1 KORETO

Chapitres

 1. 2  -   2. 3  -   3. 4  -   4. 5  -   5. 6  -   6. 6  -   7. 7  -   8. 9  -   9. 9  -   10. 10  -   11. 12  -   12. 13  -   13. 14  -   14. 14  -   15. 16  -   16. 18

1 KORETO 1

1Dimi Paulu, laketama uma lu lulanpi la Unyashungu dia ndjala utumami a Jesu Kristu, la onengesu Sosetene, 2Le ekelizia wa Unyashungu wa la Koreto,1:2 Etsh. 18:1. le wane wakakidiama le Kristu Jesu, waketama dia ndjala ekilami, kame la wane tshe watetaka lukumbu la Khumesu Jesu Kristu lu ahuli tshe, Khumewo ndu Khumesu:

3Ngandji ka mamba kayali la nyu, ndu ki kʼuma le Unyashungu Shesu, la uma le Khumadiondjo Jesu Kristu!

 

4Dimi latukaka Unyashungu ami lusaka dikambu dianyu, ne dia ngandji ka mamba ka Unyashungu kakawanyusha le Kristu Jesu. 5Ndi akanyongonya lu akambu tshe, ndu lu aui tshe, ndu lu bewu tshe — 6uku okone akashikimala diui dia Kristu le nyu — 7okone nyu hanyuhandja nduku ushasha lamʼalungamelanyu enelo ka Khumesu Jesu Kristu. 8Ndi ayunyushikike edja ndu lʼekumelu, dia nyu ndjala aha la unungu lu lushi la Khumesu Jesu Kristu. 9Unyashungu lakanyeti lu diekesanelu dia Onʼandi Kristu Khumesu, eko la kolamelu.

 

10Anyasu, dimi lambunyosengasenga lu lukumbu la Khumesu Jesu Kristu, dia nyu tshe mvuta diui otoi, diaha nyu mbatana, keli dia nyu nduwanyema lu yimba ndu lu tukanyi kame. 11Anyami, asika Koloe, wakamvutela akambu anyu vati: Tamu teko lʼatei anyu. 12Diako mbatami nti: Nyu nyatutaka untu lʼuntu ati: Dimi usika Paulu; Dimi usika Apolo;1:12 Etsh. 18:24. Dimi usika Kefasi; Dimi usika Kristu. 13Kristu ambatana uka? Paulu kakanyuvwela lu utamba a mpeketanya? Nyu nyakabatizama lu lukumbu la Paulu? 14Dimi lambuka Unyashungu lusaka, ne dia dimi kumbatiza nduku usikanyu, paka Kirispo1:14 Etsh. 18:8. la Ngayo;1:14 Etsh. 19:29; Rom. 16:23. 15ne dia untu atukuta ati: Dimi lakabatizama lu lukumbu la Paulu. 16(Dimi lakabatiza ndu khumbu ka Stefana.1:16 1 Kor. 16:15. Ladiku dia aso, dimi haluho nti: Lakabatiza untu ukina.) 17Ne dia Kristu kuntumami dia mbatiza, keli ne dia nsambisha lukumu lʼololo aha la yimba yʼaui, ne dia utamba a mpeketanya a Kristu atukuyala uyalayala.

 

18Ne dia diui dia utamba a mpeketanya dieli dikambu diʼenginya le wane wakashisho, keli le su, shu wane wakashimbamela, dio dieko wulu a nyashungu. 19Ne dia akafundama ati: Dimi layulanya yimba yʼakanga a yimba, Layunya lononga lʼakanga a lononga.1:19 Is. 29:14.

20Lendʼeli kanga yimba na? Lendʼeli ufundji?1:20 Job. 12:17; Is. 19:12; 33:18. Lendʼeli kanga tamu lʼetena kene? Unyashungu kunkadimula yimba ya kete nye, yayali enginya uka?1:20 Is. 44:25. 21Ne dia tambena yimba ya Unyashungu shati: Antu kumbeya Unyashungu uma lu yimba yawo, okone Unyashungu akasonola dinginya dia nsambisha diui diandi, ne dia nshimbela wane wawetawo. 22Tambena shati: Asi Juda watolombaka tulimbitelu, asi Ngirika watuyangaka tumba, 23keli shu tatusambishaka dia Kristu, lakawadiaki lʼutamba a mpeketanya, leli uku utamba a ntakanya le asi Juda, leli uku enginya le wedja. 24Keli le wane waketama, ndu asi Juda ndu asi Ngirika, Kristu eko wulu a Unyashungu, ndu yimba ya Unyashungu. 25Ne dia enginya ka Unyashungu kambuleka yimba yʼantu, la wodu a Unyashungu ambuleka wulu wʼantu.

 

26Anyasu, nyukani dia leta lanyu! Aha akanga a yimba yʼalimba efula, kuyanga akanga a wulu efula, kuyanga eshilambu efula mbaketama, 27keli Unyashungu akasonola akanga a dinginya wa la kete, dia ndi mbutsha akanga a yimba sonyi. Unyashungu akasonola wane weli wodu wa la kete, dia ndi mbutsha akanga a wulu sonyi. 28Unyashungu akasonola ndu diango diukitshikitshi ndu dionywama dia la kete, ndu diango dieli kemako, dia ndi nkadimula diango dieko, diayali kemako, 29ne dia untu atukuyatumbula la ntundu ka Unyashungu. 30Keli nyu nyeli antu andi le Kristu Jesu, lako lakayala uku yimba yasu uma le Unyashungu, ndu ololo asu, ndu ekidiamelu, la etshungwamelu kasu; 31uku akafundama ati: Untu layatumbula, ayatumbuli le Khumadiondjo.

1 KORETO 2

1Anyasu, lamʼakamayi le nyu, dimi kundja la aui wa mamba kana wa yimba, dia ndjunyusambisha diui dia Unyashungu. 2Ne dia dimi kunsanguya dia mbeya dikambu dikina atei anyu, tshikima dia Jesu Kristu, lakadiakema lʼutamba a mpeketanya. 3Dimi laki la nyu la wodu, la woma, la lukumba efula.2:3 Etsh. 18:9. 4Ku aui ami la esambishelu kami, dimi kunyanga nyetawuya lʼaui a yimba, keli tshikima la enyelo ka Nyuma la ka wulu, 5dia mbetawo kanyu tayalaki lu yimba yʼantu, keli lu wulu a Unyashungu.

6Keli shu tatutaka aui a yimba lʼatei a wane wambutshunda. Keli aha yimba yʼetena kene, aha yʼembuledi wʼetena kene, weko wambanyema dia mumo. 7Keli shu tatutaka yimba ya Unyashungu yaki lʼusheshe, yako yakashama, yakadjanga Unyashungu la ntundu ka tena ne, dia shu ndjala la lutumbu. 8Nduku umbuledi otoi wʼetena kene wakeyi. Utuweya, tshiki vo kundjaka Uwandji a lutumbu lʼutamba a mpeketanya. 9Keli, uku ufundami ati: Akambu wahatenyi ashu, akambu wahatuki atui; Akambu wahatoto lʼutema wʼuntu, Akambu ane mbakalongoswela Unyashungu wane wuianga.2:9 Is. 64:4.

10Keli Unyashungu akatenyawo uma le Nyuma kandi, ne dia Nyuma atushishimaka akambu tshe, ee, ndu akambu a waki wa Unyashungu. 11Untu akona leya akambu wʼuntu, ndu aha nyuma kʼuntu keli le ndi? Okone nduku untu leya akambu wa Unyashungu, naka aha Nyuma ka Unyashungu. 12Keli shu kunungula nyuma ka la kete nye, takalungula Nyuma kʼuma le Unyashungu, dia shu mbeya ushasha wakatusha Unyashungu. 13Akambu ane mbatututaka, aha la aui watetshaka yimba yʼantu, paka la aui watetshaka Nyuma.

14Untu a la kete halungula akambu wa Nyuma ka Unyashungu, ne dia vo weko uku akambu wʼanyanya le ndi. Ndi heyi mbalimbitela, ne dia vo watulimbitshiyamaka le Nyuma. 15Keli one leli la Nyuma, atulimbitelaka akambu tshe, ku nduku untu lulimbitshiya. 16Akona akeyi yimba ya Khumadiondjo, dia ndi mbulakanya?2:16 Is. 40:13. Keli shu teli la yimba ya Kristu.

1 KORETO 3

1Anyasu, dimi kumbeya nyutela diui uku akanga a Nyuma, keli uku antu wa la kete, uku le ana wʼashashi lu dikambu dia Kristu. 2Dimi lakanyusha awele, aha ma,3:2 Heb. 5:12-13. ne dia nyu tanyaki la wulu; ndu kakiane nyu kema la wulu, 3ne dia nyu nyeki lʼakambu wa dimba. Ne dia kandjema la tamu weki lʼatei myu, nyu kema wa lu alimba, hanyuyeli ditshelu diʼantu uka? 4Lamʼayuta untu omotshi ati: Dimi usika Paulu; la ukina ati: Dimi usika Apolo;3:4 1 Kor. 1:12. okone nyu kema uku antu wa la kete uka?

 

5Akona eli Apolo? Akona eli Paulu? Ekambi mbewo, nyu nyaketawo dikambu diawo uku akawasha Khumadiondjo wulu untu lʼuntu. 6Dimi lakune,3:6 Etsh. 18:4-11. Apolo akatela ashi,3:6 Etsh. 18:24-28. keli Unyashungu akatosha diango. 7Okone ndu one lakune, ndu one lakatela ashi, kema la dikambu, paka Unyashungu latotoshaka diango. 8One latuneka, ndu one latutelaka ashi, weko kame, keli untu lʼuntu ayulungula difutu uku ulimu andi. 9Ne dia shu teko ekambi kame la Unyashungu, nyu nyeko ekambo ka Unyashungu, la luudu la Unyashungu.

10Uku aki yediko ya ngandji ka mamba ka Unyashungu, kakandambisha uku uhiki a yimba, dimi lakahiki tshina dia luudu, la ukina ambuhikaka ladiku adio. Keli untu lʼuntu endi okone ahikandi. 11Untu heyi mpika hina dikina, paka tshina diakahikama; dio dieli Jesu Kristu. 12Keli naka untu ayuhika paunyi la fesa, la mboko yʼave ya ushinga a wulu, la etamba, la adiyu, la nengese, ladiku dia tshina diako — 13ulimu wa untu lʼuntu wayenama, ne dia lushi la dienyanyu diʼelimu lu dja layuyala; dja yame yayuhimba ulimu wʼuntu lʼuntu okone wewo. 14Naka ulimu wakahiki untu ladiku dia tshina diako ayutshikala, keti untu ako nungula difutu. 15Naka ulimu wʼuntu ayulungula, ndi ayushisha difutu. Kuyanga ndame ayushimbamela, keli uku untu luhandji kwe lu dja.

 

16Nyu hanyeyi nyati: Uku etemwelo ka Unyashungu mbenyu, la Nyuma ka Unyashungu atudjaseka lʼetema anyu?3:16 1 Kor. 6:19; 2 Kor. 6:16. 17Naka untu lalanya etemwelo ka Unyashungu, Unyashungu ayuwulanya, ne dia etemwelo kene ka Unyashungu keko ekila. Ndu nyu nyeko etemwelo kako.

18Untu tayadimbiyaki. Naka untu ambukana ati: Dimi la yimba lʼatei anyu, ndi ayali enginya, dia ndi ndjala la yimba, 19ne dia yimba ya la kete nye yeli enginya lu ashu a Unyashungu. Ne dia ambufundama ati: Ndi atundaka akanga a yimba lu lukesu lawo;3:19 Job. 5:13. 20la diui dikina ati: Khumadiondjo mbeyaka tukanyi tʼakanga a yimba ati: Anyanya mbeto.3:20 Esam. 94:11. 21Okone untu tayatumbulaki lu akambu wʼantu, ne dia diango tshe dieko dianyu. 22Kana Paulu, kana Apolo, kana Kefasi, kana andja, kana lumu, kana nyoi, kana diango dieko, kana mango diayayi, diango diako tshe, dieko dianyu. 23Ku nyu nyeko wa Kristu; la Kristu keko ka Unyashungu.

1 KORETO 4

1Untu ateyi ati: Ekambi wa Kristu mbesu, la alami wʼakambu wa usheshe wa Unyashungu. 2Ntu le alami, dieli la untu lʼuntu dia ndjala la kolamelu. 3Keli le mi, eko dikambu dia tshitshe, dia dimi numbuyama le nyu kana le antu akina; kuku dimi halayalumbuya. 4Dimi haleyi nduku unungu weli la mi, keli dimi hayindjama osoku. Keli Khumadiondjo atunumbuyaka. 5Okone tanyulumbuyaki akambu ntundu Khumadiondjo atayi, one layushula akambu wushami wa lu udjima, layushula tukanyi tʼetema. Ku untu lʼuntu ukuyala la diandu diandi uma le Unyashungu.

 

6Anyasu, lakanyufundela akambu ami ndu wa Apolo uku wela dikambu dianyu; dia nyetsha shati: Tanyulekaki ntsho la ntundu kʼakambu wakafundama; diaha unyanyu omotshi ndjambiya lu dikambu diʼuntu omotshi ladiku dia unyandi. 7Untu akona ambukutshikitanya? Engo kakona keli la ye, kakiye kunungula? Keli naka we akakilungula, ukundi ayandulaye uku we kunungula?

8Nyu nyambulutaka! Nyambongonaka! Nyu nyambuyala uku khumi ya dikanga, aha kame la su! Kuku, dimi nangaka nyu mbulela ndu shu mbulela kame la nyu. 9Ne dia dimi lambukana nti: Unyashungu ambutukitsha, shu atumami, lʼokongo wʼantu tshe, uku antu wakawamia dia mvo; ne dia shu tambuyala uku endelu ka wa la kete, ndu lu ashu wa andjelo, ndu lu ashu wʼantu. 10Shu teli akanga a dinginya ne dia Kristu, keli nyu nyeko akanga a yimba le Kristu. Shu teko weodu, keli nyu nyeko la wulu. Nyu nyeko la lutumbu, keli shu teko la dionyo. 11Edja ndu unya one, shu teko la ndjala, la pusa, ndu utakataka, ndu dikomoki, ndu kema la dihuli dia mbidjase shikaa. 12Shu tatukambaka ulimu wulu la anya asu.4:12 Etsh. 18:3. Lamʼatotengawo, shu tatatshokolaka. Shu tatushikikalaka lamʼatusuyawo. 13Lamʼatonyolawo, shu tatasengasengaka. Shu tambuyala uku adiyu wa la kete la mindu ya diango tshe edja ndu kakiane.

14Dimi hafundi akambu ane dia nyutsha sonyi, keli dia nyewula uku anʼami wa ngandji. 15Ne dia kuyanga nyu nyeko la elombodi waheyama mbala le Kristu, nyu kema la washenyu efula, ne dia le Kristu Jesu kakamanyuti lu lukumu lʼololo. 16Okone dimi lambunyosengasenga nti: Nyumbukuyaki?4:16 1 Kor. 11:1; Fil. 3:17. 17Dia dikambu so, mbakamanyutumela Timote, onʼami la ngandji la kolamelu le Khumadiondjo, dia ndi nyuhula ditshelu diami dieli la mi le Kristu, uku alakanyami antu lʼekelizia lu ahuli tshe. 18Amotshi wambutakula uku dimi handjuya le nyu. 19Keli dimi layuya le nyu esadi, naka Khumadiondjo alanga. Dimi layushula wulu a wane wambutakula, aha aui awo atu; 20ne dia diulelu dia Unyashungu diaha lu aui, keli dieko lu wulu. 21Alanganyu na? Dimi nkandji le nyu la uhamba, kana la ngandji la utema a memakana?


 

1 KORETO 5

1Lukumu lambuya ati: Munanyi keko lʼatei anyu. Wuhu oso kema kuyanga lʼatei wʼasi wedja, ne dia untu omotshi eko la wadi a shi.5:1 Euh. 22:30. 2Nyu nyambutakula! Nyu kuningalinga, kunanga minya untu lakatshi dikambu so lʼatei anyu.

3Mete, dimba diami kema lʼatei anyu, keli utema ami weko le nyu. Dimi lakalumbuya one lakatshi dikambu so uku dimi laki leko, 4lu lukumbu la Khumadiondjo Jesu. Lamʼasangananyu, utema ami weko la nyu, ndu wulu wa Khumesu Jesu, 5dia nyu nkimo untu oso le Satana dia ndi nanya dimba diandi, ne dia utema andi ashimbameli lu lushi la Khumadiondjo Jesu.

6Ndjatumbula kanyu kema ololo. Nyu hanyeyi nyati: Edya ka tshitshe mvudiaka ukama a ma tshe?5:6 Ngal. 5:9. 7Nyunya edya kʼedjedja, dia nyu ndjala uku ukama wʼuyuyu waha la edya. Ne dia Kristu, onʼokoko asu wʼElekanelu,5:7 Etum. 12:5. akadiakema. 8Okone nyeso tuli dambu, diaha la edya kʼedjedja, diaha la edya ka lutunu la akambu wa kolo, keli la ma dia kawo la mete, diaha la edya.5:8 Etum. 13:7; Euh. 16:3.

9Dimi lakanyufundela lu mukanda ami nti: Tanyosohanaki lʼakanga a munanyi. 10Dimi halati dia akanga a munanyi wa la kete nye, kuyanga akanga wʼekomiya, kuyanga apotwanyi, kuyanga atemodi wa dikishi, lamʼahumbanyu mumo uma la kete nye. 11Keli dimi lakanyufundela nti: Tanyosohanaki la unyanyu, naka ndi eko umunanyi, kuyanga kanga okomiya, kuyanga otemodi a dikishi, kuyanga otenganyi, kuyanga umbidjoki a wanu, kuyanga opotwanyi — tanyolekaki lʼuntu oso. 12Dimi la dikambu dia numbuya antu wa kana uka? Nyu hanyulumbuya wane weli lu ekelizia? 13Unyashungu atulumbuyaka antu wa kana. Nyunya untu a kolo oso uma lʼatei anyu.

1 KORETO 6

1Lamʼayuyala untu la dikambu le unyandi, ukundi atshondi la ntufunda la ntundu kʼantu wa kolo, aha la ntundu kʼekilami? 2Nyu hanyeyi nyati: Ekilami wavulumbuya wa la kete? Naka nyu nyatulumbuyaka wa la kete, nyu hanyukuki numbuya tukambu tuleki tutshitshe? 3Nyu hanyeyi nyati: Shu tayulumbuya andjelo? Ndi wuhu wayuleka elumbwelu lu akambu wa lumu lone li! 4Naka nyu nyayulumbuya akambu wa la kete nye, ku nyu nyayukitsha wane weli anyanya lu ekelizia lʼulimu wa numbuya uka? 5Dimi lambunyutela diui ne dia nyutsha sonyi. Ukundi, nduku untu leli la lutui lʼatei anyu leya nsambula akambu lʼatei wʼanyandi? 6Keli onangu nfundaka onangu, ku nyati: Ndu la ntundu ka wane wahetawo?

7Mete, dikambu so dieko kolo lʼatei anyu, ne dia nyu nyambosongwanela. Undi, taki ololo dia nyu mbetawo mbikike kolo? Undi, taki ololo dia nyu mbetawo nkesama? 8Keli nyu nyame nyatutshaka kolo, nyatukesaka ndu anyanyu.

9Nyu hanyeyi nyati: Antu wa kolo hawukiti diulelu dia Unyashungu? Tanyuyadimbiyaki: atshi wʼakambu wa sonyi, kuyanga atemodi wa dikishi, kuyanga amunanyi, kuyanga akanga a nende, kuyanga atshi wʼakambu wa sonyi la apami, 10kuyanga evi, kuyanga akanga wʼekomiya, kuyanga ambidjoki a wanu, kuyanga atenganyi, kuyanga apotwanyi, vo tshe hawukiti diulelu dia Unyashungu. 11Nyu amotshi nyaki asoku. Keli nyu nyakayaedia, nyakakidiama, nyakayindjama lu lukumbu la Khumadiondjo Jesu Kristu, la le Nyuma ka Unyashungu asu.

 

12Dimi la wulu wa ntsha akambu tshe, keli aha akambu tshe mbusunganyi.6:12 1 Kor. 10:23. Dimi la wulu wa ntsha akambu tshe, keli dimi halangi nduku dikambu mbahamelami. 13Mbu ya nde ne dia dikundju, la dikundju ne dia mbu ya nde, keli Unyashungu ayalanya vo ahendi: ndu dikundju ndu mbu ya nde. Keli dimba aha ne dia munanyi, keli dieko dia Khumadiondjo, la Khumadiondjo ne dia dimba. 14Unyashungu lakulula Khumadiondjo, ayutulula ndu shu la wulu andi. 15Nyu hanyeyi nyati: Alimba anyu weli beke dia Kristu? Dimi layunya beke dia Kristu, la diete uku beke diʼuseka uka? Aha osoku! 16Nyu hanyeyi nyati: One lamamana la useka, ambuyala la ndi dimba otoi? uku akati Unyashungu ati: Vo ahendi wayuyala otoi.6:16 Etat. 2:24. 17Keli one lamamana la Khumadiondjo, eko la ndi utema otoi. 18Nyulawo munanyi. Kolo kina yatsha untu, yaha lu dimba, keli one lunana, ambutshela dimba diandi kolo. 19Nyu hanyeyi nyati: Alimba anyu weko etemwelo ka Nyuma kʼOlolo, keli le nyu,6:19 1 Kor. 3:16; 2 Kor. 6:16. kakanyalungula uma le Unyashungu? Alimba waha wanyu; 20ne dia nyu nyakasumbama la ushinga a wulu. Okone nyutumbuli Unyashungu lu alimba anyu.

1 KORETO 7

1Lu akambu wakanyafundela, eko ololo le pami, diaha ndi munanda umuntu. 2Keli ne dia munanyi, pami tshe ayali la wadendi hita; la umuntu tshe ayali la umendi hita. 3Umi akitshiya wadendi lamʼalangandi; ndu wadi akitshiya umi lamʼalangandi. 4Wadi kema la wulu ladiku dia dimba diandi hita, paka umendi; ndu umi kema la wulu ladiku dia dimba diandi hita, paka wadendi. 5Tanyusehianyaki, tshikima nyambulakana etenyi, dia nyu ndjakimo lu dombelo, ku nyayuyala kame ntu; Satana atukunyuhimba ne dia wodu anyu. 6Keli dimi lambunyutela aui ane la memakana, aha uku olembe. 7Dimi nangaka nti: Antu tshe wutuyala uku dimi. Keli untu lʼuntu eko la ushasha andi uma le Unyashungu, omotshi uhuwo andi, ukina uhuwo andi.

8Keli dimi lambutela enyimba la wadi waki edu nti: Eko ololo dia vo ntshikala uku dimi. 9Keli naka vo haweyi ndjakimela, watshukani, ne dia ntshukanelu ambuleka songu ka munanyi ololo.

10Ku le atshukanyi, dimi lambudjanga, keli aha Khumadiondjo, nti: Wadi tanganaki uma le umendi 11(ku lamʼayundangana, ndi atshikali unyimba, kana akaluli le umendi) — umi takimoki wadendi.7:11 Mat. 5:32; 19:9; Mak. 10:11-12; Luk. 16:18.

12Keli le antu akina, aha Khumadiondjo, dimi kata nti: Naka unyasu omotshi eko la wadi laha umbetawudi, la umuntu uku ambetawo mbidjase la ndi, ndi tukimoki. 13Naka umuntu eko la umi laha umbetawudi, naka umendi ambetawo mbidjase la ndi, ndi tanganaki uma le umendi. 14Ne dia umi laha umbetawudi nkidiamaka uma le wadendi; la wadi laha umbetawudi nkidiamaka uma le umendi. Utunduyala aha osoku, tshiki anʼanyu hawukidiama, keli kakiane vo weko ekila. 15Keli naka laha umbetawudi ayumo, ndi amo; unyasu kana kadiyesu kema uku fumbi lu akambu ane. Unyashungu akateti lu akambu wa ki. 16We umuntu, we mbeyaka kana we ayushimbela umeye? We umi, we mbeyaka kana we ayushimbela wadeye?

 

17Untu lʼuntu akendekende lu akambu wakawusha Khumadiondjo, lamʼakaweti Unyashungu. Osoku mbatumudjangelaka ekelizia tshe. 18Undi, lʼetena kaketama untu, laso ku ndi ambahemaka uhekeli? Ndi atshikali osoku. Lʼetena kaketama untu, ku ndi atahema uhekeli? Ndi ntahemaki. 19Mbahema uhekeli eko anyanya, ndu hahema uhekeli eko anyanya, paka nkitanyia elembe wa Unyashungu. 20Untu lʼuntu atshikali lu dikambu diaki la ndi ntundu ndi atetama. 21We aki fumbi lamʼakayetama? Yala kaku. Ndu lamʼeyaye ntshungwama, utshungwami. 22Ne dia untu laketama le Khumadiondjo lamʼakindi fumbi, ndi eko utshungwami wa Khumadiondjo. Okone untu laketama lamʼakindi uyadjasedi, ndi eko fumbi ka Kristu. 23Nyu nyakasumbama lʼushinga a wulu, tanyuyalaki fumbi yʼantu. 24Anyasu, untu lʼuntu atshikali la Unyashungu lu akambu waki la ndi, lamʼakandetama.

 

25Dimi kema la olembe a Khumadiondjo ne dia amantu wa dimuma. Keli dimi lambunyutela tukanyi tami, uku one lakukama ketshi uma le khumadiondjo, dia ndjala la kolamelu. 26Okone, ne dia fono keli la su, dimi lambukana nti: Eko ololo le pami dia ndi ntshikala kaku. 27We ambukelekama la wadi? tuyangaki nkelekoma. We ambukelekwama uma le wadi, tuyangaki wadi. 28Keli naka we ambutshuka wadi, we hatshi kolo; naka usekaseka wʼemuma ambutshukama, ndi hatshi kolo. Ku antu ako wayuyala la asui lu alimba. Dimi nangaka nyamela uma lʼasui ako. 29Keli dimi lambunyutela nti: Anyasu, nshi yaya ka nshila. Lʼokongo diku wane weli la wadi wayuyala uku wane waha la wadi. 30Wane walela wayuyala uku wane wahaleli. Wane wangenangena, wayuyala uku wane wahangenangena. Wane wasumba diango, uku wane waha la diango. 31Wane wekela diango dia la kete wayuyala uku wane wahadiekela tshe, ne dia efanelu ka kete kayushisho.

32Keli dimi halangi nyu ndjala la ukananu. One lahatatshuki, atulamaka akambu wa Khumadiondjo, uku weyandi ngenyangenya Khumadiondjo. 33Keli utshukanyi atulamaka akambu wa la kete, uku weyandi ngenyangenya wadendi, 34ku ndi ambatana. Osoku ndu umuntu laha la umi, ndu usekaseka wʼemuma, vo watulamaka akambu wa Khumadiondjo, dia vo ndjala ekilami lʼalimba ndu lʼetema. Keli utshukami atulamaka akambu wa la kete, uku weyandi ngenyangenya umendi. 35Dimi lambunyutela dikambu ne dia ololo anyu. Aha dia nyutadia lu djunga, keli dia nyu ndjala la akambu wʼusunganyi, la dia nyu mbeya mamema Khumadiondjo aha la ufutanu.

36Keli naka untu nkanaka ati: Ndi heyi ndjakimela utsha le osonami andi, naka pusa kandi ka dimba kambuleka wulu, ndu naka dikambu diako mbeyaka ntsha, ndi atshi uku alangandi; kawo vo ntshukana — dikambu so kema kolo. 37Ku one lakikitala lʼutema, aha la saki, keli ambeya lama ndjakimela, la ambusanguya lʼutema dia mumba usekaseka andi wʼemuma, ndi ambutsha ololo. 38Okone ntshukana, eko ololo; ndu aha ntshukana, eko ololo. Aha ntshukana, ambuleka ntshukana ololo.

39Wadi ambukelekama le umendi lamʼeki umendi la lumu. Keli naka umendi ambuvo, ndi mbeyaka ntshukama le one lalangandi. Keli paka lu lulangu la Khumadiondjo. 40Keli tukanyi tami teko okone nti: Ndi ambuleka ngenangena dia ntshikala kaku. Dimi lambukana nti: Ndu dimi leko la Nyuma ka Unyashungu.

1 KORETO 8

1Kakiane, dimi lambunyutela dia diango dia nambula dikishi. Shu mbeyaka shati: Shu tshe teko la bewu. Ewu atutakuyaka untu, keli ngandji katuwudiaka. 2Naka untu omotshi nkanaka ati: Dimi lambeya dikambu dimotshi, keti ndi atadieyi uku ahumbandi dieya. 3Keli untu lalanga Unyashungu, untu oso ambeyama le ndi.

4Dia diango diakawalambula dikishi, shu mbeyaka shati: Nduku ekishi keli la eungelu ka mete, ndu nduku Unyashungu ukina weko, tshikima otoi. 5Diango dieko, dietawo vati: Ditemolatemola kana lʼulungu kana la kete — mete eko “ditemolatemola” ndu “khumadiondjo” efula — 6keli le su, eko Unyashungu otoi, Shesu lakatungi diango tshe, ndu shu, la Khumadiondjo otoi, Jesu Kristu. Diango tshe dieko uma le ndi, ndu shu teko uma le ndi.

7Kuku antu tshe haweyi dikambu so, keli amotshi watotemolaka dikishi edja ndu kakiane; watolekaka diango diakawalambula dikishi, ku khumʼutema ka wodu kambulanyema. 8Keli mbu ya nde hayutusukanya le Unyashungu. Naka shu hatuli, shu hatuleka ndjala kolo dikambu so; ndu naka shu tayole, shu hatuleka ndjala ololo dikambu so. 9Keli nyewo, ndjadjasela kanyu kene tayalaki utakanya le wane weli wodu. 10Naka one leli wodu ayukena, we kanga ewu, udjashi, ale diango lʼetemwelo kʼekishi; ku khumʼutema kandi hakikitala, dia nde diango diakawalambula dikishi uka? 11Okone ne dia ewu kaye, one leli wodu uku ambulana, unyanyu uku lakavu Kristu dikambu diandi! 12Okone, lamʼayunyutshela anyanyu kolo, lamʼayunyuhuma khumʼetema yawo ya wodu, keti nyambutshela Kristu kolo. 13Okone naka mbu ya nde yayutakanya unyami, keti dimi handjole unatshi pundju, ne dia dimi ntukutakanya unyami.

1 KORETO 9

1Dimi kema la ndjadjasela? Dimi kema utumami? Dimi komena Jesu Khumesu? Nyu kema ulimu ami le Khumadiondjo? 2Naka dimi kema utumami le akina, dimi leko utumami le nyu; nyu nyeko djimbitelu yulimu ami wʼutumami le Khumadiondjo.

3Oso eli aui ami, wakamateketa le wane wakamumbulaka. 4Undi, shu kema la wulu wa nde la no? 5Shu kema la wulu wa mbeteta la wadi leli umbetawudi, uku atumami akina, ndu anangu Khumadiondjo, ndu Kefasi? 6Kana dimi utu la Baranaba, mbaha la wulu wa nkimo ulimu? 7Dimbi diakona diayafuta lʼulimu andi? Untu akona lune ekodi wʼelua, ku hali elua awo? Untu akona atushaka dungalunga mbu ya nde, ku hano awele adio?

8Dimi lambuta akambu aso uku untu uka? Elembe hawuti pupu? 9Ne dia ambufundama lʼelembe a Mose ati: Tukelekaki otei lʼunyo a ngombe lamʼatatakamakamela wuhu.9:9 Euh. 25:4; 1 Tim. 5:18. Undi, Unyashungu nkanelaka ngombe tshu uka? 10Ndi hateketa lu dikambu diasu? Elu, dikambu diasu mbakafundama ati: Dieli la untu lafusa, nfusa la elungamelu; la untu lasusula, alungameli dia ndjala la yema. 11Naka shu takanyunela diango dia Nyuma, undi, dikambu dia wuki mbedio dia shu muna diango dianyu dia dimba?9:11 Rom. 15:27. 12Naka amotshi weli la wulu ladiku dianyu, shu hataleki uka?

Keli shu kuntsha la wulu ako ulimu, ku tambetawo akambu tshe, ne dia tatukutshidia lukumu lʼololo la Kristu. 13Nyu hanyeyi nyati: Wane watutshaka ulimu a diango diʼekila, watolekaka diango dia lu etemwelo; la wane watutshaka ulimu wʼediakelu, watuyalaka la etenyi kawo uma lʼediakelu?9:13 Euh. 18:1. 14Osoku mbakadjanga Khumadiondjo, dia wane watutaka lukumu lʼololo, wakundja diango diawo uma lu lukumu lʼololo.9:14 Mat. 10:10; Luk. 10:7.

15Keli dimi kundjaosela nduku ema uma lu diango ne. Dimi hanyufundela akambu ane, ne dia mbosa diango ne; ndeka ololo dimi mvo, uleki untu mbete lutumbu lami anyanya. 16Naka dimi lambusambisha lukumu lʼololo, dimi kema la dikambu dia ndjatumbula, ne dia okende weko ladiku diami. Fono keko le mi, naka dimi halasambisha lukumu lʼololo! 17Naka dimi latutshaka okone uma lu lulangu lami, uimi la difutu. Keli naka aha uma lu lulangu lami, dimi la okende wakamalungula. 18Difutu diami dieli na? Dio dieko nsambisha lukumu lʼololo lasambishami laha la ushinga, la aha ndjaosela wulu tshe weyami ndjaosela lu lukumu lʼololo.

19Kuyanga dimi lakayala la ndjadjasela uma le antu tshe, dimi lakayaete fumbi kʼantu tshe, dia dimi ndeka mbetawuya antu efula. 20Le asi Juda, dimi lakayala usi Juda, dia dimi mbetawuya asi Juda. Dime kema la tshina diʼelembe, ku lakayala uku untu leli la tshina diʼelembe le wane weli la tshina diʼelembe. 21Le wane waha la elembe, dimi lakayala uku untu laha la elembe, kuyanga dime laki uku untu laha la elembe wa Unyashungu. Keli laki la tshina dia elembe wa Kristu, dia dimi mbetawuya wane waha la elembe. 22Le akanga a weodu, dimi lakayala wodu, dia dimi mbetawuya akanga a weodu. Dimi lakayala wehu wʼantu tshe, dia dimi nshimbela amotshi. 23Dimi latutshaka akambu tshe ne dia lukumu lʼololo, dia dimi nkundja yema loko.

24Nyu hanyeyi nyati: Wane wasaka luwangu, watusakaka tshe, keli otoi omotshi utu kayulungula difutu? Nyusaki luwangu osoku, dia nyu nungula difutu. 25Untu tshe latedikaka luwangu lu tokenyo, atuyakimelaka lu akambu tshe. Vo watutshaka osoku, ne dia nungula lufule la lutumbu layulana, keli shu tayulungula lone lahalana. 26Dimi latusakaka luwangu laha la wengengo. Dimi latolokaka, aha uku untu lakomola lopepe. 27Keli dimi latuyakomolaka, latuyalembiaka lu fumbi, ne dia lamʼasambishami akina, dime ntukuyala utunami.

1 KORETO 10

1Anyasu, dimi nangaka nyu mbeya nyati: Watshesu tshe waki la tshina dia dingi,10:1 Etum. 13:21-22. vo tshe waketi lʼatei wʼuduwa.10:1 Etum. 14:22-29. 2Vo tshe wakabatizama le Mose lu dingi la lʼuduwa. 3Vo tshe wakalekaka mbu ya nde ya nyuma kame.10:3 Etum. 16:35. 4Vo tshe wakanokaka diango dia no dia nyuma kame,10:4 Etum. 17:6; Wal. 20:11. ne dia vo wakanokaka uma lu Dive dia nyuma diakawayeli. Dive diako diaki Kristu. 5Keli Unyashungu kongenangena le amotshi wuleki efula, ne dia vo wakalembiama lʼusui.10:5 Wal. 14:29-30.

6Akambu aso wakayala le su dia ntewula, diaha shu ndjala la saki yʼakambu wa kolo uku akiwo la saki.10:6 Wal. 11:4. 7Ntu, tanyuyalaki atemodi wa dikishi uku aki amotshi; uku ambufundama ati: Antu wakadjase ne dia nde la no, wakunela ne dia nkenya.10:7 Etum. 32:6. 8Ntu, tatunanaki uku akatshi amotshi, ku wakavu nunu satu akumi ahendi la satu lushi lame.10:8 Wal. 25:1-18. 9Ntu, tatuhimbaki Khumadiondjo uku akatshi amotshi, ku wakavu lʼelui.10:9 Wal. 21:5-6. 10Ntu, tanyungunangunaki uku akangunanguna amotshi, ku wakavu lʼanya wʼUnanyishi.10:10 Wal. 16:41-49 11Akambu aso wakayala le wo dia mbaewula. Vo wambufundama dia ntewula lʼekumelu ka tena diaya le su. 12Okone untu lakana ati: Dimi lambemala, ewo, atukoko. 13Nduku uhimba waya le nyu, waheyi antu memba. Keli Unyashungu eko la kolamelu; ndi hetawo dia nyu mpimbama uleki wulu anyu. Keli lamʼayuya ehimba, ndi ayunyutshela mbuka ka nyu mpanda dia nyu ndjala la wulu wa nshikikala.

 

14Okone, elangimi ami, nyulawo otemwelo wa dikishi. 15Dimi lamboteketa uku le akanga a yimba; nyediki nyame aui watami. 16Dikoho diʼotshoko diatshokolasu, dio kema uku ekesanelu kasu lu dikila dia Kristu? Ukama watulasu, vo kema uku ekesanelu kasu lu dimba dia Kristu?10:16 Mat. 26:26-28; Mak. 14:22-24; Luk. 22:19-20 17Ne dia shu, antu efula, teko ukama wame, la dimba diame, ne dia shu tshe tatosaka uma lʼukama otoi. 18Nyendi Isariyele lu akambu awo wa dimba. Wane watolekaka diango diʼediakelu, vo hawekesanela lʼediakelu?10:18 Lew. 7:6. 19Ya ukundi atami na? nti: Ma diatuwulambulaka dikishi mbeli dikambu, kana ekishi keli dikambu? 20Kema, dimi lambuta nti: Elambu watulambulaka asi wedja, edienge mbatuwalambulaka, aha Unyashungu.10:20 Euh. 32:17. Dimi halangi nyu mbekesanela la edienge. 21Nyu hanyeyi no dikoho dia Khumadiondjo, ndu dikoho diʼedienge. Nyu hanyeyi nde uma lu mesa wa Khumadiondjo, ndu umalu mesa wʼedienge. 22Khumadiondjo kutshasu kandjema uka?10:22 Euh. 32:21. Wulu mbulekisu?

 

23Wulu a ntsha akambu tshe weko, keli aha akambu tshe mbusunganyi.10:23 1 Kor. 6:12. Wulu wa ntsha akambu tshe weko, keli aha akambu tshe mbatudia. 24Untu tayayangelaki ololo andi, keli untu lʼuntu ayangeli ukina ololo. 25Nyuli engo tshe kasundjawo lu kituka, tanyumbwanaki embula ne dia khumʼutema, 26ne dia kete yeko ya Khumadiondjo, ndu diango tshe dieli loko.10:26 Esam. 24:1. 27Naka untu lahetawo ayunyeta, la nyu nangaka ntsho, kanyuli engo tshe kayuwunyukitshiya, tanyumbwanaki embula dia khumʼutema. 28Keli naka untu ayukutela ati: Engo kene kakawakimwela ekishi, tanyolekaki, ne dia untu lakakewudi, la dia khumʼutema. 29Dimi halati dia khumʼutema kaye, keli dia khumʼutema ka ukina. Okoko wana wukuki ndjadjasela kami numbuyama le khumʼutema kekina? 30Naka Himi lale, luka lusaka, okoko wana wukukimi ntendama lu diango diakamuki lusaka?

31Okone kana nyayole, kana nyayono, kana dikambu tshe diayunyutsha, nyutshi dia lutumbu la Unyashungu. 32Tanyuyalaki uku utamba a ntakanya: le asi Juda kana le asi Ngirika, kana le ekelizia wa Unyashungu, 33uku ndu dimi latongenyangenyaka antu tshe lu akambu tshe. Dimi hayayangela waho, keli latuyangelaka antu efula waho dia vo nshimbamela.

1 KORETO 11

1Nyumbukuyaki,11:1 1 Kor. 4:16; Fil. 3:17. uku wukuyami Kristu.

 

2Dimi lambunyandula, ne dia nyu nyatumbuhoka lu akambu tshe, nyatukimelaka ditshelu uku akamanyetsha. 3Keli dimi nangaka nyu mbeya nyati: Ote a pami tshe eli Kristu, la ote a umuntu eli pami; la ote a Kristu eli Unyashungu. 4Pami tshe lalomba, kana lata diui lʼote andi ukumbami, ndi ambonyola ote andi. 5Keli umuntu tshe lalomba, kana lata diui lʼote andi hakumbami, ambonyola ote. Dikambu ne dieli uku ote andi ambunyama divu. 6Naka umuntu hakumbi ote, ndi anya divu diandi. Keli naka dia umuntu minva divu, eko dikambu dia sonyi; ndi akumbi ote. 7Mete, kema ololo dia pami nkumba ote andi, ne dia ndi eko efanelu, ndu lutumbu la Unyashungu.11:7 Etat. 1:26-27. Keli umuntu eko lutumbu la pami. 8(Pami kuntungama uma le umuntu, keli umuntu kakatungama uma le pami. 9Pami kuntungama ne dia umuntu, keli umuntu kakatungama ne dia pami.)11:9 Etat. 2:18-23. 10Dia dikambu ne, umuntu eko la dikambu dia ndjala la djimbitelu ya diulelu lʼote andi, lu dikambu diʼandjelo. 11(Keli umuntu kundjala aha uma le pami kana pami aha uma le umuntu, le Khumadiondjo. 12Ne dia uku akatungama umuntu uma le pami, mbakutama pami uma le umuntu.) 13Nyuyalumbuya nyame: eko ololo dia umuntu nomba Unyashungu hakumbi ote uka? 14Ndu akambu wʼandja vame hawunyetsha ati: Eko sonyi le pami dia ndi ndjala la divu diʼutali? 15Keli naka umuntu eko la divu diʼutali, uku eli lutumbu landi. Ne dia ndi akoyama divu diandi uku ekumbelu kandi. 16Keli naka untu ayudja tamu, shu kema la etshelu kekina; kuyanga ekelizia wa Unyashungu kema la to.

 

17Dia nyutela dikambu ne, dimi hanyandula. Ne dia nyu nyatusanganaka aha lu akambu wuleki ololo, keli lu akambu wuleki kolo. 18Dikambu dia ntundu, lamʼatunyusanganaka lʼekelizia, dimi lambuka nti: Diatanelu dieko lʼatei anyu. Ku dimi mbetawoka lukumu lako yema. 19Ne dia dieli ndu la ditshikitanelu ndjala lʼatei anyu, dia antu wʼololo wenami lʼatei anyu. 20Okone lamʼatunyusanganaka, eko wulu dia nyu nde ma dia Khumadiondjo. 21Ne dia lamʼatunyolekaka, untu lʼuntu atutatelaka mbosa ma diandi; omotshi eko la ndjala, ukina umbidjoki a wanu. 22Ukundi, nyu kema la mvudu ya nyu nde la no loko? Kana nyu nyatonyolaka ekelizia wa Unyashungu, ndu nyatutshaka wane waha la diango sonyi? Ukundi ayumunyutela na? Dimi nyanduli uka? Dimi hanyandula lu dikambu ne.

23Ne dia lakalungula diui uma le Khumadiondjo, diakamanyutela nti: Khumadiondjo Jesu akose ma lʼutshu wakandafungama. 24Lamʼakanduki lusaka, ndi akadiatula; akati ati: Dimba diami ne, dio dieko dikambu dianyu. Nyutshaki okone, dia nyu mbuhomi. 25Lʼokongo wa ma dia dikolo, ndi akose ndu dikoho; akati ati: Dikoho ne dieli sheki yʼuyuyu11:25 Etum. 24:8; Jer. 31:31-34. lu dikila11:25 Etum. 24:6-8. diami. Nyutshaki okone lamʼayunyudinokaka, dia nyu mbuhomi. 26Lamʼayunyolekaka ma ne, ndu lamʼayunyonokaka dikoho ne, nyu nyayutelaka antu dikambu dia nyoi ka Khumadiondjo, edja ndu lamʼayunduya.

27Okone untu tshe layole ma ne, kana no dikoho dia Khumadiondjo wuhu wahasungana, ndi ayuyala la unungu wa dimba la dikila dia Khumadiondjo. 28Keli untu ayaediki ndame, ku ali ma ne, ano uma lu dikoho ne. 29Ne dia one lale ndu lano, ambuyalela ndu ambuyanwela ndame unungu, naka ndi halimbitela dikambu dia dimba ololo. 30Dia dikambu so, mbatuyalaka antu efula weodu ndu la hemo, ndu mbatuvokaka antu efula lʼatei anyu. 31Keli naka shu takayalimbitela shame, ku shu hatulumbuyama. 32Keli lamʼambutulumbuyama, shu tambusuyama le Khumadiondjo, dia shu tatukanyema kame la wa la kete.

33Okone, anyami, lamʼayunyusangana la ndjole ma, kanyukunganaki — 34Naka untu la ndjala, ndi atali lakandi — okone hawunyamia lamʼayunyusangana. Dimi layuyusimbula akambu akina lamʼayumuya le nyu.

1 KORETO 12

1Anyasu, dimi halangi nyu munga dikambu dia Nyuma. 2Nyu mbeyaka nyati: Lamʼakinyu asi wedja, nyu nyakanganyiama le dikishi diku dia nyumi, uku akanyalombwama. 3Okone dimi lambunyutela nti: Nduku untu lambuta uma le Nyuma ka Unyashungu ati: Jesu ambudjama mananu; ndu, nduku untu leya mvuta ati: Jesu keli Khumadiondjo, paka uma le Nyuma kʼOlolo.

4Wehu efula wa eshasha weko, keli Nyuma eli otoi. 5Wehu efula wa dikambelu weko, keli Khumadiondjo eko otoi. 6Wehu efula wʼelimu weko, keli Unyashungu eko otoi. Ndi atutshaka akambu tshe le antu tshe. 7Keli untu lʼuntu amboyama enyelo ka Nyuma, ne dia mbakundjiya waho. 8Ne dia omotshi amboyama diui dia yimba uma le Nyuma; ukina diui diʼewu uma le Nyuma kako. 9Omotshi mbetawo uma le Nyuma kako; ukina eshasha wa nkonoya antu, uma le Nyuma otoi; 10ukina etshelu kʼakambu wa mamba; ukina etelu ka diui; ukina eshihudielu ka nyuma. Ukina wehu ekina wʼeteketa; ukina ekadimwelu kʼeteketa. 11Keli Nyuma otoi katutshaka akambu aso tshe. Ndi atukahanyaka le untu lʼuntu uku aiangandi.12:11 Rom. 12:6-8.

 

12Ne dia uku eli dimba otoi, ndu edio la beke efula, la btke dia dimoa, kuyanga mbedio efula, dieko dimba otoi; osoku mbeli ndu Kristu.12:12 Rom. 12:4-5. 13Shu tshe takabatizama lu Nyuma otoi dia shu ndjala dimba otoi — asi Juda kana asi Ngirika, kana fumbi kana wuyadjasedi — shu tshe takanoshama uma le Nyuma otoi.

14Ne dia dimba diaha leke otoi, dio dieko beke efula. 15Naka dikaka diayuta ati; Ne dia dimi kema lunya dimi kema leke la dimba; okone dio diaha leke la dimba uka? 16Ndu naka tui ayuta ati: Dimi laha su, dimi kema leke la dimba; okone dio diaha leke la dimba uka? 17Utunduyala dimba tshe diayali su, lendi ututukaka? Utunduyala dimba tshe diayali tui, lendi ututononaka? 18Keli kakiane Unyashungu ambukitsha beke tshe lu dimba, uku akandalangi. 19Utunduyala dio tshe diayali leke otoi, ku lendi utuyala dimba? 20Keli kakiane dio dieko beke efula, keli dimba otoi. 21Su hadieyi mvutela lunya ati: Dimi kema la ye uhumba. Ntu, ote heyi mvutela ekulu ati: Dimi kema la nyu uhumba. 22Aha osoku, keli beke diku dia dimba dienasu shati: Dio mbuleki wodu, dieko uhumba. 23La beke diku dia dimba dienasu shati: Dio nemiamaka yema tshitshe, dio mbalekasu nemia efula; beke diasu dia dingeno diatuyalaka la kenemo utamanya. 24Keli beke diasu diʼamena hadiuhumbi. Keli Unyashungu akasanganya beke dia dimba, akaleki nemia leke lahumba, 25ne dia diatanelu diatukuyala lu dimba; keli dia beke dia dimba dialamani pupu. 26Naka leke lomotshi lambusuwa, keti beke tshe nsuwa la lo. Naka leke lomotshi lambolemiama, keti beke tshe ngenangena la lo.

 

27Okone nyu nyeko dimba dia Kristu, la untu lʼuntu eko leke ladio. 28Unyashungu ambukitsha amotshi lu ekelizia, ntundu atumami, la hendi amvutshi, la satu embetsha12:28 Ef. 4:11. ku atshi wʼakambu wa mamba, ku akonodi la ekimanyidi la embuledi, la ateketshi a wehu wʼeteketa. 29Atumami mbewo tshe uka? Amvutshi mbewo tshe? Embetsha mbewo tshe? Atshi wʼakambu wa mamba mbewo tshe? 30Vo tshe mbeli la eshasha wa nkonoya? Vo tshe mbateketa wehu wʼeteketa? Vo tshe mbeli ekadimudi wʼeteketa? 31Keli nyutetemali nyanga eshasha wuleki waki. Dimi layunyenya mbuka kuleki ololo.

1 KORETO 13

1Naka dimi layoteketa lu eteketa wʼantu ndu wʼandjelo, keli laha la ngandji, dimi lambuyala uku ohotela wahumawo, kana uku dinyandja diasakanyawo nga nga. 2Ndu naka layuyala la ushasha wa mvuta aui, naka layeya akambu tshe wa usheshe la bewu tshe, naka layuyala la mbetawo tshe ka nsekola ekungu13:2 Mat. 17:20; 21:21; Mak. 11:23. keli laha la ngandji, anyanya mbemi. 3Naka dimi layukaha diango diami tshe dia mbisha akanga a weula mbu ya nde; naka layukimo dimba diami dia dio ntshumbama, keli laha la ngandji, dikambu so kema waho le mi.

4Ngandji keli kanga memakana la ketshi. Ngandji kaha la kandjema, fayaseme, hayambiya, 5hatshi akambu wa fumbosonyi, hayangi paka lulangu landi, hadia akambu wa kolo. 6Ndi hangenangena lu yenyi, keli atongenangenaka lu mete. 7Ngandji atukhukhumeka akambu tshe, atukitshiyaka akambu tshe, atulungamelaka akambu tshe, atukikeka akambu tshe.

8Ngandji haheko pundju. Keli ditelu diʼakambu wahatayi diayushisho; eteketa wayushila; bewu diayushisho. 9Ne dia shu mbeyaka paka etenyi ketu, tatutaka etenyi ketu. 10Keli lamʼayuya akambu wʼuluwanyi, akambu wʼetenyi wayushisho. 11Lamʼakimi dikenda, dimi lakateketaka uku dikenda, lakukaka uku dikenda, lakakanaka uku dikenda. Kakiane, dimi lambuyala ekumanyi, lambukimo akambu wa dikenda. 12Kakiane, tatenaka lu lulindu uku efanelu, keli lushi loso, tayenana lu dundji. Kakiane dimi mbeyaka etenyi ketu, keli lushi lako, layushihudia tshe, uku akawanshihudia. 13Kakiane, ambutshikala mbetawo, la elungamelu, la ngandji. Akambu aso asatu, dikambu diuleki wuki lʼatei awo ku ngandji.

1 KORETO 14

1Nyuyelaki ngandji; nyuleki mbuka eshasha wa Nyuma saki, djekaleka ku lu nsambisha. 2Ne dia one latoteketaka lolendo, ndi hateketa le antu, keli le Unjishungu, ne dia nduku untu luka diui diandi. Keli lu Nyuma, katundutaka akambu wushami. 3Keli untu lasambisha antu lʼoteketa weyawo, atutelaka antu akambu wa mbaudia, wa mbakikitsha, la wa mbasamba. 4Untu latoteketaka lolendo, ambuyaudia. Keli one lasambisha antu lʼoteketa weyawo, ambudia ekelizia. 5Dimi nangaka nyu tshe nteketaka lolendo, keli lambuleka nanga nyu nsambisha antu lʼoteketa weyawo. Untu lasambisha antu lʼoteketa weyawo, ambuleka untu latoteketaka lolendo wuiti, tshikima ndi kukadimudi aui, ne dia ekelizia wudiami.

6Anyasu, naka dimi layuya le nyu lateketa lolendo, waho akona wayumunyukundjiya, naka dimi halateketa la nyu dia eshwelu, kana ewu, kana esambishelu, kana wetshelu? 7Ndu diango diaha la lumu, kana pungi kana losese, lamʼateketawo, naka vo hawutshikitanya oteketa, ukundi weya untu oteketa awo? 8Naka pungi ayudama la diui diaheyama, untu akona ayuyalongosola dia ndo ta? 9Okone ndu nyu, naka nyu hanyoteketa wukawo esadi, ukundi wayeya antu akambu watanyu? Ne dia nyu nyayoteketa la lopepe. 10Lʼatei wʼeteketa tshe weli la kete, nduku otoi weko, waha la kitshimudi yandi. 11Okone, naka dimi haleyi kitshimudi yʼoteketa, ku layuyala uku osendji le untu lateketa; la untu lateketa ayuyala uku osendji le mi. 12Okone ndu nyu, amangamedi a eshasha wa Nyuma, nyutamanya nyanga mbudia ekelizia.

13Okone one latoteketaka lolendo, alombe dia nui nkadimula aui. 14Naka dimi layolomba lu lolendo, utema ami ambolomba, keli yimba yami hayoto elua. 15Kayumutsha? Dimi layolomba lʼutema, layolomba ndu lu yimba. Dimi layimba limbu lʼutema, layimba ndu lu yimba. 16Dikambu dikina, naka we ayotshokola lʼutema utu, ukundi ayuta untu lahuki ati: Ayali osoku! lu etshokwelo kaye, lamʼahandeyi okone wataye? 17Mete, we ambuka lusaka ololo, keli untu ukina hudiama. 18Dimi lambuka Unyashungu lusaka, ne dia lambunyuleka tshe nteketa lolendo. 19Keli le ekelizia, dimi nangaka nteketa aui atanu la yimba yami dia dimi ndakanya akina, ambuleka nteketa aui nunu dikumi lu lolendo ololo.

 

20Anyasu, tanyuyalaki uku akenda lu yimba. Nyuyali uku ana wʼashashi lu kolo, keli nyuyali uku dikumanyi lu yimba. 21Ambufundama lu elembe ati; Layoteketa le antu ane lu eteketa wʼantu wahaweyi, la lu enyo wʼantu wʼangendangenda; kuyanga osoku, vo hawumbukela, mbata Khumadiondjo.14:21 Is. 28:11-12. 22Okone nendo yaha uku djimbitelu le embetawudi, paka le wane wahetawo. Keli esambishelu keli djimbitelu le embetawudi, aha le wane wahetawo. 23Okone, naka ekelizia tshe wambusangana kame, la tshe wamboteketa nendo, naka antu wayoto waheyi, kana waha embetawudi, vo hawuti vati: Akanga wʼaladi mbenyu uka? 24Keli naka vo tshe wambusambisha, ku lamʼayoto untu laha umbetawudi, kana laheyi, ndi ayutshumwama, ayulumbuyama le wo tshe. 25Akambu wushami lʼutema andi, wayusho, ku ndi ayukhusama, ayotemola Unyashungu; ayuta ati: Unyashungu eko lʼatei anyu mete.

 

26Ya ukundi, anyasu? Lamʼayunyusangana kame, untu lʼuntu eko la usambu, kana wetshelu, kana enyelo, kana lolendo, kana ekadimwelu ka lolendo. Akambu tshe watshami dia mbudia antu. 27Naka untu ayoteketa lolendo, ololo ahendi, ahendi watekete, talekaki asatu. Untu lʼuntu katekete lʼetena kandi, ku untu omotshi ayukadimula. 28Keli lamʼayuyala kema ukadimudi, ndi alembohali lʼatei wʼekelizia; ndi ayateketele, atekete le Unyashungu. 29Amvutshi watekete kana ahendi ahendi, kana asatu asatu, akina washihudia. 30Keli naka dikambu diambenyama le untu ludjashi loko, untu a ntundu alembohali. 31Ne dia nyu tshe mbeyaka mvutanela diui untu lʼuntu, dia nyu tshe mbeya, la dia nyu tshe nkikitshama. 32Nyuma yʼamvutshi yambolembiama le amvutshi; 33ne dia Unyashungu aha Unyashungu wa ufutanu, keli eko Unyashungu wa ki.

 

Uku lu ekelizia tshe wʼekilami, 34amantu walembohali lu ekelizia, ne dia hawetawoma dia vo nteketa, keli vo wakitshakitshami, uku wata ndu elembe. 35Naka vo nangaka mbeya dikambu, wambuli waumewo lu ngelu yawo, ne dia eko dikambu dia sonyi dia umuntu nteketa lu ekelizia. 36Ya ukundi? Uma le nyu mbakatshu diui dia Unyashungu? watshami la dimena ndu uluwanyi.

37Naka untu omotshi ambuyakana ati: Umvutshi mbemi; kana ati: Kanga Nyuma kemi, ndi alimbiteli akambu wamumunyufundela nti: Vo weli uku olembe wa Khumadiondjo. 38Keli naka untu heyi, ndi atshikali la heyi kandi. 39Okone nyu anyami, nyuleki ndjala la saki ka nsambisha, tanyusikeki antu nteketa nendo. 40Keli akambu tshe watshami la dimena ndu uluwanyi.

1 KORETO 15

1Anyasu, kakiane dimi lambunyulimbitshiya lukumu lʼololo laka-manyusambishaka, ndu lakamalungula, lu lako lemadinyu. 2Nyu nyakashimbamela la lukumu lako, naka nyayushikikala lu diui diakamanyusambishaka — kana nyu kumbetawo wetawotawo.

3Ne dia dimi lakatanyutedi dikambu diakamalungula nti: Kristu akavu ne dia kolo yasu, uku wata afundelu.15:3 Is. 53:5-12. 4Ndi akakhundama; akulwama lushi la satu uku wata afundelu.15:4 Esam. 16:8-10; Mat. 12:40; Etsh. 2:24-32. 5Ndi akene le Kefasi;15:5 Luk. 24:34. lʼokongo diku le ambeki dikumi la ahendi.15:5 Mat. 28:16-17; Mak. 16:14; Luk. 24:36; Joa. 20:19. 6Lʼokongo diku, ndi akene le anyasu wuleki kama tshanu lʼetena kame. Etenyi kawo kuleki, weki la lumu edja ndu kakiane, keli amotshi wambuvo. 7Ku ndi akene le Jakoba; lʼokongo diku, le atumami tshe. 8La ndjihelu, ndi akene ndu le mi,15:8 Etsh. 9:3-6. uku le ona uhasa. 9Ne dia dimi lambuleka atumami tshe tshitshe, dimi hakuki ololo dia mbetama ati: Utumami, ne dia lakasuyaka ekelizia wa Unyashungu.15:9 Etsh. 8:3. 10Keli ne dia ngandji ka mamba ka Unyashungu, mbemi uku wemi one; ngandji ka mamba kandi kakandambisha, taki anyanya. Keli dimi lakaleki tshe ntsha ulimu efula, aha dime, keli ngandji ka mamba ka Unyashungu kaki la mi. 11Okone kana dimi, kana vo, shu tatusambishaka, ku nyu nyaketawo.

 

12Naka wambusambisha dikambu dia Kristu vati: Ndi akulwama uma lu nyoi, ukundi wata amotshi anyu nyati: Nduku eulwelu kʼuma lu nyoi keko? 13Utunduyala kema eulwelu kʼuma lu nyoi, tshiki Kristu kumbulwama. 14Utunduyala Kristu kumbulwama, tshiki esambishelu kasu keko anyanya, ndu mbetawo kanyu keko anyanya. 15Ee, shu tambutanema emenyi wa kashi wa Unyashungu, ne dia shu takati shati: Unyashungu akulula Kristu, kakindi kumbulula, naka wavo hawulwama. 16Naka wavo hawulwama, tshiki ndu Kristu kumbulwama. 17Naka Kristu kumbulwama, keti mbetawo kanyu keko anyanya; nyu nyeki lu kolo yanyu. 18Ntu, ndu wane wambuvo le Kristu, wambushisho. 19Naka shu tambulungamela Kristu lamʼekisu la lumu lone lutu, ku shu tambuleka antu tshe nsuyama.

20Keli kakiane Kristu ambulwama uma lu nyoi, ndi keli olonga a wane wakavu. 21Ne dia nyoi akayi uma le untu, ndu eulwelu kʼuma lu nyoi kakayi uma le untu. 22Ne dia antu tshe watuvokaka uma le Adama, wuhu ako mbayuyala antu tshe la lumu uma le Kristu. 23Keli untu lʼuntu lu dihuli diandi: Kristu olonga a ntundu; lʼokongo, wa wane weli wa Kristu lamʼayunduya. 24Lʼokongo diku, ekumelu kayuya lamʼayundukimo diulelu le Unyashungu Shesu, lamʼayundulanya diulelu tshe, luwandji tshe, diahamelu la wulu tshe. 25Ne dia dieli la ndi mbulela, edja ndu lamʼayundukamela atunyi andi tshe la tshina diʼekulu andi.15:25 Esam. 110:1. 26Utunyi a djihelu wayolembiama eli nyoi. 27Ne dia Unyashungu akalembia diango tshe la tshina diʼekulu andi?15:27 Esam. 8:6. Keli lamʼakandati ati: Diango tshe diambolembiama, shu mbeyaka shati: Ndi hati one lakayalembiya diango tshe. 28Lamʼayuyala diango tshe diolembiami le ndi, ndu Ona ndame ayolembiama le one lakayalembiya diango tshe, dia Unyashungu ayali la diku dia diango tshe, la lu diango tshe.

 

29Naka aha osoku, ukundi atutshaka wane watusambishaka antu wakavu? Naka antu wakavu hawulama, okoko wana wabatizamelawo? 30Dikambu diakona diesu lasʼeku la nyoi tena tshe? 31Anyasu, dimi lambushikisha diui dia ndjatumbula kami le nyu, keli le mi uma le Kristu Jesu Khumesu nti: Dimi latuvokaka nshi tshe! 32Naka dimi lakalo la nyama ta lʼEfeso uku eishelu kʼantu, na waho weli le mi na? Naka wavo hawulwama, tolekaki, tonokaki, ne dia shu tayuvo lui.15:32 Is. 22:13. 33Tanyukesamaki. Diendje dia kolo diatulanyaka ditshelu diʼololo. 34Nyosene lu akambu wʼololo, tanyutshaki akambu wa kolo, ne dia amotshi haweyi Unyashungu. Dimi lambuta osoku, ne dia nyutsha sonyi.

 

35Keli omotshi ayuta ati: Ukundi wulwama antu wakavu? Wuhu akona a dimba wayuwuya la dio? 36We nginyanginya! kene kunaye weme lu kete, hatumbi tshikima to kambuvo. 37La kene kunaye, we hune utundu wʼengo, keli we ayune paka wuhu utu, kana wa epunga, kana wuhu ukuia 38Keli Unyashungu atushaka wuhu uku utundu, uku alangandi: wuhu la wuhu utundu awo. 39Emunyi tshe kema pupu, kema wuhu otoi, keli omotshi weli wʼantu, ukina weli wa nyama, ukina wa fudu, ukina wa nsi. 40Etundu wa lʼulungu weko, ndu etundu wa la kete weko. Keli lutumbu la diango dia lʼulungu leko lomotshi, lutumbu la diango dia la kete leko lukina. 41Unya eko la lutumbu lawo; ngondo eko la lutumbu lukina lato. Toto teko la lutumbu lukina lato, ne dia yoto la yoto yambutshikitana lu lutumbu. 42Osoku mbeli eulwelu ka wane wakavu. To kambunema engo kʼehondelo, kambulwama engo kahahonde. 43To kambunema la dionyo; kambulwama la lutumbu. Kambunema la wodu; kambulwama la wulu. 44Kambunema dimba ku dimba; kambulwama dimba dia Nyuma. Naka dimba ku dimba dieko, keti ndu dimba dia Nyuma dieko. 45Uku ambufundama ati: Untu a ntundu, Adama, akayala kanga lumu.15:45 Etat. 2:7. Adama a ndjihelu akayala Nyuma ka mbishaka antu lumu. 46Keli one la dimba keli la ntundu, aha one la Nyuma, lʼokongo diku one la Nyuma. 47Untu a ntundu eko lu kete, untu a ditshu, untu la hendi eko uma, lʼulungu. 48Uku eli one la ta kete, mbeli wane wa la kete; uku eli one la lʼulungu, mbeli wane wa lʼulungu. 49Uku wesu lu efanelu ka one la la kete, wuhu ako mbayutuyala lu efanelu ka one la lʼulungu. 50Anyasu, dimi lambunyutela nti: Umunyi la dikila haweyi nkita diulelu dia Unyashungu; kuyanga engo kʼehondelo nkita engo kahahonde.

 

51Nyulungi, dimi lambunyutela dikambu diush mi! Shu tshe hatulala djo lu nyoi, keli shu tshe tayukadimo, 52esadi, uku kamula ka su, lamʼayuda pungi ka ndjihelu. Ne dia pungi ayuda, antu wakavu wayulwama lʼalimba wahahonde ku shu tayukadimo.15:52 1 Tes. 4:15-17. 53Ne dia dieli la kene kʼehondelo dia ndota kene kahahonde, dieli la kene ka nyoi dia ndm a kene kaha la nyoi. 54Keli lamʼayolota kene kʼehondelo kene kahahonde, lamʼayolota kene ka nyoi kene kaha la nyoi, ku diui diufundami diayushidiyama ati: Nyoi ambo lembiama lʼelekelu.15:54 Is. 25:8. 55Nyoi li, elekelu kaye eto na? Nyoi li, wanga aye ewo na?15:55 Hos. 13:14.

56Wanga a nyoi eko akambu wa kolo; la wulu wʼakambu wa kolo eko elembe. 57Keli tuki Unyashungu lusaka, one latutushaka elekelu uma le Khumesu Jesu Kristu.

58Okone, anyasu wa ngandji, nyutetemali, nyushikikali, nyutamanya ntsha ulimu wa Khumadiondjo nshi tshe, ne dia nyu mbeyaka nyati: Pa kanyu le Khumadiondjo kema anyanya.

1 KORETO 16

1Dia diango diakawakongwela ekilami,16:1 Rom. 15:25-26. nyutshi uku akamadjangela ekelizia wa la Ngalatiya. 2Lu lushi la ntundu la lubingu, untu lʼuntu lʼatei anyu umbi diango lakandi uku akundjandi, dia nyu nyutukuyokongola diango lamʼayumuya leko. 3Lamʼayumukuma, antu wayunyosonola, mbayumutuma la mikanda dia ntola eshasha anyu utsha la Jerusalema. 4Naka eko ololo dia ndu dimi ntsho, vo wayusamba la mi kame.

5Keli dimi layuya le nyu lamʼayumeta la Makedoniya,16:5 Etsh. 19:21. ne dia layeta la Makedoniya. 6Undu, dimi layudjase lakanyu etenyi undu, kana ngondo ya tshitshi tshe, ne dia nyu ntatshokaka la mi lu lokendo tshe layumutsho. 7Ne dia dimi halangi ntanyenyi wusu utu kakiane; ne dia lambulungamela mbidjase lakanyu nshi motshi, naka Khumadiondjo ayetawo. 8Keli dimi layutshikala lʼEfeso, edja ndu Pentekosta;16:8 Lew. 23:15-21; Euh. 16:9-11. 9ne dia suku dia wuki diambundjihwamela, dia dimi ntsha ulimu, la atunyi efula weko leko.16:9 Etsh. 19:8-10.

 

10Lamʼayuya Timote,16:10 1 Kor. 4:17. kanyuwendaki, atukuyala la woma lʼatei anyu, ne dia ndi atukambelaka Khumadiondjo ulimu uku dimi. 11Untu tawonyolaki. Keli kanyutumi lu lokendo landi la ki, dia ndi ndja le mi, ne dia lambulungamela la anyasu.

12Keli dia unyasu Apolo, dimi lakosengasenga efula dia ndi ndja la anyasu le nyu, keli ndi kunanga ndja kakiane. Ndi ukuya lamʼayundena dihuli dia ndja.

13Nyosene, nyushikikali lu mbetawo, nyutshaki uku apami, nyukikitali. 14Nyutshi akambu anyu tshe la ngandji.

15Anyasu, nyu mbeyaka nyati: Khumbu ka Stefana16:15 1 Kor. 1:16. mbaki antu wa ntundu wakakadimula etema lʼAkaya, ndu mbakayakimo dia ntshela ekilami ulimu. 16Dimi lambunyosengasenga nti: Nyuyali lʼokongo wʼantu a wuhu ako, la wʼuntu tshe latutukimanyiaka lʼulimu, la latenaka pa. 17Dimi lakangenangena lamʼakayi Stefana, la Forotunato, la Akayiko. Vo wambukuka lu dihu li dianyu lamʼahanyu lindu, 18ne dia vo wakakikitsha utema ami ndu etema anyu. Okone nyolemia antu a wuhu uku.

 

19Ekelizia wa lʼAsiya wambunyutumela moyo. Akula la Piriska,16:19 Etsh. 18:2. ndu ekelizia weli lu luudu lawo wambunyumtumela moyo efula le Khumadiondjo. 20Anyasu tshe wambunyutumela moyo. Nyushani moyo lʼononanelu wʼekila.

 

21Dimi. Paulu, kufundji moyo one la lunya lami dime. 22Untu lahuki Khumadiondjo ngandji, adjami mananu. Khumesu, yaka! 23Ngandji ka mamba ka Khumadiondjo Jesu Kristu kayali la nyu. 24Ngandji kami kayali la nyu tshe le Kristu Jesu! Ayali osoku!