana kupita musulu wa Yadene mu lusenga lume. (Yadene udi wamba bualu bua lufu ne dibika dia ku lufu). Pakitabuja muntu Mukelenge Yesu, udi musanganyibue mu muaba mupia-mupia. "Bikala muntu mu Kilisto, yeye udi mufukibue mupia-mupia; malu makulukulu akaya, monayi akalua mapia-mapia" (2 Kolinto 5:17). Nzambi udi umona muaba wa bena Kilisto bu mu "miaba ya mu diulu" mu Kilisto. Mukanda wa Nzambi udi wamba ne, "Nzambi … wakatubisha nende pamue, wakatushikika nende pamue mu miaba ya mu diulu mu Kilisto Yesu" (Efeso 2:4-6).

Diambedi Bena Isalele kabayi banji kupiana buloba bua mulayi, bakavuluka dipatuka diabo mu bupika pakabadiabo bintu bia Kupita kua Yehowa. Bakavuluka buimpe ne luse bia Nzambi ne bunene bua lupandu luabo. Bena Kilisto badi bavuluka diyi dia mu Mukanda wa Nzambi ne, "Mulambu wetu wa Kupita kua Yehowa wakashipibua, Kilisto mene" (1 Kolinto 5:7). Badi bavuluka meyi a Mukelenge bualu bua bidia biende ne, "Enzayi nunku, bua kumvuluka" (Luka 22:19).

Tuakumana kumona ne, Ditengula dia Bena Isalele didi diamba bualu bua kudilumbuluisha ne ditapulula ku malu a mubidi. Bualu bua bidia bia Mukelenge tudi tubala ne, "Muntu aditete munda diambedi, nunku adie biende bidia ebi, anue lupanza elu" (1 Kolinto 11:28).

9.7 Bintu bia kudia bipia-bipia

Kunyima kua disanka dia Kupita kua Yehowa bakadia bintu biakasanganabo mu buloba, ne mampa adi kayi ne luevene ne manvua akoshabo, anyi "grain rôti". Kanana wakadi "buloba bua blé ne orge" (Dutelonome 8:8).

Pakadi Bena Isalele ne bia kudia bualu mu tshipela, Yehowa wakabatumina mana, "bidia bia mu diulu" (Ekesode nshapita 16). Mana akajika pakabangabo kudia bintu biakasanganabo mu buloba; Bena Isalele kabakadi ne mana kabidi; bakadia anu bintu biakasanganabo mu buloba bua Kanana tshidimu atshi (Yoshua 5:12).

Bua kudiunda mu malu a Nzambi ne bua kukola mu Mukelenge, muena Kilisto udi ne bia kudia bualu. Muena Kilisto mupia-mupia kena mumanye mua kujingulula malu a bungi adi mu Mukanda wa Nzambi lukasa, budiye nabu mbua kudiunda mu malu aa. Muana mukese udi wangata mabele, pakakoleye udi udia bidia bikole.

9.8 Bualu bua luevene

Mu Mukanda wa Nzambi luevene ludi tshimanyishilu tshia malu mabi. Bu mudi luevene lutangalaka lukasa mu mutanda wa bidia mujima, malu mabi mu ekeleziya adi enzeka muomumue (Galatia 5:7-9). Paulo wakadimuja Bena Kolinto ne, "Kuditumbisha kuenu kakuena kuimpe. Kanuena bamanye ne luevene lukese ludi lumuangalaka mu mutanda wa bidia mujima, anyi? Umushayi luevene lukulukulu bua nuenu nuikale bu mutanda mupia-mupia, bu munudi kanuyi ne luevene. Bualu bua mulambu wetu wa Kupita kua Yehowa wakashipibua, Kilisto mene. Nunku tuikale tudie bidia bia disanka edi; katubidiyi ne luevene lukulukulu, anyi luevene lua meji mabi ne lua malu mabi, kadi tudie disanka ne bidia bidi kabiyi ne luevene, bia malu a patoke ne a bushuwa" (1 Kolinto 5:6-8).

9.9 Bualu bua bia kudia bia Bena Kilisto

Mana akadi tshintu tshikese tshibulunge pa tshipela. Tshiakadi tshintu tshitoke too, tshiakadi tshia kutua kuimpe bu mikata mienza ne buitshi. Bena Isalele, pakamonabo, bakakonkangana ne, "Etshi ntshinyi? " Mose wakabambila ne, "Tshidi bidia biakunupa Yehowa bua kudia" (Ekesode 16:15).

Mukelenge Yesu wakambila Bena Yuda ne, "Tatu wanyi udi unupa bidia bilelela bia mu diulu. Bua bidia bia Nzambi mbiobio bidi bifuma mu diulu, bidi bipa ba pa buloba muoyo. Ndi bianyi bidia bia muoyo; walua kundi kena wikala ne nzala, wangitabuja kena wikala ne nyota" (Yone 6:32,33,35). Nunku mana adi tshifuanyikiji tshia Mukelenge Yesu bu bia kudia buetu mu tshipela tshia buloba ebu. Tudi tusangana bidia ebi nangananga mu Lumu Luimpe lua Matayo, Mako, Luka ne Yone. Mikanda eyi idi ituambila bualu bua muoyo wa Mukelenge Yesu Kilisto wetu pa buloba buetu mu kudipuekesha. Tudi tubala mu Mukanda wa Nzambi ne, "Pakamuenekeye mu tshifuanyikiji tshia muntu, yeye wakadipuekesha, wakalua mutumikidi too ne ku lufu, ku lufu mene lua pa mutshi mutshiamakane" (Filipoi 2:8). Pakalua Mukelenge Yesu, "bakamulengulula, bakamulekela kudi bantu; wakadi muena kanyinganyinga, wakamanya makenga" (Yeshaya 53:3).

"Bintu biakasanganabo mu buloba, ne mampa adi kayi ne luevene ne manvua akoshabo "grain rôti", bidi biamba bua Kilisto mu butumbi. Butudi nabu mbua kudidisha mu mikanda mifunda kudi ekeleziya kabidi bua kuikala ne bukole bua kupiana bupianyi buetu bua mu Diulu. "Grain rôti", udi utuvuluija bualu bua makenga a Kilisto, bualu bua mudimu wa bupikudi wakenzeye pa mutshi mutshiamakane. "Kadi Nzambi wakamubisha ku bafue" (Bienzedi 13:30). Kilisto "wakabuela mu diulu muine, bua kumuenekeye mpindiewu kumpala kua Nzambi bua bualu buetu" (Ebelu 9:24). Nunku butudi nabu mbua kudidisha ne Diyi dia Yeye udi mu Diulu.

Dipungila Dikulukulu didi diamba bualu bua Mukelenge Yesu Kilisto kabidi. Pakamueneka Mukelenge kudi bayidi bende babidi mu njila wa ku Emau, Yeye "wakabangila ku Mose ne ku baprofete bonso, wakabajinguluila malu akafundabo mu Mukanda wa Nzambi wonso bualu buende" (Luka 24:27). Tudi ne Mukanda wa Nzambi mujima bualu.

10 Dibutuka dia Yeleko

10.1 Muntu ne muele wa mvita mu tshianza tshiende

"Pakadi Yoshua pepi ne Yeleko, wakabanduluka, wakatangila ne, monayi, muntu wakadi muimane pepi nende ne muele wa mvita mu tshianza tshiende, ne Yoshua wakaya kudiye, wakamukonka ne, Wewe udi ku luseke luetu anyi ku luseke lua badi netu lukuna? Yeye wakitaba ne, Nansha, nakuluila bu mukelenge wa musumba wa Yehowa, Yoshua wakamututshila mpala panshi, wakamutendelela, wakamukonka ne, Mukelenge wanyi udi wambila muntu wende tshinyi? Mukelenge wa musumba wa Yehowa wakambila Yoshua ne, Umushe bisabata ku makasa ebe; bua muaba uudi muimane udi wa tshijila" (Yoshua 5:13-15).

Musangu mukuabo Yoshua wakabika ne dinda dionso bua kutangila Yeleko, musoko wa lumbu lule ne lukole, tshifuanyikiji tshia bukole buonso bua bena lukuna babo. Yoshua wakadi muntu wa dikima mene mene ne wa ditabuja dilelela. Musangu mukuabo, pakamoneye muntu ne muele wa mvita mu tshianza tshiende, wakavuluka diyi dia Yehowa kudiye ne, "Kakuena muntu udi mua kuimana kumpala kuebe too matuku onso autshidi ne muoyo; nengikale nebe bu munakadi ne Mose; tshiena nkulekela, tshiena nkushiya nkayebe" (Yoshua 1:5). Nunku pakamoneye muntu ne muele wa mvita mu bianza muimane pabuipi nende kakatshina nansha, wakamukonka ne, "Wewe udi ku luseke luetu anyi ku luseke lua badi netu lukuna? " Muntu ewu udi nganyi? Udi "Mukelenge wa musumba wa Yehowa", muomumue ne Yeye wakamueneka kudi Mose ku katshi kakakapia, nansha ludimi lua kapia luakadi lulupuka mu katshi (Ekesode 3:2). Yeye udi "Kapitene ka lupandu luetu", Mukelenge Yesu Kilisto (Ebelu 2:10). Mona bu mudi Yoshua upona ku makasa ende. Udi umutendelela, udi umusha bisabata biende ku makasa ende.

Dimueneka dia Kapitene ka musumbu wa Yehowa diakakolesha mutshima wa Yoshua. Yeye wakamiana kumuambila ne, "Ikala ne bukole ne mutshima wa dikima; kutshinyi, kukuatshiki buowa, bualu bua Yehowa, Nzambi webe, udi nebe kuonso kuwaya" (Yoshua 1:9). Katataka, bu muakumusheye bisabata biende, Yoshua wakajingulula ne, Ndi kumpala kua Yeye udi Wa Tshijila, meme bianyi bundi nabu mbua kuikala muntu wa tshijila.

10.2 Muena Kilisto udi ne dikuatshisha dia Kapitene kende bualu

Mukelenge wa Yeleko ne bantu bende mu musoko wabo wa lumbu lule ne lukole badi bamba bua bukokeshi bua muena lukuna wa Bena Kilisto ne bu mudiye musue kupumbisha bantu ba Nzambi mu dibuela diabo mu masanka abo onso adi mu Kilisto. Paulo wakajingulula malu bimpe pakafundileye Bena Efeso ne, "Ku ndekelu, nudikoleshe mu Mukelenge ne mu bukole buende bunene. Luatayi bintu bionso bia mvita bia Nzambi, bua nuenu numanye mua kuimana bakandamana kumpala kua mateyi a diabolo" (Efeso 6:10,11).

Butudi nabu mbua kuikala ne Kapitene ka lupandu luetu netu bua kupita bena lukuna betu ba nyuma bukole, ne malu onso adi mua kutupumbisha bua kubuela mu masanka etu onso adi mu Kilisto Yesu.

Muele wa mvita mu bianza bia Mukelenge wa musumba wa Yehowa udi wamba bualu bua malu abidi. Mukelenge udi mumanye mua kuvuija bukole bua Satana ne bantu bende tshianana. Paulo udi ubikila muele wa Nyuma ne, "Diyi dia Nzambi" (Efeso 6:17). Bulelela tudi mua kuamba nende ne, "Bikala Nzambi netu, nganyi udi mumanye mua kutupumbisha? " (Lomo 8:31). Mu Buakabuluibua 19:15 muele wa mvita udi wamba bua kulumbulula kuakane kua bena bupidia kudi Yeye udi wa tshijila.

10.3 Yehowa udi utangila kudi mukaji umue mu Yeleko

Mukelenge wa Yeleko ne bantu bende bakadi bantu babi, bakadi ne mitshima mikole, kadi Nzambi, udi mumanye mitshima ya bantu bonso, wakadi utangilatangila kudi diku dimue munda mua musoko, diku dia Lahaba, mukaji wakabueja batentekedi mu nzubu wende ne ditalala, mu ditabuja ne mu ditshina dia Yehowa. (Yoshua nshapita 2. Ebelu 11:31). Lahaba ne famille wende kabakamanya mua kupatuka mu musoko, mukelenge wa Yeleko wakinshila bibi bionso kadi Yehowa wakatangila nshinga mukunze musuika ku dididishi dia nzubu wa Lahaba. Pakapunga batentekedi babidi diyi nende bua kusungila muoyo wende ne mioyo ya famille wende, bakamupa nshinga mukunze bu tshieya tshilelela tshia dipungila diabo. Nshinga mukunze udi utuvuluija bualu bua mashi a Mukelenge Yesu, wakadifila bua bubi buetu. Yoshua, muntu wa Nzambi, wakela mukenji kudi batentekedi bua kusungila Lahaba ne famille wende ne bintu biende bionso ku dibutuka dia musoko.

10.4 Bakuidi badi banyunguluka Yeleko ne Mushete wa Yehowa

Yehowa wakambila Yoshua ne, "Mona, nakufila Yeleko ne mukelenge wa musoko ne bena mvita bonso ba dikima mu tshianza tshiebe" (Yoshua 6:2). Yoshua wakadi ne anu bualu bumue bualu: bua kuenza malu onso bu muakamuambila Mukelenge ne kuvuluka ne, Mvita idi mu bianza bia Nzambi, bu muakamba nsongalume Davidi, pakadiye kumpala kua Goleyata (1 Samuele 17:47).

Yoshua wakabika ne dinda dionso ne wakenza bu muakamuambila Yehowa, wakabikila bakuidi, wakabambila ne, "Ambulayi mushete wa tshipungidi tshia meyi; bakuidi muanda mutekete baye ne mpungi muanda mutekete ya nsengu ya bimpanga kumpala kua mushete wa tshipungidi wa Yehowa. Bakambila bantu ne, Pitayi, nunyunguluke musoko, bena mvita baye kumpala kua mushete wa Yehowa" (Yoshua 6:6,7).

Mushete wa Yehowa, wakadi mushete wa tshipungidi tshia meyi, wakadi mushale mu muaba mutambe wa tshijila mu Nzubu wa Tshitendelelu. "Munda muawu muakadi tshifuadi tshia ngolo tshitekelamu mana, ne mulangala wa Alona wakela ntonga, ne mabue akadi meyi a tshipungidi mafundapu" (Ebelu 9:3,4). Pakafika Bena Isalele bua kusabuka Yadene, Yoshua wakabambila ne, "Monayi, mushete wa tshipungidi tshia meyi a Mukelenge wa buloba buonso udi usabuka Yadene kumpala kuenu" (Yoshua 3:11). Mushete wa tshipungidi wakavuluija Bena Isalele ne, Mukelenge wa bukole buonso udi netu, udi uya kumpala kuetu.

10.5 Bena Isalele badi banyunguluka lumbu lua Yeleko bapuwa

Matuku asambombo bakuidi bakatuala mushete wa tshipungidi bakanyunguluka musoko musangu umue ne bena mvita bonso ba Bena Isalele. Bakuidi muanda mutekete bakaya kumpala kua mushete wa tshipungidi, bakadi baya bela mpungi, bantu bonso bakitabuja mukenji wa Yoshua ne, "Kanuedi mbila, diyi dienu kadiumvuiki, diyi dimue kadilupuki mukana muenu too ne palua dituku dinanuambila ne, Elayi mbila; pananuambila nunku, nuele mbila" (Yoshua 6:10).

Mpungi yakadi tshimanyinu tshia bumanyishi bua Diyi dia Yehowa kudi Bena Isalele. Bena Isalele bakavuluka ne, Katuena tuya ku mvita mu bukole buetu kadi mu bukole bua Yehowa. Musangu mukuabo Bena Isalele bakamueneka kudi Bena Yeleko bu bantu bakatshina bua kufuilangana nabo, nangananga bu Bena Isalele bakanyunguluka musoko matuku asambombo musangu umue bapuwa. Pakafika dituku dia muanda mutekete, bakuidi bakanyunguluka musoko wa Yeleko misangu muanda mutekete, bakatshidi bapuwa too ne Yoshua wakela mukenji ne, "Elayi mbila, bualu bua Yehowa wakunupa musoko". Pakela bantu mbila bikole lumbu luakadishimbukila, basalayi ba Bena Isalele bakabuela mu musoko.

Nomba muanda mutekete udi nomba wa mushinga mukole mu Mukanda wa Nzambi. Musangu mukuabo tudi mua kuela meji bualu bua nomba ewu bu nomba wa tshishiki, nomba udi wamba bua dikumbajibua dia bualu (Genese 2:2. 2 Bakelenge 5:14. Lewitiki 16:19).

Yoshua ne Bena Isalele bonso bakitabuja Diyi dia Mukelenge. "Bua ditabuja ngumbu ya Yeleko yakashimbuka pakamanabo kuyinyunguluka matuku muanda mutekete" (Ebelu 11:30). Bua ditabuja Lahaba, mukaji wa mu Kanana, wakadi diambedi muena tshiendenda, wakashikama talalaa munkatshi mua bantu ba Nzambi.

Dilesona dinene bua Yoshua ne Bena Isalele bonso didi diodimue ne diyi dia Mukelenge Yesu kudi bayidi bende ne, "Binuikala kanuyi nanyi, kanuena bamanye mua kuenza bualu" (Yone 15:5).

11 Bualu bubi buakenza Akana

11.1 Yeleko: musoko wa mulawu

Bantu ne bintu bionso bia mu musoko wa Yeleko biakadi muinshi mua mulawu wa Yehowa bualu bua bubi bua bena musoko. Yoshua wakabela Bena Isalele ne, "Musoko ewu ne bintu bionso bidimu bikale bia tshijila kudi Yehowa. Anu Lahaba, mukaji wa tshiendenda, ikale ne muoyo ne bantu bonso badi nende mu nzubu muende, bualu bua yeye wakasokoka batentekedi batuakatuma. Nuenu nupidie tshintu tshia tshijila; kanuangatshi tshintu tshinuakajila; binuatshiangata, nenueleje tshitudilu tshia Bena Isalele mulawu, nenutshikengeshe. Yoshua wakadimuja bantu dituku adi, wakabambila ne, Muntu yonso udi ubika bua kuasa musoko ewu wa Yeleko kabidi neikale ne mulawu kumpala kua Yehowa; pabangeye kuasa musoko neajimije muana wa bute wende ne pajadikeye bibi bia musoko neajimije muana wa mukala wende" (Yoshua 6:17,18,26).

11.2 Bualu bubi busokoka

"Kadi Bena Isalele bakenza bualu bubi ne tshintu tshia tshijila; bualu bua Akana… wakadiangatshila tshintu tshia tshijila; ne tshiji tshiakakuata Yehowa bualu bua Bena Isalele" (Yoshua 7:1).

Bubi buakadi busokoka mu tshitudilu tshia Bena Isalele too ne pakatuma Yoshua bena mvita bua kuluisha Bena Ai. Kunyima kua dibutuka dia Yeleko Yoshua wakatuma batentekedi ku Ai bua kutentekela buloba. Bakapingana ne diyi ne, "Kembualu bua bantu bonso kuya nansha, kadi anu balume binunu bibidi anyi bisatu baye bua kuluisha Bena Ai … bualu bua bobo badi banya-banya" (Yoshua 7:2,3). Bidi bimueneka ne, Yoshua kakalomba lungenyi kudi Yehowa. Wakatuma bena mvita bua kuluisha Bena Ai kadi Mukelenge wa musumba wa Yehowa kakadi nabo bu muakadiye nabo kumpala kua ngumbu ya Yeleko. Bena Ai bakapita basalayi ba Isalele bukole, bakashipa bantu bu makumi asatu ne basambombo, Bena Isalele bakanyema kumpala kuabo. Mitshima ya bantu yakatekete-tekete, yakakudimuka bu mayi.

Yoshua wakadipanda bilulu biende, wakadikuma mpala wende panshi kumpala kua mushete wa Yehowa too ne ku dilolo. Yoshua wakamba ne, "Aka! Mukelenge Yehowa… munyi?… Nengambe tshinyi?… Wewe newenze tshinyi bua dina diebe dinene"? Yehowa wakamuambila ne, "Bena Isalele bakenza bibi; bakashipa tshipungidi tshinapunga nabo, bakadiangatshila tshintu tshia tshijila, bakatshiba kabidi, bakasokoka bubi buabo… nunku Bena Isalele kabena mua kuimana kumpala kua bena lukuna babo, bakela bena lukuna babo nyima bualu bua bobo bakadiela mulawu… bika biebe, ujidike bantu, ubambile ne, Nudijidile bua malu a makelela; bualu bua Yehowa, Nzambi wa Isalele, udi wamba ne, Tshintu tshia tshijila tshidi munkatshi muenu, nuenu Bena Isalele, nunku kanuena mua kuimana kumpala kua bena lukuna too ne panuumusha tshintu tshia tshijila munkatshi muenu" (Yoshua 7:6-13).

11.3 Nzambi udi utangila Bena Isalele bu bantu bamue

Yoshua wakambila Nzambi ne, "Wewe newenze tshinyi bua dina diebe dinene?" Yeye kakajingulula ne, Bualu bubi buakakuata Bena Isalele bonso bualu bua "Dina dinene dia Yehowa". Dina didi diamba bualu bua bienzedi bia muntu, bualu bua bilele biende. Muprofete mukuabo wakamba, bualu bua Nzambi ne, "Wewe udi ne mesu mapite buakane adi kaayi mua kutangila malu mabi, ne kuena mua kutangila bienzedi biabo bibi tshianana" (Habakuka 1:13). Mose wakambila Bena Isalele ne, "Yehowa, Nzambi wenu, udi wendakana munkatshi mua tshitudilu bua kunusungila, ne bua kufila badi nenu lukuna mu bianza bienu; nunku tshitudilu netshikale tshia tshijila. Yehowa katangidi tshintu tshibi munkatshi muenu, kasesuki kunudi" (Dutelonome 23:14). "Nudilengeshe, nuenu badi batuala malonga a Yehowa. Malu a tshijila adi akanangana ne nzubu webe, Yehowa, too ne tshiendelele" (Yeshaya 52:11. Musambu 93:5).

11.4 Yoshua udi ulonda diyi dia Yehowa

"Nunku Yoshua wakabika ne dinda dionso, wakasangisha Bena Isalele ku bisamba biabo; bakasungula tshisamba tshia Yuda… wakasungula Akana… Akana wakambila Yoshua ne, "Bulelela, nakuenzela Yehowa, Nzambi wa Isalele, bubi; bualu bunakuenza budi nunku: panakatangila tshilulu tshimpe tshia Bena Babulona ne nshekele nkama ibidi ya argent ne tshiamu tshia or tshia mushinga wa nshekele makumi atanu munkatshi mua bintu, lukuka luakankuata, nakabiangata; mona bidi bisokoka mu buloba munkatshi mua ntenta wanyi, ne tshiamu tshia argent tshidi muinshi muabi" (Yoshua 7:16-21).

Batumibue bakaya lubilu ku ntenta wa Akana, bakasangana bintu bisokoka bu muakambeye. Yoshua wakamuambila ne, "Wewe wakatukengesha bualu kayi? Yehowa neakukengeshe lelu. Bena Isalele bonso bakamukuma ne mabue yeye ne bintu biende bionso kabidi, bakabiosha ne kapia. Bakunguisha mushiki munene wa mabue pa mutu pende; udiku too ne lelu; ne Yehowa wakalekela tshiji tshiende. Nunku badi babikila muaba awu ne, Tshibanda tshia Akola too ne lelu" (Yoshua 7:22-26).

Muaku, "Akola" udi wamba bua matata, kadi pakumusha Bena Isalele bualu bubi munkatshi muabo, Nzambi wakadi mumanye mua kuamba mu matuku a Yeshaya ne, "Lupongo lua Akola neluikale muaba wa bimuna kulalamu" (Yeshaya 65:10. Hoshea 2:15). Akola, muaba wa matata, wakalua muaba wa ditekemena ne wa ditalala. Nzambi udi musue bantu bende. Papangabo, udi ubakengesha bua kubakuatshisha, "bua tuetu tuikale bangatshi ba tshijila tshiende" (Ebelu 12:10).

11.5 Dilesona dinene bua ekeleziya wa Nzambi

Nyuma Muimpe wa Nzambi udi munkatshi mua bantu bende too ne dipingana dia Mukelenge bua kuangata ekeleziya wende. Yeye udi Nyuma wa tshijila. "Bu mudi yeye wakanubikila udi wa tshijila, nunku nuenu kabidi nulue ba tshijila mu malu onso a muoyo wenu; bualu bua diyi didi difundibua ne, Nuenu nenuikale ba tshijila, bualu bua meme ndi wa tshijila" (1 Petelo 1:15,16).

Bikala bualu bubi budiku mu ekeleziya bidi bualu bukole ku mesu kua Nzambi. Paulo wakafundila Bena Kolinto bualu bua masandi akadi munkatshi muabo ne, "Kuditumbisha kuenu kakuena kuimpe. Kanuena bamanye ne luevene lukese ludi lumuangalaka mu mutanda wa bidia mujima, anyi?" (1 Kolinto 5:6). Bikala bena ekeleziya witabuja malu mabi munkatshi muabo badi banyingalaja Nyuma Muimpe. Paulo wakafundila Bena Tesalonike ne, "Kanujimi Nyuma Muimpe" (1 Tesalonike 5:19). Malu mabi adi mua kubuela mu ekeleziya ku kakese ku kakese. Butudi nabu mbua kuikala badimuke ne batabale.

Tulamate ku diyisha dia mu Mukanda wa Nzambi."Diyi dionso dia mu Mukanda wa Nzambi didi difume munda mua Nzambi bu mupuya wende, ne didi ne mudimu muimpe wa kuyisha bantu, ne wa kubabela, ne wa kubadimuja, ne wa kubalongesha mu buakane bua Nzambi" (2 Timote 3:16).

12 Yoshua udi upanga mu bualu bua Bena Gibeona

12.1 Kunyenga kua musoko wa Ai

Tuakamana kubala bu muakanyema Bena Isalele kumpala kua Bena Ai. Nzambi wa Bena Isalele kakadi ne bantu bende bua bualu bubi bua Akana. Pakumusha Bena Isalele bubi munkatshi muabo, Yehowa wakambila Yoshua ne, "Kutshinyi, kukuatshiki buowa, angata bena mvita bonso; bika biebe, ya kudi Ai; tangila nakamana kufila mukelenge wa Ai ne bantu bende ne musoko wende ne buloba buende mu tshianza tshiebe" (Yoshua 8:1). Katataka Yehowa wakadi mulombole bantu bende. Bena Isalele bakaya kumpala mu ditabuja, bena lukuna babo kabakadi mua kuimana kumpala kuabo. "Bikala Nzambi netu, nganyi udi mumanye mua kutupumbisha?" (Lomo 8:31).

12.2 Bena Gibeona badi benza budimu

"Pakumvua Bena Gibeona muakenzela Yoshua Yeleko ne Ai, bobo bakenza budimu, bakadifuanyikija bu milopo yakalua kule, bakateka bibombi bikulakaja panyima pa mpunda yabo, ne milondo ya nvinyo ya biseba bipandike ne bilamakaja, ne bisabata bilamakaja ku makasa abo, ne bilulu bisunsuke pambidi patio, ne mampa abo onso akuma, akakuata butu. Bakaya kudi Yoshua mu tshitudilu ku Gilegala, bakamuambila ne Bena Isalele bonso ne, Tuetu tuakufuma kule ku buloba bukuabo, nunku nupunge netu tshipungidi. Bena Isalele bakambila Bena Hiwi ne, Bumue nuenu nudi ba munkatshi muetu, nunku netupunge nenu tshipungidi munyi? Bobo bakambila Yoshua ne, Tuetu tudi bapika bebe. Yoshua wakabakonka ne, Nudi banganyi? Nuakufuma kudi kunyi? Bakamuambila ne, Bapika bebe bakalua kule ku buloba bukuabo bualu bua dina dia Yehowa, Nzambi webe; bualu bua tuetu tuakumvua lumu luende ne malu onso akenzeye mu Ejipitu, ne malu akenzeleye bakelenge babidi ba Bena Amole bakadi dishiya dia Yadene, Sihona, mukelenge wa Heshebona, ne Oga, mukelenge wa Bashana, wakadi mu Ashatelota. Bakulu betu ne bena kuetu bonso bakatuambila ne, Angatayi bintu bia kudia mu njila mu bianza bienu, yayi bienu kusangakana nabo, nubambile ne, Tuetu tudi bapika benu, nupunge netu tshipungidi. Mampa aa akadi ne kapia patuakaangata mu nzubu yetu dituku dituakabanga luendu bua kulua kunudi, kadi monayi, adi mume, adi makuate butu; ne milondo eyi ya mvinyo ituakuuja tente yakadi mipia-mipia, kadi monayi, yakapandika; ne bilulu ebi ne bisabata bietu biakakulukaja bualu bua luendu luakatamba bule. Yoshua wakabapa budishikaminyi, wakapunga nabo tshipungidi, bua bobo bikale ne muoyo; bakelenge ba mu Isalele bakaditshipa kudibo. Pakapita matuku asatu ku nyima bamane kupunga nabo tshipungidi, bakumvua lumu ne bobo bakadi nabo mutumba, bakashikama munkatshi muabo. Bena Isalele bakabisha luendu luabo, bakalua ku misoko yabo dituku disatu" (Yoshua 9:3-17).

12.3 Yoshua kena ulomba lungenyi kudi Yehowa

Yoshua ne bakelenge ba Bena Isalele bakadi badingibua kudi Bena Gibeona. Mona bu muakaluabo ne meyi mimpe, bamba ne, "Bapika bebe bakalua kule ku buloba bukuabo bualu bua dina dia Yehowa". Bantu bakuabo badi benza nunku too ne lelu. Badi babuela munkatshi mua bantu ba Nzambi bu bena kuitabuja, kadi kabayi banji kukudimuna mitshima yabo.

Pakafika Bena Isalele ku misoko yabo yakadi pabuipi, tshiji tshiakakuata Bena Isalele, bakasua kubashipa. Yoshua ne bakelenge babo bonso bakapidia kushipa tshipungidi tshiakapungabo nabo. Bakasungila Bena Isalele ku bualu bubi butambe bunene. Yoshua wakabikila Bena Gibeona, wakabambila ne, "Bualu kayi nuakatudinga ne, Tudi ba kule, nuenu bikale anu munkatshi muetu? Nunku nudi ne mulawu, kakuena umue wenu wapanga kuikala mupika: buonso buenu nenuikale bapandi ba nkunyi ne basunyi ba mayi ba mu nzubu wa Nzambi wanyi" (Yoshua 9:22).

Kunyima kua bidimu bia bungi, mu matuku a mukelenge Davidi, tshiole tshiakadi ku buloba bidimu bisatu bilondangane. Davidi wakebeja Yehowa bualu ebu. Yehowa wakamba ne, "Bualu ebu buakalua bua Shaula ne bua mashi akamatshishabo mu nzubu wende, bualu bua wakashipa Bena Gibeona" (2 Samuele 21:1).

12.4 Tudimuke bualu bua budimu bua bantu

Mukanda wa Nzambi udi utudimuja bualu bua badingi bu Bena Gibeona, nangananga mu tshikondo tshietu. Bantu aba badi bendakana munkatshi mua bantu bua kubadinga. Badi ne ndimi ya lupepele, bakuabo badi bendakana bua lukuka lua argent. Bena Gibeona badi tshifuanyikiji tshia ba pa buloba badi basue kuikala ne tshitupa tshikuabo ne Bena Kilisto. Pakajingulula Yoshua bualu buabo bimpe, yeye wakenza ne lungenyi luakapeteye kudi Nzambi, kakitabuja bua bantu aba bikale ne buobumue ne Bena Isalele. Katataka, mu matuku etu, mbualu bukuabo. Bena Kilisto bakuabo badi bitabuja ba pa buloba (buena kuamba ne, bantu kabayi bena ditabuja) mu bisumbu biabo. Ku kakese ku kakese badi balekela diyisha dia mu Mukanda wa Nzambi. Badi babikila malu mabi ne, Malu mimpe. Kunshikidilu, batshidi ne tshimuenekelu tshia buimpe bua Nzambi, kadi badi bamukoma nyima.

Nzambi wakindila bidimu bipita bia bungi diambedi yeye kayi muanze kulumbuluisha Bena Kanana. Nzambi utshidi ne lutulu lua bungi ne ba pa buloba. Petelo wakafunda ne, "Bananga, kanupu muoyo bualu ebu bumue ne, Dituku dimue kudi Mukelenge didi bu bidimu tshinunu, ne bidimu tshinunu bidi bu dituku dimue. Mukelenge kena ushanguluka bua kushikijeye milayi yende, bu mudi bakuabo babala dishanguluka; kadi udi netu lutulu, kena musue umue wenu ajimine, kadi udi musue bonso balue kukudimuna mitshima yabo" (2 Petelo 3:8,9). "Pinganayi kudi Yehowa, Nzambi wenu; bualu bua yeye udi unuleja luse, kena ukuata tshiji lukasa, udi ne luse lujalame lukumbane" (Yoele 2:13). Mukenji wa Lumu Luimpe ludi ne, "Lelu ewu, binumvua diyi diende, kanukoleshi mitshima yenu… monayi, katataka ntshikondo tshimpe, monayi, katataka ndituku dia lupandu" (Ebelu 3:7,15. 2 Kolinto 6:2).

13 Kaleba: Muntu wakalonda Yehowa mene mene

13.1 Kaleba udi musue bupianyi buende

"Bena Yuda bakalua kudi Yoshua mu Gilegala. Kaleba, muana wa Yefune, Muena Kenizi, wakamuambila ne, Wewe udi mumanye bualu buakambila Yehowa Mose, muntu wa Nzambi, bualu buanyi ne bualu buebe mu Kadeshe-banea. Nakatshidi bidimu makumi anayi pakantuma Mose, muntu wa Yehowa, ku Kadeshe-banea bua kutentekela buloba; nakapingana kudiye kabidi ne diyi diakadi mu mutshima wanyi. Bana betu batuakaya nabo bakatekesha mitshima ya bantu; kadi meme nakalonda Yehowa, Nzambi wanyi. Mose wakaditshipa dituku adi ne, Bulelela, buloba buwakadiata makasa ebe nebuikale kuudi ne kudi bana bebe bu bupianyi tshiendelele, bualu bua wewe wakalonda Yehowa, Nzambi wanyi mene mene. Katataka mona, Yehowa wakundama ne ntshidi ne muoyo, bu muakambeye too bidimu ebi makumi anayi ne bitanu, ku dituku diakambila Yehowa Mose diyi adi, pakadi Bena Isalele bendakana mu tshipela: lelu ndi ne bidimu muanda mukulu ne bitanu. Ntshidi ne bukole lelu, bu munakadi nabu dituku diakantuma Mose; bu muakadi bukole buanyi dituku adi, mbu mutshidibu katataka, bua kuluangana mvita ne bua kuya ne bua kupingana. Katataka umpe bianyi luseke elu lua ku mikuna, bu muakamba Yehowa dituku adi; bualu bua wewe wakumvua dituku adi bu muakadiku Bena Anaka, ne misoko minene ya ngumbu; bikala Yehowa nanyi, nembipate, bu muakamba Yehowa. Yoshua wakamuvudishila disanka; yeye wakapa Kaleba, muana wa Yefune, Hebelone bu bupianyi. Nunku Hebelone wakalua bupianyi bua Kaleba, muana wa Yefune, Muena Kenizi, too ne ku dituku edi; bualu bua yeye wakalonda Yehowa, Nzambi wa Isalele mene mene" (Yoshua 14:6-14).

13.2 Kaleba: Muena kueyemena

Pakatuma Mose bantu dikumi ne babidi bua kutentekesha buloba bua Kanana, bobo bakapingana kunyima kua matuku makumi anayi ne mamuma mimpe a buloba. Bonso bakamba ne, "Bulelela, buloba abu budi buule tente ne mabele ne buitshi, aa mmamuma a buloba" (Nomba 13:27). Kadi batentekedi dikumi bakalua kudi Bena Isalele ne lumu lubi lua buloba. Bakatekesha mitshima ya bantu. Bakamba ne, "Buloba abu butuakutentekela butu buadia bantu badi bikalamu; bantu bonso batuakamonamu badi bantu ba mibidi minene. Tuakamona bantu ba nfiondo, bana balume ba Anaka… tuakadi bu mpasu, tuakadi nunku ku mesu kuabo kabidi" (Nomba 13:31-33).

Kaleba ne Yoshua bakapingana ne lumu luimpe. Bakambila Bena Isalele ne, "Buloba butuakapita bua kutentekela budi butambe buimpe. Bikala Yehowa ne disanka bualu buetu, yeye nealue netu mu buloba ebu, neatupebu; buloba budi buule tente ne mabele ne buitshi… Yehowa udi netu, kanubatshinyi" (Nomba 14:7-9).

13.3 Kaleba udi upeta Hebelone bu bupianyi buende

Yoshua wakapa Kaleba Hebelone bilondeshile pa diyi dia Yehowa mukana wa Mose ne, "Bulelela, buloba buwakadiata makasa ebe nebuikale kuudi ne kudi bana bebe bu bupianyi tshiendelele, bualu bua wewe wakalonda Yehowa, Nzambi wanyi mene mene" (Yoshua 14:9). "Bulelela, difutu didiku bua muntu muakane; bulelela, Nzambi udiku udi ulumbulula bilumbu pa buloba" (Musambu 58:11).

Hebelone wakadi musoko munene mu histoire wa Bena Isalele. Pakapandaluka Lota kudi Abalahama, Yehowa wakambila Abalahama ne, "Bika biebe, wendakana mu buloba buonso, mu bule buabu ne mu butshiamu buabu; bualu bua nenkupebu". Abalahama wakashikama mu Hebelone; wakenzelaku Yehowa tshioshelu. Yeye wakajika Sala, mukaji wende mu Hebelone. Pakafua Abalahama, bana bende balume bakajika tatu wabo mu Hebelone (Genese 13:17,18. 23:19. 25:10).

13.4 Akasa, muana wa bakaji wa Kaleba

Kaleba wakamba ne, "Muntu yonso watamba musoko wa Kiyata-sefe, udi unyenga, nemmupe Akasa, muana wanyi wa bakaji, bu mukaji wende". Kaleba wakapa Oteniele, muntu wa dikima, Akasa, bu mukaji wende. Akasa wakadi bu tatu wende, muntu wa ditabuja ne dia dinanukila. Yeye wakasengelela Oteniele bua kumulombela budimi kudi tatu wende. Wakapeta buloba buimpe bua Sude. Pashishe Akasa wakamonangana ne tatu wende kabidi. Wakatuluka panyima pa mpunda wende, ne Kaleba wakamuebueja ne, "Udi musue tshinyi?" Yeye wakamuitaba ne, "Unvudishile disanka; bualu bua wewe wakunteka ku buloba bua Sude, umpe bianyi kabidi mishimi ya mayi yakadi ku mutu ne yakadi kuinshi" (Yoshua 15:16-19). Buloba bua Sude budi buamba bua buloba buimpe. Kadi Akasa wakalomba mishimi ya mayi yakadi ku mutu ne kuinshi. Malu aa adi wamba bualu bua muntu udi ukebakeba masanka a nyuma. Mishimi ya mayi yakadi ku mutu idi yamba bualu bua masanka etu adi mu Diulu. Idi yamba bua masanka a Nyuma Muimpe ne bua buobumue. "Bulelela, buobumue buetu budi ne Nzambi ne Muana wende Yesu Kilisto" (1 Yone 1:3). Mishimi ya mayi yakadi kuinshi idi yamba bua buobumue bua bena Kilisto bualu bua Nyuma Muimpe udi munda muabo. "Bituenda mu munya, bu mudiye mu munya (Nzambi udi munya), tudi tuikalangana ne buobumue, ne mashi a Yesu, Muanende, adi atulengesha ku mibi yonso" (1 Yone 1:7).

13.5 Bupianyi bua bana ba Yosefe

"Bana ba Yosefe bakambila Yoshua ne, Bualu kayi wewe wakatupa anu tshitupa tshimue bu bupianyi buetu, tuetu tudi bantu ba bungi bualu bua Yehowa wakatusankisha? Yoshua wakabambila ne, Binuikala bantu ba bungi, yayi bienu muitu nuditapile muaba mu buloba bua Bena Pelizi ne bua Bena Lefa; bualu bua buloba bua mikuna ya Bena Efelayima budi butamba bukese kunudi. Bana ba Yosefe bakamba ne, Buloba bua ku mikuna kabuena butukumbana; Bena Kanana bonso badi bashikama mu tshibanda badi ne makalu a biamu, ne badi mu Betesheana ne misoko eyi ne badi mu tshibanda tshia Yizelele.Yoshua wakambila ba mu nzubu wa Yosefe, Bena Efelayima ne Bena Manashe ne, Nuenu nudi bantu ba bungi, nudi ne bukole bua bungi, kanuena anu ne tshitupa tshimue: kadi buloba bua ku mikuna nebuikale buenu; ditu didiku, kadi nenuditape, ne muaba awu newikale wenu; nudi mua kuipata Bena Kanana nansha bobo ne makalu a biamu nansha bobo ne bukole" (Yoshua 17:14-18).

13.6 Nuye muitu bua kutapa mitshi

Bana ba Yosefe bakadi ba bungi kadi kabakadi ne ditabuja dia Kaleba. Bakasua buloba bua bungi kadi mitshima yabo yakadi mitekete. Yoshua wakabasengelela bua kuenza mudimu, bua kutapa ditu. Bituasua masanka a nyuma, butudi nabu mbua kudifila ku malu aa, bua kunanukila mu malu a Nzambi. Butudi nabu mbua kuya muitu muntu ne muntu bua "kutapa mitshi".

Kaleba wakadi ne bidimu muanda mukulu ne bitanu kadi wakamba ne, "Ntshidi ne bukole lelu, bu munakadi nabu dituku diakantuma Mose (ku tshikondo atshi wakadi ne bidimu makumi anayi); bu muakadi bukole buanyi dituku adi, mbu mutshidibu katataka, bua kuluangana mvita ne bua kuya ne bua kupingana". Mukanda wa Nzambi udi wamba ne, "Badi bindile Yehowa nebasangashe bukole buabo; nebabande mulu ne mapuapua bu nyunyu ya mukanku, nebanyeme lubilu ne kabena bapungila, nebende ne kabena bateketa" (Yeshaya 40:31).

13.7 Buloba buwakadiata makasa ebe nebuikale kuudi

Mulayi wa Yehowa kudi Bena Isalele wakadi ne, "Buloba buwakadiata makasa ebe nebuikale kuudi ne kudi bana bebe". Bidi anu muomumue bua bualu buetu lelu. Tudifile ku malu aa, tuikale benji ba Diyi, nunku netubuele mu masanka a bupianyi buetu mu Kilisto. Tshitupa tshietu tshia mu Kilisto tshidi "muitu, buloba bua mikuna, ne bibanda". Paulo wakafundila Bena Kolinto ne, "Bualu bua bintu bionso mbienu… ne bintu bidiku ne bintu bilualua: bionso mbienu; ne nuenu nudi ba Kilisto, ne Kilisto udi wa Nzambi" (1 Kolinto 3:21,22).

13.8 Shilo: muaba wa masanka a nyuma

Kunyima kua malu aa Bena Isalele bakadisangisha ku Shilo, bakashimikaku ntenta wa kusambakena; buloba buonso buakadi talalaa kumpala kuabo. (Shilo udi wamba bualu bua ditalala). Bisamba muanda mutekete biakadi bishala, kabiyi bianze kuangata bupianyi buabo. Yoshua wakambila Bena Isalele ne, "Nuenu nenutshimbakane musangu bule munyi bua kuya bua kuangata buloba buakanupa Yehowa? " (Yoshua 18:3).

Mu matuku aa Shilo wakadi centre munene bua kutumbishamu Yehowa. Ntenta wa kusambakena wakaleja Bena Isalele ne, Yehowa udiku. Wakadi muaba uwakateka Nzambi dina diende. Yehowa wakamana kubamanyisha ne, "Ku miaba yonso kundi nnuvuluisha dina dianyi, nendue kunudi, nennusankishe" (Ekesode 20:24).

Ntenta wa kusambakena kenaku lelu, kadi Mukelenge Yesu udi munkatshi mua bantu bende badisangishibua ku dina diende. Yeye wakamba ne, "Ndi bianyi munkatshi mua bantu babidi anyi basatu badi badisangisha mu dina dianyi" (Matayo 18:20).

"Bualu bua yeye udi ujidila ne bobo badi bajidibua kabidi, bonso badi ba Tatu umue : bua bualu ebu kena ufua bundu bua kubabikila ne, Bana betu, wamba ne, Nengambile bana betu dina diebe, munkatshi mua bena ekeleziya nengimbe misambu ya kukutumbisha nayi" (Ebelu 2:11,12).

14 Mudimu wa Yoshua udi mujika

14.1 Yoshua udi uvuluija Bena Isalele bualu bua buimpe bua Yehowa kudibo

Mu matuku a Yoshua Yehowa wakapa Bena Isalele buloba buonso buakalayeye Abalahama. Yeye wakabasankisha bu muakabalayeye. "Yehowa wakabapa dikisha ku nseke yonso bu muakalayeye bankambua babo, kakuakadi umue wa bena lukuna babo bonso wakamanya mua kubatantamena; Yehowa wakafila bena lukuna babo bonso mu bianza biabo. Kabakapanga tshintu tshimpe tshimue tshiakalaya Yehowa Bena Isalele; bakapeta bintu ebi bionso" (Yoshua 21:43-45).

"Pakapita matuku a bungi, ne pakamana Yehowa kupa Bena Isalele dikisha kudi bena lukuna babo bonso bakadi babanyunguluka, ne pakalua Yoshua muntu mununu ne bidimu biende biakakumbana, Yoshua wakabikila Bena Isalele bonso ne bakulu babo ne bakadi ku mutu kua bisamba biabo ne balumbuluishi babo ne tupita tuabo, wakabambila ne, Meme ndi muntu mununu, ne bidimu bianyi biakukumbana: nuenu nuakatangila malu onso akenzela Yehowa, Nzambi wenu, bisamba ebi bionso bua bualu buenu; bualu bua Yehowa, Nzambi wenu, yeye mene wakanuluila mvita" (Yoshua 23:1-3).

14.2 Yoshua udi ukolesha mitshima ya Bena Isalele

Dituku adi Yoshua wakasengelela Bena Isalele bikole. Bobo bakamana kutangila malu manene akenzela Nzambi bua bualu buabo. Yoshua wakasua kukolesha mitshima yabo mu malu a Yehowa. Wakabambila ne : "Nuikale ne mitshima ya dikima bua kutumikila ne kuenza meyi onso adi mafunda mu mukanda wa mikenji ya Mose; kanusesuki ku tshianza tshia balume anyi tshia bakaji" (Yoshua 23:6). Bena Kilisto budibo nabu mbua kuikala ne mitshima ya dikima bua kuya kumpala mu malu a Nzambi. Diyi dia Nzambi didi diamba ne, "Nuikale benji ba diyi, kanuikadi anu bumvui badi" (Yakobo 1:22). Ku tshikondo tshia Yoshua Bena Isalele kabakadi ne Mukanda mujima wa Nzambi, bakadi ne mikanda mifunda kudi Mose.

Yoshua wakabambila ne, "Kanubuelakanyi ne bisamba ebi bidi bishala munkatshi muenu; kanutedi mena a nzambi yabo, kanuditshipi kudiyi, kanuyikuatshidi mudimu, kanuyikukuidi; lamatayi Yehowa, Nzambi wenu, bu munuakuenza too ne ku dituku edi. Nudimuke bienu bua nuenu nusue Yehowa, Nzambi wenu" (Yoshua 23:7,8,11).

Bantu bonso bakakuatshila Yehowa mudimu matuku onso a Yoshua, ne a bakulu bakadi bashala ne muoyo kunyima kua Yoshua, kadi ba mu tshikondo tshikuabo tshiakabalonda kunyima kabakamanya Yehowa. Bakenzela nzambi mikuabo mudimu, bakalekela Yehowa, Nzambi wa batatu babo. Kuonso kuakayabo tshianza tshia Yehowa tshiakadi kudibo bua kubenzela bibi bu bu muakamba Yehowa, ne bu muakaditshipa Yehowa kudibo bakadi ne ntatu ya bungi (Balumbuluishi 2:715). Lelu, butudi nabu mbua kuikala badimuke kabidi! Paulo wakafundila Bena Kolinto ne, "Lekelayi kulamakajibua ne badi kabayi bena ditabuja bu badi kabayi bakanangane; bua buakane budi ne bulunda kayi ne bualu bubi; anyi munya udi ne buobumue kayi ne midima… muena ditabuja udi ne tshitupa kayi ne udi kayi ne ditabuja? Ntempelo wa Nzambi udi upunga diyi kayi ne mpingu? Bualu bua tuetu tudi bu ntempelo wa Nzambi udi ne muoyo" (2 Kolinto 6:14-16).

Yoshua wakamba kabidi ne, "Monayi, lelu ewu nkadi pa kuya mu njila utu waya bonso ba pa buloba: nudi bamanye mu mitshima yenu yonso ne mu mioyo yenu yonso ne kanuakapanga tshintu tshimpe tshimue tshiakanulaya Yehowa, Nzambi wenu; nuakapeta bintu bionso, kanuakapanga tshintu tshimue" (Yoshua 23:14).

Bupianyi bua bena kuitabuja bua lelu budi butamba bupianyi bua Bena Isalele bunene mene mene. Bupianyi buabo budi mu Diulu. Nansha luendu luabo bu benyi ne bena luendu pa buloba ebu ludi lukole, luendu lua ditabuja ludi luendu lua disanka. Paulo wakafunda Bena Kolinto ne, "Malu adi disu kadiyi dianze kutangila, ne ditshu kadiyi dianze kumvua, adi kayi manze kubuela mu mutshima wa muntu, malu onso akalongoluela Nzambi badi bamunanga" (1 Kolinto 2:9).

14.3 Meyi a kunshikidilu a Yoshua kudi Bena Isalele

Katataka Nzambi wakadi pepi ne kubikila muntu wende wa kueyemena kudiye. Yoshua wakamana kujikija mudimu wende pa buloba, anu bualu bumue buakashala. Yeye wakasangisha bisamba bionso bia Bena Isalele kumpala kuende bua musangu wa kunshikidilu. Ke anu kumpala kuende kadi tudi tubala ne, "bakadisangisha kumpala kua Nzambi" (Yoshua 24:1).

Yoshua, muntu mununu wa bidimu lukama ne dikumi, wakabalondela bu muakabalombola Nzambi buonso buabo, ku tshikondo tshia Abalahama too ne ku dituku adi, pashishe Yoshua wakabambila ne, "Binuamona ne kukuatshila Yehowa mudimu kudi kubi, lelu nusungule unudi basue kukuatshila mudimu, ne nzambi yakadi bankambua benu bakuatshile mudimu dishiya dia musulu wa Pelata anyi nzambi ya Bena Amole, bena buloba bunudi bashikame; kadi meme ne ba mu nzubu muanyi netukuatshile Yehowa mudimu" (Yoshua 24:15).

Muntu ne muntu budiye nabu mbua kusungula bua bualu buende. Njila ibidi idiku: njila wa ditabuja, udi njila wa ku muoyo, ne njila wa kabutu udi munene (Matayo 7:13). Mukelenge Yesu wakamba bua bamfumu babidi. "Muntu kena mumanye mua kukuatshila bamfumu babidi mudimu diakamue; yeye neikale ne mukuabo lukuna ne mukuabo dinanga, anyi nealamate mukuabo neapidie mukuabo. Kanuena bamanye mua kukuatshila Nzambi mudimu ne Mamona diakamue" (Matayo 6:24). Tuambe bu Yoshua: "Meme ne ba mu nzubu muanyi netukuatshile Mukelenge mudimu".

14.4 Bumanyishi bua Yoshua budi buimpe

Tudi tujingulula ne, Dituku diakumvua Bena Isalele diyi dia kunshikidilu dia Yoshua diakadi dituku dinene mu histoire wa Bena Isalele. Bakadisangisha kumpala kua Nzambi. Bena Isalele bakakuata meyi ende ku mitshima yabo mene mene. Bantu bonso bakakuatshila Yehowa mudimu matuku onso a Yoshua, ne a bakulu bakadi bashala ne muoyo kunyima kua Yoshua. Pakajikija Yoshua kuyikilangana ne bantu, yeye wakabamuangalaja, muntu ku bupianyi buende muntu ku bupianyi buende. Nzambi wakasankisha bantu bende, wakabajadika mu bupianyi buabo.

Muena mudimu mukuabo wa Nzambi wa kueyemena, Paulo, wakamba ne, "Nakuluangana mvita muimpe, nakushikija tshidikijilu tshia lubilu, nakulamata ditabuja; tshidi kumpala mpindiewu ntshifulu tshia butumbi tshia buakane bua Nzambi tshintekela, tshialua Mukelenge mulumbuludi muakane kumpa dituku diadia; kena utshimpa anu meme, kadi neatshipe bonso kabidi badi basue dimueneka diende" (2 Timote 4:7,8).