LUKA

Chapitres

 1   2 -  2   4 -  3   6 -  4   7 -  5   9 -  6   11 -  7   13 -  8   15 -  9   18 -  10   21 -  11   23 -  12   25 -  13   27 -  14   29 -  15   31 -  16   32 -  17   33 -  18   35 -  19   36 -  20   38 -  21   40 -  22   41 -  23   44 -  24   46 -


LUKA 1

1Antu efula wambutatela nkondola okondo one wʼakambu wakatshama lʼatei asu, 2uku akatutela wane waki emenyi la ekambi wa diui uma lʼetatelu. 3Ndu dimi lakakani yimba nti: Ololo dimi nkufundela lʼonondji wʼololo, we Teofilo, ne dia dimi lakeyi akambu ane tshe ololo uma lʼetatelu, 4dia we mbeya mete ka aui wakawakulakanyaka.

 

5Lu nshi ya Herode, khumʼekanga ka Judiya, olombedi omotshi akiko, lukumbu landi Zekariya1:5 “Zekariya,” keli “Zakariyasi,” lu ngirika.. Ndi aki lʼonongo wa Abidja1:5 1 Ek. 24:10. Wadendi aki kanula ya ana amantu wa Arona, lukumbu landi Elisabete. 6Vo ahendi waki ololo lu ashu wa Unyashungu. Vo wakakendakendaka lu elembe la lu adjangu tshe wa Khumadiondjo aha la unungu. 7Vo tawaki la ona, ne dia Elisabete aki ekumba. Vo ahendi waki esumbi.

8Lamʼakandatshaka ulimu andi wʼolombedi la ntundu ka Unyashungu la lushi la lushi, 9uku aki ulimu wʼolombedi, diaki la ndi dia mboto lʼetemwelo ka Khumadiondjo la ntutshumba tsho. 10Ului tshe wʼantu wakalombaka lʼandja lu unya wakawatshumbaka tsho. 11Ondjelo wa Khumadiondjo akene le ndi, emadi lu lunya landi la pami lʼediakelu ka ntshumba tsho. 12Zekariya akakasana lamʼakandawenyi. Woma akawundi. 13Keli ondjelo akawutela ati: Zekariya, tukaki woma, dombelo diaye diambukema. Wadeye Elisabete ayuta la ye ona pami, kuwole wati: Joani. 14We ayuyala la ongenongeno, ndu la diese. Antu efula wayongenangena dia eutwelu kandi. 15Ndi ayuyala wuki lu ashu wa Khumadiondjo. Ndi hono wanu kana enono ka wulu.1:15 Wal. 6:3. Ndi ayuludiama la Nyuma kʼOlolo uma lʼutema a nyangu. 16Ndi ayukadimula asi Isariyele efula Le Khumadiondjo, Unyashungu awo. 17Ndi ayokendakenda la ntundu ka Unyashungu Lu nyuma ndu lu wulu wa Elidja, Dia nkadimula etema wa washi le anʼawo1:17 Mai. 4:5-6. La dia nkadimula akanga wa uhedia lu yimba yʼantu wʼololo, Ne dia ntanya Khumadiondjo antu wolongoswami.

18Zekariya akambula ondjelo ati: Ukundi ayumeya dikambu ne? ne dia dimi laya usumbi, wademi ambutshunda. 19Ondjelo akâkaluya diui ati: Dimi, Ngabiriyele,1:19 Dan. 8:16; 9:21. latemalaka la ntundu ka Unyashungu, lambutumama dia ndjukutela, ndu dia nkela lukumu lʼololo lone. 20Ulungi, we ayuyala lumi. We heya nteketa edja ndu lushi layuyala akambu ane, ne dia we hetawi aui ami ane wayushidiyama lʼetena kawo. 21Antu wakakungelaka Zekariya, wakambi ne dia ndi akabiya lu etemwelo. 22Lamʼakandatumbi, ndi kumbeya nteketa la wo. Vo wakeyi vati: Ndi akenyi enelo lu etemwelo. Ndi akateketa la wo lu anya; ndi akatshikala lumi. 23Lamʼakashili nshi yʼekambelu kandi, ndi akatshu utsha lakandi.

24Lʼokongo a nshi sho, wadendi Elisabete akatshu diemi. Ndi akayashe ngondo tshanu; akati ati: 25Khumadiondjo ambuntshela okone lu nshi yakandamenaka, ne dia minya sonyi kami lʼatei wʼantu.

 

26Lu ngondo ka samalu, Unyashungu akatumi ondjelo Ngabiriyele lʼusumba omotshi wa Ngalili, lukumbu lawo Nazareta, 27le umuntu lʼemuma, lakambela pami kemotshi ka lu khumbu ka Davidi, lukumbu landi Josefu. Lukumbu la umuntu ako laki Mariya. 1:27 Mat. 1:18. 28Ondjelo akayi le ndi, akawutela ati: Moyo! we umbukami a ngandji ka mamba, Khumadiondjo eko la ye. 29Keli ndi akakasana efula dia diui so. Ndi akakani yimba dia wuhu wa moyo oso. 30Ku ondjelo akawutela ati: Mariya, tutaki woma, ne dia we ambukama ngandji ka mamba uma le Unyashungu. 31Ulungi, we ayutsho diemi, ayuta ona pami, kuwole wati: Jesu.1:31 Mat. 1:21. 32Ndi ayuyala wuki, wayuweta vati: Onʼa Khumʼuiungu. Khumadiondjo Unyashungu ayuwusha kiti Ka diulelu ka Davidi tshendi. 33Ndi ayulela khumbu ka Jakoba pundju.1:33 2 Sam. 7:12, 13, 16; Is. 9:7.

34Mariya akambula ondjelo ati: Ukundi ayuyala dikambu so lamʼenaye wati: Dimi lateyana nduku la pami. 35Ondjelo akûkaluya diui ati: Nyuma kʼOlolo ayuya le ye. Wulu wa KhumʼUlungu wayukukhukhume la dedi diandi. Okone vo way ole ona layuyuta vati: LʼEkila, Onʼa Unyashungu.

36Ulungi, ndu umuntu luto la ye, Elisabete, ambutsho diemi lʼusumbi andi. One lakawetaka vati: Ekumba, ngondo kene keli ngondo kandi ka samalu, 37ne dia nduku dikambu diaheyi Unyashungu ntsha.1:37 Etat. 18:14. 38Mariya akati ati: Ulungi, ukambi a Khumadiondjo mbemi, diayali le mi uku diui diaye. Ku ondjelo akutshiki.

 

39Lu nshi sho, Mariya akunela, akatshu esadi lu leke lʼakuna, lʼusumba omotshi wa la Juda. 40Ndi akoto lu luudu la Zekariya, akemula Elisabete. 41Lamʼakuki Elisabete moyo wakawemula Mariya, ona akakadimo lʼutema andi. Ku Elisabete akaludiama la Nyuma kʼOlolo. 42Ndi akahangohango la diui dia wulu ati: We eko la otshoko lʼatei wʼamantu, ndu ona leli lʼutema aye, eko la otshoko! 43Uma lendi uyi dikambu ne dia nyangu Khumemi ndja le mi? 44Ne dia lamʼakamuki moyo aye, ona akakadimwi lʼutema la ongenongeno. 45Umuntu laketawo diui so eko la otshoko, ne dia akambu wakawawutela uma le Khumadiondjo wayushidiyama. 46Ku Mariya akati ati: Utemʼami ambutumbula Khumadiondjo, 47Lumu lami lambongenangena le Unyashungu, shimbedi ami. 48Ne dia ndi akenyi ekitakitelu kʼukambi andi a umuntu. Nyulungi, nonga tshe wayumbetaka vati: Leli la otshoko. 49Ne dia one leli la wulu ambuntshela akambu wa mamba. Lukumbu landi leko ekila. 50Ketshi kandi keko le nonga la nonga Ya wane watuwukaka woma. 51Ndi akenya antu wulu wa lunya landi. Ndi akadianganya akanga wʼetaku lu tukanyi tʼetema awo. 52Ndi akakitshakitsha akanga wulu uma lu kiti yawo ya waulelu, Akambiya antu kʼantu. 53Ndi akalutsha wane waki la ndjala diango diʼololo. Ndi akâkaluya akanga wʼengonyi anyanya. 54Ndi akakimanyia ukambi andi Isariyele, Ne dia euhwelu ka ketshi kandi, 55Uku akandatela watshesu, Le Abarahama1:55 Etat. 17:7. ndu le tukanula tandi pundju.1:55 1 Sam. 2:1-10. 56Mariya akadjase la Elisabete uku ngondo shatu, ku ndi akakalula utsha lakandi.

 

57Etena ka Elisabete mbuta kakakuki. Ku ndi akuti ona pami. 58Asukanyi andi la wa lu khumbu kandi wakuki vati: Khumadiondjo ambuhamia ketshi kandi le ndi, ku vo wakangenangena la ndi. 59Lamʼakakuki lushi lʼenane, vo wakayi dia ndjahemia ona uhekeli.1:59 Lew. 12:3. Vo wakayangi mbole lukumbu vati: Zekariya, uku lukumbu la shi. 60Nyangu akâkaluya diui ati: Kema; wawole vati: Joani. 61Vo wakawutela vati: Nduku untu lu khumbu kaye lakawole lukumbu loso. 62Ku vo wakenya shi tulimbitelu lʼanya dia mbeya lukumbu lakona lalangandi mbole. 63Ku ndi akalombe dibaya dia nfunda; akafundi ati: Lukumbu landi Joani. Ku vo tshe wakambi. 64Kemʼedja unyo andi wakadiho, lulimi landi lakakoko. Ndi akateketa, akandula Unyashungu. 65Woma akandi wane tshe waki lasuki la wo. Aui aso tshe wakadiangana lu leke tshe la akuna wa Judiya. 66Antu tshe wakawauki, wakalamaka lʼetema awo. Vo wakati vati: Ukundi ayuyala ona oso na? Lunya la Khumadiondjo laki la ndi.

 

67Zekariya, shi, akaludiama la Nyuma kʼOlolo. Ndi akati akambu wahatayi ati: 68Wanduli Khumadiondjo, Unyashungu wa Isariyele; Ne dia ndi akakendela antu, akatshela etshungwelu. 69Ndi akatutudjiya ushimbedi a wulu Lu khumbu kʼukambi andi Davidi, 70Uku akandati lʼenyo wa amvutshi andi wʼekila edjedja ati: 71Shu tayushimbamela uma le atunyi asu, Ndu uma lʼanya wa tshe watutuhetshaka. 72Ndi akuki watshesu ketshi, Akuho sheki yandi yʼekila. 73Etshibelu kakandatshibela Abarahama tshesu, 74Ati: Lamʼayunyushimbamela uma lʼanya wʼatunyi asu, Nyayontemolaka aha la woma. 75Ndu lu akambu wʼekila la lu akambu wʼololo La ntundu kandi nshi yasu tshe. 76Ee, ndu we ona, wayuketa vati: Umvutshi a KhumʼUlungu, Ne dia we ayutsho la ntundu ka Khumadiondjo Dia nongosola mbuka yandi.1:76 Mal. 3:1. 77Dia ndakanya wudja andi dikambu dia panda. Dia mbadimanyia kolo yawo. 78Ne dia ketshi ka mamba ka Unyashungu asu, Okone sasi dia pindju diayutokendela uma lʼulungu. 79Dia mpetela wane wudjashi lu udjima1:79 Is. 9:2. la lu dididji dia nyoi; Dia nombola ekulu asu lu mbuka ka ki.

80Ona akuli, akakikitala lʼutema. Ndi aki lʼesui wa tosenga, edja ndu lushi lakandene le Isariyele.

LUKA 2

(Mat. 1:18-25)

1Lu nshi sho, Kayisa Angusta akadjanga dia nfunda kumbu yʼantu tshe. 2Efundelu keso kaki efundelu ka ntundu lamʼaki Kuriniyo umbuledi a Suriya. 3Antu tshe wakatshu dia ntufundama, untu lakawo, untu lakawo. 4Ndu Josefu akatshu uma la Ngalili, uma lʼusumba wa Nazareta, utsha la Judiya, utsha lʼusumba wa Davidi, wetawo vati: Betelehema, 5ndi la Mariya lakandambela, laki la diemi. 6Lamʼakiwo leko, nshi yakakuki ya ndi mbuta. 7Okone ndi akuti ona pami lʼenundu, akudingi ahondo. Ndi akawetamia lʼelelu ka dungalunga, ne dia dihuli tadiakiko lu luudu la angendangenda.

 

8Lu leke loso kaki aiami wʼekoko, waki lʼusui walama ekoko awo lʼutshu. 9Ondjelo wa Khumadiondjo akemala lasuki la wo. Lutumbu la Khumadiondjo lakahetela, ku vo wakuki woma efula. 10Ondjelo akawatela ati: Tanyukaki woma. Nyulungi, lambunyela lukumu lʼololo lʼongenongeno a wuki wayuyila le antu tshe, 11ne dia wambunyutela Ushimbedi lu ngelu ka Davidi elo. Ndi eli Kristu Khumadiondjo. 12One eli djimbitelu ya nyu mbeva. Nyayena ona udingami ahondo, etami lʼelelu ka dungalunga. 13Shashimuya, ului a wuki wʼalimbi wa lʼulungu wakasangana la ondjelo ako wandula Unyashungu vati: 14Lutumbu layali le Unyashungu lʼulungu. Ki kayali la kete lʼatei wʼantu watongenyangenyaka.

15Lamʼakatshiki andjelo utsha lʼulungu, aiami wʼekoko wakatanela vati: Tutshu kakiane utsha la Betelehema, tutenyi dikambu ne diambuya, diambutewuya Khumadiondjo. 16Vo wakatshu esadi, wakatani Mariya la Josefu, la ona etami lu elelu ka dungalunga. 17Lamʼakawenyi dikambu diako, vo wakasanya diui diakawawatela lu dikambu diʼona. 18Wane tshe wakuki, wakambi dia akambu wakawatela aiami wʼekoko. 19Keli Mariya akalamaka aui aso tshe, akakanaka dikambu diawo lʼutema andi. 20Ku aiami wʼekoko wakakalula watatumbula, watandula Unyashungu, ne dia akambu tshe wakawuki la wakawenyi, uku akawawatela.

 

21Lamʼakakuki nshi enanei ya mbahemia uhekeli,2:21 Lew. 12:3. vo wakawole lukumbu vati: Jesu, lukumbu iakawole ondjelo2:21 Luk. 1:31. la ntundu ndi atoto lʼutema.

 

22Lamʼakakuki nshi yawo ya ndjaedia, uku elembe wa Mose, vo wakela Jesu la Jerusalema dia ndjukimo le Khumadiondjo 23(uku ufundami lu elembe a Khumadiondjo ati: Wayeta ona pami tshe, yatakundu lʼutema a nyangu, vati: Lʼekila le Khumadiondjo2:23 Etum. 13:2, 12.), 24la dia nambula ulambu uku akawati lu elembe wa Khumadiondjo, ati: Binga pendi kana ana ahendi wa tukudumba.2:24 Lew. 12:6-8. 25La Jerusalema kaki pami kemotshi, lukumbu landi Simeyona. Untu oso aki ololo, aki umbetawudi, akalungamelaka esambelu ka Isariyele. Nyuma kʼOlolo aki la ndi. 26Nyuma kʼOlolo akawenya ati: We huvo ntundu atenyi Kristu ka Khumadiondjo. 27Ndi akoto lʼetemwelo lu wulu wa Nyuma. Lamʼakayi ambutshi wa Jesu la ona uku etshelu kʼelembe, 28ndi akulungula lu anya, akandula Unyashungu. Ndi akati ati: 29Khumadiondjo, etawo ukambi aye atshu kakiane la ki, Uku diui diaye, 30Ne dia ashu ami wambena panda kaye 31Kakayalongosola lu ashu wa wedja tshe, 32Usasi wa mpetela asi wedja,2:32 Is. 42:6; 49:6; 52:10.Lu lutumbu la wudja aye Isariyele.

33Shi la nyangu wakambi dia akambu wakandati lu dikambu dia ona. 34Simeyona akatshokola, akatela Mariya, nyangu, ati: Ulungi, ona ambutumama ne dia ekwelo La etwelu kʼantu efula lu Isariyele; Ndu dikambu dia djimbitelu ya tamu. 35(Ee, ndu yombo ya ntundula utema aye), Ne dia tukanyi tʼuma lʼetema efula tashwami.

36Ndu umvutshi a umuntu Ana, onʼa Fanuele, a lu diuhu dia Ashere. Ndi aki usumbi a lukusumbi, akadjase la umendi deku esambeli lu nshi yandi yʼusekaseka; 37ndi aki wadi aki udu deku akumi enanei la nei. Ndi kumumoka lu etemwelo, akatemolaka Unyashungu la dikilelu dia mbu ya nde ndu la dombelo lʼutshu ndu la yanyi. 38Ana akayi lu unya ako, akuki Unyashungu lusaka, akati dikambu diandi le antu wakalungamelaka etshungwelu ka Jerusalema.

39Lamʼakawashidiya akambu tshe uku elembe wa Khumadiondjo, vo wakakalula la Ngalili, lu ngelu kawo Nazareta.2:39 Mat. 2:23. 40Ona akuli, akakikitala, akaluli la yimba. Ngandji ka mamba ka Unyashungu kaki la ndi.

 

 

 

41Ambutshi wa Jesu wakatshokat i eleku la eleku la Jerusalema lu dikambu dia lushi la wuki lʼElekanelu.2:41 Etum. 12:1-27; Euh. 16:1-8. 42Lamʼakindi la deku dikumi la pendi, vo wakatshu leko uku aki etshelu kawo ka lushi la wuki lako. 43Lamʼakawashidiya nshi, lamʼakawayakalulaka, Jesu dikenda akatshikala la Jerusalema. Ambutshi andi kumbeya vati: Ndi ambutshikala. 44Vo wakakani vati: Ndi eko lʼului wʼantu, wakatshu lokendo la lushi otoi. Ku vo wakuyangi lʼatei wʼantu wuto la wo, ndu wʼantu weyana la wo. 45Lamʼakiwo kumbena, vo wakakalula utsha la Jerusalema, watuyangi. 46Lʼokongo wa nshi shatu, vo wakutani lu etemwelo, udjashi lʼatei wʼembetsha, uka aui awo la awambula embula. 47Wane wakuki aui andi, wakambi dia yimba yandi la ekadimwelu kandi ka embula. 48Lamʼakawenyi ambutshi andi, vo wakakashimo. Nyangu akawumbula ati: Onʼami, ukundi ambuyututshela okone na? Enda, dimi la sho tambukuyanga la lunyangu! 49Ndi akawambula ati: Katanyanyangi pa? Nyu hanyeyi nyati: Dieli la mi dia ndjala lu luudu la Papa? 50Ku vo kumana diui diakandawatela fundu. 51Ku ndi akatshu la wo, akakumi la Nazareta; akakitanyiaka aui awo. Nyangu akalamaka aui aso tshe lʼutema.

52Jesu akahami lu yimba, lu diema ndu lu kenemo le Unyashungu ndu le antu.

LUKA 3

(Mat. 3:1-12; Mak. 1:1-8; Joa. 1:19-28)

1Lʼeleku ka dikumi lʼatanu ka diulelu dia Tiberiyo Kayisa, lamʼaki Potiyo Pilata umbuledi wa Judiya la Herode umbuledi wa Ngalili, la Filipo onangu umbuledi wa beke dia Ituriya la Tarakoniti, la lamʼaki Lusaniya umbuledi wa Abilene, 2lu nshi yaki Anasi la Kayifasi elombedi wa ladiku, diui dia Unyashungu diakayi le Joani, onʼa Zekariya, lʼusui. 3Ndi akayi lu beke tshe lasuki la Jorodana, atasambisha dikambu dia batiza kʼekadimwelu kʼetema, dia kolo yawo yadimanyemi, 4uku ufundami lu buku diʼaui wa umvutshi Isaya ati: Diui dia untu lahangohango lʼusui ati: Nyolongosole mbuka ka Khumadiondjo; Nyusimbuli esese andi. 5Ekidi tshe wayutediama; Akuna tshe la ekungu tshe wayukitshakitshama; Diango dia wengenge diayuyala esimboki; Ndu nbuka ya tufukutufuku yayukitanela; 6Ku antu tshe wayena panda ka Unyashungu.3:6 Is. 40:3-5.

7Ku Joani akatela elui wʼantu wakatshu dia ntubatizama le ndi ati: Nyu ana wʼakhuha,3:7 Mat. 12:34; 23:33. akanyuhula dia ndawo kele kayayi? 8Okone nyoto elua uku ekadimwelu kʼetema anyu; tanyutatelaki mvuta nyati: Shu la tshesu Abarahama.3:8 Joa. 8:33. Dimi lambunyutela nti: Unyashungu mbeyaka mbulwela Abarahama tukanula tandi uma lu ave ane. 9Kakiane kenge yambetama la tshina dia etamba. Ku utamba tshe wahato elua wʼololo, ayokotama, ayukadjema lu dja.3:9 Mat. 7:19.

10Antu wakawumbula vati: Ku ukundi ahumbasu ntsha? 11Ndi akâkaluya diui ati: One leli la akoti ahendi, akahani la one laha la koti. One leli la mbu ya nde, atshi pupu. 12Ndu elungudi wʼelambu wakayi dia ndjubatizama,3:12 Luk. 7:29. wakambula vati: Umbetsha, ahumbasu ntsha? 13Ndi akawatela ati: Tanyosaki ulambu ladiku dia yediko yakawanyutela. 14Ndu alimbi wakawumbula vati: Ndu shu, kahumbasu ntsha na? Ndi akawatela ati: Tanyosaki engo uma le untu la khudu. Tanyumamanyiaki untu. Nyongenengene la afutu anyu.

 

15Lamʼaki wudja la elungamelu, ndu lamʼakakanaka antu tshe lʼetema awo dikambu dia Joani vati: Kana ndi keli Kristu, 16Joani akûkaluya diui vo tshe ati: Mete, dimi lambunyubatiza la ashi, keli one layayi ambundeka wulu. Dimi kema ololo wukukimi nkelekula okodi a sabata yandi. Ndi ayunyubatiza la Nyuma kʼOlolo la dja. 17Ledi leko lu lunya landi. Ndi ayedia efufwelu kandi, ayusanganya epunga lu dipenge. Keli ndi ayutshumba puhudi lu dja yahadimala.

 

18Ndu alaku akina efula mbakasambishaka Joani antu lukumu lʼololo. 19Keli khumʼekanga Herode, lakandahangwela ne dia Herodiyasi, wadi onangu, la dia akambu wa kolo tshe wakatshaka Herode, 20akahe ndu dikambu ne ladiku dia akambu andi tshe, akadji Joani lu lukanu.3:20 Mat. 14:3-4; Mak. 6:17-18.

 

(Mat. 3:13-17; Mak. 1:9-11)

21Lamʼakabatizama antu tshe, kakabatizama ndu Jesu. Lamʼakandalombaka, ulungu akadiho. 22Ku Nyuma kʼOlolo akuhulwela lʼutundu uku fudu ka inga. Diui diakayi uma lʼulungu ati: Onʼami la ngandji keye! We ambongenyangenya.3:22 Etat. 22:2; Esam. 2:7; Is. 42:1; Mat. 3:17; Mak. 1:11; Luk. 9:35.

 

(Mat. 1:1-17)

23Lamʼakatatela Jesu ndame nsambisha, ndi aki la deku akumi asatu, ndi aki onʼa (uku akukanaka antu) Josefu, onʼa Heli, 24onʼa Matata, onʼa Lewi, onʼa Meleki, onʼa Janai, onʼa Josefu, 25onʼa Matatiya, onʼa Amose, onʼa Nahuma, onʼa Eseli, onʼa Nangai. 26Onʼa Mata, onʼa Matatia, onʼa Semeyina, onʼa Joseka, onʼa Joda, 27onʼa Joanana, onʼa Resa, onʼa Zerubabele, onʼa Sheyalatiyele, onʼa Neri, 28onʼa Meleki, onʼa Adi, onʼa Kosama, onʼa Elemadama, onʼa Ere, 29onʼa Jesu, onʼa Eliyezere, onʼa Jorima, onʼa Matata, onʼa Lewi, 30onʼa Simeyona, onʼa Judasi, onʼa Josefu, onʼa Jonama, onʼa Eliyakima, 31onʼa Melea, onʼa Mena, onʼa Matata, onʼa Natana, onʼa Davidi, 32onʼa Jese, onʼa Obede, onʼa Boaza, onʼa Saia, onʼa Nashona, 33onʼa Aminadaba, onʼa Adimina, onʼa Arani, onʼa Hezerona, onʼa Pereze, onʼa Juda, 34onʼa Jakoba, onʼa Isaka, onʼa Abarahama, onʼa Tera, onʼa Nahora, 35onʼa Serunge, onʼa Reu, onʼa Pelenge, onʼa Ebere, onʼa Shela, 36onʼa Kayinana, onʼa Arapakeshade, onʼa Sheme, onʼa Noa, onʼa Lameka, 37onʼa Metusela, onʼa Enoke, onʼa Jareda, onʼa Mahalalele, onʼa Kayinana, 38onʼa Enoshe, onʼa Sete, onʼa Adama, onʼa Unyashungu.

LUKA 4

(Mat. 4:1-11; Mak. 1:12-13)

1Jesu akakalula uma la Jorodana, uludiami la Nyuma kʼOlolo. Ndi akalombwama le Nyuma lʼusui 2nshi akumi anei. Ndi akahimbama le uhimbanyi. Ndi konde nduku engo lu nshi sho. Lamʼakashili nshi sho, ndi akuki ndjala. 3Ku uhimbanyi akawutela ati: Naka Onʼa Unyashungu keye, uteli dive ne, diahilo ekenga ka ma. 4Jesu akûkaluya diui ati: Ambufundama ati: Until huyala la lumu ne dia ma tu.4:4 Euh. 8:3. 5Ku ndi akambela la ndi, akawenya waulelu tshe wa la kete lu wenya otoi. 6Uhimbanyi akawutela ati: Dimi layukusha wulu one tshe, ndu lutumbu la waulelu aku; ne dia wakambisha wulu, okone untu tshe lalangami mbusha, layuwushawo. 7Okone naka we ayontemola, vo tshe wayuyala waye. 8Jesu akûkaluya diui ati: Ambufundama ati: Otemole Khumadiondjo, Unyashungu aye, ukambeli ndame ulimu.4:8 Euh. 6:13. 9Ku ndi akatshu la ndi la Jerusalema; akatuweme lu ote wʼetemwelo, akawutela ati Naka Onʼa Unyashungu keye, ulimbo uma lindu. 10Ne dia ambufundama ati: Ndi ayokosengwela andjelo andi, dia nkulama.4:10 Esam. 91:11. 11Ku Vo wayukemba lʼanya awo, Ne dia we utukuhumanya dikaka lu dive.4:11 Esam. 91:12.

12Jesu akûkaluya diui ati: Wakati vati: Tuhimbaki Khumadiondjo,4:12 Euh. 6:16. Unyashungu aye. 13Lamʼakashidiya uhimbanyi ehimba eso tshe, ndi akatukutshika, edja ndu lamʼayundutana etena ka mbuhimba ntu.

 

(Mat. 4:12-17; Mak. 1:14-15)

14Jesu akakalula la Ngalili la wulu a Nyuma. Lukumu landi lakadiangana lu leke loso tshe. 15Ndi aketshaka lu temwelo diawo, akatumbwama le antu tshe.

 

(Mat. 13:53-58; Mak. 6:1-6)

16Jesu akayi la Nazareta, lene akanduli. Ndi akoto lʼetemwelo lushi lʼekila, uku aki etshelu kandi. Ndi akemala dia mbala mukanda a Unyashungu. 17Wakawusha buku dia umvutshi Isaya, ku ndi akombola wombo wʼafundelu wʼekila, akenyi dihuli diakawafundi ati: 18Nyuma ka Khumadiondjo kambumbahema, Ne dia ndi akankidia dia dimi nsambisha akanga a weula lukumu lʼololo. Ndi akantumi dia ntutela wane

wambundama dikambu dia etshungwelu, Ndu akanga a tutshungu dia esenelo, La dia ntshungula wane wambusuyama,

19La dia mvutela antu dia eleku kaketawo Khumadiondjo.4:19 Is. 61:1-2. 20Ndi akombe buku, akadikaluya le ulami, ku ndi akadjase. Antu tshe waki lʼetemwelo, wakawendi tee. 21Ku ndi akatatela mbatela ati: Afundelu kene kambushidiyama lʼatei anyu elo. 22Antu tshe waki emenyi wa dikambu diako, wakambi dia aui wa ngandji ka mamba, wakatumbi uma lu unyo andi. Vo wakambwana vati: Ndi kema onʼa Josefu uka? 23Ndi akawatela ati: Mete, nyayukanula nyati: We wetshi, uyakonoya! Utshi akambu wakatuki we atsha la Kaperenauma ndu lindu lakanyu. 24Ndi akawatela ati: Mete kanyutelami nti: Nduku umvutshi wambetawoma lu wudja awo.4:24 Joa. 4:44. 25Mete kanyutelami nti: Lamʼakadihama ulungu deku satu la ngondo shamalu, lamʼakayala ndjala ka kasha lu kete tshe4:25 1 Khum. 17:1. lu nshi ya Elidja, wadi waki edu waki efula lu Isariyele. 26Keli Elidja kuntumama le akina, paka la Zarefata, lu kete ya Sidona, le umuntu laki wadi aki udu.4:26 1 Khum. 17:8-16. 27Ndu lu nshi ya umvutshi Elisha, akanga a sudi efula waki lu Isariyele, keli akina konkono, paka Namana, usi Suriya,4:27 2 Khum. 5:1-14. utu. 28Lamʼakawuki aui aso, antu tshe waki lu etemwelo wakandunganela la kele. 29Vo wakunela, wakusukula uma lʼusumba, wakayi la ndi lʼote a dikuna diakawaki usumba, dia mbuka lu luwinga etshulitshuli. 30Keli Jesu aketi lʼatei awo, akatshu.

 

(Mak. 1:21-28)

31Jesu akayi la Kaperenauma, usumba omotshi wa la Ngalili, akawaetsha lushi lʼekila. 32Antu wakakashimo dia wetshelu andi, dia diui diandi diaki la wulu.4:32 Mat. 7:28-29. 33Lu etemwelo kaki untu omotshi, laki la odienge. Ndi akahangohango la diui dia wulu ati: 34Yee! we Jesu yʼusi Nazareta, dikambu diakona diasasu la ye? We ambuya dia ndjutudiaka? Dimi keyaka, lʼEkila la Unyashungu keye. 35Jesu akuhanewela ati: Uyali ki! Utumbi uma le ndi! Lamʼakawumbi odienge lʼatei awo, vo wakatumbi uma le ndi, kumbutshela kolo. 36Vo tshe wakambi, wakambwana vati: Na diui ne na? ne dia ndi atosengolaka edienge lu luwandji ndu lu wulu, ku vo watutumbaka. 37Ku lukumu landi lakadianga lu ahuli tshe wa lu leke loso.

 

(Mat. 8:14-15; Mak. 1:29-31)

38Jesu akunela uma lʼetemwelo, akoto lu luudu la Simona. Ukilu a Simona a umuntu aki la dimba dja dia wulu; wakasengasenga Jesu dia dikambu diandi. 39Jesu akemala, awenda, akahangwela dimba dja, ku dio diakukimo. Kemʼedja ndi akunela, akakambela ulimu.

40Lamʼakayangi unya mbidja, wane tshe waki la akanga a hemo wehu efula, wakayi la wo le Jesu. Ndi akawahe anya, akakonoya. 41Edienge wakatumbi uma le antu, wakahangohango vati: Onʼa Unyashungu keye! Ndi akahangwela, kumbetawo dia vo nteketa, ne dia vo wakeyi vati: Kristu kendi.

 

(Mak. 1:35-39)

42Lamʼakahuto unya, ndi akatumbi, akatshu lu dihuli dia shenga. Elui wʼantu wakuyeli, wakayi le ndi, wakayangi mbeme vati: Tututshikaki. 43Keli ndi akawatela ati: Dieli la mi dia nsambisha lukumu lʼololo la diulelu dia Unyashungu ndu lu esumba ekina, ne dia dimi lakatumama dia dikambu diako. 44Ku Jesu akasambisha lu temwelo dia Ngalili.

LUKA 5

(Mat. 4:18-22; Mak. 1:16-20)

1Lamʼakemala Jesu lʼokenge wʼuduwa a Ngenezareta, ului wʼantu wakudingi, wakuki diui dia Unyashungu. 2Ndi akenyi watu ehendi lʼokenge wʼuduwa. Keli amundji wa nsi wakatumbi loko, waki lu nsula tei yawo. 3Ndi akoto lu watu omotshi waki Simona. Ndi akolombe dia ndi nsemiya watu uma lʼokenge. Ku ndi akadjase, aketsha antu uma lu watu.5:3 Mat. 13:1-2; Mak. 3:9-10; 4:1. 4Lamʼakandakumiya nteketa, ndi akatela Simona ati: Mosemiya watu utsha lu dingunda, nyukitshakitsha tei yanyu, keli nyokoke nsi. 5Simona akûkaluya diui ati: Uwandji, shu takatshi ulimu utshu tshe, hatundji nduku engo.5:5 Joa. 21:3. Keli layukitshakitsha tei ne dia diui diaye. 6Lamʼakawatshi osoku, vo wakandi nsi efula,5:6 Joa. 21:6. ku tei yakate. 7Ku vo waketi anyawo amundji, waki lu watu ukina, la papi diʼanya vati: Nyuyi, nyuyutukimanyia. Vo wakayi, wakaludia watu ako ehendi, ku watu wakayangi ndjita. 8Keli lamʼakenyi Simona Petero dikambu so, ndi akayakosha lʼekulu wa Jesu. Ndi akati ati: Khumadiondjo, umo uma le mi, ne dia untu a kolo kemi. 9Ndi akambi, ndi la antu tshe waki kame la ndi, ne dia efula ka nsi yakawandi. 10Ndu Jakoba la Joani, ana wa Zebede, waku waki amundji wa nsi kame la Simona, wakambi. Ku Jesu akatela Simona ati: Tukaki woma. Uma ka kakiane, we ayundaka antu. 11Lamʼakawayi la watu awo lʼumamu, vo wakatshiki tshe, wakuyeli.

 

(Mat. 8:1-4; Mak. 1:40-45)

12Lamʼaki Jesu lʼusumba omotshi, enda, untu aki leko laki la sudi dimba tshe. Lamʼakandenyi Jesu, ndi akayakosha ekhukhumadi; akosengasenga ati: Khumadiondjo, naka we alanga, we mbeyaka nkonoyami. 13Ku ndi akasimtula lunya, akawunanda; akati ati: Dimi nangaka, okono. Kemʼedja sudi kakashili. 14Jesu akokokomiya ati: Tutelaki untu dikambu ne. Keli utshu, utuyaenya le olombedi. Utukimo diango diakati Mose ne dia ekonwelo kaye5:14 Lew. 14:1-32. uku djimbitelu le wo. 15Keli lukumu landi lakaleki nyangana. Elui a waki wʼantu wakamote dia ndjuka aui andi, la dia ndjokono lu hemo yawo. 16Keli ndi akatshokaka ndame lʼesui wa tosenga, akatolombaka Unyashungu.

 

(Mat. 9:1-8; Mak. 2:1-12)

17Lushi lomotshi, lamʼaketshaka Jesu antu, Afarise, la embetsha wʼelembe wa-kadjashi lasuki. Vo wakayi uma lu ngelu tshe ya Ngalili ndu ya Judiya ndu uma la Jerusalema. Wulu wa Khumadiondjo waki la ndi wa nkonoya antu. 18Enda, apami wakayi la kanga ekhusi etami lu tangi. Vo wakayangi mbotshiya lu luudu, la mbetamia la ntundu ka Jesu. 19Lamʼakiwo kumena hyuli ya mboto, ne dia ului wʼantu, vo wakambela lu sambi ka luudu, wakafufula luudu, wakubuluya la tangi kandi lʼatei awo la ntundu ka Jesu. 20Lamʼakandenyi mbetawo kawo, ndi akati ati: Pami, kolo yaye yambudimanyema. 21Afundji la Afarise wakatatela mumbwana vati: Akona one atenga Unyashungu na? Akona eli la wulu wa nyimanyia kolo, naka aha Unyashungu ndame? 22Keli Jesu akeyi tukanyi tawo, akawambula ati: Ukundi akananyu lʼetema anyu na? 23Dikambu diakona diuleki kolo, mvuta ati: Kolo yaye yambudimanyema, kana eto, okendekende? 24Keli dia nyu mbeya nyati: Onʼa untu eko la wulu la kete wa nyimanyia kolo — ndi akati ati: — Dimi lambukutela nti: Eto, osa tangi kaye, utshu lakaye. 25Kemʼedja, ndi aketo la ntundu kawo, akose tangi akandetami, akatshu lakandi atatumbula Unyashungu. 26Vo tshe wakambi, wakatumbula Unyashungu; wakuki woma efula. Vo wakati vati: Elo, shu tambena akambu wahatatenaka.

 

(Mat. 9:9-13; Mak. 2:13-17)

27Lamʼaketi akambu aso. Jesu akamo leko. Ndi akenyi ulungudi wʼelambu, lukumbu landi Lewi, udjashi lu dihuli diʼelungwelu. Jesu akawutela ati: Undjeli. 28Ku ndi akatshiki tshe, akunela, akuyeli.

 

29Lewi akakatela Jesu dambu dia wuki lakandi. Ului a wuki wʼelungudi wʼelambu wakadjashi la wo wale ma. 30Afarise la afundji wakangunangunela ambeki andi; wakawumbula vati: Ukundi alenyu la anonyu la elungudi wʼelambu la antu wa kolo na?5:30 Luk. 15:1-2. 31Jesu akâkaluya diui ati: Akanga a wulu hawuhumbi wetshi, paka akanga a hemo. 32Dimi kundja dia ndjeta antu wʼololo, lakayi dia ndjeta antu wa kolo, dia vo nkadimula etema.

 

(Mat. 9:14-17; Mak. 2:18-22)

33Vo wakatela Jesu vati: Ambeki wa Joani watukilaka mbu ya nde ekila efula, watolombaka Unyashungu; ndu ambeki wʼAfarise watutshaka osoku, keli ambeki aye watolekaka, watonokaka. 34Jesu akawambula ati: Nyu mbeyaka nkidia engenyi wʼutshuki a wadi mbu ya nde lamʼeki utshuki a wadi kame la wo? 35Keli nshi yayuyala, lamʼayuwakosola utshuki a wadi, la nshi sho mbayuwukilaka mbu ya nde. 36Ku ndi akawauki wela ntu ati: Nduku untu atataka etshi ka dihondo diʼuyuyu la nkimamanya lu dihondo diʼedjedja. Naka ndi ayutsha osoku, keti ndi mbata dihondo diʼuyuyu; ndu etshi ka dihondo diʼuyuyu hasungana lu dihondo diʼedjedja. 37Nduku untu ayangula ashi wʼelua wʼeyuyu lu atapa wa dikuhu diʼedjedja. Lamʼayundutsha osoku, ashi wʼelua wʼeyuyu wayata dikuhu, wayutshulo, ndu dikuhu diayulana. 38Keli ololo mangula ashi wʼelua wʼeyuyu lu atapa wa dikuhu diʼeyuyu. 39Nduku untu lakanwe ashi wʼelua wʼedjedja, layulanga wʼeyuyu; ne dia ndi ayuta ati: Wʼedjedja weko ololo.

LUKA 6

(Mat. 12:1-8; Mak. 2:23-28)

1Lushi lomotshi lʼekila, Jesu akatetaka lu dikambo diʼasami. Ambeki andi wakani nanula, wakayishishi lʼanya, wakali.6:1 Euh. 23:25. 2Keli Afarise amotshi wakati vati: Ukundi atshanyu dikambu dieli ekila lushi lʼekila? 3Jesu akâkaluya diui ati: Nyu nyatali dikambu diakatshi Davidi, lamʼakindi la ndjala, ndi la wane waki la ndi? 4Ndi akoto lu luudu la Unyashungu, akose ma dia Eyalelu, akali, akadish ndu wane waki la ndi. Dio diaki ekila dia untu kʼuntu nde, paka elombedi etu mbakadilekaka.6:4 Lew. 24:9. 6:4 1 Sam. 21:1-6. 5Ku ndi akawatela ati: Onʼa untu eko uwandji a lushi lʼekila.

 

(Mat. 12:9-14; Mak. 3:1-6)

6Lushi lukina lʼekila, Jesu akoto lu etemwelo, akawaetsha. Untu omotshi, kanga lunya la pami lakumi, aki leko. 7Afundji la Afarise wakotokiya vati: Kana ndi ayokonoya antu lushi lʼekila, ne dia vo mbosongwela. 8Keli ndi akeyi tukanyi tawo. Ndi akatela kanga lunya lakumi ati: Eto, emala kʼatei. Ku ndi aketo, akemala. 9Jesu akawatela ati: Dimi lambunyumbula nti: Eko ekila dia ntsha ololo lushi lʼekila? Mamela lumu lʼuntu, kana ludiaka? 10Ku ndi akewewa, awaenda vo tshe, akawutela ati: Usimbuli lunya. Ndi akalusimbula, ku lunya landi lakakono. 11Keli vo wakadanganela la kele, wakatanela uku ayuwutshela Jesu.

 

(Mat. 10:1-4; Mak. 3:13-19)

12Lu nshi sho, Jesu akatshu lu dikuna dia ntolomba. Ndi akakolamela nomba Unyashungu utshu tshe. 13Lamʼakahutounya, ndi aketi ambeki andi. Ndi akasonola uma lʼatei awo dikumi la ahendi, akawaole ati: Atumami. 14Simona, lakandole ntu ati: Petero, la Andere, onangu; Jakoba la Joani; Filipo la Baratolomayo; 15Mateu la Tomasi; Jakoba, onʼa Alafayo, la Simona, lakawetaka vati: Zelote; 16Judasi, onʼa Jakoba, la Judasi Isakariyote, lakayala ufungi. 17Ku ndi akahulo la wo, akemala lu dihuli dia bamubamu, ndi la ului a wuki wʼambeki andi, ndu antu efula uma la Judiya tshe la uma la Jerusalema, la uma lu leke la Tura la Sidona lʼumamu wʼashi a waki, wakayi dia ndjuka aui andi la dia ndjokono uma lu hemo yawo. 18Wane tshe wakasuwi la edienge, wakakono. 19Antu tshe wakayangi mbunanda, ne dia wulu wakatumbi uma le ndi, ku ndi akakonoya vo tshe.

 

(Mat. 5:1-12)

20Ku Jesu akedia ashu le ambeki andi, akati ati:

Nyu akanga a weula nyeli la otshoko, ne dia diulelu dia Unyashungu dieko dianyu.

21Nyu wane weli la ndjala kakiane, nyeko la otshoko, ne dia nyu nyayulutshama.

Nyu wane walela kakiane, nyeko la otshoko, ne dia nyu nyayola.

22Lamʼayunyuhetsha antu, lamʼayuwunyunya uma lʼului awo, lamʼayuwunyuhangwela, ndu lamʼayuwutundja kumbu yanyu vati: Kolo, lu dikambu dia Onʼa untu, nyeko la otshoko.6:22 1 Pet. 4:14. 23Nyongenengene lushi lako, nyulimbolimbo la ongenongeno, ne dia difutu dianyu dieko wuki lʼulungu. Watshewo wakatshela amvutshi wuhu ako.6:23 2 Ek. 36:16; Etsh. 7:52.

24Keli fono kayayi le nyu, nyu engonyi! ne dia nyu nyambulungulaka esambelu kanyu.

25Fono kayayi le nyu, nyu wane wambuluta kakiane, ne dia nyu nyayuka ndjala.

Fono kayayi le nyu, nyu wane wola kakiane, ne dia nyu nyayuyala okei, nyayulela.

26Fono kayayi le nyu, lamʼayunyandula antu tshe; ne dia watshewo wakandula amvutshi wa kashi wuhu ako.

 

(Mat. 5:38-48; 7:12a)

27Keli dimi lambunyutela, nyu wane wuka, nti: Nyulangi atunyi anyu, nyutsheli wane wanyuhetsha ololo. 28Nyotshokole wane watunyudjaka mananu; nyolombeli wane watunyotengaka. 29Naka untu ayukokomola lu tama dimotshi, kuwingisweli ndu dikina. Naka untu ayukokosola koti, tosekaki mbusha ndu ukutu aye. 30Usha untu tshe lakolomba. Lamʼakokosola untu diango diaye, tudilombaki ntu. 31Nyutsheli antu uku alanganyu vo nyutshela.6:31 Mat. 7:12.

32Naka nyu nyatukaka wane watunyukaka ngandji ngandji, nyu la lusaka lakona? Ndu antu wa kolo watutshaka wuhu ako. 33Naka nyu nyatutshelaka wane watunyutshelaka ololo ololo, nyu la lusaka lakona? Ndu antu wa kolo watutshaka wuhu ako. 34Naka nyu nyatosondjaka wane watunyulungamelaka nyati: Tayulungula, nyu la lusaka lakona? Ndu antu wa kolo watosondjaka antu wa kolo diango, ne dia ndjulungula uku akawakimo. 35Nyuki atunyi anyu ngandji, nyatsheli ololo, nyasondja diango, aha la elungamelu ka vo nyukaluya, okone difutu dianyu diayuyala efula, ndu nyayuyala ana wa KhumʼUlungu; ne dia ndi eko la memakana le wane wahuki lusaka ndu le antu wa kolo. 36Nyuyali la ketshi uku eli Shenyu la ketshi. 37Tanyalaki akambu wʼantu, watukalaka akambu anvu; tanyamiaki antu, watukunyamia. Nyudimanyiya antu kolo, ku wayunyudimanyia. 38Nyusha antu, ku wayunyusha. Wayunyusha yediko yʼololo, yokokomadi, yushikishami, yatshulotshulo lu tulu yanyu; ne dia wayunyedikela la yediko yakanyawaedikela.

 

39Ku Jesu akawaukela wela ati: Kanga tshungu mbeyaka nombola kanga tshungu uka? Vo ahendi hawoko lu difuku?6:39 Mat. 15:14. 40Umbeki haleki umbetsha andi.6:40 Mat. 10:24-25; Joa. 13:16; 15:20. Keli untu tshe layumana mbeka, ayuyala uku umbetsha andi. 41Ukundi wendaye fumvufumvu yeli lu su dia unyaye, keli hakani dia wima utamba weli lu su diaye? 42Ukundi weyaye mvutela unyaye wati: Unyami, ela nkutundja fumvufumvu yeli lu su diaye, keli weme hendi wima wʼutamba weli lu su diaye? We kanga lukesu, utanyisha wima utamba lu su diaye, ku kuyenyi ololo dia ntundja fumvufumvu yeli lu su dia unyaye.

43Nduku utamba wʼololo atotokaka elua a kolo; ndu nduku utamba a kolo atotokaka elua wʼololo. 44Utamba tshe wambeyama uma lʼelua awo.6:44 Mat. 12:33. Nduku untu latumbaka elua wa fingu uma lu atende, kuyanga nkohola sandji diʼelua wʼekodi lu dikumbu diʼatende. 45Untu ololo atutundjaka kene keli ololo uma lu eumbelu kʼololo kʼuma lʼutema andi. Untu a kolo atutundjaka kene keli kolo uma lu eumbelu kandi ka kolo; ne dia unyo andi atoteketaka akambu wa lʼutema.6:45 Mat. 12:34.

 

(Mat. 7:24-27)

46Ukundi atunyumbetaka nyati: Khumadiondjo, Khumadiondjo, keli hanyutshi akambu watumutaka? 47Untu tshe latuyakaka le mi, latukaka aui ami, latuwatshaka, layunyenya one leli uku ndi. 48Ndi eko uku untu lakahiki luudu, lakatshimi etali, lakalonge tshina dia luudu ladiku dia dive. Lamʼakayi elula, ashi wakakomama lu luudu lako, kumbeya lunyinginya, ne dia lo lakahikama ololo. 49Keli untu latukaka, ku hatshi, eko uku untu lakahiki luudu ladiku dia kete, aha ntshima. Ashi wakakomama lu luudu lako, kemʼedja, lo lakanyuko. Ehandjwelu ka luudu lako kaki wuki.

LUKA 7

(Mat. 8:5-13)

1Lamʼakashili Jesu mvuta aui andi tshe, ndi akakumi la Kaperenauma. 2Ukambi omotshi olombodi wʼalimbi, lakalemiama le ndi, aki la hemo lasuki la mvo. 3Lamʼakanduki lukumu la Jesu, ndi akutumela dikumanyi diʼasi Juda dia ntolomba, dia ndi ndjushimbela ukambi andi. 4Lamʼakawayi le Jesu, vo wakosengasenga wulu; wakati vati: Ololo andi nkukaka dia we mbutshela dikambu so, 5ne dia ndi nangaka wudja asu. Ndame kakatuhikela etemwelo kasu. 6Ku Jesu akatshu la wo. Lamʼakandayala suki la luudu, olombodi wʼalimbi akatumi engenyi andi le ndi; akawutela ati: Khumadiondjo, tuyasuyaki, ne dia dimi kema ololo wukukiye mboto lu luudu lami. 7Ntu, dimi lakakani nti: Dimi kema ololo wukukimi ntsho le ye, keli uti diui, ku ukambi ami ayokono. 8Ne dia dimi leko lʼokongo wʼakina, leko la alimbi lʼokongo ami; naka layutela omotshi nti: Utshu, ndi ayutsho; la ukina nti: Uyi, ndi ayuya; ndu ukambi ami nti: Utshi okone, ndi ayutsha. 9Lamʼakuki Jesu aui aso, ndi akambi dikambu diandi, akasikiso, akatela ului wʼantu wakayuyelaka ati: Dimi lambunyutela nti: Dimi latenyi mbetawo ka wuki wuhu one kuyanga lu Isariyele. 10Ku waku wakatumama, wakakalula lu luudu, wakatani ukambi ako ambokono.

 

11Kemʼedja ndi akatshu lʼusumba wetawo vati: Nayina. Ambeki andi la ului a wuki wʼantu wakatshu la ndi. 12Lamʼakandakumi lasuki la suku diʼusumba, enda, wakayatumbaka la untu ambuvo, aki ona etoi lʼutema a nyangu. Nyangu aki wadi aki udu. Antu efula wa lʼusumba wakayi le ndi. 13Lamʼakawenyi Khumadiondjo, ndi akawuki ketshi; akawutela ati: Tulelaki. 14Ku Jesu akayi lasuki, akananda kaka yaki udu. Ku wane wakatawembaka wakemala. Jesu akati ati: Olongo, dimi lambukutela nti: Eto. 15Lakavu akasunguka, akatatela nteketa. Ku Jesu akukimwela nyangu. 16Woma akawandi vo tshe. Vo wakatumbula Unyashungu, wata vati: Umvutshi a wuki ambuya lʼatei asu. Ntu vati: Unyashungu ambokendela wudja andi. 17Lukumu landi loso lakadiangana la Judiya tshe, ndu lu beke dia lʼemamu.

 

(Mat. 11:2-19)

18Ambeki wa Joani wakatela Joani akambu aso tshe. 19Ku Joani aketi ambeki andi ahendi. Ndi akatumi le Jesu dia ntuwumbula vati: We keli ndʼako layayi, kana tukungeli ukina? 20Lamʼakayi apami aso le ndi, vo wakawutela vati: Joani Ubatizanyi kututumi dia ndjukumbula ati: We keli ndʼako layayi, kana tukungeli ukina? 21Lu unya oso, Jesu akakonoya antu efula uma lu hemo yawo la elandu a wulu la edienge. Ndi akasenya efula waki tutshungu. 22Ndi akâkaluya diui ati: Nyututeli Joani akambu wenanyu la wukanyu: akanga a tutshungu wambosena, akanga a tshumbi wambokendakenda, akanga a sudi wambokono, akanga a puki wambuka,7:22 Is. 35:5-6. wavo wambulwama, asi wula wambusambishama lukumu lʼololo.7:22 Is. 61:1. 23Untu tshe lahatani utakanya lu dikambu diami, eko la otshoko.

 

24Lamʼakakalula akendji wa Joani, Jesu akatatela mvutela elui wʼantu ati: Akanyatshu dia ntenda lʼusui na? Sopo diasutshasutshama la lohele li? 25Akanyatshu dia ntenda na? Untu lolotshi ahondo wa yovuyovu? Enda, wane walota ahondo wa lukumu, la emenyi wʼolo, vo weko lu kumbu ya khumi ya dikanga. 26Akanyatshu dia ntenda na? Umvutshi? Ee, lambunyutela nti: One kuleki umvutshi. 27Ndʼako kakawafundi vati: Enda, lambutuma dikendji la ntunduka elundji kaye, Ndi ayolongosola mbuka kaye la ntundu kaye.7:27 Mai. 3:1.

28Lambunyutela nti: Lʼatei a wane wakutama le amantu, nduku omotshi luleki Joani. Keli luleli tshitshe lu diulelu dia Unyashungu, kuleki. 29Lamʼakuki antu tshe akambu aso, ndu elungudi wʼelambu, wakayindja Unyashungu, lamʼakawabatizama la batiza ka Joani. 30Keli Afarise la embeyi wʼelembe wakaseke daku dia Unyashungu, lamʼakiwo kumbatizama le ndi.7:30 Mat. 21:32; Luk. 3:12.

31La na ayumufanya antu wa lu lolonga lone? vo weli uku na? 32Vo weli uku akenda wudjashi lu kituka, wetana, wata vati: Shu takanyudedi pungi, ku nyu hanyonwe wenye.

Shu takadi tukuku, ku nyu hanyuledi.

33Ne dia Joani Ubatizanyi akayi, kondekaka, konokaka ashi wʼelua, ku nyu nyakati nyati: Kanga odienge kendi. 34Onʼa untu akayi, ndi ndekaka la nokaka, ku nyu nyambuta nyati: Kanga dishi la onoshi a wanu, ongenyi wʼelungudi wʼelambu la antu wa kolo. 35Yimba yambuyindjama le anʼayo tshe.

 

36Ufarise omotshi akalangi di Jesu ntole la ndi ma. Ndi akoto lu luudu la Ufarise, akadjase la mesa. 37Enda, lʼusumba kaki umuntu omotshi. Lamʼakandeyi ati: Jesu ambudjase la mesa lu luudu la Ufarise, ndi akayi la malashi lu olondo wa wema. 38Ndi akemala lʼokongo alela lʼekulu andi, akatatela ndoya ekulu wa Jesu la asoi andi. Ndi akekitula la divu diandi. Ndi akaki wumbu lʼekulu andi, akakiti malashi lʼekulu.7:38 Mat. 26:7; Mak. 14:3; Joa. 12:3. 39Lamʼakenyi Ufarise wakaweti dikambu diako, ndi akayatela ati: Utunduyala untu one eko umvutshi, tshiki ndi uteya umuntu one luwunandji wuhu wendi, ati: Untu a kolo kendi. 40Jesu akati ati: Simona, dimi la diui dia nkutela. Ku ndi akati ati Umbetsha, uta. 41Osondjanyi omotshi aki la akanga wʼabasa andi ahendi: omotshi aki la dibasa dia denariyo kama tshanu la ukina akumi atanu. 42Lamʼakiwo kundjala la engo ka mbufuta, ndi akadimanyia abasa vo ahendi. Okone lʼatei awo, akona ayuleka mbuka ngandji? 43Simona akûkaluya diui ati: Dimi lambukana nti: One lakandadimanyia dibasa diuleki. Ndi akawutela ati: We ambusambula ololo. 44Ku ndi akasikiso le umuntu; akatela Simona ati: We menaka umuntu one? Dimi lakotwe lu luudu laye, we hambisha ashi wa mbotsha ekulu ami. Keli ndi amboloya ekulu ami la asoi andi, ambekitula la divu dianni. 45We hakanyi la mi wumbu. Keli umaka lamʼakamotwe edja ndu kakiane, ndi hakimo mbikami wumbu lʼekulu ami. 46We hankitshi iso lʼote ami. Keli ndi ambunkita malashi lʼekulu ami. 47Okone dimi lambukutela nti: Kolo yandi yeli efula, yambudimanyema, ne dia ndi akukaka ngandji efula. Keli one layuwudimanyia tshitshe, ndi ayuka ngandji tshitshe. 48Ku ndi akatela umuntu ati: Kolo yaye yambudimanyema. 49Waku wakadjashi la ndi wale ma, wakatatela ndjambula untu lʼuntu lʼutema ati: Akona one adimanyia kolo na? 50Ku ndi akatela umuntu ati: Mbetawo kaye kambukushimbela; utshu la ki.

LUKA 8

1Lʼokongo diku, Jesu akatakindulaka lʼesumba ndu lu ngelu, atasambisha lukumu lʼololo la diulelu dia Unyashungu, ndu ambeki dikumi la ahendi waki la ndi. 2Ndu amantu amotshi wakakono uma lʼedienge la uma lu hemo yawo: Mariya, lakawetaka vati: Wʼusi Mangadala, laki la edienge esambeli, wakatumbi uma le ndi; 3ndu Joana, wadi a Kuza, ulama diango dia Herode; ndu Suzana, la akina efula, wakalimanyiaka la diango diawo.8:3 Mat. 27:55-56; Mak. 15:40-41; Luk. 23:49.

 

(Mat. 13:1-9; Mak. 4:1-9)

4Lamʼakamote ului a wuki, antu wakayi le Jesu uma lʼusumba la usumba. Ku Jesu akuki wela ati: 5Lmbuki a wuhu akatshu dia ntuka wuhu andi. Lamʼakandatukaka, emotshi wakako lʼumamu a mbuka. Antu wakawekamela lʼekulu, fudu ya lʼulungu yakekomola. 6Wehu ekina wakako ladiku dia dive; lamʼakawatumbi, wakalengela, ne dia tawaki la ashi. 7Wehu ekina wakako lʼatei wʼatende. Atende wakuli la wo, waketshidia. 8Wehu ekina wakako lu kete yʼololo, wakuli, wakadji tongo lukama lukama. Lamʼakandati akambu aso, ndi akahangohango ati: Leli la atui a mbuka, uki.

 

(Mat. 13:10-17; Mak. 4:10-12)

9Ambeki wa Jesu wakawumbula vati: Na kitshimudi ka wela one? 10Ndi akawatela ati: Wakanyusha dia mbeya akambu wushami lu diulelu dia Unyashungu, keli akina la wela etu. Okone lamʼayuwenda, ku hawenyi. Lamʼayuwuka, ku hawumani fundu.8:10 Is. 6:9-10. 11Kitshimudi ya wela one eli okone: Wuhu eli diui dia Unyashungu. 12Wuhu wa lʼumamu a mbuka, eli wane watukaka diui, ku uhimbanyi atuyakaka, atakosolaka diui uma lʼetema awo, dia vo tawetawoki, tawushimbamelaki. 13Wuhu wa lu dive, eli wane watulungulaka diui la ongenongeno lamʼadiukawo. Keli vo kema la ediu, watetawoka etenyi, ku lu lushi lʼehimba, watetolaka. 14Wuhu wakako lʼatei wʼatende, eli antu watukaka diui, ku lamʼatshowo lu mbuka yawo, watutshidiamaka la ndjakanela, la ukundji, la ongenongeno wa lumu lone, hawuluwanya nduku ulua. 15Wuhu wa lu kete yʼololo, eli wane weli la etema wa mete ndu wʼololo. Lamʼukawo diui, vo watudikimelaka wulu, watotoka elua la memakana.

 

(Mak. 4:21-25)

16Nduku untu latohetshaka tala, ku ndi dikukhume lukinga, kana dikitsha lʼukilingu a tangi. Keli ndi atudikitshaka ladiku diʼekitshelu tala,8:16 Mat. 5:15; Luk. 11:33. dia wane woto wenyi usasi. 17Ne dia nduku kene kambushama, kahashwama; nduku kene keli lu usheshe, kaheyama ndu kahenama.8:17 Mat. 10:26; Luk. 12:2. 18Okone nyewo uku ukanyu, ne dia one leli la, wayuwusha dikina. Keli laha la, wayokosola ndu kene kakanandi ati: Dimi la to.8:18 Mat. 25:29; Luk. 19:26.

 

(Mat. 12:46-50; Mak. 3:31-35)

19Nyangu Jesu la anangu wakayi le Jesu. Keli vo kumoeya nkuma le ndi, ne dia ului wʼantu. 20Vo wakawutela vati: Nyo la ananyo wambemala lʼandja, vo nangaka nkena. 21Keli ndi akûkaluya diui ati: Wane watuhukamaka diui die Unyashungu, watuditshaka, mbeli nyomi la analingu.

 

(Mat. 8:23-27; Mak. 4:35-41)

22Lushi lomotshi, Jesu akoto lu watu ndi la ambeki andi. Ku ndi akawatela ati: Tuteho la wedi wʼuduwa, ku vo wakatshu. 23Lamʼakawatatshokaka, ndi akalali djo. Ngimbi ka wulu kakayi lʼuduwa; watu wakayangi ndula la ashi. Vo waki lasʼeku la nyoi. 24Vo wakayi le ndi, wakawemula, wakati vati: Uwandji, Uwandji, tambuvo. Ndi akemo, akahangwela ngimbi la asukhu, vo wakalembohala, ku akayala yoo. 25Ku ndi akawambula ati: Mbetawo kanyu, lendʼeto na? Vo wakuki wema, wakambi; wakambwana vati: Akona une latela ndu ngimbi ndu ashi, ku vo ukitanyia diui diandi?

 

 

 

 

(Mat. 8:28-34; Mak. 5:1-20)

26Vo wakakumi lu kete ya asi Ngadara yelanedi la Ngalili. 27Lamʼakateho Jesu la wedi, untu omotshi uma lʼusumba akahumana la ndi; ndi aki la edienge lʼutema, aki edja, kondota dihondo. Ndi kumbidjaseka lu luudu, paka lu waumbu. 28Lamʼakandenyi Jesu, ndi akahangohango, akukhusamela. Ndi akawelela wulu ati: We, Onʼa Unyashungu KhumʼUlungu, kasami la ye na? Dimi lambukosengasenga nti: Tunsuyaki. 29Ndi akatela odienge ati: Utumbi uma le untu one. (Ne dia vo wakawundaka tena efula. Ndi aki la alami, wakukelekaka la molola la kata. Lamʼakandahimbutaka diango so tshe, odienge akusukuyaka lʼesui wa tosenga). 30Jesu akawumbula ati: Lukumbu laye na? Ndi akati ati: “Ului a wuki;” ne dia edienge efula wakoto lʼutema andi. 31Ku wakosengasenga vati: Tututelaki dia shu ntsho lu ohongo waha la ekumelu. 32Limba la wuki la sumbu laki leko, lakalekaka lu dikuna. Vo wakasengasenga vati: Etawo dia shu ndjoto. Ndi aketawo. 33Ku edienge wakatumbi uma le untu oso, wakoto sumbu. Limba lako lakakhunguso lʼuhulula, lakatambela lʼuduwa, lakavu.

34Lamʼakenyi wane wakayileshaka dikambu so, vo wakalawo, wakatudisanya lu esumba ndu lu tusamba. 35Vo wakatshu dia ntenda dikambu diakatumbi. Vo wakayi le Jesu, wakatani untu lakatumbi edienge, udjashi la ntundu ka Jesu, olotshi ahondo, aya la yimba, ku vo wakuki woma. 36Emenyi wa dikambu so wakawatela uku akakono kanga odienge. 37Antu tshe wa lu kete ya Ngadara wakosengasenga dia ndi mbamwela, ne dia woma a wuki akawandi. Ku ndi akoto lu watu, akakalula. 38Keli untu lakatumbi edienge, akasengasenga Jesu dia ntshikala la ndi. Keli ndi akutumi, akawutela ati: 39Ukaluli lakaye, utataka akambu wa mamba wukutshedi Unyashungu. Ku ndi akatshu, akatudianganya akambu a mamba wakutshela Jesu lʼusumba awo.

 

(Mat. 9:18-26; Mak. 5:21-43)

40Lamʼakakalula Jesu, ului wʼantu wakusangela, ne dia vo tshe wakukungela. 41Enda, untu omotshi akayi, lukumbu landi Jayiro. Ndi aki umbuledi wʼetemwelo. Ndi akakhusama lʼekulu wa Jesu; akosengasenga ati: Uyoto lu luudu lami. 42Ne dia ndi aki la ona umuntu otoi, laki la deku dikumi la pendi, lakayangi mvo.

 

Keli lamʼakandatatshokaka, elui wʼantu wakukukela. 43Umuntu laki la ekelelo ka dikila deku dikumi la pendi, akashili diango diandi le wetshi, keli nduku omotshi lakeyi mbokonoya. 44Ndi akayi lʼokongo wa Jesu, akananda uhimbu wa dihondo diandi. Kemʼedja, dikila diakahimbo ntumba. 45Jesu akambula ati: Umunandji na? Lamʼakanguna antu tshe, Petero la wane waki la ndi wakati vati: Uwandji, elui wʼantu wukudingi, mbukusakanyisha! 46Keli Jesu akati ati: Untu omotshi akamunandji, ne dia dimi lambuka nti: Wulu wakatumbi uma le mi. 47Lamʼakenyi umuntu ati: Wambumbishula, ndi akayi, ayadidima, akakhusama la ntundu kandi. Ndi akati lu ashu wʼantu tshe okone akandawunandji, ndu okone akandakonwe esadi. 48Ku ndi akawutela ati: Onʼami, mbetawo kaye kambukokonoya; utshu la ki.

 

49Lamʼakataka Jesu osoku, untu omotshi akayi uma laka umbuledi wʼetemwelo, akati ati: Onʼaye a umuntu ambuvo; tusuyaki Umbetsha ntu. 50Keli lamʼakuki Jesu diui so, ndi akatela umbuledi wʼetemwelo ati: Tukaki woma, etawo paka mbetawo, ku ndi ayokono. 51Lamʼakandoto lu luudu, ndi kumbetawo dia untu mboto la ndi, tshikima Petero, Joani, Jakoba, la shi la nyangu ona umuntu. 52Tshe wakalelaka, wakulelaka. Keli ndi akati ati: Tanyulelaki. Ndi havwi, lu djo kendi. 53Ku vo wakawole sali, wakeyi vati: Ndi akavwi. 54Keli ndi akukimela lu lunya; akawutela diui dia wulu ati: Ona umuntu, eto! 55Ku lumu landi lakakalula; kemʼedja, ndi aketo. Ku Jesu akasengola dia mbusha mbu ya nde. 56Ku ambutshi andi wakambi, keli ndi akakokomiya ati: Tanyutelaki untu dikambu diutshimi.

LUKA 9

(Mat. 10:5-15; Mak. 6:7-13)

1Jesu aketi ambeki dikumi la ahendi, akawasha wulu wa mbahamela edienge tshe la dia nkonoya hemo. 2Ndi akatumi dia ntusambisha dikambu dia diulelu dia Unyashungu, ndu dia ntokonoya akanga a hemo. 3Ndi akawatela ati: Tanyukimelaki engo ka ntsho lu lokendo lanyu, Tanyukimelaki danga kuyanga diutu, kuyanga mbu ya nde, kuyanga falanga. Tanyuyalaki la ekutu ehendi. 4Lu luudu tshe layunyoto, kanyuhangi loko edja ndu lamʼayunyunela. 5Wane wahanyulungula, lamʼayunyunela uma lʼusumba ako, kanyuhumeli ditshu uma lʼekulu anyu uku omenyi le wo.9:5 Etsh. 13:51. 9:5 Luk. 10:4-11. 6Ku vo wakunela, watakindula lu ngelu la ngelu, watasambisha lukumu lʼololo, la watakonoya antu lʼahuli tshe.

 

(Mat. 14:1-12; Mak. 6:14-29)

7Khumʼekanga Herode akuki akambu tshe wakatshama. Ku ndi akakanana efula, ne dia amotshi wakati vati: Joani kambulo uma lu nyoi; 8akina vati: Elidja kambene; akina vati:9:8 Mat. 16:14, Mak. 8:28; Luk. 9:19. Umvutshi omotshi wʼedjedja kambulo. 9Herode akati ati: Joani, dimi lakuhimbula ote, keli akona ukanga akambu aso wukami Ku ndi akayangi mbena.

 

(Mat. 14:13-21; Mak. 6:30-44; Joa. 6:1-14)

10Lamʼakakalula atumami, vo wakatela Jesu akambu wakawatshi. Ku ndi akawaose, akatshu la wo vame lʼusumba, wetawo vati: Betesayida. 11Keli lamʼakeyi elui wʼantu dikambu diako, vo wakuyeli. Ndi akalungula, akawatela dikambu dia diulelu dia Unyashungu; akakonoya wane wakahumbi nkono. 12Unya akayangi mbidja, ambeki dikumi la ahendi wakayi; wakawutela vati: Udianganya antu, vo watshu lu wangelu la lu tusamba, dia ntuhanga la dia ntukundja mbu ya nde, ne dia shu teko lane lu dihuli dia dieta. 13Keli ndi akawatela ati: Nyuwasha mbu ya nde. Vo wakati vati: Shu la dikenga dia ma tanu la nsi hyendi tshu — tshikima shu ntsho la ntusumbela antu ane tshe ma. 14Vo waki apami nunu tanu. Ndi akatela ambeki andi ati: Nyuwadjasha lu elui, uku akumi atanu akumi atanu. 15Vo wakatshi osoku, wakawadjasha vo tshe. 16Ku ndi akose dikenga diako tanu la nsi hyendi, akalela lʼulungu, akaditshokola, akadiatula. Ndi akasha ambeki dia vo nkitsha la ntundu kʼantu. 17Vo tshe wakali, wakaluti. Ambeki wakatongona betshi diakatshikala, asaka dikumi la ahendi.

 

(Mat. 16:13-19; Mak. 8:27-29)

18Lamʼakandalombaka lu dieta, ambeki waki la ndi. Ndi akawambula ati: Akona ata antu, emi? 19Vo wakûkaluya diui vati: Joani Ubatizanyi; akina mvutaka vati: Elidja; akina vati: Umvutshi omotshi wʼedjedja kambulo.9:19 Mat. 14:1-2; Mak. 6:14-15; Luk. 9:7-8. 20Ndi akawambula ati: Keli nyu atanyu na, emi? Petero akûkaluya diui ati: Kristu ka Unyashungu keye.9:20 Joa. 6:68-69. 21Keli ndi akakokomiya, akawatela ati: Tanyutelaki untu dikambu so. 22Ndi akati ntu ati: Dieli la Onʼa untu dia nsuwa esuwa efula ndu ntunama le dikumanyi la le elombedi a waki ndu le afundji. Dieli la ndi dia ndjakema, la dia mbulwama lushi la satu.

23Naka untu nangaka ndjelami, ndi ayaseke, embe utamba andi a mpeketanya la lushi la lushi, andjeli.9:23 Mat. 10:38; Luk. 14:27. 24Ne dia untu tshe lalanga mamela lumu landi, ayulushisha. Keli untu tshe lashisha lumu landi dikambu diami, ndi ayulamela.9:24 Mat. 10:39; Luk. 17:33; Joa. 12:25. 25Waho wa untu lendʼewo, naka ndi ayukundja kete tshe la ndjashisha kana ndjalanya? 26Untu tshe layumbuka sonyi ndu layuka aui ami sonyi, Onʼa untu ayuwuka sonyi lamʼayunduya lu lutumbu landi ndame ndu lu lutumbu la Shi ndu la andjelo wʼekila 27Keli dinu lambunyutela mete nti: Amotshi anyu wambemala lane, hawuvo edja ndu lamʼayuwena diulelu dia Unyashungu.

 

(Mat. 17:1-8; Mak. 9:2-8)

28Uku nshi enanei uma lamʼakati Jesu aui aso, ndi akose Petero la Joani ndu Jakoba, akambela lʼukungu dia ntolomba. 29Lamʼakandalombaka, elundji kandi akakadimo, dihondo diandi diakayala wema pesopeso la ngaingai. 30Ulungi, apami ahendi, wakasawulaka la ndi. Vo waki Mose la Elidja. 31Vo wakene lu lutumbu, wakateketa dikambu dia nyoi kakandayangi mvo la Jerusalema. 32Petero la wane waki la ndi, wakanyingonyingoka la djo. Keli lamʼakawasene, vo wakenyi lutumbu landi ndu apami ahendi wakemadi la ndi. 33Lamʼakayangi apami ako mangana uma la le ndi, Petero akatela Jesu ati; Uwandji, ndeka ololo shu ntshikala lindu. Tuhiki tumbu satu: kemotshi kaye, kemotshi ka Mose, kemotshi ka Elidja. Ndi kumbeya kene kakandati. 34Lamʼakandati aui aso, dingi diakayi, diakahutamela. Lamʼakawoto lu dingi, vo wakuki woma. 35Ku diui diakayi uma lu dingi ati: Onʼami one, osonami ami9:35 Is. 42:1; Mat. 3:17; 12:18; Mak. 1:11; Luk. 3:22. nyuwukeli!9:35 2 Pet. 1:17-18. 36Lamʼakashili diui, Jesu akatanema ndame. Vo wakatshikala ki, kumvutela nduku untu dikambu dimotshi lu nshi sho lʼatei wʼakambu wakawenyi.

 

(Mat. 17:14-21; Mak. 9:14-29)

37La wedi a pindju, lamʼakawahulo uma lʼukungu, ului a wuki wʼantu wakahumana la ndi. 38Ku pami kemotshi uma lʼului wʼantu akawelela ati: Umbetsha, dimi lambukosengasenga nti: Uyendi onʼami a pami. Ndi eko onʼami etoi. 39Ulungi, odienge atuwundaka, ndi atawanaka shashimuya Odienge atuhuhanyaka edja ndu lolodu lambutumba. Vo hawututumbaka uma le ndi esadi, watokomolaka wulu. 40Dimi lakasengasenga ambeki aye dia vo mbutundja, keli vo kumbeya mbutundja. 41Jesu akâkaluya diui ati: Yee! lolonga laha la mbetawo la akanga a wendjudi, edja ndu kaandi ayumutshikala la nyu ndu ayumuyala la memakana le nyu? Uhuya la onʼaye lindu. 42Kamʼakandayayakaka, odienge akawumbi, akuhuhanya wulu. Keli Jesu akahangwela odienge. Ndi akakonoya dikenda dia pami, akûkaluya le shi. 43Vo tshe wakambi dia wulu wa Unyashungu.

 

(Mat. 17:22-23; Mak. 9:30-32)

Keli lamʼakambaka antu tshe dia akambu tshe wakandatshi, ndi akatela ambeki andi ati: 44Aui ane woto lʼatui nyu, ne dia Onʼa untu ayukimwama lʼanya wʼantu. 45Keli vo kumana diui so fundu. Dio diakashama le wo; okone vo kudieya. Vo wakuki woma dia mbumbula dia diui diako.

 

(Mat. 18:1-5; Mak. 9:33-37)

46Vo wakatatela mumbwana dia untu akona luleki wuki lʼatei awo.9:46 Luk. 22:24. 47Keli lamʼakenyi Jesu tukanyi ta lʼetema awo, ndi akose kiendakenda, akaweme la le ndi; 48akawatela ati: Untu tshe lalungula kiendakenda nye lu lukumbu lami, ndi ambunungula. Untu tshe lanungula, ambulungula one lakantumi,9:48 Mat. 10:40; Luk. 10:16; Joa. 13:20. ne dia one luleki tshitshe lʼatei anyu, ndi keli wuki.

 

(Mak. 9:38-40)

49Joani akahula diui, akati ati: Uwandji, shu takenyi untu atundja edienge lu lukumbu laye; ku shu takusike, ne dia ndi kema undjedi kame la su. 50Keli Jesu akâkaluya diui ati: Tanyusikeki. Untu lahanyutuni, eko lu leke lanyu.

 

51Lamʼakasukana nshi ya ndi mbosama lʼulungu, ndi akakolamela mbediya elundji kandi utsha la Jerusalema. 52Ndi akatumi akendji la ntundu kandi. Vo wakatshu, wakakumi lu ngelu kʼasi Samariya la ntolongoswela akambu. 53Vo kumbulungula, ne dia elundji kandi kakatelelaka utsha la Jerusalema. 54Lamʼakenyi ambeki andi Jakoba la Joani dikambu so, vo wakawumbula vati: Khumadiondjo, we nangaka shu mvuta diui, dia dja mpulo uma lʼulungu la muatshumba?9:54 2 Khum. 1:9-16. 55Keli ndi akakadimo, akahan, wela. 56Ku vo wakatshu lu ngelu kekina.

 

(Mat. 8:19-22)

57Lamʼakawatatshokaka lu mbuka, untu omotshi akatela Jesu ati: Dmu layukuyela lu ahuli tshe, lenʼatayatshu. 58Jesu akawutela ati: Mbulu yeko la afuku, fudu ya lʼulungu yeko a kefu, keli Onʼa untu kema la lama mbetamia ote andi! 59Ku ndi akatela untu ukina ati: Undjeli. Keli ndi akati ati: Khumadiondjo, etawo dia dimi ntatshwi la ntukhunde papa. 60Keli ndi akawutela ati: Utshiki edu, wakhundeki anyawo edu. Keli we, utshu, utadianganyaka dikambu dia diulelu dia Unyashungu. 61Ndu ukina akati ati: Khumadiondjo, layukuyela, keli etawo dia dimi ntalakanyi la wane weli lakami.9:61 1 Khum. 19:20. 62Keli Jesu akawutela ati: Naka untu ayudja lunya lu lungu la nkutula ngombe, naka ndi ayewo, ku ndi hakuka mboto lu diulelu dia Unyashungu.

 

 

LUKA 10

1Lamʼaketi akambu aso, Khumadiondjo akasonola akina akumi esambeli, akatumi ahendi ahendi la ntundu kandi lu esumba tshe ndu lu ahuli tshe wakandalangi ntsho. 2Ndi akawatela ati: Dinela dieko efula, ken ekambi mbeli tshitshe; okone nyolombe uwandji a dinela, dia nyutumela ekambi lu dinela diandi.10:2 Mat. 9:37-38. 3Nyutshu, enda, lambunyutuma uku ana wʼekoko lʼatei a ndjaundu.10:3 Mat. 10:16. 4Tanyukimelaki tapa kuyanga diutu, kuyanga sabata. Tanyemulaki untu lu mbuka 5Lu luudu tshe layunyoto, kanyuti ntundu nyati: Ki kayali lu luudu lone! 6Naka onʼa ki eko loko, ki kanyu kayusambela le ndi. Naka kema, ki kanyu kayukalula le nyu. 7Kanyutshikali lu luudu lako. Kanyolekaki, kanyonokaki kene kayuwunyushaka, ne dia ukambi kukuki dia nkundja difutu diandi.10:7 1 Kor. 9:14; 1 Tim. 5:18. Tanyetetaki lu luudu la luudu. 8Lʼusumba tshe wayunyukuma, lamʼayuwunyulungula, kanyuli diango diayuwukitsha la ntundu kanyu. 9Kanyokonoya akanga a hemo weli loko; kanyuwateli nyati: Diulelu dia Unyashungu diaya suki la nyu. 10Keli lʼusumba tshe wayunyoto, naka akanga a ngelu hawunyulungula, kanyutshu lʼesese ato, kanyuti nyati: 11Ndu ditshu dia lʼusumba anyu, diakakakatedi lʼekulu asu, tambunyukitweladio.10:11 Etsh. 13:51. Keli nyulimbiteli nyati: Diulelu dia Unyashungu diambusukana.10:11 Mat. 10:7-14; Mak. 6:8-11; Luk. 9:3-5. 12Dimi lambunyutela nti: Lushi loso, fono ka usumba oso ayuleka ka Sodoma.10:12 Etat. 19:24-28; Mat. 11:24. 10:12 Mat. 10:15.

13We Korazina, fono kayayi le ye! We Betesayida, fono kayayi le ye! Utunduyala akambu wa wulu wakatshama lʼatei aye, mbakatshama la Tura la Sidona10:13 Is. 23:1-18; Ezek. 26:1—28:26; Joe. 3:4-8; Am. 1:9-10; Zek. 9:2-4. tshiki vo wambukadimulaka etema edjedja, wudjashi lu akutu la lʼetuku! 14Keli lʼelumbwelu, fono kanyu kayuleka ka Tura la Sidona. 15Ndu we, Kaperenauma, wayukumbiya lʼulungu uka? Wayukuhuluya utsha lʼUdimu a Pengandu.10:15 Is. 14:13-15.

16One lanyukela, ambumbukela;10:16 Mat. 10:40; Mak. 9:37; Luk. 9:48; Joa. 13:20. one lanyutuna, ambuntuna; one lantuna, ambutuna one lakantumi.

 

17Akumi esambeli ako wakakalula lʼongenongeno. Vo wakati vati: Khumadiondjo, ndu edienge wambutolembela lu lukumbu laye. 18Ku ndi akawatela ati: Dimi lakenyi Satana ako uma lʼulungu uku dingadimu. 19Nyulungi, dimi lambunyusha wulu wa mbikamela elui la kutu,10:19 Esam. 91:13. ndu ladiku dia wulu tshe wʼutunyi. Nduku engo kayunyutshela kolo. 20Keli tanyongenangenaki ne dia edienge wambunyukela, nyongenengene ne dia kumbu yanyu yambufundama lʼulungu.

 

(Mat. 11:25-27; 13:16-17)

21Lu unya oso, Jesu akangenangena le Nyuma kʼOlolo. Ndi akati ati: Papa, Uwandji wʼulungu la kete, lambukandula, ne dia we akashe akambu ane le akanga a tumba la ewu, ku ambuwashula le tokendakenda. Ee, Papa, ne dia wuhu uku mbaki lulangu laye la ngandji ka mamba! 22Papa ambukimwela diango tshe.10:22 Joa. 3:35. Nduku untu leya Ona, tshikima Papa. Ndu nduku untu leya Papa, tshikima Ona,10:22 Joa. 10:15. ku Ona ayuwenya untu tshe lalangandi.

23Ku ndi akasikiso le ambeki, akawatela lu sheki ati: Ashu wena akambu wenanyu, weko la otshoko, 24ne dia amvutshi efula la khami ya dikanga wakalangi mena akambu wenanyu, ku vo kumbaena; wakalangi mbuka akambu wukanyu, ku kumbauka.

 

25Ulungi, umbeyi wʼelembe omotshi akemala, akahimbi Jesu ati: Umbetsha, ayumutsha na dia nkita lumu la pundju? 26Jesu akawumbula ati: Kufundami lʼelembe na? Ukundi atuyalaka na? 27Ndi akûkaluya diui ati: Ulangi Khumadiondjo, Unyashungu aye, lʼutema aye tshe, ndu la lumu laye tshe, ndu la wulu aye tshe, ndu la yimba yaye tshe;10:27 Euh. 6:5. la ulangi unyaye, uku ayalangaye.10:27 Lew. 19:18. 28Ndi akawutela ati: Kawo kataye. Utshaki osoku, ku we ayuyala la lumu.10:28 Lew. 18:5. 10:28 Mat. 22:35-40; Mak. 12:28-34.

29Keli ndi akalangi ndjayindja; akambula Jesu ati: Akona eli unyami ako? 30Jesu akûkaluya diui ati: Untu omotshi akatatshokaka uma la Jerusalema utsha la Jeriko. Ndi akoto lu anya wʼapotodi. Vo wakukula ahondo, wakokomola, wakatshu, wakutshiki afunda lasʼeku la nyoi. 31Olombedi omotshi akatatshokaka lu mbuka keso, lamʼakandawenyi, ndi aketi lʼokenge ukina. 32Ndu usi Lewi pupu, lamʼakandakumi lu dihuli so, lamʼakandawenyi, ndi aketi lʼokenge ukina. 33Keli usi Samariya omotshi, lakatatshokaka lu lokendo, akakumi lu dihuli diakindi. Lamʼakandawenyi, ndi akangasana la ketshi. 34Ndi akasukana la le ndi, akawombe puta, akatela iso la wanu loko. Ku ndi akawahe lu nyama kandi, akayi la ndi lu pangu kʼangendangenda. 35La wedi a pindju, ndi akatundja denariyo pendi, akasha kanga pangu, akati ati: Ulamaki. Lamʼayumukalula, dimi layukufuta kene tshe kayuyushisha lu dikambu diandi. 36Le untu lakoto lu anya wʼapotodi, akona akanaye, akayala unyandi lʼatei wʼantu aso asatu? 37Ndi akati ati: One lakawuki ketshi. Jesu akawutela ati: Utshu, ututshi pupu.

 

38Lamʼakawatatshokaka lu mbuka, Jesu akakumi lu ngelu kemotshi. Umuntu omotshi, lukumbu landi Mata, akulungula lakandi. 39Ndi aki la onangu a umuntu, lukumbu landi Mariya,10:39 Joa. 11:1. lakadjase lʼekulu wa Khumadiondjo, ahukama diui diandi. 40Keli Mata akakanana la ulimu efula, ku ndi akayi le Jesu; akawumbula ati: Khumadiondjo, we heyi wati: Onalingu akantshikedi ulimu dime? Telandi ayi la ndjunkimanyia. 41Keli Jesu akûkaluya diui ati: Mata, Mata, we ambuleka ndjakananya la ndjahenyahenya diʼakambu efula, 42keli dikambu otoi mbeli uhumba. Mariya ambosonola leke lʼololo, lo haluyosama uma le ndi.

 

 

 

LUKA 11

(Mat. 6:9-15; 7:7-11)

1Jesu akalombaka lu dihuli dimotshi. Lamʼakandashidiya, umbeki andi omotshi akawutela ati: Khumadiondjo, utetsha lama nomba, uku aketsha Joani ambeki andi. 2Ku ndi akawatela ati: Lamʼayunyolombaka, kanyutaki nyati: Shesu, hikumbu laye layali ekila. Diulelu diaye diayi. 3Utushaki mbu ya nde yasu ya la lushi la lushi. 4Utudimanyia kolo yasu, ne dia ndu shu tatudimanyiaka untu tshe leli la su dikambu. Tutukumiaki lamʼeli ehimba.

 

5Jesu akawambula ati: Akona lʼatei anyu leli la ongenyi, lamʼayundutsho le ndi lʼasa ndeki, ati: Ongenyi, osondja dikenga satu dia ma: 6ne dia ongenyi ami omotshi ambuya uma lu lokendo, dimi kema la engo kambusha, 7ku one leli lu luudu, ayukaluya diui ati: Takumimbiya, lukuki lambudihama kakiane, anʼami weko la mi lu tangi, dimi haleyi mbeto dia ndjukusha diango? 8Lambunyutela nti: Kuyanga ndi heto dia ndjuwusha diango ne dia ndi eko ongenyi andi, keli ne dia limbiya landi, ndi ayeto, ayuwusha diango tshe diahumbandi. 9Dimi lambunyutela nti: Nyolombe, ku wayunyusha; nyuyangi, ku nyayena; nyokokole, ku wayunyudihula. 10Ne dia untu tshe latolombaka, atulungulaka; latuyangaka, atenaka; latokokolaka, wayudihula. 11Untu akona lʼatei anyu leli umbutshi a pami, lamʼayolomba onʼandi la pami lusi, ku ndi mbusha ului lu dihuli dia lusi? 12Kana ndi ayolomba ukeli, ku ndi mbusha kutu? 13Okone, naka nyu, antu wa kolo, mbeyaka mbisha anʼanyu eshasha wʼololo, Shenyu le lʼulungu huleka mbisha wane wolomba Nyuma kʼOlolo?

 

(Mat. 12:22-30; Mak. 3:19-27)

14Jesu akatundjaka odienge a lumu. Lamʼakatumbi odienge, kanga lumi akateketa, ku elui wʼantu wakambi. 15Keli amotshi wakati vati: La wulu wa Belezebulu, uwandji wʼedienge, mbatundutundjaka edienge.11:15 Mat. 9:34; 10:25. 16Akina wakuhimbi, wakôlombe djimbitelu yʼuma lʼulungu.11:16 Mat. 12:38; 16:1; Mak. 8:11. 17Keli ndi akeyi tukanyi tawo, akawatela ati: Diulelu tshe diambatana, diayulana. Khumbu kambatana, kayoko. 18Naka ndu Satana ambatana, ukundi ayushikikala diulelu diandi? Ne dia nyu nyambuta nyati: La wulu wa Belezebulu mbatundutundjaka edienge. 19Naka dimi oso atutundjaka edienge la wulu wa Belezebulu, ku ana anyu watetundjaka la wulu akona? Okone vo wayuyala embadi anyu. 20Keli, naka dimi latutundjaka edienge la luhita la Unyashungu, keti diulelu dia Unyashungu diambuyakaka le nyu. 21Keli lamʼayulama kanga wulu luudu landi, olotshi diango tshe dia ta, diango diandi diayuyala ki. 22Keli lamʼayuwukhumela ukina luleki wulu, ndi ayolembia. Ku one lambolembia ayokosola eloto wa ta tshe wakandekamaka, ayukahanya diango diakandakosola. 23Laha kame la mi, kambuntuna.11:23 Mak. 9:40. One lahasanganya la mi diango, kadidianganya.

24Lamʼatumba odienge uma le untu, vo nkindulaka lu ahuli waha la ashi, watayangi mumuya. Lamʼahawakitani, vo wayuta vati: Dimi layukalula lu luudu lami lenʼakamatumbi. 25Lamʼakalulawo, ku vo wambulutana leli pudipudi lolongoswami. 26Ku vo wayutsho, wayutosa edienge ekina esambeli wuleki kolo; wayoto, wayudjase loko. Ku akambu wa untu oso wa lʼokongo, wayuleka wa ntundu kolo.

27Lamʼakataka Jesu akambu aso, umuntu omotshi lʼului wʼantu akawelela ati: Utema wakakuti, ndu awele wakayalome, weko la otshoko! 28Keli ndi akati ati: Mete, wane watuhukamaka diui dia Unyashungu, la watudikitanyiaka, mbeli la otshoko!

 

(Mat. 12:38-42; Mak. 8:12)

29Lamʼakamotaka elui wʼantu la le Jesu, ndi akatatela mbatela ati: Lolonga lone, leko lolonga la kolo! Vo watuyangaka djimbitelu,11:29 Mat. 16:4; Mak. 8:12. keli hawuwasha djimbitelu, tshikima djimbitelu ya Jona. 30Uku akayala Jona djimbitelu le asi Niniva,11:30 Jon. 3:4. wuhu ako mbayuyala Onʼa untu le antu wa lu lolonga lone. 31Khumʼekanga ka umuntu ka la Diku dia Kushi ayemala lʼelumbwelu la antu wa lu lolonga lone, ayuwamia, ne dia ndi akayi uma lu kuma ya kete, dia ndjuka yimba ya Solomona.11:31 1 Khum. 10:1-10; 2 Ek. 9:1-12. Nyendi, luleki Solomona, eko lane. 32Asi Niniva wayemala lushi lʼelumbwelu la wa lu lolonga lone, wayuwamia, ne dia vo wakakadimula etema lamʼakawuki esambishelu ka Jona.11:32 Jon. 3:5. Nyendi, luleki Jona, eko lane.

 

(Mat. 5:15; 6:22-23)

33Nduku untu latohetshaka tala, ku ndi dikitsha lu dihuli dia ushamu, kana la tshina dia kidunda, keli ndi atudikitshaka lu ekitshelu ka tala,11:33 Mat. 5:15; Mak. 4:21; Luk. 8:16. ne dia wane woto wenyi usasi adio. 34Su diaye mbeli tala dia dimba diaye. Lamʼeli su diaye ololo, dimba diaye tshe diayulula too la usasi. Keli lamʼedio kolo, ndu dimba diaye diayulula too la udjima. 35Okone endi kana usasi mbeli lʼutema aye, aha udjima. 36Okone naka dimba diaye tshe diambulula la usasi, diaha la leke la tshududu, dio tshe diayulula la usasi, uku tala mbakohetela la usasi adio wa ngaingai.

 

(Mat. 23:1-36; Mak. 12:38-40; Luk. 20:45-47)

37Lamʼakateketaka Jesu, Ufarise omotshi akaweti, dia ndi ntole la ndi ma. Ku ndi akoto, akadjase la mesa. 38Lamʼakenyi Ufarise dikambu so, ndi akambi, ne dia ndi kombotsha anya la ntundu ka nde ma. 39Khumadiondjo akawutela ati: Nyu, Afarise, nyatotshaka lʼandja a dikoho la donga, keli lʼetei anyu, ambulula too la dihotwanelu la akambu wa kolo. 40Nyu nyeko dinginya! Undi, one lakadikingi lʼandja awo, ndi kunkinga ndu lʼetei awo? 41Keli lamʼayunyusha antu diango la ketshi, nyuwasha diango dieli lʼetei. Nyendi, diango tshe diayela pudipudi le nyu.

42Keli fono kayayi le nyu, Afarise! ne dia nyu nyatukimoka etenyi ka dikumi ka nyumba la luhuhu la akatshikatshi tshe,11:42 Lew. 27:30. nyatulekanaka sambu kʼololo la ngandji ka Unyashungu. Aki ololo anyu ntsha akambu ane, la aha ntshika akambu wa la ntundu. 43Fono kayayi le nyu, Afarise! ne dia nyu nangaka die dia ntundu lu temwelo, la waemu lu tuka. 44Fono kayayi le nyu! ne dia nyu nyeko uku waumbu wahene lu ashu, watokendakendaka antu ladiku diawo, ku vo haweyi.

45Umbeyi wʼelembe omotshi akûkaluya diui ati: Umbetsha, lamʼataye diui so, we ambutotenga ndu shu. 46Jesu akati ati: Fono kayayi ndu le nyu, embeyi wʼelembe! ne dia nyu nyataheka wutshu weli wulu memba lu aheka wʼantu, keli nyu nyame hanyunanda wetshu ako kuyanga la luhita. 47Fono kayayi le nyu! ne dia nyu nyatuhikaka waumbu wʼamvutshi, keli watshenyu mbakadiaki. 48Okone nyu nyeko emenyi, nyatetawoka akambu wakatshaka watshenyu, ne dia vo wakadiaki, keli nyu nyatuhikaka waumbu awo. 49Diako mbakati ndu yimba ya Unyashungu ati: Dimi layatumela amvutshi la atumami. Vo wayudiaka amotshi, wayuwasuya. 50Okone akila tshe wakatshulwama uma lʼetatelu kʼandja, wayali dikambu dia wa lolonga lone, 51umaka dikila dia Abtle,11:51 Etat. 4:8. edja ndu dikila dia Zekariya,11:51 2 Ek. 24:20-21. lakawadiaki lʼasa ediakelu la etemwelo. Mete kanyutelami nti: Ayuyala dikambu dia wa lu lolonga lone. 52Fono kayayi le nyu, embeyi wʼelembe! ne dia nyu nyakakosola ona sapi kʼakambu wa bewu. Nyu nyame komboto, keli nyu nyakashimbi wane wakayangi mboto.

 

53Lamʼakatumbi Jesu loko, afundji la Afarise wakatatela mbudinga la wulu, wakalangi mboteketsha akambu efula. 54Vo wakotokiya, dia mbosa diui diukukindi mvuta.

LUKA 12

1Lu unya oso, lamʼakamote antu nunu nunu, edja ndu wakakamanela lʼekulu, Jesu akatatela mvutela ambeki andi ati: Nyewo edya ka Afarise,12:1 Mat. 16:6; Mak. 8:15. kako keli lukesu 2Nduku kene kambukumbama, kahakumbwama. Nduku kene kambushama, kaheyama.12:2 Mak. 4:22; Luk. 8:17. 3Okone akambu tshe wakanyati lu udjima, wayukema lu usasi. Akambu wakanyataka hyotehote lu mvudu ya lʼetei, wayuwelelama lʼete a mvudu.

4Dimi lambunyutela, nyu wane weli engenyi ami, nti: Tanyukaki wane wadiaka alimba woma, ku lʼokongo haweyi ntsha dikambu dikina. 5Keli dimi layunyewula ona lahumbanyu mbuka woma: nyuki one leli la wulu wa mbikadja antu lu luwinga la dja lʼokongo a mbadiaka woma; ee, dimi lambunyutela nti: Nyuwuki woma! 6Hawutusundjaka tufudu tutanu akuta ahendi? Keli nduku otoi ato atuhamameka lu ashu wa Unyashungu. 7Ndu weondji wa divu dia lʼete anyu wambalema tshe. Tanyukaki woma: nyu nyambuleka tufudu efula ushinga a wulu.

8Dimi lambunyutela nti: Untu tshe layumbetawo la ntundu kʼantu, ndu Onʼa untu ayuwetawo la ntundu ka andjelo wa Unyashungu. 9Keli untu layumanguna la ntundu kʼantu wayuwanguna lu ashu wa andjelo wa Unyashungu. 10Untu tshe lateketa diui dia kolo lu dikambu dia Onʼa untu, wayudimanyia. Keli untu latenga Nyuma kʼOlolo, hawudimanyia.12:10 Mat. 12:32; Mak. 3:29. 11Lamʼayuwuya la nyu la ntundu ka temwelo, la embuledi, ndu dihangamendi, tanyuyakananyaki nyati: Ukundi ayutukaluya diui, kana aui akona wayututa? 12ne dia Nyuma kʼOlolo ayunyetsha aui wayunyuhumba mvuta lu unya oso.12:12 Mat. 10:19-20; Mak. 13:11; Luk. 21:14-15.

 

13Untu omotshi lʼului wʼantu akawutela ati: Umbetsha, uteli onalingu akahani la mi sangu. 14Keli ndi akawumbula ati: Pami, akankitsha umbadi kana ukahi ladiku dianyu? 15Ku ndi akawatela ati: Nyendi, nyewo okomiya wa diango tshe; ne dia lumu la untu haluyala ne dia efula ka diango dieli la ndi. 16Ku ndi akawauki wela ati: Kete ya kanga ongonyi omotshi yakangonya diango efula. 17Ku ndi akakani yimba lʼutema andi ati: Kayumutsha na, ne dia dimi kema la lama mumba diango diami dia dinela? 18Ku ndi akati ati: Dimi layutsha okone: layuhandjula apenge ami, layuhika akina wuleki waki. Ku dimi layumba diango diami dia ninela la diango diami tshe loko. 19Ku layutela utema ami nti: Utema, we la diango efula diumbami dia deku efula. Ukaki olo, olekaki, onokaki, ongenangenaki. 20Keli Unyashungu akawutela ati: Enginya li! Wayolomba utema aye lʼutshu wʼelo one. Ku diangodiakayalongosola diayuyala diaki na? 21Osoku mbeli untu layaumbela diango, laha la ukundji le Unyashungu.

 

(Mat. 6:25-34)

22Ku Jesu akatela ambeki andi ati: Okone mbanyutelami nti: Tanyuyakananyaki dia nyumu yanyu nyati: Ayutole na? kana dia alimba anyu nyati: Ayutolota na? 23ne dia lumu lambuleka mbu ya nde, dimba diambuleka ahondo. 24Nyendi angwangwa: vo hawutuneka, hawutunaka. Vo kema la eunibelu kana dipenge. Unyashungu atuwashaka mbu ya nde. Ndi nemo dia mamba dienyu, ndeka fudu efula li! 25Untu akona lʼatei anyu, lamʼayunduyakananyu, ku ndi ntalula utali a nshi ya lumu landi kubita otoi? 26Okone naka nyu hanyeyi ntsha dikambu dia tshitshe, okoko wana wayakananyanyu dia akambu akina? 27Nyendi alembo, uku wulawo; vo hawukambi ulimu, hawutshi ahondo. Keli dimi lambunyutela nti: Kuyanga Solomona lu lutumbu landi tshe,12:27 1 Khum. 10:4-7; 2 Ek. 9:3-6. kondota uku dembo dimotshi lʼatei awo. 28Keli naka Unyashungu atolotshaka adiyu wa lʼusui, weko elo, ku lui wayukadjema lu atshuka, ndi huleka nyolotsha, nyu akanga a mbetawo ka tshitshe? 29Tanyuyangaki kene kayunyole kana kayonyono; tanyuyakananyaki. 30Ne dia wedja wa la kete watuyangaka diango so tshe, keli Shenyu mbeyaka ati: Nyu nyatudihumbaka. 31Keli nyutayangi diulelu diandi, ku ndu diango so tshe diayuyala dianyu.

32Tanyukaki woma, nyu limba la tshitshe lʼekoko, ne dia Shenyu nangaka nyusha diulelu. 33Nyusundja dieli la nyu; nyusha antu diango la ketshi. Nyuyatsheli atapa wahuyala emusu, la eumbelu lʼulungu kahashili, lene ahatusukanaka uvi, lene ahatulanyaka yumumbu. 34Ne dia tenʼeli eumbelu kanyu, kayuyala ndu etema anyu.

 

35Nyolote eya lu kindi yanyu; nyohetsha atala anyu.12:35 Mat. 25:1-13. 36Nyame nyuyali uku antu walungamela khumewo12:36 Mak. 13:34-36. lamʼayundukalula uma lu dambu dia diwala. Okone lamʼayunduya, lamʼayundokokola, wayudihula esadi. 37Ekambi ako wayuyala la otshoko lamʼayuya khumewo, lamʼayundatana wasena. Mete kanyutelami nti: Ndi ayolota uya, ayuwadjasha lu mesa. Ndi ayuya, ayakambela ulimu. 38Naka ndi ayuya lʼesenelo ka hendi, kana ka satu, lamʼayundatana osoku, vo wayuyala la otshoko. 39Keli nyu mbeyaka nyati: Kanga luudu, utundeya unya wayuya uvi, tshiki ndi akasene, tutundutshika luudu landi, dia vo lutundula. 40Ndu nyu nyuyalongosole, ne dia Onʼa untu ayuya lu unya wahanyalungamela.12:40 Mat. 24:43-44.

 

(Mat. 24:45-51)

41Petero akambula Jesu ati: Khumadiondjo, shame mbukediye wela one, kana antu tshe? 42Khumadiondjo akati ati: Ulami akona weli la kolamelu la yimba, wayukitsha uwandji andi ladiku dia wa lu luudu landi, dia mbakahelaka mbu ya nde lu tena diayo? 43Ukambi oso ayuyala la otshoko lamʼayuya uwandji andi, lamʼayundutana atsha osoku. 44Mete kanyutelami nti: Ndi ayukitsha ladiku dia kene tshe keli la ndi. 45Keli lamʼayuta ukambi ako lʼutema ati: Uwandji ami huya esadi; lamʼayundutatela nkomola ekambi wʼapami la ekambi wʼamantu, la ndekaka, la nokaka, la mbidjoka wanu, 46uwandji wʼukambi oso ayuya lu lushi lahandulungamela, ndu lu unya wahandeyi. Ndi ayuyokomola wulu, ndu ayuyukitsha lu leke lʼakanga wʼuhedia. 47Ukambi ako, lakeyi uku akalangi uwandji andi, laki konongosola diango diandi, laki kuntsha lulangu la uwandji andi, ayokomwama efula. 48Keli one laki kumbeya, lakatshi akambu wukuki nkomwama, ndi ayokomwama yema tshitshe. Untu tshe lambuwusha diango kambi, ayolomba efula. La untu tshe layuwukimiya diango kambi, wayolomba diango diuleki efula.

 

(Mat. 10:34-36)

49Dimi lakayi dia ndjudja dja la kete. Keli kayumutsha naka yo yambohetaka? 50Dimi leko la batiza, ka dimi mbatizama.12:50 Mak. 10:38. Ndu dimi leko la dikambu dia wuki edja ndu to kambushidiyama! 51Nyu nyambukana nyati: Dimi lakayi dia ndjusha antu ki la kete? Dimi lambunyutela nti: Kema. Dimi lakayi dia ndjatanya antu. 52Umaka kakiane, antu atanu wa lu luudu otoi wayatana: asatu lene, ahendi lene; ahendi lene, asatu lene. 53Vo wayatana: shi la ona pami, ona pami la shi; nyangu la ona umuntu, ona umuntu la nyangu; ukilu a umuntu la olokayi andi.12:53 Mik. 7:6.

 

(Mat. 16:1-4; Mak. 8:11-13)

54Ndi akatela elui wʼantu ntu ati: Lamʼatunyenaka dingi diatambela lu leke lʼehutwelu ka unya, nyu nyatutaka esadi nyati: Mvula kuyayi, ku to katuyaka. 55Lamʼatunyenaka lopepe uma lu leke la diku dia kushi, nyu nyatutaka nyati: Umbi ka wulu; ku atuyalaka osoku. 56Nyu akanga a lukesu, nyu mbeyaka nimbitela elundji ka kete la ka ulungu, keli ukundi ahanyalimbitela akambu wʼetena kene?

57Okoko wana wahanyayalumbuya kene keli ololo? 58Lamʼayuyutsho la ufundji aye utsha le unumbushi, utashidisha la ndi lu mbuka, ne dia ndi atukutukotola le umbadi, la umbadi ntukukimo le ulami, ku ulami ntukudja lu luudu la lukanu. 59Dimi lambunyutela nti: We hatumbi uma loko, tshikima we ambufuta dikuta dia ndjihelu.

LUKA 13

1Antu amotshi waki leko etena kako, wakatela Jesu vati: Pilata akasanganya dikila diʼasi Ngalili amotshi la dia nyama yawo yakawadiakela Unyashungu. 2Ku ndi akâkaluya diui ati: Nyu nkanaka nyati: Asi Ngalili aso waki antu wa kolo ndeka asi Ngalili tshe, ne dia vo wakasuwi wuhu oso uka? 3Dimi lambunyutela nti: Kema. Keli naka nyu hanyukadimula etema, nyu tshe nyayuvo wuhu ako. 4Ndu antu aku dikumi la enanei, ane wakavu lamʼakanyukwela luudu lʼetangelu la Siloama, nyu nkanaka nyati: Vo waki atshi wa kolo ndeka antu tshe watuyalaka la Jerusalema? 5Dimi lambunyutela nti: Kema. Keli naka nyu hanyukadimula etema, nyu tshe nyayuvo wuhu ako.

 

6Jesu akuki wela one ati: Untu omotshi aki la utamba a fingu lʼekambo kandi kʼelua. Ndi akayi dia ndjuyanga elua loko, keli ndi kuntana. 7Ku ndi akatela ohehi wʼekodi ati: Enda, deku satu ne mbatumuyakaka dia ndjuyanga elua lʼutamba one a fingu, keli halatani. Okote; ukundi osawo dihuli la kete wososa? 8Ndi akûkaluya diui ati: Khumadiondjo, utshiki ndu eleku kene, edja ndu dimi lambufunda kete la tshina, la nkitsha tumi. 9Naka vo ayoto elua eleku kayayi, ku kawo; keli naka hatwe, we mbeyaka ndjokota.

 

10Ndi aketshaka antu lʼetemwelo kemotshi lushi lʼekila. 11Nyulungi, umuntu omotshi, laki la odienge wakawete ekomo deku dikumi la enanei, aki loko. Ndi akakutama kuta, kumbeya nkuto nduku yema. 12Lamʼakawenyi Jesu, ndi akaweti; akawutela ati: Umuntu, we ambutshungo uma lu ekomo kaye! 13Ku ndi akawahe anya. Kemʼedja, umuntu akakuto; akatumbula Unyashungu. 14Keli umbuledi wʼetemwelo akuki kele ne dia Jesu akakonoya untu lushi lʼekila. Ndi akatela ului wʼantu ati: Nshi shamalu yeko, yahumba antu ntsha elimu awo. Okone lu nshi sho, kanyuyakaki, kanyuyokonwamaki, keli aha lushi lʼekila.13:14 Etum. 20:9-10; Euh. 5:13-14. 15Ku Khumadiondjo akûkaluya diui ati: Nyu akanga a lukesu! untu akona lʼatei anyu ahatshungula ngombe kana punda kandi uma lʼelelu, la nkilombola utsha lʼashi lushi lʼekila? 16Umuntu one, kanula yʼAbarahama, lakakeleka Satana deku ne dikumi la enanei, taki ololo ndi nkelekwama uma lu dimama ne lushi lʼekila? 17Lamʼakandati akambu aso, atunyi andi tshe wakalombo la sonyi. Ului tshe wʼantu wakangenangena, ne dia akambu tshe wa lutumbu wakandatshi.

 

(Mat. 13:31-32; Mak. 4:30-32)

18Ku Jesu akati ati: Diulelu dia Unyashungu dieli uku na? Dimi layudifanya la na? 19Dio dieko uku lotongo la lohodia lakose untu, lakanduki lʼekambo kandi. Lo lakuli, lakayala utamba. Fudu ya lʼulungu yakahema lu tahi yalo.

 

(Mat. 13:33)

20Jesu akati ntu ati: La na ayumufanya diulelu dia Unyashungu? 21Dio dieko uku edya, kakose umuntu, kakandashe lu tediko tusatu ta shima, edja ndu to kakakukanela la shima tshe.

 

(Mat. 7:13-14, 21-23)

22Jesu akakindula lu esumba ndu lu wangelu, akatetshaka antu, lamʼakandatetaka utsha la Jerusalema. 23Untu omotshi akawumbula ati: Khumadiondjo, antu tshitshe mbayushimbamela? Ndi akawutela ati: 24Nyukalangani dia mboto lu suku dia tshitshe; ne dia dimi lambunyutela nti: Antu efula wayulanga mboto loko, keli vo hawuyala la wulu wa mboto. 25Lamʼayeto kanga luudu, lamʼayundudiha lukuki, nyu nyayutatela memala lʼandja. Nyu nyayokokola lu lukuki, nyayuta nyati: Khumadiondjo, utudihula. Ku ndi ayunyukaluya diui ati: Dimi haleyi uma lendi uyenyu. 26Ku nyu nyayutatela mvuta nyati: Shu takalekaka, takanokaka lu ashu aye; we aketshaka antu lu esese asu. 27Ndi ayuta ati: Dimi lambunyutela nti: Haleyi uma lene uyenyu. Nyumo uma la le mi, nyu atshi wa kolo tshe!13:27 Esam. 6:8. 28Nyu nyayulela, nyayokeketanya wanyu leko,13:28 Mat. 22:13; 25:30. lamʼayunyena Abarahama, Isaka la Jakoba, ndu amvutshi tshe lu diulelu dia Unyashungu, ku nyu nyame nyayukadjema lʼandja. 29Antu wayuya uma lu leke lʼehutwelu ndu uma lʼedjelu ka unya, uma lu leke la ngelʼa kushi ndu uma la diku dia kushi, wayudjase lu diulelu dia Unyashungu.13:29 Mat. 8:11-12. 30Nyulungi, antu amotshi weli lʼokongo, wayuyala la ntundu; la amotshi weli la ntundu, wayuyala lʼokongo.13:30 Mat. 19:30; 20:16; Mak. 10:31.

 

(Mat. 23:37-39)

31Lu unya ako, Afarise amotshi wakayi, wakatela Jesu vati: Utshu, umo uma lindu, ne dia Herode nangaka kudiaka. 32Ku ndi akawatela ati: Nyutshu, nyututeli mbulu keso nyati: Elo la lui, dimi layutundja edienge, layokonoya antu, ku lushi la satu dimi layushidiya ulimu ami. 33Keli dieli la mi dia ntsho la mbuka kami elo la lui la ledia lui, ne dia umvutshi heyi mvo amakina, tshikima la Jerusalema. 34Yee! Jerusalema, Jerusalema, latudiakaka amvutshi, latukaka wane watuwukutumelaka ave li! Ndi tena efula diakamalangi nsanganya anʼaye, uku atusanganyaka wali a koko anʼato la tshina diʼahafu ato, ku nyu kunanga li! 35Enda, khumbu kanyu kambukalema. Dimi lambunyutela nti: Nyu hanyuyomena ntu, edja ndu lamʼayunyuta nyati: One layayi lu lukumbu la Khumadiondjo, eko la otshoko.13:35 Esam. 118:26.

LUKA 14

1Lushi lʼekila lomotshi, lamʼakoto Jesu lu luudu la umbuledi omutshi wʼAfarise dia ntole ma, Afarise wakokeshanya. 2Untu omotshi aki la ntundu kandi la hemo ka khuta. 3Jesu akambula ambeyi wʼelembe la Afarise ati: Nkonoya untu lushi lʼekila eko ekila, kana kema? 4Keli vo wakatshikala ki. Ku ndi akawose, akokonoya, akukimo. 5Ku Jesu akawambula ati: Untu akona lʼatei anyu, ayuyala la punda kana ngombe, lamʼayutoko lu difuku diʼashi, ku ndi hakitundja esadi lushi lʼekila?14:5 Mat. 12:11. 6Vo kumbeya mbukaluya diui ntu lu akambu ako.

 

7Jesu akukela wane wakawaeti lu ma wela lamʼakandenyi wuyasonwela die dia nemo. Ndi akawatela ati: 8Lamʼaketa untu lu dambu dia diwala, tudjaseki lu edie ka nemo, ne dia, undu, ndi aketshi untu omotshi lukuleki nemo. 9Ku one lakaketshi we la ndi, ayukutela ati: Utshikeli untu one dihuli, ku we ayuleka mbosa dihuli diuleki nkitakita la sonyi. 10Keli lamʼaketawo, utshu, utudjase lu dihuli diuleki nkitakita. Ku lamʼayuya one lakaketshi, ndi mbeyaka nkutela ati: Ongenyi, umbeli. Ku we ayuyala la lutumbu lu ashu wʼantu tshe wudjashi la ye wale ma.14:10 Tuk. 25:6-7. 11Ne dia tshe layambiya, ayukitshakitshama; one layakitshakitsha, ayumbiyama.14:11 Mat. 23:12; Luk. 18:14.

 

12Jesu akatela ndu one lakaweti ma ati: Lamʼayuyukate ma dia midi kana dia dikolo, tetaki engenyi aye, ananyo, kana asi khumbu kaye, kana asukanyi weli akanga wʼengonyi, vo watukuyuketa ndu vo, ndu watukuyulemanya la ye. 13Keli lamʼayuyukatela antu dambu, keti akanga a weula, dikomo, tshumbi, la tutshungu. 14Ku we ayotshokwama, ne dia vo kema la diango dia nemanya la ye. Vo wayukukaluyadio lu eulwelu kʼantu wʼololo uma lu nyoi.

 

15Lamʼakuki untu omotshi lakadjashi la ndi lamʼakawalekaka ma aui aso, ndi akatela Jesu ati: One layole ma lu diulelu dia Unyashungu, eko la otshoko! 16Keli Jesu akawutela ati: Untu omotshi akakate ma dia wuki dia dikolo, ndi aketi antu efula, 17Lʼetena ka ma dia dikolo, ndi akatumi ekambi andi, dia ntutela wane wakandeti ati: Nyuyi, kakiane diango tshe diambolongoswama. 18Keli vo tshe wakatatela nsakosako: untu lʼuntu akalombe edimanyelu. La ntundu akawutela ati: Dimi lambusumba ekambo. Dimi mpumbaka ntsho dia ntukiena, mbakolombami nti: Unyimanyia. 19Ukina akati ati: Dimi lambusumba ngombe dikumi, hyendi hyendi lu lokoho. Dimi nangaka ntuyenda, mbakolombami nti: Unyimanyia. 20Ukina akati ati: Dimi lambutshuka wadi, okone haleyi ntsho. 21Ukambi oso akayi, akayutela uwandji andi akambu ako. Ku kanga luudu akumala kele, akatela ukambi andi ati: Utshu lu esese la lu tuwuka ta lʼusumba, kuyi la akanga a weula, la dikomo, la tutshungu, la tshumbi. 22Ukambi akati ati: Khumadiondjo, ambutshama uku utshiye, keli luudu lekiko hwe. 23Uwandji akatela ukambi ako ati: Utshu lu esese la lu kumbu yʼetamba, kututshutshiya antu la wulu dia vo mboto, luudu lami laluli. 24Ne dia dimi lambunyutela nti: Nduku otoi wʼapami aku wakametshi, ayunganela ma dia dikolo.

 

25Elui a waki wʼantu wakatatshokaka la Jesu. Ndi akasikiso, akawatela ati: 26Naka untu ambuya le mi, ku ndi hahetsha shi, la nyangu, la wadi, la ana, la anangu, la akadiyendi, ee, ndu lumu landi, keti ndi heyi ndjala umbeki ami.14:26 Mat. 10:37. 27Untu tshe lahembe utamba andi a mpeketanya dia ndjelami, ndi heyi ndjala umbeki ami.14:27 Mat. 10:38; 16:24; Mak. 8:34; Luk. 9:23. 28Untu akona lʼatei anyu, lamʼalangandi mpika luudu lʼetangelu, ku hatadjashi dia ntediki ushinga, kana ndi la diango dia nkuka lushidiya? 29Lamʼambunduhika etshina, ku ndi kema la wulu wa lushidiya, wane tshe wayenda, wayutatela mbosoka. 30Vo wayuta vati: Pami kene akatatela mpika luudu, keli ndi kumbeya lushidiya. 31Kana, khumʼekanga kakona, lamʼayundutsho dia ntolosha khumʼekanga kekina, hatadjashi dia ntakanyi yimba, kana ndi la antu andi nunu dikumi, weko la wulu wa mpumana la ukina layayi le ndi la antu nunu akumi ahendi? 32Kuku kana lamʼeki ukina etali, ndi ayutumela akendji la ntuwumbula akambu wa vo ndjala ki. 33Okone untu tshe lʼatei anyu lahaseke kene tshe keli la ndi, ndi heyi ndjala umbeki ami.

34Leho leko ololo, keli naka leho lambusuwo, la na ayunyulete mpe ntu? 35Lo kema ololo dia mbidja lu kete kana lu diala: wayulukadja lʼandja. One leli la atui wa mbuka, uki.

 

 

 

LUKA 15

(Mat. 18:10-14)

1Elungudi wʼelambu tshe la antu wa kolo wakayasukanaka la le Jesu, dia ndjuka uku atandi. 2Afarise la afundji wakangunanguna vati: Untu one atulungulaka antu wa kolo, atolekaka la wo.15:2 Luk. 5:29-30.

 

3Jesu akawaukela wela one ati: 4Untu akona lʼatei anyu, lamʼendi la ekoko lukama, naka ndi ambudimanya omotshi, ku ndi hatshiki akumi divwa la divwa lʼusui dia ntuyanga one wushishwi, edja ndu lamʼayunduwena? 5Lamʼayunduwena, ndi ayuwahe lʼaheka, ayongenangena. 6Lamʼayundukuma lakandi, ndi ayeta engenyi andi la asukanyi andi; ayuwatela ati: Nyongenengene la mi, ne dia lambena okoko ami wakashisho. 7Dimi lambunyutela nti: Wuhu ako mbayuyala ongenongeno utamanya lʼulungu lu dikambu dia untu a kolo otoi lukadimudi utema, uleki dia antu akumi divwa la divwa wahahumbi nkadimula etema.

 

8Kana umuntu akona, lamʼendi la tenyi dia fesa dikumi, naka ndi ambushisha etenyi kemotshi, ku ndi hahetsha tala, hombe luudu, la hayangi lʼeteti, edja ndu lamʼayundukiena? 9Lamʼayundukiena, ndi ayeta engenyi andi la asukanyi andi. Ndi ayuwatela ati: Nyongenengene la mi, ne dia lambena etenyi kakamashisha. 10Okone dimi lambunyutela nti: Ongenongeno ndjalaka lu ashu wʼandjelo wa Unyashungu lu dikambu dia untu a kolo otoi lambukadimula utema.

 

11Ku Jesu akati ati: Untu omotshi aki la ana apami ahendi. 12Ona kushi akatela shi ati: Papa, umbisha etenyi ka diango diayuyala le mi. Ku ndi akâkahanya diango diandi. 13Kemʼedja, ona kushi akasanganya diango diandi tshe, akatshu lu lokendo lu kete yʼetali. Ndi akatuhandjula diango diandi lu akambu wa lutshitu, wakandatshaka. 14Lamʼakandamani diango diandi tshe, ndjala ka kasha ka wulu kakayala lu kete sho. Ndi akatatela mpumba diango. 15Ku ndi akatshu, akatekesanela la untu omotshi la lu kete yako. Ku untu ako akutumi dia ntuleshaka sumbu lʼusui. 16Ku ndi akalangi ndutsha dikundju diandi la pusu yakalekaka sumbu. Nduku untu lakawusha ema a nde. 17Keli lamʼakandatshuti, ndi akati ati: Ndi ma efula dieli la ekambi wa papa, ndu dikina ladiku, ku dimʼone avo ndjala lindu li! 18Dimi layunela, layutsho le papa; layutuwutela nti: Papa, dimi lakatshela ulungu kolo, lakatshi kolo ndu lu ashu aye. 19Ololo ami hakuki, dia vo mbetami ntu vati: Onʼaye; umbete uku ukambi aye omotshi. 20Ku ndi akunela, akayi le shi. Keli lamʼakindi tshalula, shi akawenyi, akangasana la ketshi, akalawo, akatukhumbatela lu kingu, akanonana la ndi. 21Ona akawutela ati: Papa, dimi lakatshela ulungu kolo, ndu lakatshi kolo lu ashu aye. Ololo ami hakuki, dia vo mbetami ntu vati: Onʼaye. 22Keli shi akatela ekambi andi ati: Nyela ukutu wuleki ololo, nyolotsha, nyuwudji lohete lu lunya landi, la sabata lʼekulu andi. 23Nyela osongo wa ngombe wununyi, nyudiaki, keli tuli, tongenengene. 24Ne dia onʼami one akavu, ku ambuyala la lumu ntu; ndi akashisho, ku ambenama. Ku vo wakatatela ngenangena.

25Lʼetena keso, ona lʼenundu aki lʼekambo. Ku lamʼakandayayakaka, lamʼakandasukana lasuki la luudu, ndi akuki wahuma la wano wenye. 26Ku ndi aketi ukambi omotshi, akawumbula akambu wakayala. 27Ku ndi akawutela ati: Onanyo kambuya. Sho ambudiakela osongo wa ngombe wununyi, ne dia ndi ambulungula la wulu ndu la ki. 28Keli ndi akumala kele, kunanga mboto lu luudu. Ku shi akatumbi, akayosengasenga. 29Keli ndi akâkaluya shi diui ati: Enda, deku efula ne diamumukukambela ulimu, dimi kundjaka elembe aye nduku lushi. Keli we atambisha kuyanga yana ya mbudi nduku lushi, dia dimi ngenangena lʼengenyi ami. 30Keli lamʼuyi onʼaye one, lakali diango diaye la amantu a luseka, we ambudiakela osongo a ngombe wununyi! 31Ndi akawutela ati: Onʼami, we ndjalaka la mi nshi tshe. Kene tshe keli kami, kaye keto. 32Keli aki ololo mbola la ngenangena, ne dia onanyo one akavu, ku ambuyala la lumu; akashisho, ku ambenama.

LUKA 16

1Jesu akatela ambeki andi ntu ati: Kanga ongonyi omotshi akiko, laki la ulami a diango. Wakufundi le ndi vati: Ndi akalanya diango diaye tshe. 2Ku ndi akaweti, akawumbida ati: Dikambu diakona diukami so? Umbisha esanganyelu kʼulimu aye, ne dia we heyi ntshikala lu ulimu ntu. 3Ku ulami akayambula lʼutema andi ati: Kayumutsha na, lamʼambuminya uwandji ami lʼulimu wʼulami? Dimi laha la wulu wa nkamba, keli dimi la sonyi ka nomba diango olombalomba. 4Dimi lakasanguya dikambu diayumutsha, dia vo nungulami lu mvudu yawo lamʼayuwuminya lʼulimu wa nama diango. 5Ku ndi aketi akanga wʼabasa wa uwandji andi otoi la otoi. Ndi akambula la ntundu ati: Efula kakona kukulamiye le uwandji ami? 6Ndi akawutela ati: Tediko tʼiso lukama. Ku ukambi uku akawutela ati: Osa mukanda wʼesundjelu, udjase esadi, ufundi akumi atanu. 7Ku ndi akambula ukina ati: Efula kakona ukulamiye? Ndi akawutela ati: Tediko lukama tʼepunga. Ndi akawutela ati: Osa mukanda aye wʼesundjelu, ufundi tediko akumi enanei. 8Uwandji akandula ulami a kolo, ne dia ndi akatshi akambu wa yimba; ne dia ana wʼetena kene, wambuleka ana wa yanyi yimba lu lolonga lawo. 9Dimi lambunyutela nti: Nyuyandeli engenyi uma lu ukundji wʼakambu wa kolo. Okone lamʼayushila ukundji ako, vo wayunyulungula lu mvudu yawo ya pundju.

10One leli la kolamelu lu diango diuleki tshitshe, eko la kolamelu ndu lu diango diuleki fula. One leli la lukesu lu diango diuleki tshitshe, eko la lukesu ndu lu diango diuleki efula. 11Ku naka nyu tanyaki la kolamelu lʼukundji wa kolo, akona ayunyukimiya ekundji wa mete? 12Naka tanyaki la kolamelu lu diango dia untu ukina, akona ayunyusha dieli dianyu? 13Nduku untu leya nkambela ewandji ehendi ulimu: ne dia ndi ayuhetsha omatshi, ayulanga ukina. Kuku kana ndi ayekama omotshi, ayonyola ukina. Nyu hanyeyi nkambela Unyashungu la ukundii ulimu.16:13 Mat. 6:24.

 

14Afarise, waki anangi wa falanga, wakuki akambu aso tshe, wakosoke. 15Jesu akawatela ati: Nyu nyeli antu wayayindja lu ashu wʼantu, keli Unyashungu mbeyaka etema anyu. Diango diambolemiama lʼatei wʼantu diambendjwama lu ashu wa Unyashungu.

16Elembe la aui wʼamvutshi wakiko edja ndu le Joani. Uma lu etena keso, watusambishaka lukumu lʼololo la diulelu dia Unyashungu, untu lʼuntu atuyaotshiyaka loko la khudu.16:16 Mat. 11:12-13. 17Keli eshishwelu ka ulungu la kete, ambuleka eshishwelu ka shidishidi yʼelembe dikambu dia tshitshe.16:17 Mat. 5:18.

 

(Mat. 19:1-12; Mak. 10:1-12)

18Untu tshe laseka wadendi, latshuka ukina, ambunana. One latshuka umuntu lukimwi umendi, ambunana.16:18 Mat. 5:32; 1 Kor. 7:10-11.

 

19Kanga ongonyi omotshi akalotaka ahondo wa linene wa tilili wʼamena. Ndi akangenangenaka la lushi la lushi la ufunu. 20Olombi a diango omotshi lukumbu landi Lazaro akakitshamaka la suku diandi. Ndi aki la puta dimba tshe. 21Ndi akalangaka ndjalesha la fusa yakakokaka lu mesa wa kanga ongonyi; ndu fo yakalombolaka puta yandi. 22Lʼokongo diku olombi akavu, andjelo wakawembe utsha lu tulu ka Abarahama. Ndu kanga ongonyi akavu, ku wakukhunde. 23Ndi aki la fono lu Luwinga la Dja. Ndi akedia ashu, akenyi Abarahama tshalula la Lazaro lu tulu kandi. 24Ku ndi akawelela wulu ati: Papa Abarahama, umbuki ketshi. Untumeli Lazaro, ndi adji sodi ka luhita landi lʼashi, ambodia lulimi; ne dia dimi la fono lu lumbi la dja. 25Keli Abarahama akati ati: Onʼami, uho wati: We akalungulaka diango diʼololo lu nshi yakiye la lumu, ku Lazaro akalungulaka diango dia kolo. Keli kakiane, ndi ambusambema lindu, ku we ambuyala la fono. 26Dikambu dikina, luwinga la wuki leko lʼasasu la nyu. Wane walanga mbeta uma lindu utsha le nyu, haweyi mbeta. La nduku untu leya mbeta uma leko uya le su. 27Ku ndi akati ati: Papa, dimi lambukosengasenga nti: Utumi lu luudu la papa; 28ne dia dimi la analingu atanu; ndi atuwaewuli, watukukuma ndu vo lu dihuli ne dia fono. 29Keli Abarahama akati ati: Vo weko la Mose la amvutshi; vo wawaukeli. 30Ndi akati ati: Kema, papa Abarahama. Keli naka untu omotshi lakavu ayutsho le wo, vo wayukadimula etema. 31Ndi akawutela ati: Naka vo hawukela Mose la amvutshi, keti vo hawetawo kuyanga untu lulwi uma lu nyoi.

LUKA 17

(Mat. 18:6-7, 21-22; Mak. 9:42)

1Ku Jesu akatela ambeki andi ati: Mete, akambu wa ntakanya wayuya; keli fono kayayi le untu latunga akambu ako! 2Uleki ololo dia ndi nkelekama dive diʼohelo lu kingu, la ntambiyama lʼuduwa, uleki ndi ntakanya kiendakenda motshi. 3Nyuyalamaki. Naka unyaye ayutsha kolo, ulaki. Naka ndi ayukadimula utema, udimanyia.17:3 Mat. 18:15. 4Naka ndi ayukutshela kolo etshela esambeli lushi otoi, ndu lamʼayundukalula le ye ekalula esambeli, ati: Lambukadimula utema; kudimanyia.

 

5Atumami wakatela Khumadiondjo vati: Ufudia mbetawo kasu. 6Khumadiondjo akati ati: Utunduyala nyu la mbetawo uku lotongo la lohodia, tshiki nyu mbeyaka mvutela utamba one wa lukhumu nyati: Ukhundwami, unemi lʼuduwa, ku vo mbeyaka nyukitanyia.

7Keli untu akona lʼatei anyu, leli la ukambi lakamba kana lalama ekoko, lamʼayuya ukambi uma lʼekambo, ku ndi ayuwutela ati: Utadjashi, utali ma? 8Ndi hawutela ati: Onongoswele diango dia dimi nde, olote uya, unkambeli ulimu, edja ndu lamʼayumushila nde la no, ku lʼokongo diku we ayole, ayono? 9Undi, ndi ayuka ukambi uku lusaka ne dia ndi akatshi akambu wakandosengola? 10Okone ndu nyu, lamʼayunyushidiya ntsha paka akambu tshe wakawanyosengola, kanyuti nyati: Ekambi wʼanyanya mbesu. Shu tambutsha akambu waki la su dia ntsha.

 

11Lamʼakawatatshokaka lu mbuka utsha la Jerusalema, Jesu aketi lʼasa Samariya la Ngalili. 12Lamʼakandakumi lu ngelu kemotshi, apami dikumi akanga a sudi wakahumana la ndi. Vo wakemala tshalula. 13Ku vo wakuwelela vati: Jesu, Uwandji, utuki ketshi! 14Lamʼakandawaenyi, ndi akawatela ati: Nyutshu, nyutuyaenya le elombedi.17:14 Lew. 14:1-32. Lamʼakawatatshokaka, vo wakakono. 15Lamʼakenyi otoi awo omotshi ati: Dimi lambokono, ndi akakalula, ayatumbula Unyashungu la diui dia wulu. 16Ndi akayakosha lʼekulu wa Jesu, akawuki lusaka. Usi Samariya kakindi. 17Jesu akûkaluya diui ati: Aha antu dikumi mbokonwe, keli, lendʼeli divwa? 18Nduku untu ukina lukaludi dia ndjutumbula Unyashungu, tshikima ongendangenda one? 19Ndi akawutela ati: Eto, utshu. Mbetawo kaye kambukokonoya.

 

(Mat. 24:23-28, 36-41)

20Lamʼakambula Afarise Jesu vati. Etena kakona kayuya diulelu dia Unyashungu? Ndi akakaiuya diui ati: Diulelu dia Unyashungu hadiuyayi la tulimbitelu tʼantu mbeya. 21Ntu, vo hawuta vati: Enda, dio ne lane! kana ati: Dio diku leku! Keli diulelu dia Unyashungu dieko lʼetema anyu.

22Ku Jesu akatela ambeki andi ati: Nshi yayuya, lamʼayunyulanga mena lushi otoi uma lu nshi ya Onʼa untu, ku hanyulenyi. 23Antu wayunyutela vati: Enda, lene! kana ati: Enda lane! Tanyutshokaki, tanyayelaki. 24Uku atungadimoka dingadimu dia ndjadi lu leki lomotshi lʼulungu ku dio menama lu leke lukina lʼulungu, wuhu ako mbayuyala Onʼa untu lu lushi landi. 25Keli la ntundu, dieli la ndi dia nsuwa esuwa efula la ntunama le wa lu loiunga lone. 26Uku akayala lu nshi la Noa,17:26 Etat. 6:5-8. mbayuyala lu nshi ya Onʼa untu. 27Vo wakalekaka, wakanokaka, wakatshukaka, wakatshukamaka edja ndu lushi lakoto Noa lu watu a luudu, ku elula kakayi, kakadiaki tshe.17:27 Etat. 7:6-24. 28Wuhu ako mbakayala ndu lu nshi ya Lota17:28 Etat. 18:20—19:25. — vo wakalekaka, wakanokaka; wakasumbaka, wakasundjaka; wakuneka, wakahikaka mvudu. 29Keli lushi lakatshu Lota uma la Sodoma, dja ya tsho yakahulo uma lʼulungu, yakadiaki vo tshe — 30wuhu oso mbayuyala lushi layushwama Onʼa untu. 31Lu lushi lako, naka untu eko ladiku dia luudu, la diango diandi dieko lʼetei, ndi takitaki dia ntuditundja; pupu ndu le untu leli lʼekambo, ndi takalulaki.17:31 Mat. 24:17-18; Mak. 13:15-16. 32Nyuho wadi a Lota.17:32 Etat. 19:26. 33Untu tshe layanga nkundja lumu landi, ayulushisha. Keli untu tshe lashisha lumu landi, ayulushimbela.17:33 Mat. 10:39; 16:25; Mak. 8:35; Luk. 9:24; Joa. 12:25. 34Dimi lambunyutela nti: Utshu oso, apami ahendi wayuyala lu tangi: wayosa omotshi, wayutshika ukina. 35Amantu ahendi wayohela diango kame: wayosa omotshi, wayutshika ukina. 17:35 “17:36” nfundamaka paka la tshina dia page, aha lʼatei, lu abuku amotshi. 36Apami ahendi wayuyala lʼekambo: wayosa omotshi, wayutshika ukina. 37Vo waktikaluya diui vati: Khumadiondjo, lendi na? Ndi akawatela ati: Lenʼeli udu, katusanganaka wapungu.

LUKA 18

1Jesu akawaukela wela dia vo nombaka nshi tshe, aha mpeko. 2Ndi akati ati: Lʼusumba omotshi kaki umbadi, laki kumbukaka Unyashungu woma, ndu laki konemiaka untu. 3Ndu wadi aki udu aki lʼusumba ako. Ndi akayakaka le ndi, akataka ati: Onsombwele le utunyi ami. 4Nshi motshi, ndi kunanga. Keli lʼokongo diku, ndi akati lʼutema andi ati: Kuyanga dimi haluki Unyashungu woma, ndu halalemia untu, 5ku ne dia wadi aki udu one ambomenya pa, dimi layosombweya. Ndi atukonembia la olendolendo andi. 6Khumadiondjo akati ati: Nyulungi, okone wata umbadi a kolo, 7Ku Unyashungu hasombweya esonami andi watulelelaka ndu la yanyi ndu lʼutshu, ndi atakungiyaka edja uka? 8Dimi lambunyutela nti: Ndi ayasombweya esadi. Keli lamʼayuya Onʼa untu, ndi ayutana mbetawo la kete?

 

9Ndu wela one mbakandukela amotshi, wakayalungamelaka vati: Ololo mbesu, wakanyolaka akina. 10Apami ahendi wakoto lu etemwelo dia ntolomba. Omotshi aki Ufarise, ukina aki ulungudi wʼelambu. 11Ufarise akemala, akalombe ndame okone ati: Unyashungu, lambukuka lusaka ne dia dimi kema uku antu akina, apotwanyi, akanga a lukesu, amunanyi, kana uku ulungudi wʼelambu one. 12Dimi latukilaka mbu ya nde tena pendi lu lubingu la lubingu. Dimi latukimoka etenyi ka dikumi uma lu diango tshe diatumukundjaka. 13Keli ulungudi wʼelambu akemala tshalula, kunanga mbedia ashu andi, keli akayakomola lu tulu; akati ati: Unyashungu, umbuki ketshi, dimi untu a kolo! 14Dimi lambunyutela nti: Untu oso akatshu lakandi uyindjami ndeka ukina; ne dia untu tshe layambiya, ayukitshakitshama; keli one layakitshakitsha, ayumbiyama.18:14 Mat. 23:12; Luk. 14:11.

 

(Mat. 19:13-15; Mak. 10:13-16)

15Vo wakayi la tokendakenda le Jesu, dia ndi mbananda. Keli lamʼakenyi ambeki dikambu diako, vo wakahangwela. 16Keli Jesu akawaeti; akati ati: Nyete tokendakenda wayi le mi, tanyasikeki, ne dia diulelu dia lʼulungu dieko diʼantu uku vo. 17Mete kanyutelami nti: Untu tshe lahalungula diulelu dia Unyashungu uku kiendakenda, keti ndi hoto loko.

 

(Mat. 19:16-30; Mak. 10:17-31)

18Umbuledi omotshi akambula Jesu ati: Umbetsha wʼololo, kayumutsha na, dia nkita lumu la pundju? 19Jesu akûkaluya diui ati: Okoko wana wambetaye wati: Ololo? Nduku leli ololo, paka Unyashungu ndame. 20We mbeyaka elembe, ati: Tunanaki,18:20 Etum. 20:14; Euh. 5:18. Tudiakaki.18:20 Etum. 20:13; Euh. 5:17. Tuvaki.18:20 Etum. 20:15; Euh. 5:19. Tumamanyiaki.18:20 Etum. 20:16; Euh. 5:20. Olemia sho la nyo.18:20 Etum. 20:12; Euh. 5:16. 21Ndi akati ati: Akambu aso tshe mbatumutshaka umaka nshi yami ya dikenda. 22Keli lamʼakuki Jesu aui aso, ndi akawutela ati: Dikambu otoi mbambutshikala! utusundja dieli la ye tshe, utudikaheli akanga a weula, ku we ayuyala la diango lʼulungu. Kuyi, kundjeli. 23Keli lamʼakanduki aui aso, ndi akanyangi efula, ne dia ndi aki la ongonyi efula. 24Jesu akawendi; akati ati: Eko dikambu dia wuki, dia akanga wʼengonyi mboto lu diulelu dia Unyashungu! 25Eotwelo ka kamelo lʼushu wa tedi, kambuleka eotwelo ka kanga ongonyi lu diulelu dia Unyashungu dikambu dia tshitshe. 26Wane wakuki aui ako, wakati vati: Ku akona ayeya nshimbamela? 27Keli ndi akawatela ati: Akambu weli wulu le antu, kema wulu le Unyashungu. 28Ku Petero akati ati: Enda, shu takatshiki tshe, tambukuyela. 29Ku ndi akawatela ati: Mete kanyutelami nti: Nduku untu lambutshika luudu, kana wadi, kana anangu, kana ambutshi, kana ana ne dia diulelu dia Unyashungu, 30ahulungula diango diuleki efula lʼetena kene, ku lʼetena kayayi, ndi ayulungula lumu la pundju.

 

(Mat. 20:17-19; Mak. 10:32-34)

31Jesu akose ambeki dikumi la ahendi, akawatela ati: Nyulungi, shu ane tutatshu utsha la Jerusalema, akambu tshe wakafundi amvutshi, wayushidiyama le Onʼa untu. 32Ne dia ndi ayukimwama le asi wedja, ayosokama, ayotengama, ayutamela soi. 33Vo wayokomola, wayudiaka. Lushi la satu, ndi ayulo. 34Vo kunshihudia nduku dikambu lʼatei wʼakambu aso. Aui ako wakawashamela; vo kumbeya akambu wakandati.

 

(Mat. 20:29-34; Mak. 10:46-52)

35Jesu akasukana lasuki la Jeriko. Kanga tshungu omotshi akadjashi lʼumamu a mbuka, alomba diango. 36Lamʼakanduki ului wʼantu wateti, ndi akambula dikambu diambutshama. 37Vo wakawutela vati: Jesu yʼusi Nazareta kateti. 38Ndi akawelela wulu ati: Jesu, Kanula ya Davidi, umbuki ketshi! 39Ku waku waketi la ntundu, wakuhangwela vati: Olembohali! Keli ndi akahangohango wulu ati: Kanula ya Davidi, umbuki ketshi! 40Ku Jesu akemala, akati dia vo mbela le ndi. Lamʼakandasukana, ndi akawumbula ati: 41Alangaye dimi nkutshela na? Ndi akati ati: Khumadiondio, nsena mbalangami. 42Jesu akawutela ati: Osene; mbetawo kaye kambukokonoya. 43Kemʼedja, ndi akasene, akuyeli, atatumbula Unyashungu. Ku antu tshe, lamʼakawenyi dikambu diako, wakandula Unyashungu.

LUKA 19

1Jesu akakumi la Jeriko, akatetaka. 2Untu omotshi aki leko, lukumbu landi Zakeyo. Ndi aki kapita ka elungudi wʼelambu ndu kanga ongonyi. 3Ndi akayangi mena Jesu uku akindi, keli ndi kumbeya mbena lʼatei wʼului wʼantu, ne dia ndi aki mundumundu. 4Okone ndi akalawo la ntundu, akatumbela lʼutamba wa lukhumu dia ntuwena, ne dia Jesu akayangi mbeta laawo. 5Lamʼakakumi Jesu lu dihuli diako, ndi akawalela; akawutela ati: Zakeyo, usamanya, uhulo; dieli la mi dia mpanga lakaye elo. 6Ku ndi akahulo esadi, akulungula la ongenongeno. 7Lamʼakawenyi dikambu diako, vo tshe wakangunanguna vati: Ndi ambutsho dia niuhanga laka untu a kolo. 8Zakeyo akemala, akatela Khumadiondjo ati: Ulungi, dimi layusha akanga a weula etenyi ka hendi ka diango diami. Naka lakose engo uma le untu lʼumamanyia, dimi layuwukaluya diango nei nei. 9Jesu akawutela ati: Panda kambuya lu luudu lone elo! ne dia ndu ndi keli kanula ya Abarahama. 10Ne dia Onʼa untu akayi, dia ndjuyanga la ndjushimbela wane wakashisho.19:10 Mat. 18:11.

 

11Lamʼakawukaka akambu aso, Jesu akahe diui, akawaukela wela, ne dia ndi aki lasuki la Jerusalema, ndu ne dia vo wakakani vati: Diulelu dia Unyashungu diayene esadi. 12Untu omotshi, kanga lukumu, akatshu lu kete kina yʼetali dia ntuyalungwela diulelu, ati: Kakaluli. 13Ku ndi aketi ekambi andi dikumi, akawasha mina dikumi; akawattla ati Nyutshi la yo ukanda, edja ndu lamʼayumukalula. 14Keli wudja andi wakuhetsha; wakatumi akendji lʼokongo andi vati: Shu hatulangi untu one ntulela. 15Lʼokongo diku wa nungula diulelu, ku lamʼakandakalula, ndi akati ati: Nyeti ekambi eku wakamasha falanga, dia dimi mbeya diango diakamakundja waho lʼukanda. 16One la ntundu akayi le ndi, akati ati: Khumadiondjo, mna kaye kambuta mina kina dikumi ladiku. 17Ndi akawutela ati: Kawo, ve ukambi wʼololo! ne dia we akatanema la kolamelu lu diango diuleki tshitshe, uleli esumba dikumi. 18One la hendi akayi, akawutela ati: Khumadiondjo, mina kaye kambuta mina kina tshanu. 19Ndi akawutela ati: Ndu we, uleli esumba etanu. 20Ukina akayi, akati ati: Khumadiondjo, enda, mina kaye kene, kakamumbi lu tshambala. 21Dimi lakakuki woma, ne dia we eko kanga ngala. We atototongonaka kene kakiye kunkitsha; ndu atunaka kene kakiye kumune. 22Ndi akawutela ati: Uma lu aui aye, mbayumukamia, we ukambi a kolo! We akeyi wati: Dimi leko kanga ngala, latotongonaka lamʼakimi kunkitsha, ndu latunaka lamʼakimi kumune? 23Ya ukundi akiye kunkitsha lufalanga lami lu dihuli diʼesombanyelu, tshiki lutuyulosa kame la waho? 24Ku ndi akatela wane wakemadi lasuki ati: Nyokosole mina kandi, nyusha kanga mina dikumi. 25(Ku vo wakawutela vati: Khumadiondjo, ndi la mina dikumi!) 26Dimi lambunyutela nti: One leli a, wayuwusha; keli one laha la, wayokosola ndu kene keli la ndi.19:26 Mat. 13:12; Mak. 4:25; Luk. 8:18. 27Keli atunyi ami waki kunanga dimi mbaulela, nyuwaela lindu, nyuyadiaki la ntundu kami.19:27 Mat. 25:14-30.

 

(Mat. 21:1-11; Mak. 11:1-11; Joa. 12:12-19)

28Lamʼakashili Jesu mvuta aui aso, ndi aketi la ntundu utsha la Jerusalema. 29Lamʼakakumi Jesu lasuki la Betefange la Betaniya, lʼukungu wetawo vati: Ukungu wʼEweli, ndi akatumi ambeki ahendi, 30ati: Nyutshu la ngelu keledinyu. Lamʼayunyukuma leko, nyu nyayutana osongo a punda wahatahema untu, ukelekami. Kanyukelekuli, kanyuyi la wo. 31Naka untu ayunyumbula ati: Dikambu kuna diukelekulanyu? Kanyuwuteli nyati: Khumadiondjo kuhumba. 32Ku wane wakandatumi wakatshu, wakutani uku akandawatela. 33Lamʼakawakelekulaka osongo a punda, akanga awo wakawamnula vati: Dikambu kuna diakelekulanyu osongo a punda? 34Vo wakati vati: Khumadiondjo kuhumba. 35Ku vo wakayi la wo le Jesu. Vo wakahe ahondo awo ladiku dia osongo a punda, ku wakahemia Jesu. 36Lamʼakandatatshokaka, antu wakali ahondo awo lu mbuka. 37Lamʼakandasukana lasaki la Jerusalema, lʼuhulula wʼUkungu wʼEweli, ului wʼambeki tshe wakatatela ngenangena, la mandula Unyashungu, wahangohango ne dia akambu wa mamba tshe wakawenyi. 38Vo wakati vati: Khumʼekanga luyi lu lukumbu la Khumadiondjo, atumbwami!19:38 Esam. 118:26. Ki kayali lʼulungu, la lutumbu layali ladiku dia ulungu! 39Afarise amotshi uma lʼului wʼantu wakawutela vati: Umbetsha, uhangweli ambeki aye. 40Ndi akâkaluya diui ati: Dimi lambunyutela nti: Naka vo wayolembohala, ave wayuhangohango.

 

41Lamʼakasukana Jesu, ndi akenyi usumba, akulelela. 42Ndi akati ati: Utuyeya weme lu lushi lʼelo, akambu watutungaka ki li! Keli kakiane, akambu ako wambushama uma lu ashu aye, 43ne dia nshi yayuyala le ye, yayukutshimela atunyi aye lungeli. Vo wayukutshimba, wayukukhuka. 44Vo wayukuhumanya la kete, ndu we ndu anʼaye weli lʼatei aye. Vo hawutshika dive ladiku dia dikina lʼatei aye, ne dia we heyi etena kayukokendela akambu aso.

 

(Mat. 21:12-17; Mak. 11:15-19; Joa. 2:13-22)

45Jesu akoto lʼetemwelo, akatatela mbitshanya waku wakasundjaka diango. 46Ndi akawatela ati: Ambufundama ati: Luudu lami layuyala luudu la dombelo,19:46 Is. 56:7. keli nyu nyambuluhiluya wuku wʼapotodi.19:46 Jer. 7:11.

47Jesu aketshaka antu la lushi la lushi lu etemwelo.19:47 Luk. 21:37. Keli elombedi a waki la afundji la dihangamendi wakayangi mbudiaka. 48Keli vo kumbeya ntsna nduku dikambu, ne dia antu wakumamema, wakahukamaka aui andi.

LUKA 20

(Mat. 21:23-27; Mak. 11:27-33)

1Lushi lomotshi, lamʼaketshaka Jesu ante lu etemwelo ndu lamʼakandasambishaka lukumu lʼololo, elombedi a waki la afundji la dikumanyi wakutumbela. 2Vo wakawumbula vati: Ututeli, uma lu wulu akona watuyutshaka akambu ane? Akakusha wulu one na? 3Ndi akâkaluya diui ati: Ndu dimi layunyumbula umbula omotshi, keli kanyukadimweli. 4Batiza ka Joani akayi uma lʼulungu kana uma le antu? 5Vo wakakaui yimba vati: Naka shu tayuta shati: Uma lʼulungu, ndi ayuta ati: Okoko wana akinyu kumbetawo? 6Keli naka shu tayuta shati: Uma le antu, antu tshe wayutuka ave, ne dia vo mbetawoka vati: Umvutshi mbakindi. 7Ku vo wakûkaluya diui vati: Hateyi uma lene akito. 8Jesu akawatela ati: Ndu dimi, halanyutela uma lu wulu akona watshami akambu ane.

 

(Mat. 21:33-46; Mak. 12:1-12)

9Jesu akatatela mbuka antu wela one ati: Untu akakambi ekambo kʼelua,20:9 Is. 5:1. akakitshikela ekambi, akatshu lu kete kina la ntudjase edja. 10Lamʼakakuki eleku kʼelua, ndi akatumi ukambi andi omotshi le ekambi wʼekambo, dia vo mbusha elua uma lʼekambo. Keli ekambi wʼekambo wakokomola, wakiikaluya anyanya. 11Ku ndi akatumi ukambi andi ukina. Vo wakokomola ndu ndi, wakotenge, wakûkaluya anyanya. 12Ndi akatumi ndu la satu. Vo wakokote puta ndu ndi, wakawutshanya. 13Ku kanga ekambo akati ati: Kayumutsha na? Dimi layutuma onʼami la ngandji, kana vo wayolemia, undu. 14Keli lamʼakawenyi ekambi wʼekambo, vo wakatanela vati: Ukito uku. Nyeso tudiaki, sangu diayali diasu. 15Ku vo wakusukula uma lʼekambo, wakudiaki. Wuhu akona wayatshela kanga ekambo? 16Ndi ayuyulanya ekambi ako, ayusha akina ekambo kandi. Lamʼakawuki diui so, vo wakati vati: Unyashungu ashimbi dikambu dia wuhu oso! 17Keli ndi akawaendi tee, akawambula ati: Na kitshimudi ka diui ne, diakafundama ati:

Dive diakatuni ambiki wa luudu, Diakayala ote wa tshuku?20:17 Esam. 118:22.

18One tshe layoko lu dive so, ayuhimbohimbo tenyi, keli untu layudiokwela, diayuhandjula uku ditshu.

 

(Mat. 22:15-22; Mak. 12:13-17)

19Afundji la elombedi a waki wakeyi vati: Jesu, shu mbukedindi wela oso. Vo wakayangi mbunda lu unya ako, keli vo wakuki antu woma. 20Vo wakokeshanya, wakatumi atopi dia vo ndjafanya uku antu wʼololo, dia mbosa aui andi la mbukimo le umbuledi, kanga diulelu. 21Vo wakawumbula vati: Umbetsha, shu mbeyaka shati: We atutaka ndu atetshaka antu ololo; we kema la shonodi, keli we atetshaka antu mbuka ka Unyashungu lu mete. 22Eko ekila shu nambula Kayisa, kana kema? 23Keli ndi akeyi lukesu lawo, akawatela ati: 24Uhunyumenya denariyo. Kanga efanelu la efundelu keli loko? Vo wakati vati: Ka Kayisa. 25Ndi akawatela ati: Okone nyusha Kayisa diango dia Kayisa. Nyusha Unyashungu diango dia Unyashungu. 26Ku vo kumbeya munda Jesu lu aui andi la ntundu kʼantu. Vo wakambi dia diui diakandakaluya, ku wakalembohala ki.

 

(Mat. 22:23-33; Mak. 12:18-27)

27Asaduke, wane watutaka vati: Eulwelu kʼuma lu nyoi kemako,20:27 Etsh. 23:8. wakayi le Jesu. 28Vo wakawumbula vati: Umbetsha, Mose akatufundela ati: Naka untu ambuvo, ambutshika wadendi, aha la ona, onangu kakitani la ndi, kawulweli luhanga.20:28 Euh. 25:5. 29Anangu esambeli wakiko. Lʼenundu akatshuki wadi, akavu, kuntshika ona. 30La hendi akakitana la wadendi, akavu kuntshika ona. 31Ndu la satu akakitana la ndi. Okone vo tshe esambeli wakavu, kuntshika ana. 32Lʼokongo awo, vo tshe, ndu umuntu akayuvo. 33Okone lu eulwelu kʼuma lu nyoi, ndi ayuyala wadi a na! ne dia ndi aki wadewo vo esambeli. 34Jesu akawatela ati: Ana wa lʼetena kene watutshukaka, ndu watutshukamaka. 35Wane weli ololo, wayukuma lʼetena kako la lu eulwelu kʼuma lu nyoi, vo hawutshuki kuyanga ntshukama. 36Vo haweyi mvo ntu, ne dia vo wambedima la andjelo. Vo weli ana wa Unyashungu, ne dia vo weko ana wʼeulwelu kʼuma lu nyoi. 37Keli wavo watulwamaka, ndu Mose akatenya dikambu diako lu ahuli wata dikambu dia dikumbu, lene akandeti Khumadiondjo ati: Unyashungu a Abarahama, Unyashungu a Isaka, Unyashungu a Jakoba.20:37 Etum. 3:6. 38Ndi kema Unyashungu a wavo, keli ndi eko Unyashungu a wasena, ne dia tshe weko la lumu le ndi. 39Afundji amotshi wakâkaluya diui vati: Umbetsha, ololo mbutshiye. 40Lʼokongo wa akambu aso, vo kundjala la dihunga dia mbumbula akambu akina ntu.

 

(Mat. 22:41-46; Mak. 12:35-37)

41Jesu akawambula ati: Ukundi watawo vati Kristu eko kanula ya Davidi? 42Ne dia Davidi ndame akati lu Buku diʼEsambu ati:

Khumadiondjo akatela Khumemi ati:

Udjase lu lunya lami la pami,

43Edja ndu lamʼayumete atunyi aye kihuna kʼekulu aye.20:43 Esam. 110:1. 44Davidi ndame mbetaka ati: Khumadiondjo; ya ukundi wendi kanula yandi na?

 

(Mat. 23:1-36; Mak. 12:38-40; Luk. 11:37-54)

45Antu tshe wakuki lamʼakatela Jesu ambeki andi ati: 46Nyewo afundji! Vo watulangaka nkendakenda lʼekutu wʼetali; watulangaka antu mbaemula lu tuka, la mbasha die diuleki ame ta lu temwelo, ndu ahuli wa nemo lu alambu; 47vo watohotolaka wadi waki edu mvudu, ku dia vo nkesa antu, mbatuwolombaka alombelo wʼetali. Vo mbayuleka manyema!

LUKA 21

(Mak. 12:41-44)

1Jesu akedia ashu, akenyi akanga wʼengonyi wadja eshasha awo lʼekitshelu. 2Ndi akenyi ndu wadi aki udu, kanga wula, adja ekinga ehendi loko. 3Ndi akati ati: Wadi aki udu, kanga wula, akadjisha ushasha wuleki eshasha wudjishawo, vo tshe. 4Ne dia vo wakadjisha eshasha awo uma lʼefula ka diango dieli la wo; keli ndi, uma lu wula andi, mbudjishandi kene tshe kaki la ndi, kakandahumbi ndjakimanyia.

 

(Mat. 24:1-2; Mak. 13:1-2)

5Lamʼakati antu amotshi vati: Etemwelo ambusangema la ave wʼololo la eshasha uma le antu, Jesu akati ati: 6Dia diango dienanyu diku, nshi yukuyala, lamʼahutshikala nduku dive ladiku dia dikina, wayahandjula tshe. 7Ku vo wakawumbula vati: Umbetsha, lushi lakona layuyala akambu aso? Djimbitelu yakona yayutena lamʼayuyala akambu aso lasuki la ndja? 8Ndi akati ati: Nyewo, nyatukunganyiama; ne dia efula wayuya lu lukumbu lami, wayuta untu lʼuntu ati: Dimi keli ndi; ndu ati: Etena kaya suki. Tanyayelaki. 9Lamʼayunyuka kumu yʼata la ya mindju, tanyukaki woma, ne dia dieli la akambu aso dia ndja la ntundu, keli ekumelu huyala esadi.

10Jesu akawatela ati: Wudja wayolosha wudja ukina. Diulelu diayolosha diulelu dikina. 11Adidimu wa mamba wa kete wayuyala efula. Ndjala ya kasha yayuya, ndu elandu lu dihuli la dihuli. Weoma a mamba wayuyala la tulimbitelu ta waki uma lʼulungu. 12Keli la ntundu ka akambu aso tshe watayi, vo wayunyunda, wayunyusuya, wayunyukimo lu temwelo la lu mvudu ya kanu. Vo wayunyela la ntundu ka khumi ya dikanga la embuledi ne dia lukumbu lami. 13Etena keso, kayuyala etena ka nyu ndjala emenyi ami le antu. 14Okone nyusanguya lʼetema anyu, tanyukanaki yimba la ntundu uku ayunyukaluya aui, 15ne dia dimi layunyusha unyo ndu yimba yaheya atunyi anyu mpumana la yo, kana nkaluya diui.21:15 Luk. 12:11-12. 16Keli nyu nyayukimwama uma le ambutshi anyu, uma le anengenyu, ndu uma le wane wuto lanyu. Vo wayudiaka amotshi lʼatei anyu. 17Antu tshe wayunyuhetsha ne dia lukumbu lami. 18Keli nduku wondji a divu dia lʼete anyu wayushisho. 19Uma lu memakana kanyu, mbayunyushimbela nyumu yanyu.

20Lamʼayunyena elui wʼalimbi wambudinga Jerusalema, kanyeyi nyati: Elanyelu kayo kaya suki. 21Lushi lako, wane weli la Judiya, kawulawo lʼekungu; wane weli lʼatei a ngelu, kawumo; wane weli lʼesui, tawuyakaki loko. 22Ne dia nshi sho, yeko nshi ya nsomboya,21:22 Hos. 9:7. dia akambu tshe wufundami nshidiyama. 23Fono kayayi le wane weli la waemi! la le wali walomia ana lu nshi sho! Ne dia asui a wulu wayuyala la kete, kele kayuyala le antu aso. 24Ku vo wayudiakema la tombo, wayotolama fumbi lu wedja tshe. Asi wedja wayohotshahotsha Jerusalema, edja ndu etena kʼasi wedja ambukuka.

 

(Mat. 24:29-31; Mak. 13:24-27)

25Tulimbitelu tayuyala lu unya, lu ngondo ndu lu toto.21:25 Is. 13:10; Ezek. 32:7; Joe. 2:31; Eny. 6:12-13. Fono kʼasi wedja kayuyala la kete. Vo wayukanana, ne dia luhelu lʼashi a wuki la asukhu. 26Antu wayuka yimba tshimba, ne dia woma la elungamelu kʼakambu wayayi la kete, ne dia diango dia wulu dia lʼulungu diayusutshasutshama. 27Ku vo wayena Onʼa untu ayayi lu dingi21:27 Dan. 7:13; Eny. 1:7. la wulu la lutumbu la wuki. 28Keli lamʼayutatela akambu aso ndja, kanyuwaleli, kanyedia ete anyu; ne dia etshungwelu kanyu kaya suki.

 

(Mat. 24:32-35; Mak. 13:28-31)

29Jesu akawaukela wela ati: Nyendi utamba a fingu, ndu etamba ekina tshe. 30Lamʼatuwutumbiaka songusongu, nyu nyame nyatenaka ndu nyateyaka nyati: Eleku ka owo kaya suki. 31Osoku ndu nyu, lamʼayunyena akambu ane wambuyala, nyayeya nyati: Diulelu dia Unyashungu diaya suki. 32Mete kanyutelami nti: Wa lu lolonga lone hawushila, tshikima akambu ane tshe wambushidiyama. 33Ulungu la kete wayushila, keli aui ami hawushila.

34Keli nyuyalamaki, ne dia etema anyu watukuyala wutshu la dishi, la edjwelu ka wanu la edinganu wa lumu lone. Lushi loso, latukuya le nyu shashimuya, uku shuni ya djunga, 35ne dia osoku mbayuya lushi lako le antu tshe wudjashi ladiku dia kete. 36Keli nyendaki, nyolombaki lʼosengosengo dia nyu mpanda lu akambu aso tshe wayuya, la dia memala la ntundu ka Onʼa untu.

37Jesu aketsha antu lu temwelo nshi tshe.21:37 Luk. 19:47. Ndi akatshokaka etshu tshe, aketamaka lʼukungu, wetawo vati: Ukungu wʼEweli. 38Antu tshe wakayakaka le ndi kʼolomo la pindju lu etemwelo, dia ndjuka aui andi.

LUKA 22

(Mat. 26:1-5, 14-16; Mak. 14:1-2, 10-11; Joa. 11:45-53)

1Dambu dia Ma Diaha la Edya Lu diaki lasuki, dietawo vati: Elekanelu.22:1 Etum. 12:1-27 2Elombedi a waki la afundji wakayangi wuhu wa ndjaka Jesu, ne dia vo wakukaka antu woma.

 

3Satana akoto lʼutema a Judasi, letawo vati: Isakariyote, omotshi a lu dikumi la ahendi. 4Ndi akatshu, akatusanga la elombedi a waki la elombodi wʼalimbi lulimi wuhu wa ndi mbukimo le wo. 5Ku vo wakangenangena, wakulaki dia mbusha falanga. 6Ku ndi aketawo, akayangi etena kʼololo ka ndi mbakimwelandi, lamʼaha elui wʼantu laawo.

 

(Mat. 26:17-25; Mak. 14:12-21; Joa. 13:21-30)

7Lushi la Ma Diaha la Edya lakakuki, lakawahumbaka ndjaka osongo wʼokoko wa dambu diʼElekanelu. 8Jesu akatumi Petero la Joani, akawatela ati: Nyutshu, nyututolongoswele dambu diʼElekanelu, dia shu ndjole. 9Vo wakawumbula vati: Lendi alangaye shu ntudilongosola? 10Ndi akawatela ati: Nyulungi, lamʼayunyukuma lʼusumba, nyu nyayuhumana lʼuntu ayembe mbaka kʼashi, kanyuyeli utsha lu luudu layundoto. 11Kanyuteli kanga luudu nyati: Umbetsha ambukumbula ati: Lendʼeli luudu lʼangendangenda, dia dimi ndjole dambu diʼElekanelu la ambeki ami? 12Ku ndi ayunyenya luudu la wuki la ladiku, lolongoswami. Nyututolongoswele loko. 13Ku vo wakatshu, wakatani uku akandawatela. Vo wakalongosola dambu diʼElekanelu.

14Lamʼakakuki unya, ndi akadjase, ndu atumami wakadjase kame la ndi. 15Ndi akawatela ati: Dimi lambuleka nanga nde la nyu dambu ne diʼElekanelu, ntundu latasuwi. 16Dimi lambunyutela nti: Dimi handjole ma ne ntu, edja ndu dio diayushidiyama lu diulelu dia Unyashungu. 17Ku ndi akose dikoho; lamʼakanduki lusaka, ndi akati ati: Nyudiose, nyudikahani. 18Dimi lambunyutela nti: Umaka kakiane, dimi handjono uma lʼelua wʼekodi, edja ndu diulelu dia Unyashungu diambuya. 19Ndi akose ukama wa ma; lamʼakanduki lusaka, ndi akawatula, akawasha. Ndi akati ati: Dimba diami ne! 22:19 “22:19c—20” nfundamaka paka la tshina dia page, aha lʼatei, lu abuku amotshi. diambukimwama dikambu dianyu. Kanyutshaki okone, dia mbuhomi. 20Ndu lʼokongo wa ma dia dikolo, ndi akose dikoho; akati ati: Dikoho ne, dieli sheki yʼuyuyu22:20 Jer. 31:31-34. ya lu dikila diami, diambutshulwama dikambu dianyu. 21Nyulungi, lunya la one lafunga, leko la mi lu mesa.22:21 Esam. 41:9. 22Mete, On a untu ayutsho uku akawusanguya, Keli fono kayayi le one lufunga! 23Ku vo wakatatela mumbwana vati: Akona ukuki ntsha dikambu so?

 

24Tamu takatumbi lʼatei awo vati: Akona uleki wuki lʼatei asu?22:24 Mat. 18:1; Mak. 9:34; Luk. 9:46. 25Ndi akawatela ati: Khumi ya dikanga yʼasi wedja watuwaulelaka la ngala. Ku asi wedja watuwaetaka vati: Atshi wʼololo. 26Keli nyu, tanyuyalaki osoku. One lunyuleki wuki, ayali uku kushenyu; la olombodi, ayali uku ukambi anyu.22:26 Mat. 23:11; Mak. 9:35. 22:26 Mat. 20:25-27; 10:42-14. 27Uleki wuki na, one ludjashi lale ma, kana one lukambela ulimu? Aha one ludjashi lale ma? Keli dimi leko lʼatei anyu uku ukambi.22:27 Joa. 13:12-15.

28Keli nyu nyambutshikala la mi lʼehimba ami. 29Dimi lambunyusha diulelu uku akambisha Papa, 30dia nyu nde la no lu mesa ami lu diulelu diami. Nyu nyayudjase lu kiti ya diulelu, nyayulumbuya wedja dikumi la ehendi wa Isariyele.22:30 Mat. 19:28.

 

(Mat. 26:31-35; Mak. 14:27-31; Joa. 13:36-38)

31Simona, Simona, ulungi, Satana akalombe dia nkosa, dia nkuyungula uku epunga, 32keli dimi lakakolombela, dia mbetawo kaye tashilaki. Lamʼayuyukadimo, kushikike anyaye. 33Ku ndi akawutela ati: Khumadiondjo, dimi lambuyalongosola dia itsho la ye lu lukanu ndu lu nyoi. 34Ku Jesu akatela Petero ati: Elo, lekeka lateki, we ayumanguna tena satu wati: Halaweyi.

 

35Jesu akawambula ati: Lamʼakamanyutumi aha la tapa, aha la diutu, aha la sabata,22:35 Mat. 10:9-10; Mak. 6:8-9; Luk. 9:3; 10:4. nyu nyakahumbi engo? Vo wakati vati: Kema. 36Ndi akawatela ati: Keli kakiane, one leli la tapa, adiose, ose ndu diutu; one laha la yombo asundja koti diandi, ayisumbi. 37Ne dia dimi lambunyutela nti: Dieli la diui diufundami nshidiyama le mi, ati: Ndi akalen kame la antu wa kolo,22:37 Is. 53:12. ne dia aui wa dikambu diami wayushidiyama. 38Vo wakawutela vati: Khumadiondjo, enda, tombo tuhendi tone. Ku ndi akawatela ati: Ambukuka.

 

(Mat. 26:36-46; Mak. 14:32-42)

39Jesu akatumbi, akatshu lʼUkungu wʼEweli, uku aki etshelu kandi. Ku ambeki andi wakuyeli. 40Lamʼakandakumi lu dihuli diako, ndi akawatela ati: Nyolombaki, nyutukoto lu ehimba. 41Ku ndi akangana uma le wo tshalula, yukuki untu mbuka lowoko la dive. Ndi akakhuse adui, akalombe. 42Ndi akati ati: Papa, naka we nangaka, uminyiya dikoho ne. Kuku aha uku alangami, keli uku alangaye. 43Ku ondjelo omotshi akene le ndi uma lʼulungu, akukikitsha. 44Lamʼakindi lʼasʼeku la nyoi, ndi akaleki nomba wulu. Dungu diandi diakayala uku apopo a waki wa dikila mbalo la kete. 45Lamʼakandunela uma lu nomba, ndi akayi le ambeki, akatani lu djo, ne dia lunyangu. 46Ndi akawatela ati: Ngandi etamanyu na? Nyeto, nyolombe, nyutokoto lu ehimba.

 

(Mat. 26:47-56; Mak. 14:43-50; Joa. 18:2-11)

47Kamʼakateketaka Jesu, ului a wuki wʼantu wakayi, kame lʼuntu lak wetaka vati: Judasi, omotshi la lu dikumi la ahendi, ndi kaki lolombo lawo. Ndi akayi uya le Jesu la ndjononana la ndi. 48Keli Jesu akawumbula ati: Judasi, we kambufunga Onʼa untu lu enonanelu? 49Lamʼakenyi wane waki lasuki la ndi akambu wakayangi ntumba, vo waka-wumbula vati: Khumadiondjo, takote yombo? 50Omotshi akakote ukambi wʼolombedi a wuki, akuhimbula tui dia lunya la pami. 51Keli Jesu akâkaluya diui ati: Tanyutshaki wuhu uku ntu. Ku ndi akananda tui diandi, akokonoya. 52Ku Jesu akambula elombedi a waki, elombodi wa lʼetemwelo la dikumanyi, waku wakayi le ndi, ati: Nyu nyambuya la tombo la tukalimba uku uya le opotodi? 53Lamʼakimi la nyu la lushi la lushi lʼetemwelo,22:53 Luk. 19:47; 21:37. nyu kunsimbula anya anyu le mi. Keli unya anyu one, ndu wa wulu wa udjima.

 

(Mat. 26:57-58, 69-75; Mak. 14:53-54, 66-72; Joa. 18:12-18, 25-27)

54Vo wakandi Jesu, wakatshu la ndi. Vo wakoto la ndi lu luudu lʼolombedi a wuki. Keli Petero akayuyelaka tshalula. 55Lamʼakawongonya dja lʼatei a seke dia lukumbu, lamʼakawadjase kame, Petero akayudjase lʼatei awo. 56Umuntu ukambi wʼulimu akawenyi udjashi lʼusasi a dia, akawendi tee; akati ati: Ndu untu one kaki la ndi. 57Keli ndi akanguna, akati ati: Umuntu, dimi halaweyi. 58Ahuyala yema, ukina akawenyi; akati ati: Ndu we keli otoi awo omotshi. Keli Petero akati ati. Pami, aha dimi. 59Lamʼakaketi uku ushidi otoi, ukina akati ati: Mete, ndu untu one kaki la ndi, ne dia usi Ngalili kendi! 60Keli Petero akati ati: Pami, dimi haleyi lataye oso. Ku kamʼakandataka, lekeka lakeki. 61Khumadiondjo akasikiso, akendi Petero tee. Ku Petero akuho diui dia Khumadiondjo, diakandawutela ati: La ntundu ka lekeka lateki elo, we ayumanguna tena satu. 62Ku ndi akatumbi, akaleli wulu.

 

(Mat. 26:67-68; Mak. 14:65)

63Apami wakakimedi Jesu wakosoke, wakokomola. 64Ku vo wakukumbi ashu, wakawumbula vati: Uta diui. Ukokomodi na? 65Wakosongwela akambu akina efula, wakotenge.

 

(Mat. 26:59-66; Mak. 14:55-64; Joa. 18:19-24)

66Lamʼakahuto unya, ului wa dikumanyi dia wudja wakasangana kame la elombedi a waki la afundji. Vo wakatshu la ndi lʼelumbwelu; wakati vati: 67Naka Kristu keye, ututeli. Keli ndi akawatela ati: Dimi kunyutelaka, nyu hanyetawo; 68kunyumbulaka, nyu hanyunkaluya diui. 69Keli umaka kakiane, Onʼa untu ayudjase lu lunya la pami la Unyashungu. 70Ku vo tshe wakawumbula vati: Onʼa Unyashungu keye? Ndi akâkaluya diui ati: Tuku nyame aso wata, nyati: Dimi keli ndi. 71Ku vo wakati vati: Kakatahumbi emenyi ntu? Shu shame tambuka uma lʼunyo andi.

LUKA 23

(Mat. 27:1-2, 11-14; Mak. 15:1-5; Joa. 18:28-38)

1Ului awo tshe wakunela, wakayi la Jesu la ntundu ka Pilata. 2Vo wakatatela mbosongwela, vati: Takatani untu one angayula wudja asu, asike antu nambula Kayisa; ata ati: Dime keli Kristu, khumʼekanga. 3Pilata akawumbula ati: Khumʼekanga kʼasi Juda keye? Ndi akûkaluya diui ati: Wemʼoso ata. 4Ku Pilata akatela elombedi a waki la elui wʼantu ati: Dimi halenyi nduku munga le untu one. 5Keli vo wakatetemala mvuta vati: Ndi atotomboshaka antu, atetshaka lu Judiya tshe, uma la Ngalili edja ndu lu dihuli ne.

 

6Keli lamʼakuki Pilata diui diako, ndi akambula kana pami kako aki usi Ngalili. 7Lamʼakandeyi ati: Uma lu diulelu dia Herode kendi, ndi akutumi le Herode, laki ndame la Jerusalema nshi sho. 8Lamʼakenyi Herode Jesu, ndi akangenangena. Ndi akalangi mbena edja, ne dia ndi akukaka lukumu landi. Ndi akalungamela mbena atsha dikambu dimotshi dia mamba. 9Ndi akawumbula aui efula, keli Jesu kumbukaluya nduku diui. 10Elombedi a waki la afundji wakemala, wakosongwela wulu. 11Ku Herode la alimbi andi wakawonyola wakosoke. Vo wakolotsha dihondo dia nemo, ku ndi akûkaluya le Pilata. 12Herode la Pilata wakayala engenyi lushi loso, keli ntundu vo wakahetshanyaka.

 

(Mat. 27:15-26; Mak. 15:6-15; Joa. 18:39—19:16)

13Pilata aketi elombedi a waki la embuledi la antu kʼantu. 14Ndi akawatela ati: Nyu nyambuya la untu one le mi, nyati: Ndi kangayula antu. Enda, dimi lambuwumbula la ntundu kanyu, halenyi nduku munga le untu one lu akambu wosongwelanyu. 15Ee, ndu Herode kumbena la dikambu, ne dia ndi akûkaluya le su. Nyulungi, ndi kuntsha dikambu dia ndi mvo. 16Okone dimi layokomola, ku layutshungula. 17Diaki la ndi dia mbatshungwela usi lukanu omotshi lushi la dambu.

18Keli vo tshe wakahangohango kame vati: Utunyiya untu uku, ututshungweli Barabasi! — 19Wakadji Barabasi lu lukanu, ne dia ndi akatombosha asi usumba, akadiakana. 20Ku Pilata akateketa la wo ntu, akalangi ntshungula Jesu. 21Keli vo wakadji dielu vati: Udiaki lu utamba a mpeketanya! Udiaki lu utamba a mpeketanya! 22Ndi akawambula umbula a satu ati: Okoko wana, kolo kakona kutshindi? Dimi halawenyi la dikambu dia ndi mvo. Okone dimi layokomola, ku layutshungula. 23Keli vo wakatetemala mvuta la aui a wulu, wakalombe vati: Udiaki lu utamba a mpeketanya! Aui awo wakolembia. 24Ku Pilata akasambula; akati ati: Diatshami uku alombanyu. 25Ndi akatshungula one lakawadji lu lukanu ne dia ndi akatombosha antu ndu akadiakana, uku akawolombe. Keli ndi akakimo Jesu uku lulangu lawo.

 

(Mat. 27:32-44; Mak. 15:21-32; Joa. 19:17-27)

26Lamʼakawatatshokaka la Jesu, vo wakandi untu omotshi, lukumbu landi Simona, usi Kurene, lakayayakaka uma lʼusui, wakawahe utamba a mpeketanya dia ndi mbemba lʼokongo a Jesu. 27Ului a wuki wʼantu wakuyeli. Amantu wakayayakomolaka, wayaleli. 28Keli Jesu akasikiso le wo, akati ati: Ana amantu wa Jerusalema, tanyundelaki, keli nyuyaleli, nyuleli ndu anʼanyu. 29Nyulungi, nshi yayuya, yayuta antu vati: Amantu wa dikumba la etema wahuti ana, ndu awele wahalomia ana, weko la otshoko! 30Ku wayutatela mvutela akuna vati: Nyutokwele; ndu ekungu vati: Nyutukhukhume.23:30 Hos. 10:8; Eny. 6:16. 31Ne dia naka vo wambutsha akambu ane lamʼeki utamba uyuyu, ukundi ayuwutsha lamʼumawo?

32Wakatshu ndu la antu akina ahendi, atshi wa kolo, dia ntadiaka kame la ndi, 33Lamʼakawakumi lu dihuli dietawo vati: Lombo, vo wakahane Jesu lʼutamba a mpeketanya. Wakahane ndu atshi wa kolo: omotshi lu lunya landi la pami, la ukina lu lunya landi la lomoso. 34Ku Jesu akati ati: Papa, adimanyia, ne dia vo haweyi kene katshawo. Vo wakakahana ahondo andi lu eukelu kʼuwali.23:34 Esam. 22:18. 35Antu wakemala wenda. Ndu embuledi wakosoke; wakati vati: Ndi lakashimbelaka akina, ndi ayashimbeli naka Kristu ka Unyashungu, osonami andi, mbendi! 36Ndu alimbi wakosoke, wakayi le ndi, wakawusha wanu wʼukavi. 37Vo wakati vati: Naka Khumʼekanga kʼasi Juda keye, uyashimbeli. 38Wakafundi ndu efundelu ladiku diandi vati: Khumʼekanga kʼAsi Juda One.

39Omotshi lʼatei wa atshi wa kolo wakahanemi la Jesu lu utamba a mpeketanya, akukanula ati: We aha Kristu? Uyashimbeli, utushimbeli ndu shu! 40Keli ukina akuhangwela, akati ati: We huki Unyashungu woma, ne dia we akanyema pupu? 41Mete, wakasambula dikambu diasu ololo, ne dia shu tambulungula difutu dia etsha asu. Keli unto one, kuntsha nduku dikambu dia kolo. 42Ndi akati ati: Jesu, kumbuho lamʼayuyukuma lu diulelu diaye. 43Ndi akawutela ati: Mete kakutelami nti: Elo, kayuyuyala la mi lu Paradisu.

 

(Mat. 27:45-56; Mak. 15:33-41; Joa. 19:28-30)

44Lamʼakayala unya lʼatei wʼote, udjima akayala lu kete tshe edja ndu lʼeshidi esatu. 45Yanyi kumbale; dihondo23:45 Etum. 26:31-33. dia lʼetemwelo diakate kʼatei. 46Jesu akawelela diui wulu ati: Papa, lambukitsha lumu lami lu anya aye23:46 Esam. 31:5. Lamʼakandati osoku, ndi akakitshiya. 47Lamʼakenyi olombodi wʼalimbi akambu wakatshama, ndi akatumbula Unyashungu; akati ati: Mete, pami kene aki untu ololo! 48Elui tshe wʼantu wakayi dia ndjenda dikambu diako. Lamʼakawenyi akambu wakatshama, vo wakakalula, watayakomola lu tulu. 49Wane wakeyanaka la ndi tshe, ndu amantu wakuyeli uma la Ngalili,23:49 Luk. 8:2-3. wakemala tshalula, wakenyi akambu ako.

 

(Mat. 27:57-61; Mak. 15:42-47; Joa. 19:38-42)

50Nyulungi, untu omotshi, lukumbu landi Josefu, uma lʼArimatiya, usumba wʼasi Juda, aki leko. Ndi aki undaki omotshi, untu ololo ndu uluwanyi. 51Ndi kumbetawo diui diawo ndu akambu wakawatshi. Ndi akalungamelaka diulelu dia Unyashungu. 52Untu ako akatshu le Pilata, akatolomba udu a Jesu. 53Ku ndi akuhanula, akawombe la dihondo dia linene; akatuwetamia lu diumbu diakawatunguna lu dive, diahatakhundama untu. 54Lushi loso, laki lushi la Elongoswelo. Ku lushi lʼekila, mbaki etatelu. 55Amantu wakayi la ndi uma la Ngalili, wakayayakaka lʼokongo. Vo wakenyi diumbu, ndu okone akawetamia udu andi. 56Ku vo wakakalula, wakalongosola diango diʼupumu la biso dia malashi.

 

(Mat. 28:1-10; Mak. 16:1-8; Joa. 20:1-10)

Vo wakumuya lushi lʼekila, uku aki olembe.

LUKA 24

1Keli la kesekese ya lushi la ntundu la lubingu, vo wakayi la diumbu, wakela diango diʼupumu diakawalongosola. 2Vo wakatani dive diakangitwami uma lu diumbu. 3Ku vo wakoto loko, kuntana udu wa Khumadiondjo Jesu. 4Lamʼakawakananaka dia dikambu diako, apami ahendi wakayemala lasuki la wo, wolotshi ahondo wa ngaingai. 5Lamʼakawuki woma, ndu lamʼakawakole dundji utsha la kete, apami wakawambula vati: Okoko wana wayanganyu lasena lʼatei wʼedu? 6Ndi kema lane, keli ndi ambulo. Nyuho okone akandanyutela lamʼakindi la Ngalili, 7ati: Dieli la Onʼa untu dia nkimoma lu anya wʼantu wa kolo, la dia ndjakema lu utamba a mpeketanya, ku ndi ayulo lushi la satu.24:7 Mat. 16:21; 17:22-23; 20:18-19; Mak. 8:31; 9:31; 10:33-34; Luk. 9:22; 18:31-33. 8Vo wakuho aui andi; 9ku wakakalula uma la diumbu; wakatutela ambeki dikumi la otoi ndu akina tshe akambu ako tshe. 10Amantu ako waki Mariya wʼusi Mangadala, la Joana, la Mariya wa nyangu Jakoba ndu amantu akina, waki la wo, wakatutela atumami akambu ako. 11Aui ako, waki uku aui wa utata lu ashu awo; vo kumbetawo. 1224:12 nfundamaka paka la tshina dia page, aha lʼatei, lu abuku amotshi. Keli Petero akemala, akalawo utsha la diumbu. Ndi akanyama, akalingela, akenyi ahondo wa linene atu. Ku ndi akakalula utsha lakandi, atambi dia dikambu diakayala so.

 

(Mak. 16:12-13)

13Nyulungi, lushi lako ahendi uma lʼului awo wakatatshokaka utsha lu ngelu, ketawo vati: Emayo, kaki stade akumi asamalu uma la Jerusalema. 14Vo wakatasawulaka dia akambu aso tshe wakatshama. 15Lamʼakawatasawulaka, ndu lamʼakawatambwanaka, Jesu ndame akayi lasuki la wo, akatshu kame la wo. 16Keli ashu awo wakashimbama dia vo mbeya. 17Ndi akawambula ati: Aui akona watanyasawula lamʼatanyakendakenda? Vo wakemala ki, waki la dundji dia lunyangu. 18Omotshi, lukumbu landi Keleopa, akûkaluya diui ati: We untu luhangi la Jerusalema, ku heyi akambu wambuyala leko nshi nye? 19Ndi akawambula ati: Akambu akona aso? Vo wakawutela vati: Lu dikambu dia Jesu yʼusi Nazareta, laki umvutshi a wulu lu etsha andi ndu lʼaui andi, la ntundu ka Unyashungu ndu kʼantu tshe. 20Okone elombedi a waki la embuledi asu wakukimo dia mbamia dia ndi mvo, ku wakudiaki lʼutamba a mpeketanya. 21Keli shu takalungamela shati: Ndi kayutshungula Isariyele. Ee, ladiku diʼaui aso tshe, elo keli lushi la satu lʼokongo wʼakambu aso. 22Ntu amantu amotshi lʼului asu wakakumi kʼolomo la diumbu, wakatukashimudi. 23Lamʼakiwo kuntana udu andi, vo wakakaludi, wakatshi vati: Takenyi enelo kʼandjelo watutela vati: Ndi eko la lumu. 24Ku amotshi waki la su, wakatshwi la diumbu, wakatanyi dikambu uku akatshi amantu. Keli vo kumbena. 25Ndi akawatela ati: Nyu akanga a dinginya, nyu nyatutshi mbatshimbaka lʼetema dia mbetawo aui tshe wakati amvutshi! 26Undi, taki ololo Kristu nsuwa lu akambu aso, la mboto lu lutumbu landi? 27Ku ndi akatatela uma le Mose, la uma le amvutshi tshe, akamanya akambu andi fundu lu afundelu tshe.

28Ku vo wakasukana utsha la ngelu kakawatatshokaka. Ndi akayangi mbalekana. 29Ku vo wakosengasenga wulu vati: Uhangi la su, ne dia aya dikolo, unya ambeta. Ku ndi akoto, akahangi la wo. 30Lamʼakandadjase la wo ale ma, ndi akose ukama a ma, akotshokola. Ndi akawatula, akawasha. 31Ku ashu awo wakadihwama, wakaweyi. Ku ndi akasango uma lu ashu awo. 32Vo wakambwana vati: Undi, etema asu kompeta lamʼakandateketaki la su lu mbuka, ndu lamʼakandatumanyaki afundelu fundu? 33Vo wakunela lu unya ako, wakakalula uya la Jerusalema. Ku vo wakatani dikumi la otoi wusanganyimi kame, ndu akina waki la wo. 34Vo wakati vati: Mete, Khumadiondjo ambulo, ndi akene le Simona. 35Ku vo wakasanya akambu wakayala lu mbuka, ndu uku akandeyama le wo lamʼakandatula ma.

 

(Mat. 28:16-20; Mak. 16:14-18; Joa. 20:19-23)

36Lamʼakawateketaka akambu aso, ndame akemala lʼatei awo; akawatela ati: Ki kayaii la nyu! 37Keli vo wakuki w oma a mamba, wakakani vati: Tambena edimu. 38Ku ndi akawambula ati: Okoko wana wadidimanyu? Dikambu kuna diambuyala ekandukandi lʼetema anyu? 39Nyendi anya ami la ekulu ami, nyeyi nyati: Dime. Nyumunandi, nyeyi, ne dia edimu aha la emunyi la weka uku amenanyu la wo. 24:39 “24:40” nfundamaka paka la tshina dia page, aha lʼatei, lu abuku amotshi. 40Lamʼakandati osoku, ndi akawaenya anya andi la ekulu andi. 41Lamʼakiwo kumbetawo ne dia ongenongeno, lamʼakawambaka, ndi akawambula ati: Nyu la engo ka nde lane? 42Ku vo wakawushu etshi ka lusi la lufumba. 43Ndi akalose, akali la ntundu kawo.

 

44Jesu akawatela ati: Lamʼakimi la nyu, dimi lakanyutela aui ane nti: Dieli la akambu tshe wakafundama lu dikambu diami lu elembe a Mose, ndu lu aui wʼamvutshi ndu lu esambu wa Davidi nshidiyama. 45Jesu akadihula etema awo, dia vo mana afundelu fundu. 46Ku ndi akawatela ati: Ambufundama ati: Dieli la Kristu dia nsuwa, la dia ndi mbulo uma lu nyoi lushi la satu; 47la dia nsambisha wedja tshe dikambu dia ekadimwelu kʼetema la edimanyelu ka kolo lu lukumbu landi, atateli uma la Jerusalema. 48Nyu nyeli emenyi wʼakambu ane. 49Nyulungi, dimi lambunyutumela daka dia Papa.24:49 Etsh. 1:4. Keli nyutshikali lʼusumba, edja ndu lamʼayunyuludiama la wulu uma lʼulungu.

 

(Mak. 16:19-20)

50Jesu akalombola edja ndu lamʼakawakumi lu welelo wa Betaniya. Ku ndi akeme anya andi, akatshokola. 51Lamʼakandatshokolaka, ndi akamamitona la wo, akembama lʼulungu.24:51 Etsh. 1:9-11. 52Vo wakotemola, wakakalula la Jerusalema la ongenongeno a wuki. 53Vo waka alaka lʼetemwelo nshi tshe, wandula Unyashuneu.